fbpx

>Than Win Hlaing – Journal Gyaw Ma Ma Lay

December 6, 2011

>

ဂျာနယ်ကျော်မမလေး၏ ဘ၀နှင့် စာပေလက်ရာများ – အပိုင်း (၁)
သန်းဝင်းလှိုင်
ဒီဇင်ဘာ ၆၊ ၂၀၁၁


ဂျာနယ်ကျော်မမလေးသည် ရသစာပေရေးသားသော စာရေးဆရာမကြီးဖြစ်၍ အရေးအသားလှပခြင်း၊ ကြည်လင်ခြင်း၊ မိမိခံစားမှုကို ပေါ်လွင်အောင် ရသဖြင့်ဖော်ပြနိုင်ခြင်းတို့အတွက် သူ့စာပေကို လူတိုင်းမြတ်နိုးကြသည်။ သူ့တွင် ထက်မြက်သောနိုင်ငံရေးအမြင်ရှိသည်။ ဘိုကလေးမြို့၊ တို့ဗမာအစည်းအရုံး၏ အတွင်းရေးမှူးနှင့် တက်ခေတ်အမျိုးသမီးဥက္ကဌပီပီ မြစ်ဝကျွန်းပေါ်တလျှောက် အရင်းရှင်သွေး စုပ်မှု များအကြောင်း ဟောပြောခဲ့သူဖြစ်သည်။ အမျိုးသမီးနိုင်ငံရေးလှုပ်ရှားမှုသမိုင်းး၌ သခင်မဒေါ်တင်လှို၏ ဟောပြောချက်များမှာ တစ်ချိန်က အာဏာပိုင်တို့ စောင့်ကြည့်နားထောင်ရသည်အထိ ဖြစ်သည်။

သူ့ဘ၀အကြောင်းနှင့် သူ့ပတ်ဝန်းကျင်သာမက အမျိုးသမီးများ၏အိမ်ထောင်ရေး၊ ကိုယ်လက်ကြံ့ခိုင်ရေး၊ အမျိုးသားများ၏ အထင်သေး မှုများ၊ ဆင်းရဲသားလက်သုပ်သည်၊ အိမ်စေမလေး၊ တောင်သူလယ်သမားသရုပ်ဖော်၊ ထီစာရေးမလေးများ၊ မုဆိုးမဘ၀၏သိမ်ငယ်ပုံ၊ သူပုန် များအား အလင်းဝင်ရန်တိုက်တွန်းချက်၊ ပြည်ထောင်စုနေ့အတွေ့အကြုံဆောင်းပါးများအပြင် တိုင်းရင်းမြန်မာဆေးပညာပေး ထက်မြက် ပုံဆောင်းပါးများကိုလည်း ရေးသားပြုစုခဲ့သူ ဖြစ်သည်။

သူ၏ ကလောင်အမည်ခွဲများမှာ ‘ဘိုကလေး မတင်လှိုင်’၊ ‘လှတခိုင်’ ၊ ‘ရဝေလှိုင်’ နှင့် ‘ဂျာနယ်ကျော် မမလေး’ တို့ဖြစ်သည်။

သူစာပေလောက ရောက်ရှိလာပုံမှာလည်း ထူးဆန်းသည်ဟု ဆိုရပေမည်။ အမျိုးသမီးများကြက်တောင်ရိုက်သည်ကို အမြင်ကပ်နေသော အမျိုးသမီးတစ်စု၏ ‘ပစ်စာ’ ပစ်၍ ပြက်ရယ်ပြုသည့်အတွက် မိမိကပြန်လည်ဆောင်းပါးရေးသားခဲ့ရာမှ စာပေနယ်ထဲသို့ရောက်ရှိလာသည်။

ဤသည်နှင့်ပတ်သက်၍ ဂျာနယ်ကျော်မမလေးသည် ၁၉၅၇ ခုနှစ်၊ နိုဝင်ဘာလထုတ် ရှုမ၀မဂ္ဂဇင်းတွင် ‘စာပေဆု’ အမည်ဖြင့် ဆောင်းပါး၌ အောက်ပါအတိုင်း ရေးသားဖော်ပြထားသည်။

“… ကျွန်မစာရေးဆရာဖြစ်လာပုံသည် ကိုယ်၌က စာပေ၀ါသနာထုံ၍၊ စာပေနှင့်နီးစပ်၍၊ စာရေးဆရာဖြစ်လိုသောဆန္ဒရှိ၍ စာပေနယ်ထဲ ရောက်ကာ စာရေးဆရာဖြစ်လာရခြင်းမဟုတ်ပေ။ စာပေလောကသို့ရောက်သွားအောင် ကျွန်မကိုတွန်းထိုးပို့လိုက်၍ စာရေးဆရာဖြစ် လာ ရသည်မှာ အမှန်စင်စစ် ‘ပစ်စာ’ ကလေးတစောင်ကြောင့် ဖြစ်လေသည်။ ကျွန်မမှာ ပစ်စာတစောင်ကြောင့် စာရေးဆရာဖြစ်လာရသောကြောင့် ထိုပစ်စာသည် ကျွန်မ၏ဘ၀မှတ်တမ်းတွင် အရေးပါသောစာတစောင်ဖြစ်သည်။

