>treasure of my life, poems from my heart – 26

August 1, 2011

>

ဘ၀ထဲက ရတနာ၊ ရင်ထဲက ကဗျာ (၂၆)
တင်မိုး
သြဂုတ် ၁၊ ၂၀၁၁


၁။
မေရီလင်းပြည်နယ်မှာ အကြမ်းဖက်သေနတ်သမား သောင်းကျန်းနေတယ်။ ကိုယ်ပျောက် သေနတ်သမားမို့ ရဲတွေ မြင်နိုင်စွမ်းမရှိ။ အလစ်မှာ သေနတ်စွမ်းပြပြန်ပြီ။ ဟော … တယောက်၊ ဟော … တယောက်။

သေနတ်သမားကိုမုန်းမိတယ်။ အပြစ်မဲ့သူတွေကို ဇီဝိန်ခြွေပြီး လူတွေချောက်ချားအောင် ဖန်တီးနေတယ်။ အပြစ်မဲ့လူသားတွေကို ဓားစာခံထားပြီး နိုင်ငံရေးကစားနေတာဖြစ်မယ်။ သူရဲဘောကြောင်လိုက်တဲ့ လုပ်ရပ်။ ဒီလို ခိုးကြောင်ခိုးဝှက် သေနတ်စွမ်းပြနေတာကို အဟုတ်ကြီးမှတ်ပြီး လူတွေအထိတ်တလန့် နေရတဲ့ဘ၀ကို အရသာခံနေဟန်တူပါရဲ့။ ဖြစ်မှဖြစ်ရပလေ။
ရဲတွေကတော့ ရုပ်ရှင်ထဲကအတိုင်းပါပဲ။ လူဆိုးတွေ မရှိတော့ဘူးဆိုရင် သူတုိ့ရောက်လာကြစမြဲ။ နိုင်ငံတကာရဲတွေလဲ မြန်မာရဲနဲ့အတူတူပါလား။ မရိုးနိုင်တဲ့ ရဲစရိုက်ပါ။


သေနတ်သမား။ သေနတ်ရှိရုံနဲ့ အဓမ္မမှုတွေကျူးလွန်ဖို့ လိုင်စင်ရထားပြီးပြီ။ အဓမ္မမှုကိုကာကွယ်နိုင်၊ ဟန့်တားနိုင်စွမ်းရှိပါလျက် အဓမ္မမှုကို မျက်နှာပြောင်ပြောင် ကျူးလွန်လေ့ရှိတယ်။ သွေးမြောက်တော့ ခွေးလောက်မှ အဖိုးမတန်တော့။

လက်နက်ကိုင်တွေရဲ့ဂုဏ်ရည်ဟာ အဓမ္မမှုကို ကျူးလွန်ရဲတဲ့ ဂုဏ်ရည်လား။ ရှက်ဖွယ် ရှက်ဖွယ်။ သေနတ်အားကိုး၊ လက်နက်အားကိုးနဲ့ ပြည်သူတွေကို ဓားမိုးချင်တယ်။ အနိုင်ကျင့်ချင်တယ်။ လူယုတ်မာသခင်က ခိုင်းရင်ခိုင်းသမျှ လုပ်ချင်တယ်။ ရွံရှာစက်ဆုပ်စရာ ၀ိဘစ္ဆရသ။

သေနတ်သမား၊ လက်နက်သမားတွေမှာ ကိုယ်ကျိုးမှတပါး ဘာကိုမှမစဉ်းစား။ ကိုယ်ကျိုးရမယ်ဆိုရင် ဘနဖူး သိုက်တူးမဲ့လူစား။ ကြေးစားစိတ်ဓာတ်ပါကလား။

(၂)
ငါက
သေနတ်ကို မကိုးကွယ်။
အတတ်ကို ကိုးကွယ်တယ်။
အာဏာကို မကိုးကွယ်
ပညာကို ကိုးကွယ်တယ် …။

ဒီလို တချိန်က ကဗျာဖွဲ့ခဲ့ဖူးပါတယ်။ မြန်မာနိုင်ငံမှာ ၁၉၆၂ ခုနှစ်ကစပြီး သေနတ်သမားတွေ ကြီးစိုးလာခဲ့တယ်။ ပြည်သူလူထုက ရွေးကောက် တင်မြှောက်လိုက်တဲ့ အစိုးရကို သေနတ်အားကိုးနဲ့ အနိုင်ကျင့်ပြီး နိုင်ငံ့အာဏာကို လုယူလိုက်တယ်။ ရာဇ၀င်ရိုင်းပါပေ့။

၁၉၉၀ မှာ လူထုရွေးကောက်ပွဲလုပ်တော့ ပြည်သူလူထုက ခမောက်အဖွဲ့ကို တခဲတနက် မဲပေးပြီး ရွေးလိုက်ကြပြန်တယ်။ လက်နက်ကိုင်စစ်တပ်က အဓမ္မအနိုင်ကျင့်ပြီး အာဏာမလွှဲ။ အာဏာမအပ်။ မျက်နှာပြောင်တိုက်ပြီး ပြည်သူ့ဆန္ဒကို မုဒိမ်းကျင့်ကြပြန်တယ်။ အခုထက်ထိ။ ရာဇ၀င်ရိုင်းပါပေ့။

