>Mar Mar Aye – 258

December 29, 2008

>

ပြောပြစရာတွေလည်း တပုံကြီးရှိသေးတယ် (၂၅၈)
စာရဲ့လေးနက်မှု
မာမာအေး
ဒီဇင်ဘာ ၂၉၊ ၂၀၀၈

သောတရှင်များ ကျန်းမာတော်မူကြပါစရှင်- မာအေးချစ်တဲ့ သောတရှင်တွေ ဂီတ၀ါသနာရှင်တွေအားလုံး မာအေးရဲ့ အသံလေး ကြားရတဲ့အခါမှာ ကိုယ်ရောစိတ်ပါ ချမ်းသာကြပါစေလို့ ဆုမွန်ကောင်း တောင်းလိုက်ပါတယ်။

သောတရှင်တို့ရေ၊ ရှေ့တပတ်မှာတုန်းက အဆိုသင်ပေးချင်တဲ့ မာအေး လက်ကွက် အရင်ပေးဖြစ်သွားတယ်လို့ ပြောခဲ့ပါတယ်။ အရိုးကို အရွက်ဖုံးလို့ ကိုယ့်မြန်မာဂီတ စုန်းစုန်းမမြုပ်ခင် မီချင်တဲ့နေရာကနေပြီး မီနိုင်သမျှ လက်တကမ်းစာလေးပဲဖြစ်ဖြစ်၊ နုသစ်သူတို့လက်ထဲ ဆက်လက် မြဲခိုင် တပိုင်တနိုင်သော ဂီတ ပျိုးချကြည့်တဲ့ သဘောပေါ့ရှင်။

မာအေးရဲ့ ချစ်သူ ခင်သူတွေ သောတရှင်တွေ အားလုံးနဲ့ ဝေးနေရတာကလည်း ဆယ်စုကာလ စွန်းခဲ့မှပဲကိုး။ “ဒီနိုင်ငံမှာ ကိုယ့်အကျိုးလည်းရှိ၊ ဂီတအကျိုးလည်းရှိ၊ တိုင်းပြည်လည်း အကျိုးရှိစေမယ့် ရိုးရာဂီတ မှတ်တမ်းတွေ လုပ်ခဲ့ပါလား၊ အဲဒီဂီတ မှတ်တမ်းအတွက် စိတ်ဝင်စားစွာ ထောက်ပံ့ပေးမယ့် မြန်မာချစ်သူ လူတချို့ ရှိလို့ပါ။ ကျနော်တို့လည်း ၀ိုင်းကူပေးမှာပေါ့။ ၁ နှစ် ၂ နှစ်လောက် အချိန်ပေးနိုင်ရင် ဖြစ်ပါတယ်” လို့ မြန်မာကျောင်းဆရာကြီးတဦးက မြန်မာစကား ပီပီသသကြီး မာအေးကို ဖုန်းနဲ့ လိုက်ရှာပြီး ပြောခဲ့တာကို ယုံစားမိလို့ စောင့်စားမိလို့ အနေကြာသွားပါကြောင်း ပြောခဲ့ဖူးပါတယ်။ ခုတော့ အဲဒီစောင့်မိခဲ့တာကြီးကြောင့် ဘ၀တဆစ်ချိုး ထပ်ပိုးလာတဲ့ အပြောင်းအလွဲ ကံကြမ္မာမွဲဖို့ ကံဖန်လာတာလို့ ထားလိုက်ပါပြီလေ။ ဂီတမှတ်တမ်းမှတ်ရာတွေ သူတို့ လုပ်ပေးမှလား လို့ စိတ်မလျှော့ခဲ့ပါဘူး။