အသက် ၁၈ နှစ်အရွယ်လောက်၌ ဘိုကလေးမြို့တွင် နေထိုင်ခဲ့စဉ် ပစ်စာတစောင်ရလေသည်။ ကျွန်မကို အရပ်က မျက်စိမွေးစူးးလွန်း၍ မျက်မုန်းကျိုးကျိုးဖြင့် ပစ်သောစာလည်းဟုတ်၏။

ကျွန်မအပျိုအရွယ်၌ရခဲ့သော ပစ်စာကား …. “မြို့မျက်နှာဖုံးလူကုံထံ သမီးတစ်ယောက်ဖြစ်လျက်နှင့် မိန်းကလေးဣနြေ္ဒတစ်စက်မှမ ရှိဘဲ ကာလသားကလေးတွေနဲ့တွဲပြီး သွားလာနေရုံမက တစ်ဆင့်တက်ပြီး ခုန်ပေါက်ပျံလွှား ကြက်တောင်ရိုက်ကစားနေတာဟာ မြို့မျက်နှာကို အိုးမည်းသုတ်နေတာနဲ့ အတူတူပဲ။ အပျိုလေး၊ အရွယ်လေး ဣနြေ္ဒမှမထောက်၊ ခုန်လိုက်ပေါက်လိုက်နဲ့ မြို့လယ်ကောင်မှာ ကာလသား တွေနဲ့ကစားနေတာ ရပ်တန်းကရပ်ရင်ရပ်၊ မရပ်ဘဲဆက်ပြီး ညနေတိုင်းကစားနေရင် အမည်နာမနဲ့တကွ မြန်မာ့အလင်းသတင်းစာ မောင်း သတင်းထဲထည့်ပြီး အရှက်ခွဲမယ်။ စောင့်သာကြည့်”
လျှို့ဝှက်သော အမျိုးသမီး ၁၅ ဦးအဖွဲ့

ကျွန်မသည် ကျွန်မ၏အပေါင်းအသင်းသူငယ်ချင်းများဖြစ်သော ရွယ်တူတန်းတူ ယောက်ျားကလေးတစ်စုနှင့် ညနေတိုင်း (ဘက်မင်တန်) ကြက်တောင်ရိုက်ကစားလေသည်။ ထိုကာလ ထိုအချိန်တုန်း၌ ဘိုကလေးမြို့တွင် လူကုံထံ သမီးပျိုကလေးများသည် အိမ်ပြင်ထွက် သော အလေ့မရှိကြပေ။ မိန်းမပျိုကလေးတယောက်တည်း လမ်းပေါ်မှာ မတွေ့ရချေ။ အပျိုကလေးဖြစ်လာလျှင် အိမ်တွင်းအောင်းကြသည်။ ပိုက်ဆံကျိကျိတက်ချမ်းသာ၍ ကြပ်ကြပ်ဂုဏ်ရှိလျှင် မြို့တွင်ပွဲလမ်းသဘင်ရှိမှသာ သမီးပျိုလေးကို ပွဲထုတ်ကြသောအလေ့ရှိ၏။ သမီးပျို၏ ရွှေရုပ်လွှာကို လူတကာမမြင်စေရ။ နေရာတကာမတွေ့စေရ။ အပျိုဈေးကောင်းအောင် အိမ်ပြင်ထုတ်ခြင်းမရှိ။

ထိုခေတ်ကမိန်းမပျိုများမှာ အိမ်တွင်းအောင်းနိုင်မှ အဖိုးတန်ပြီး လင်ကောင်းရသည်။ မြို့အုပ်၊ ၀န်ထောက်၊ အိုင်စီအက်စ် စသောဂုဏ်ပုဒ်တို့နှင့် ပြည့်စုံပြီးသော သားရှင်တို့သည် ဒီစကြိတ်မြို့နယ်များမှ အိမ်တွင်းအောင်းသူဌေးသမီးကလေးတွေကို စနည်းနာ၍ သတင်းနား ထောင်ကာ ပိုက်စိတ်တိုက်ရှာဖွေကြလေသည်။ ပိုက်ဆံချမ်းသာသူ၊ အနေအထိုင်ဗိုင်းကောင်း ကျောက်ဖိ၊ အိမ်ပြင်မထွက်၊ အိမ်တွင်းအောင်းသူစသည့်ဂုဏ်ပုဒ်တို့နှင့် ပြည့်စုံနေလျှင် သားရှင်များဘက်မှ ရာထူးဂုဏ်နှင့် သမီးရှင်ဘက်မှ ငွေနှင့်စပ်လျက် အရောင်းအ၀ယ်တည့်သွားကြလေ သည်။

ယင်းကဲ့သို့အချိန်အခါ၌ ကျွန်မသည် အပျိုကလေးအရွယ် လူမမြင်ချင်အဆုံး လမ်းမ ပေါ်ရောက်နေ၏။ လူတကာမြင်နိုင်သည့်လမ်းပေါ်တွင် ယောက်ျားကလေးများနှင့်တွဲ၍ ခုန်ပေါက်ကစားနေသည်ကို ထိုခေတ်မျက်စိနှင့်လျှင် မျက်စိမွေးစူးချင်စရာပင်တည်း။