ကျွန်တော်တို့ရဲ့လူထုဟာ အစော်ကားခံရတဲ့ လူထု။ အနိုင်ကျင့်ခံရတဲ့ လူထု။ ကိုယ့်ဆန္ဒကို ထုတ်ဖော်ခွင့်မရတဲ့ လူထု။ ဘယ်လောက်ရင်နာဖွယ်ကောင်းသလဲ။

ကျွန်တော်တုိ့ရဲ့သမိုင်းစာမျက်နှာတွေဟာ ညစ်ပတ်ပေကျံနေတဲ့ စာမျက်နှာတွေဖြစ်တယ်။ ၁၉၆၂ ခုမှ ယခု ၂၀၀၂ ခုနှစ်အထိ သေနတ်သမား စစ်ဗိုလ်ကြီးတွေ၊ စစ်ဘုရင်တွေ ဗိုလ်ကျ စိုးမိုးနေတဲ့ တိုင်းပြည် ဖြစ်တယ်။ နှစ်ပေါင်း (၄၀) ရှိခဲ့ပြီ။ နစ်နာလိုက်တာကွယ်။ သမိုင်းမှာ မျက်နှာ မပြနိုင်လောက်အောင် ရှက်စရာကောင်းလှချည့်။

(၃)
“တရားမဲ့စွာ တာတေလန်တဲ့
သနားမငဲ့ညှာ ဗမာတွေနှံခဲ့တဲ့
မဟာရွှေဂျပန် စောက်ကျင့်ဆိုးတွေကြောင့်”

အဲသလို ဆရာကြီးသခင်ကိုယ်တော်မှိုင်းရဲ့ ကလောင်ဖျားက ဖက်ဆစ်ဂျပန်တွေရဲ့ အမူအရာတွေကို ခါးခါးသီးသီး ကဗျာဖွဲ့ခဲ့ဖူးတယ်။

အောက်တိုဘာ (၁၀) ရက်နေ့က မြန်မာပန်းချီဆရာ၊ စာရေးဆရာ၊ ရုပ်ရှင်ဒါရိုက်တာကြီး ဦးဝင်းဖေနဲ့အတူ ကျွန်တော်လဲ ၀ါရှင်တန်က ဂျပန်နိုင်ငံရောက်လာတယ်။ ဂျပန်ရောက် မြန်မာမိသားစုတွေ တည်ထောင်ထားကြတဲ့ “အာဟာရစာကြည့်တိုက်” က ကြီးမှူးကျင်းပတဲ့ စာပေဟောပြောပွဲအတွက်ပါ။

ပြုံးရွှင်ဖော်ရွေတဲ့၊ ချိုသာတဲ့၊ လှိုက်လှဲပျူငှာတဲ့မေတ္တာနဲ့ မြန်မာစာပေချစ်သူတို့က နာရိတာလေဆိပ်က ဆီးကြိုကြတယ်။ နွေးထွေးပါဘိ။ ဆွေမျိုးသားချင်း အငွေ့အသက်က ချမ်းမြေ့ပါဘိ။

တိုကျိုမှာ မြန်မာမိသားစုတွေ သောင်းနဲ့ချီပြီး ရှိကြသတဲ့။ မြန်မာစားသောက်ဆိုင်တွေလဲ အတော်များများ ရှိကြပြီ … တဲ့။ မြန်မာကာရာအိုကေသီချင်းဆိုတဲ့ ခန်းမတွေနဲ့ ပျော်စရာပါပဲ … တဲ့။

သူတို့တတွေဟာ ရောက်ရာနေရာမှာ ကိုယ့်နိုင်ငံ၊ ကိုယ့်လူမျိုး၊ ကိုယ့်စာပေ၊ ကိုယ့်ဘာသာတရားကို တလေးတစားရှိကြတယ်။ ကိုယ့်ယဉ်ကျေးမှုကို ပြုစုပျိုးထောင်ကြတယ်။

တပင်တပန်းလုပ်ကိုင်ပြီးရခဲ့တဲ့ ချွေးနဲစာကလေးတွေစုဆောင်းပြီး မြန်မာစာကြည့်တိုက် တည်ထောင်ကြတယ်။ သူတို့စေတနာဖြူစင်ပြီး ထက်သန်အားကြီးပုံ ချီးကျူးမကုန်နိုင်စရာ။