မနှစ်က နယူးယောက်မှာ မာအေးနှလုံးကိုခွဲစိတ် ကုသပေးခဲ့တဲ့ ဆရာဝန်တစုက ပြန်ခါနီး နှုတ်ဆက်ကြတော့ ပြောပါတယ် ‘မင်း နောက်ထပ် ပြန်လာစရာ မလိုတော့ဘူး မာမာ၊ မင်းကို နှလုံးအသစ်နဲ့ လူသစ်ဖြစ်အောင် တို့လုပ်ပေးလိုက်ပြီ’ တဲ့၊ သူတို့တတွေရဲ့ အောင်မြင်မှုအတွက် ၀မ်းသာ ပီတိဖြစ်တဲ့ အပြုံးတွေနဲ့ပေါ့။ ကိုယ်လည်း ပြုံးတော့ ပြုံးလိုက်မိတာပါပဲ။ ကိုယ့်ရင်ထဲမှာ သူ့ပစ္စည်းနဲ့သူ မဟုတ်တော့ပါလား လို့လည်း အသိမှာပေါ်တော့ နောက်ဆုံးခရီးတာ ပိုနီးလာတယ်လို့ ခံစားမိတာပေါ့ရှင်။ ဟိုးတုန်းကလောက် အချိန်မရှိတော့ဘူး၊ အားသွန်ခွန်စိုက် လုပ်နိုင်မယ့် လုပ်အားကရော ကိုယ်ရည်မှန်းထားတာတွေ ဘယ်လောက် လုပ်နိုင်မလဲပေါ့။ တယောက်တည်းတော့ နိုင်ပုံမပေါက်တော့ဘူးဆိုတာ သိနေပြီပဲ။ ကိုယ့်နိုင်ငံသား အများစုအားနဲ့ ပေါင်းပြီး ကျိုးစားရမယ်လို့ ဆုံးဖြတ်ပြီး ‘မာမာအေးဖောင်ဒေးရှင်း’ တည်ထောင်ဖို့ရာ ဆန်ဖရန်စစ္စကိုမှာ ရန်ပုံငွေပွဲ ကျင်းပ ခြေတလှမ်းစလိုက်ပါတယ်။

– မာအေးရဲ့ သီချင်းတွေ၊ ရေးခဲ့တဲ့စာတွေ ကဗျာတွေ ဆောင်းပါးတွေ၊ အသံလွှင့်ခဲ့တဲ့ ဟောပြောချက်တွေ အားလုံးကို စုဆောင်း သိမ်းဆည်း ထိန်းသိမ်းမယ်။
– မြန်မာ့ယဉ်ကျေးမှု ဆိုမှု တီးမှု ကခုန်မှုတွေ သင်ကြားပေးမယ်။
– မဟာဂီတ၀င် အခြေခံကြိုးသီချင်းများအတွက် ဆိုနည်းစနစ် ပြုစု ထုတ်လုပ်မယ်။
– ပြည်တွင်းပြည်ပက မြန်မာဂီတပညာရှင်တွေကို ကူညီပံ့ပိုးမယ်။
– ဂီတရေးရာ ဆွေးနွေးပွဲများ၊ စင်တင်ဖျော်ဖြေပွဲများ ပြုလုပ်မယ်။
– ဂီတ၀ါသနာရှင်များအတွက် စာဖတ်ခန်းနဲ့ မြန်မာစာ၊ မြန်မာစကား သင်ကြားပေးမယ် လို့ ရည်ရွယ်ထားပါတယ်။

ဂီတ၀ါသနာရှင်တွေကို မြန်မာစာ မြန်မာစကား သင်ပေးမယ် ဆိုတာ ကြားရတော့ ပြုံးချင်ချင် ဖြစ်သွားကြမလား မဆိုနိုင်ဘူး။ ဒီမှာဘက်က တချို့တလေ စတ်မတာ စာမတတ်ကြဘူး ရှင်တို့ရဲ့။ စကားမပြောတတ်တာတွေလည်း ကိုယ့်လူမျိုးထဲရှိပါ့။ ဒါကြောင့် သီချင်းဆိုချင်ရင် စာနဲ့စကား အရင်သင်မှဖြစ်မယ်၊ စာတတ်မှ သီချင်းက ဘာအဓိပ္ပာယ်လဲ လို့ သိမှာ မဟုတ်လား။ စာရဲ့လေးနက်မှုရှိပုံကို ပြောရအောင် သီချင်းလေးတပိုဒ် နားထောင်လိုက်ပါဦး။

ဆည်မြောင်းချောင်းကန် ပြည့်လျှံတိုးအောင် မိုးလုံးမည်းမျှ မရွာစေချင်ပါပေ xx ဆည်မြောင်းချောင်းကန် အသင့်အမှန်ဖြိုးရန် ပုလဲလုံးရွဲအလှ ရွာစေချင်ပါပေ xx တို့ပြည်သည်ကား ဆန်စပါးအသက်ပေ၊ (တို့မြေဆီကား) တို့ပြည်သည်ကား ဆန်စကားအခက်ဝေ၊ မက်မပြေနိုင်သော လယ်တောယာမြေ၊ ထွန်ယက်ပြုစု ယုယအမြဲလေ (အမြဲတစေ) တိမ်တမန် အို အဆွေ၊ တို့များရွှင်လန်း ပုလဲပန်းကိုချွေ။ xx (တိတ်တမန်မှ – စိုးစန္ဒာထွန်း)