မြို့ပေါ်တွင် စာကြည့်တိုက်ထောင်သောကိစ္စ၊ စကားရည်လုပွဲလုပ်သောကိစ္စ၊ ဆွမ်းကြီးလောင်းအသင်းကိစ္စ၊ ပြေးပွဲပြိုင်ပွဲကစားခုန်စားပွဲကိစ္စ၊ လူငယ်များအသင်း၊ နိုင်ငံရေးအသင်း စသော မြို့ရေးရွာရေးအသင်းအပင်း ဝေယျာဝစ္စအတွက် လူစုလူဝေးနှင့် စုဝေးပေါင်းစပ်၍ လုပ် လေသောလုပ်ငန်းတိုင်း ကာလသားတအုပ်ထဲတွင် မိန်းမဆို၍ ကျွန်မတယောက်တည်း အပျိုလေးဖြစ်သည်။

ကျွန်မသည် အသင်းအတွက်၊ မြို့ရေးရွာရေးကိစ္စအတွက် ကာလသားတအုပ်နှင့် တအိမ်တက်ဆင်း ပိုက်ဆံအလှူခံသည်။ တအိမ်တက် ဆင်း စာအုပ်စာတမ်းအလှူခံသည်။

လူတကာမြင်နိုင်သည့်လမ်းပေါ်တွင် ယောက်ျားကလေးတစ်စုနှင့် သွားအတူလာအတူရှိသောကျွန်မကို မျက်မုန်းကျိုးနေကြရာတွင် လမ်း ပေါ်ထွက်၍ ယောက်ျားတစုနှင့် ကြက်တောင်ရိုက်ကစားပြန်ခြင်းကြောင့် ကြည့်မရရှုမရအောင် မျက်စိမွေးစူးလာကြကာ ပစ်စာပစ်ကြခြင်း ဖြစ်လေ၏။

ကျွန်မလက်ထဲရောက်လာသောပစ်စာထဲ၌ ယောက်ျားကလေးတွေနှင့် သွားအတူ လာအတူ တွဲနေခြင်း၊ ကြက်တောင် ၀င်ရိုက်ကစားခြင်း တို့သည် မြို့ပေါ်၌အပြစ်ကြီးတခုကျူးလွန်နေသကဲ့သို့ ဖြစ်နေသည်။ လျှို့ဝှက်သောအမျိုးသမီး ၁၅ ဦးအဖွဲ့သည် ခေတ်နောက်ကျကာ မိန်းမပီပီ အမြင်ကျဉ်းသည်ဟုထင်မိသည်။ ကျွန်မအမြင်၌ ကြက်တောင်ရိုက်ကစားခြင်းသည် မြို့မျက်နှာအိုးမည်းသုတ်ခြင်းဟု ယူဆလက်ခံ နိုင်ခြင်းမရှိ၊ ယောက်ျားကလေးများနှင့် ခင်မင်ခြင်း၊ မိတ်ဆွေဖြစ်ခြင်းသည် ဣနြေ္ဒနှင့်မဆိုင်၊ အပျိုနှင့်မဆိုင်၊ ဣနြေ္ဒမမဲ့၊ အပြစ်မရှိဟု ယုံကြည်၏။

ကျွန်မထံသို့ ရောက်လာသောပစ်စာကို ဘိုကလေးတစ်မြို့လုံးသာမက တစ်နိုင်ငံလုံးသိအောင်ဖော်ပြချုင်မိသည်။ ပစ်စာကိုဖော်ပြလျက် ကျွန်မ၏ အယူအဆ၊ အတွေးအခေါ်၊ အတွေ့အကြုံများကို ပွင့်ပွင့်လင်းလင်းကြီး ရေးသားချေပလိုက်ချင်မိသည်။

၁၅ ဦးအဖွဲ့က သတင်းစာထဲထည့်မည်ဟု ခြိမ်းခြောက်လိုက်သည့်အတိုင်း ကျွန်မ၏ချေပချက်ဆောင်းပါးကို မြန်မာ့အလင်းသတင်းစာ၌ ထည့်ဖြစ်အောင်ထည့်မည်ဟု သန္နိဋ္ဌာန်ချလိုက်လေသည်။ ထို့ကြောင့် ပစ်စာသည် သတင်းစာထဲတွင် ဆောင်းပါးရေးရန် ကျွန်မကို နေ့စဉ် တွန်းထိုးရေးခိုင်းနေတော့သည်။

စာပေနှင့်ပတ်သက်၍ ၀ါသနာထုံသူတို့ကဲ့သို့ ဆောင်းပါးရေးရန် ကဗျာစပ်ရန်စိတ်ကူး တစ်ခါမျှ မပေါ်မိ။ ၀ါသနာလည်းမထုံ။ ကျွန်မမှာ ဆောင်းပါးကို ဘယ်ပုံဘယ်နည်းရေးရမှန်းမသိအောင် ခက်နေလေသည်။ သတင်းစာ၊ ဂျာနယ်၊ မဂ္ဂဇင်းထဲ၌ပါသော ဆောင်ပါးများကို ရေး နည်းရေးဟန် လေ့လာဖတ်ရှုကြည့်သည်။

ကျွန်မမှာ ပစ်စာကို ချေပရေးသားဖို့ရာ အခက်အခဲတွေ့ကြုံနေစဉ် စာရေးကောင်းတယောက်ဖြစ်နိုင်တယ်ဟု ဆရာအားပေးဖူးသော စကား ကိုသတိရကာ အားတက်လာလျှက် ကြိုးစားပမ်းစားရေးသည်။