သူတို့နေထိုင်ရတာ ဖျာ (၆) ချပ်ခွဲစာ အခန်းကျဉ်းကလေး။ လူ (၄-၅) ယောက်စုပြီး ငှားနေကြရ။ လုပ်ကိုင်ကြရတာကလဲ အိုးတိုက်ပန်းကန်ဆေး။ “အိုက်တိုးပဂေးဆန်” လို့ မြန်မာပီပီ ဟာသနှောပြီး လောကဓံကို အမောခံရင်း ပြောတတ်ပြန်သေးရဲ့။ မိဝေးဖဝေး ဆွေဝေးရပ်ကွာ သူတပါးတိုင်းပြည်မှာ မျက်နှာငယ်ငယ် ၀လုံးကလေး ကလယ်ကလယ်နဲ့ ကျင်လည်ကျက်စားနေကြရင်းက ကိုယ့်ပြည်ကိုလဲ လွမ်းတတ်ကဲ့။ ကိုယ့်စာပေ၊ ကိုယ့်ယဉ်ကျေးမူကိုလဲ ချစ်တတ်တဲ့။ တကယ့်သူတော်ကောင်း မြန်မာ ကလေးတွေပါလား။

ကိုယ့်မိခင်နိုင်ငံက “ကပ်ကျန်မွဲတေ ဖွတ်ဘိုးအေ” ဖြစ်ပြီး ချွတ်ခြုံကျလေတော့ ပွဲစားအမျိုးမျိုးအားကိုးပြီး သိန်းရှစ်ဆယ် ကိုးဆယ် အရင်းပြုပြီးလာခဲ့ရပေမဲ့ ဂျပန်မှာကျတော့ နေရထိုင်ရမသက်သာ “အိုဗာစတေး” ခေါ်တဲ့ ၀လုံးဘ၀။

ကိုယ့်တိုင်းပြည်ကလဲ ဖခင်ရင်းမဟုတ်။ စစ်သားပထွေးမို့ ချစ်အားဝေးကြရရှာတယ်။ အားကိုးရာမဲ့၊ ခိုလှုံရာမဲ့ နေခဲ့ကြရတယ်။ ရင်နာဖွယ်ကောင်းလေစွ။ ကိုယ့်နိုင်ငံကလဲ ကိုယ့်ကိုမကယ်နိုင်။ မကယ်နိုင်ရုံ မက လည်မျိုညှစ်ချင်သေးရဲ့။ ဖြစ်ရပုံများ …။ သဘောဖြူအူစင်းပြီး အရင်းခံစေတနာကောင်းကြရှာတဲ့ တို့နိုင်ငံသားတွေရဲ့ ကံကြမ္မာကို ရင်နာနာနဲ့ တွေးမိပါတယ်။

(၄)
ကုန်းဘောင်ခေတ်မှာ မြန်မာနိုင်ငံဟာ ပဒေသရာဇ်အိပ်မက်က နိုးထဖို့ကြိုးစားခဲ့ကြတယ်။ ဂျပန်မှာလဲ မေဂျီဘုရင်လက်ထက် ခေတ်သစ်အိပ်မက်မက်ခဲ့တယ်။ ကနောင်မင်းသား၊ ယောမင်းကြီး စတဲ့ အင်အားစု ခေတ်မီမှု ကြိုးစားခဲ့ကြတဲ့အချိန်ပေါ့။

“ကုန်းဘောင်ခေတ်မှ၊ ပြိုင်တူထလဲ
အထနှေးနှေး၊ အိပ်ရေးမ၀
သူကတမျိုး၊ ငါတမျိုး
အနိုးမတတ်၊ ထမင်းငတ်
မတ်တပ်ရပ်လို့ လမ်းမှာငို
ရွှေဘို နေညိုတော့
မြေမျိုခံရ မြန်မာ့ဘ၀ကြမ္မာကံ”

ဂျပန်နဲ့မြန်မာ အခုတော့ ကွာချင်တိုင်းကွာပြီမဟုတ်လား။ “သခင်မျိုးဟေ့” လို့ တရေးနိုးထအော်ခဲ့ပေမဲ့ အော်ရင်းဟစ်၊ လှော်ရင်းနစ်ခဲ့ရပြီ မဟုတ်လား။

“ရာစုသစ်မှာ ဘာပြုလို့နစ်ရမလဲ” လို့ အားခဲနိုင်မှ တန်ကာကျတော့မယ်။
သတိရနိုးထကြစေသတည်း။ ။

ခေတ်ပြိုင်ဂျာနယ် အတွဲ (၁၁၄)၊ နိုဝင်ဘာ ၂၀၀၂



သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:Uncategorized

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ဒေါ်ခင်မျိူးချစ်၏ သတင်းစာလောက ထွက်ပါပြီ

By

ဒေါ်ခင်မျိူးချစ်၏ သတင်းစာလောက ထွက်ပါပြီ (မိုးမခ) သြဂုတ် ၂၄၊ ၂၀၁၈ စာရေးဆရာမကြီး ဒေါ်ခင်မျိူးချစ်...

Read more »

ဂီတအနုပညာရှင်ကြီး မာမာအေး စိန်ရတုမွေးနေ့ အမှတ်တရ မိုးမခစာအုပ်ထုတ်

By

ဂီတအနုပညာရှင်ကြီး မာမာအေး စိန်ရတုမွေးနေ့ အမှတ်တရ မိုးမခစာအုပ်ထုတ် (မိုးမခစာအုပ်စင်) သြဂုတ် ၁၇၊ ၂၀၁၈...

Read more »

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ

By

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ (မိုးမခ)...

Read more »

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်