ဒီသီချင်းသားလေးကိုတော့ ချစ်ဆွေတို့ ကြားဖူးနေကြမှာပါ။ တိမ်တမန် ဆိုတဲ့ သီချင်းထဲကပါပဲ။ ရေးတဲ့ ဂီတစာဆိုကတော့ ‘မောင်မောင်လတ်’ တဲ့ရှင့်။ ‘နောင်’ ဆိုတဲ့ ကလောင်နာမည်နဲ့ ကဗျာလောကမှာလည်း ထင်ရှားတဲ့သူဖြစ်ပါတယ်။

တိန်တမန်သီချင်းဟာ အဆိုတော်ကြီးမေလှမြိုင် ဓာတ်ပြားသွင်းဖို့ ရေးပေးခဲ့တာပါရှင်။ ဓာတ်ပြား မထုတ်ဖြစ်တဲ့အခါ တီးခတ်ပေးခဲ့ရတဲ့ စန္ဒယားလှထွတ်က သီချင်းကောင်းလေးမို့ နှမြောတသ အသံယူလွှင့်ခဲ့တာနဲ့ ကျော်ကြားတဲ့ တေးတပုဒ် ဖြစ်လာတာပါပဲ။

အကိုမောင်မောင်လတ် ရေးတဲ့ ‘တိမ်မည်းညိုရိပ်တွေ ကုန်သည်လေ’ ဆိုတဲ့ စာကို ‘တိမ်မည်းညိုရိပ်တွေ တောင်ပြန်လေ’ လို့တော့ ပြောင်းပေးခဲ့ရပါသတဲ့။ ‘ကုန်သည်လေ’ ဆိုတာ Trade Wind ကို ပြောမှန်း စာစစ်တဲ့သူက မသိဘူး ဆိုပဲ။ မူလတန်း ပထ၀ီ မကြေလို့ ထင်ပါရဲ့။ မာအေးလည်း ‘တိမ်တမန်’ ဆိုတဲ့သူတွေထဲမှာ ပါပါတယ်။ ‘မိုးပုလဲနဲ့ တိမ်မည်းညို’ ဇာတ်ကားအတွက် မဉ္ဇူရုပ်ရှင်ကို အသံသွင်းပေးခဲ့တာပါ။ ဒီကနေ့ ဆိုတဲ့သူက ‘တို့ပြည်သည်ကား ဆန်စပါး အသက်ပေ၊ တို့ပြည်သည်ကား ဆန်စပါး အခက်ဝေ’ လို့ ဆိုသွားတာကို ကြားလိုက်လို့ပါ။ တကယ်တော့ ‘တို့ပြည်သည်ကား ဆန်စပါး အသက်ပေ’ အဲဒါ မှန်ပါတယ်။ မာအေးတို့နိုင်ငံက စိုက်ပျိုးရေး အဓိကဟာ စပါးလို့ ပြောတာပါ။

နောက်စာတကြောင်းက ‘တို့မြေဆီကား ဆန်စပါး အခက်ဝေ’ လို့ ဆိုမှ တို့နိုင်ငံရဲ့ မြေဆီမြေနှစ်ဟာ ဆန်စပါး အပင်ရဲ့ အခက်အလက်တွေကို ဖွံ့ထွားအောင်မြင်စေတယ် ဆိုတဲ့ မူရင်းအဓိပ္ပာယ်ကို ဖြစ်စေမှာမို့ သီချင်းစာ အမှန် ဆိုရအောင် ပြောပေးလိုက်ပါတယ်ရှင်။ ။

[ မူရင်း – ဘီဘီစီ၊ မြန်မာဌာန ]


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:Uncategorized

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ

By

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ (မိုးမခ) နိုဝင်ဘာ ၁၄၊ ၂၀၁၈ မိုးမခစာပေက ထုတ်ဝေပြီး...

Read more »

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ

By

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ (မိုးမခစာအုပ်စင်) အောက်တိုဘာ ၁၈၊ ၂၀၁၈...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)