ကျွန်မ၏ အယူအဆ၊ အတွေးအခေါ်၊ အတွေ့အကြုံများဖြင့် ချေပရေးသားသည်။ ကျွန် မဆောင်းပါးကို အယ်ဒီတာထံပေးသောစာမျိုးဆန်ဆန် ရေးသည်။ ဆောင်းပါးထဲ၌ ပစ်စာကို သူ့အတိုင်းကူးထည့်သည်။

‘အယ်ဒီတာ မြန်မာ့အလင်းသတင်းစာ’ ဟု လိပ်မူတပ်လျက် ဆောင်းပါးပို့လိုက်ပြီး သတင်းစာထဲတွင် ဆောင်းပါးပါမပါ စောင့်ဖတ်နေရာ ငါးလခနဲ့ကြာမြင့်ပြီးနောက် တနေ့ မမျှော်လင့်ဘဲ မြန်မာ့အလင်းဘယ်ဒီတာထံမှ ဆောင်းပါးနှင့်ပတ်သက်၍ ပြန်စာရလေသည်။ “သူလိုလူ’ စာအုပ်အစတွင် ဖော်ပြရေးသားထားခဲ့ဖူးသည့်အတိုင်း ကျွန်မ၏ချေပရေးသားချက်ဆောင်းပါးကို ပယ်ထားသောစာများအကြားမှ သွားတွေ့ ကာ အယူအဆ၊ အရေးသားကို နှစ်သက်သဘောကျသွားလျက် ဆောင်းပါးများရေးပို့ပါရန် ကျွန်မထံသို့ တိုက်တွန်းတောင်းပန်တော့သည်။

ကျွန်မသည် ယင်းပစ်စာကြောင့် သတင်းစာတိုက်နှင့် ဆက်သွယ်သွားမိလျက် ဆောင်းပါးများ အကြိမ်ကြိမ်ရေးပို့ပေးကာ စာပေနယ်ထဲသို့ ရောက်ခဲ့ရသည်။

သို့ကလို ပစ်စာတစ်စောင်ကို အကြောင်းပြု၍ မိမိက ပြန်လှန်ဆောင်းပါးရေးသားခဲ့ရာမှ စာပေနယ်ထဲ့သို့ရောက်ခဲ့ခြင်းဖြစ်ရာ နုနယ်ပျော့ ပျောင်းသော အမျိုးသမီးပင်ဖြစ်လင့်ကစား ကြံ့ခိုင်ထက်မြက်သော စိတ်ထားရှိကြောင်း အကဲခတ်နိုင်ပါသည်။

ဘိုကလေး မတင်လှိုင်ကလောင်အမည်ဖြင့် ၁၉၃၆ ခု မြန်မာ့အလင်းသတင်းစာပါ “အမျိုးသမီးများ ‘ဏာကြီးသတ်’ ဉာဏ်ရှိကြရန်” ဆောင်း ပါးသည် ပထမဆုံးပုံနှိပ်စာမူဖြစ်သည်။

၁၉၄၁ ခု၊ မေလထုတ် ဂျာနယ်ကျော်တွင် ‘မသိရလေခြင်း’ ဟူသောဝတ္ထုကို စတင်ရေးသားခဲ့သည်။

အဆိုပါဝတ္ထုကို မူလက စိတ်ကူးထဲ၌ ဇာတ်လမ်းလည်းမရှိ၊ ၀တ္ထုမရေးဖူးသူအဖို့ ရေးဟန်ရေးနည်းအကျင့်မရှိဘဲ ရေးရန်ရွံ့နေခဲ့သည်။

ရေမကူးတတ်သောသူတယောက်ကို ရေကူးတတ်အောင် မြစ်ထဲကန်ချလိုက်၍ မနစ်အောင် ယက်ကန်ယက်ကန်ကူးရင်ဖြင့် ရေကူးတတ် သွားသူကဲ့သို့ပင် ဂျာနယ်ကျော်အယ်ဒီတာဦးစောဦးက ဂျာနယ်ကျော်တွင် ထည့်သွင်းဖော်ပြရန် အတင်းရေးခိုင်းရာမှ ရေးဖြစ်သွားသော ၀တ္ထုဖြစ် သည်။

ဂျာနယ်ကျော်မမလေးရေးသားခဲ့သော စာနယ်ဇင်းများမှာ မြန်မာ့အလင်းသတင်းစာ၊ ဂျာနယ်ကျော်၊ ရှုမ၀၊ ကမ္ဘာ့ဒိုင်ဂျက်၊ ကလောင်ရှင် ဂျာနယ်၊ ဂန္တ၀င်ဂျာနယ်၊ သွေးသောက်၊ ငွေတာရီ၊ စာပေဂိမန္တစာစောင်၊ စန္ဒာ၊ ဒီမိုကရေစီ ဒေသန္တရဂျာနယ်၊ န၀ဒေး၊ ပေဖူးလွှာ၊ ဖြူနီညိုပြာ၊ မြ၀တီ၊ ရွှေမြို့တော်မဂ္ဂဇင်း၊ ရှုထောင့်ဂျာနယ်တို့ ဖြစ်ကြသည်။

ဂျာနယ်ကျော်မမလေးရေးသားခဲ့သော လုံးချင်းဝတ္ထုများအနက် ‘သူလိုလူ’ ၊ ‘သူလိုမိန်း’၊ ‘မုန်း၍မဟူ’ ၊ ‘ရင်နင့်အောင်မွှေး’၊ ‘ရင်မှတရှိုက်’ နှင့် ‘သွေး’၊ ‘စိတ်’ တို့မှာ ထင်ရှားသည်။

အဆိုပါဝတ္ထုများအနက် ဆရာမကြီး ဂျာနယ်ကျော်မမလေး၏ ‘မုန်း၍မဟူ’ ၀တ္ထုသည် ၁၉၅၅ ခုနှစ်ထုတ် ရှုမ၀မဂ္ဂဇင်းအတွဲ ၈၊ အမှတ် ၉၆ တွင် စတင်ဖော်ပြသောဝတ္ထုဖြစ်သည်။ ရှု မ၀တိုက်မှပင် ပထမဆုံးလုံးချင်းဝတ္ထုအဖြစ် ထုတ်ဝေခဲ့၍ ယနေ့အထိ ၁၂ ကြိမ်အထိ အကြိမ် ကြိမ်ရိုက်နှိပ်ထုတ်ဝေခဲ့ရသည့် စာအုပ်ဖြစ်သည်။ နိုင်ငံရပ်ခြားဘာသာများစွာသို့လည်း အကြိမ် ကြိမ်ပြန်ဆိုခြင်းခံရသော ထင်ရှားလှသည့် မြန်မာဝတ္ထုစာအုပ်လည်း ဖြစ်သည်။

ယင်းဝတ္ထု၌ အသွင်မတူ၊ စရိုက်မတူသော ဇာတ်ကောင်တို့ဖြင့် ဇာတ်လမ်းဆင်ထားသော ၀တ္ထုဖြစ်သည်။ ဗိုလ်စိတ်ဝင်၍ သခင်အ ခေါ်ခံပြီးလျှင် ဗမာ့အမူအရာ လုံးလုံးပျောက်ကာ မျက်နှာဖြူစနစ်အတိုင်း နေထိုသူမြန်မာလူမျိုး စပါးအ၀ယ်တော်နှင့် စပါးပွဲစားကြီး၏ သမီး ထွေး၊ ထိုသူ့အောက် အသက် ၂၀ ငယ်သူတို့လုပ်ငန်းကိုအကြောင်းပြု၍ ဆက်သွယ်မိကာ ချစ်ကြိုက်လက်ထပ်လိုက်ပြီးနောက် ပေါ်ပေါက် လာသောပြဿနာများကို ဇာတ်လမ်းဖွဲ့ထားသည်။ မုန်း၍မဟုတ်ပါဘဲလျက် စေတနာအပြည့်ရှိနေလင့်ကစား အမြင်မတူမှု၊ မလိုက်လျော နိုင်မှုတို့ကြောင့် အဆင်မပြေဖြစ်ရသော အိမ်ထောင်ရေးဘ၀တခုကို တင်ပြထားသည်။ ဤ၀တ္ထုတွင် ဘ၀လေ့လာမှု၊ ဘ၀အမြင်ရှိမှုတို့ကို ရသပေါ်အောင် သရုပ်ဖော်ရေးဖွဲ့ထားနိုင်သဖြင့် ၁၉၅၅ ခုနှစ်အတွက် စာပေဗိမာန်ဝတ္ထုရှည်ဆုကို ချီးမြှင့်ခဲ့လေသည်။

‘မုန်း၍မဟူ’ ၀တ္ထုကို ပီကင်းတက္ကသိုလ် အရှေ့တိုင်းဌာနမှူး ၁၉၈၅ ခု၊ စက်တင်ဘာလတွင် ‘ဘူရီဟန်’ (Bu Shi Hen) အမည်ဖြင့် တရုတ် ဘာသာသို့ ပြန်ဆိုထုတ်ဝေခဲ့ပြီး အမှာစာတွင် ‘အနောက်တိုင်းကို အထင်ကြီးချင်တာတွေ၊ ကိုယ့်ကိုယ်ကိုနိမ့်ကျတယ်လို့ထင်တဲ့လူငယ် တွေအတွက် သတိပေးတဲ့ခေါင်းလောင်းသံ’ ဟု ဖော်ပြခဲ့ဖူးပါသည်။

၁၉၉၁ ခုတွင်မူ အမေရိကန်၊ အိုဟိုင်းအိုးတက္ကသိုလ် အပြည်ပြည်ဆိုင်ရာလေ့လာရေး ဌာနမှ Not out of Hate အမည်ဖြင့် အင်္ဂလိပ်ဘာသာသို့ ပြန်ဆိုခဲ့ပြီး အမှာစာရေးသူ မစ္စက်အင်နာဂျေအားလော့ (Mrs Anna Jone Allot) (မြန်မာအမည် ခင်ခင်ချော) က ‘မြန်မာစာပေသမိုင်းတွင် ဆရာမကြီး ဂျာနယ်ကျော်မမလေး၏ကဏ္ဍနှင့် မြန်မာစာပေလော့လာသူများအတွက် အနောက်နိုင်ငံနှင့် မြန်မာ့ယဉ်ကျေးမှုတို့ကို ပဋိပက္ခ အသွင်ကို ထင်ရှားထူးခြားစွာဖော်ပြနိုင်သောဝတ္ထု’ ဟု သုံးသပ်ထားသည်ကို တွေ့ရပါသည်။ အင်္ဂလိပ်ဘာသာသို့ပြန်ဆိုသူမှာ ‘မာ ဂရက် အောင်သွင်’ ဖြစ်ပြီး သမိုင်းဌာနတွဲဖက်ပါမောက္ခ ၀ီလျံဖရက်ဒရစ် (William H.FrederiK) က တည်းဖြတ်ပေးခဲ့သည်။

‘မုန်း၍မဟူ’ ၀တ္ထုကိုပင် ၁၉၉၄ ခုနှစ်တွင် ပြင်သစ်ပါမောက္ခ Jean Claude Auge နှင့် ဒေါက်တာခင်လေးမြင့် (ဆရာမကြီး ဂျာနယ်ကျော်မမ လေး၏သမီး) တို့က ပြင်သစ်ဘာသာပြန်ဆိုကာ အာရှိစာပေဌာန (မြန်မာစာ) ၏ L’Harmatan စာအုပ်တိုက်မှ ထုတ်ဝေခဲ့သည်။ ရုရှား ဘာသာသို့ V.D.Mazo က ပြန်ဆို၍ သိပ္ပံပညာတံခွန်အသင်းမှ ထုတ်ဝေခဲ့သည်။ ဥဇဘက်နိုင်ငံကလည်း ဥဇဘက်ဘာသာပြန်ဆို ထုတ်ဝေ ခဲ့ကြောင်း သိရသည်။

ဆရာမကြီး ဂျာနယ်ကျော်မမလေး၏ အခြားထင်ရှားသောဝတ္ထုမှာ ‘သူမ’ဖြစ်သည်။ ဤ၀တ္ထုကို စက္ကူရှားပါးသော ဂျပန်ခေတ်အတွင်းက ပထမအကြိမ်အဖြစ် အုပ်ရေတထောင်ရိုက် နှိပ်ထုတ်ဝေရသည်။ ယင်းဝတ္ထုနှင့်ပတ်သက်၍ ဒုတိယအကြိမ်ဝေခြင်း (၁၉၅၇) အတွက် အမှာ စာရေးသားရာတွင် ဤ၀တ္ထုကို စာရေးသူက ‘လက်တည့်စမ်းရေးကျင့်ခဲ့သောဝတ္ထု’ ဟု ဆိုထားသည်။

‘သူမ’ ၀တ္ထုသည် စိတ်ကူးယဉ်ဇာတ်လမ်းဝတ္ထု ဖြစ်သည်။ ဆရာမကြီး ဂျာနယ်ကျော်မမလေးသည် ဂျပန်ခေတ်က သခင်သန်းထွန်း (နောင် ဗကပဥက္ကဌ ထောင်တွင်းကျဆုံး) နှင့် အိမ်ချင်းကပ်နေခဲ့သည်။ ထိုစဉ်က သခင်သန်းထွန်းသည် လူပျိုဖြစ်သည်။ အဖော်တစုနှင့် ဖြစ်က တတ်ဆန်း တရုန်းရုန်းနေကြသည်။ ဂျာနယ်ကျော်မမလေးက သခင်သန်းထွန်းအိမ်ကို ပြင်ဆင်မွမ်းမံပေးခဲ့ရသည်။ စည်းကမ်းကလနားများ သတ်မှတ်ပေးခဲ့ရသည်။

“အမျိုးသမီးများနှင့်ပတ်သက်၍ အိမ်မှုလုပ်ငန်းနှင့်စပ်လျဉ်းသော အသိဉာဏ်ကျယ်ပြန့်လာစေသည့် ၀တ္ထုကြောင်းကိုရေးရန် ၀တ္ထုဇာတ်လမ်း တွေးခေါ်ရာတွင် သခင်သန်းထွန်း၏အိမ်ကြီးကိုပြေးမြင်လိုက်ကာ ၀တ္ထုဇာတ်လမ်းအစရသွားလေ၏” ဟု ‘သူမ’ ၀တ္ထု ဒုတိယအ ကြိမ်ထုတ် ဝေခြင်းအမှာစာတွင် စာရေးသူက၀န်ခံထားသည်။ ‘သူမ’ သည် စိတ်ကူးယဉ်ဇာတ်လမ်းဖြစ်သည့်အလျောက် ဖတ်၍ကောင်းသည်။ လူကြိုက်များသည်။ ရုပ်ရှင်ရိုက်လိုကြသည်။ ယင်းနှင့်ပတ်သက်၍ ဒုတိယနှိပ်ခြင်းတွင်ပင် စာရေးသူက …

“ဤ၀တ္ထုကို ယခု (၁၉၅၇) ပြန်ဖတ်ကြည့်ရာတွင် စိတ်ကူးဉာဏ်ကွန့်ထားသော စိတ်ကူးယဉ်ဝတ္ထုဟု မြင်နေမိသည်။ စာပေနှင့်ဘ၀ ပေါင်း စပ်ကာ သရုပ်ဖော်စာပေမျိုးကိုရေးရန် အားသန်ရှေးရှုနေခိုက် ၀တ္ထုရေးစ လွန်ခဲ့သောဆယ်နှစ်နှစ်ကရေးခဲ့သောဝတ္ထုကို ရှုမ၀က နားပူ လွန်းသဖြင့် ရုပ်ရှင်ရိုက်ဖို့ရန် ဖြည့်စွက်ရေးပေးရခြင်း ဖြစ်ပါ၏” ဟူ၍ ဖော်ပြထားသည်။

အမှန်တရားကို သိက္ခာနှင့်ရင်း၍ဖော်ထုတ်ခဲ့သော စိတ်ဓာတ်အင်အားခိုင်မာလှသည့် ရဲရင့်ပြတ်သားလှသော အမျိုးသမီးတဦး၏စရိုက်၊ တွေ့ကြုံရသောဘ၀ဇာတ်လမ်းတစ်ခုကို ‘စိတ်’ ၀တ္ထုတွင် ဖတ်ရှုနိုင်သည်။

၁၉၆၇ ခုနှစ်၊ ဧပြီလမှစ၍ ရှုမ၀မဂ္ဂဇင်းတွင် အခန်းဆက်ရေးသားဖော်ပြခဲ့သော ‘ရင်နင့်အောင်မွှေး’ ၀တ္ထုသည် ဆရာမကြီး၏ ထင်ရှားသော ၀တ္ထုဖြစ်သည်။

မွန်မြတ်အထက်တန်းကျသော မြန်မာအမျိုးသမီးများပေါ်ထွက်လာစေရန် ဦးတည်ချက်အခိုင်အမာနှင့်ရေးခဲ့သောဝတ္ထုဖြစ်သည်။

အဆိုပါဝတ္ထုကို ၁၉၆၇ ခုနှစ်၌ ဂျာနယ်ကျော်မမလေး စာပေတိုက်နှင့်ပထမအကြိမ်ထုတ်ဝေခဲ့သည်။ ယခုအခါ သတ္တမအကြိမ်အဖြစ် ၂၀၀၄ ခုနှစ်၊ ဧပြီလတွင် ရတနာပုံစာပေတိုက်မှ ထုတ်ဝေခဲ့သည်။

ယင်းဝတ္ထုနှင့်ပတ်သက်၍ စာရေးသူကစာအုပ်မှာတွင် …

“ကျွန်မ၏ ဘ၀တစ်လျှောက်လုံး ဘယ်အခါမှ အားလပ်ခွင့်မရှိခဲ့ဘဲ နေ့ရှိသရွေ့ အလုပ် ကိစ္စအမျိုးမျိုးနှင့် လူနာများဖြင့်သာ အလုပ်ရှုပ်လျက် အချိန်ကုန်ခဲ့ရသည်။ စာရေးရန်ဝတ္ထုရှည်မ ထားနှင့် ၀တ္ထုတို၊ ဆောင်းပါးများကိုပင် မရေးနိုင်အောင် အားလပ်ခွင့်အချိန်မျိုး မရှိသလောက် ဖြစ်နေသည်။ နိုင်ငံတော်အစိုးရက ကျွန်မကိုထိန်းသိမ်းထားသည့်အခါ နေ့ရှိသရွေ့၊ အချိန်ရှိ သရွေ့ ပင်ပန်းကြီးစွာ လုပ်ငန်းအမျိုးမျိုးနှင့် အလုပ်များခဲ့ရသော ကျွန်မမှာ အနားရခွင့်၊ အားလပ်ခွင့်ရသကဲ့သို့ ဖြစ်ရသည်။ ခြံနှင့်ဝင်းနှင့်၊ အိမ်တစ်လုံးနှင့် သီးသီးသန့်သန့် ကျွန်မတကိုယ် တည်း အေးအေးဆေးဆေးနေထိုင်ရသည့်အချိန်ကာလ၌ စားရေးချင်စိတ်ဖြစ်ပေါ်လာသည်။ စာရေးချင်စိတ်ဖြစ်ပေါ်လာ၍ စာရေးရန် အချိန် ရှာကြည့်သည်။

ကျွန်မကိုထိန်းသိမ်းထားခိုက် ကျွန်မပြုလုပ်ထားသော ကျွန်မ၏ အဓိဋ္ဌာန်ချက်များနှင့် နေ့စဉ်အချိန်ဇယားကို ဖော်ပြလိုပါသည်။

အဓိဋ္ဌာန်ချက်။ ။ လွှတ်သည့်နေ့အထိ သက်သတ်လွတ်စားရန် ၈ ရက်၊ ဥပုသ်နေ့တိုင်း ဥပုသ်မပျက်စောင့်ရန်၊ ရံဖန်ရံခါ ဥပုသ်ရက်ရှည် ၁ လ၊ ၂ လ၊ ၃ လ၊ ၅ လအထိစောင့်ရန်၊ ဂုဏ် တော်ပုတီး နေ့စဉ်ပုတီးပတ် ၁၈၀၀ စိပ်ရန်၊ နေ့စဉ် အရုဏ်တက်ထွက်ပြုစနေမင်းနှင့် ၀င်မည့် ဆဲဆဲနေမင်းကို တစ်နေ့မပျက် သစ္စာပြု၍ မောရသုတ်ရွတ်ဆိုရန်။

အချိန်ဇယား။ ။ နံနက် ၄ နာရီမှ ၈ နာရီ။ ရေးချိုး၊ ဘုရားရှိခိုး၊ ခြံဝင်းထဲ၌ပုတီးစိပ်၊ လမ်းလျှောက်၊ ခြံဝင်းလှည့်ရှင်း၊ ကော်ဖီသောက်။
နံနက် ၈ နာရီမှ ၁၂ နာရီ။ ပုတီးစိပ်၊ ဘုရားရှိခိုး၊ ပဋ္ဌာန်းတက်၊ အိမ်သန့်ရှင်းရေးလုပ်၊ အ ၀တ်လျှော်၊ ရေစိမ်၊ ရေချိုး၊ ဘုရားရှိခိုး၊ ဆွမ်းတော်ကပ်၊ နံနက်ထမင်းစား။
နေ့ ၁၂ နာရီမှ ၂ နာရီ။ ၁ နာရီအိပ်ချိန်၊ ၁ နာရီစာဖတ်ချိန် သို့မဟုတ် တရားထိုင်။
၂ နာရီမှ ၆ နာရီ။ ရေးချိုး၊ ကော်ဖီသောက်၊ ပုတီးစိပ်၊ ရေစိမ်၊ ပုတီးစိပ်၊ ညစာထမင်း စား။
၆ နာရီမှ ၉ နာရီ။ ဘုရားရှိခိုး၊ ခြံဝင်းထဲ၌ ၂ နာရီလမ်းလျှောက်ရင်းပုတီးစိပ်၊ ရေချိုး၊ ကျွဲနို့သောက်၊ စာဖတ် (သို့မဟုတ်) အိမ်သို့စာရေး၊ အိပ်။

ဤအဓိဋ္ဌာန်ချက်၊ ဤအချိန်ဇယားအတိုင်း မပျက်မကွက်ပြုလုပ်ခြင်းကြောင့် ကျွန်မမှာ လူနှင့်မတူဘဲ စက်နှင့်အလားတူကာ တရက်မပျက် အဓိဋ္ဌာန်ချက်နှင့် အချိန်ဇယားအတိုင်း သုံးနှစ်သုံးမိုး ပြုလုပ်ခဲ့သည်။

ဘုရားငါးချိန်ရှိခိုး၍ ရေငါးချိန်ချိုးရန်၊ ဂုဏ်တော်ပုတီး၊ ၁၈၀၀ စိပ်ရန် နေ့စဉ်နေ့တိုင်း ပြုလုပ်ရမည့် ကျွန်မ၏အချိန်ဇယားကြောင့် ထိန်းသိမ်း ခံထားရသည့် သုံးနှစ်နှင့် နှစ်လနေခဲ့ရသောအချိန်ကာလသည် အချိန်ကို ကျွန်မကအစိုးမရဘဲ ကျွန်မကို အချိန်ကသာ အစိုးရထားသည်။

စာရေးချင်စိတ်ဖြစ်ပေါ်လာ၍ နာရီနှင့်ကိုက်ထားသော အချိန်ဇယား၌စာရေးရန် အချိန်ရှာကြည့်သောအခါတွင် နေ့ ၁၂ နာရီမှ နေ့ ၂ ချက်။ အိပ်ရန်၊ စာဖတ်ရန်၊ ဇယားချထားသော အချိန် ၂၄ နာရီရှိ၍ ထိုအချိန်သည်သာလျှင် ကျွန်မ၏အားလပ်ခွင့်ကိုယ်ပိုင်အချိန်ကို ရှာတွေ့ သည်။ ၁ နာရီအိပ်၍ ၁ နာရီဝတ္ထုရေးရန် သို့မဟုတ် မအိပ်ဘဲ ၂ နာရီစလုံးရေးရန် ပြင်ဆင်သတ မှတ်လိုက်သည်။

ဝတ္ထုဇာတ်လမ်းနှင့် ရည်ရွယ်ချက်ကို ကျွန်မ ပထမစဉ်းစားရသည်။ ကျွန်မ၏အာရုံထဲ၌ အမျိုးသမီးများအတွက် အကျိုးပြုစေမည့် ဇာတ်လမ်း တပုဒ်ရေးရန် အကြမ်းအားဖြင့် အတွေးပေါ်လာသည်။ မြန်မာအမျိုးသမီးလေးတစ်ဦး၏ ကောင်းမြတ်သောအရည်အသွေးဖြစ်သည့် မိန်းမ ပီသမှုကို မြန်မာ့ယဉ်ကျေးမှုမျိုးရိုးစဉ်လာ၊ ဓလေ့ထုံးစံ၊ စည်းကမ်းစသည်များဖြင့် စပ်ဖျော်၍ ပုံစံလောင်းကာ ရုပ်လုံးဖော်ပြရန် စိတ်ကူးရရှိ သည်။ မြန်မာအမျိုးသမီးကလေးတဦးဖြစ်လာလျှင် လောကီရေးရာနှင့် ကြည့်လျှင်သောလလည်းကောင်း၊ လောကုတ္တရေးရာနှင့်ကြည့်လျှင် သော်လည်းကောင်း၊ ယဉ်ကျေးမှုနှင့်ကြည့်လျှင်သော်လည်းကောင်း လိုက်နာကျင့်သုံးမှတ်ယူ ပြုမှုရမည့်အချက်အလက်တို့မှာ များမြောင်လှ ရကား ယင်းအချက်အလက်များထဲမှ အခြေခံဖြစ် သော ရတနာသုံးပါး ကြည်ညိုသူ၊ အနန္တောအနန္တဂိုဏ်းဝင် မိဘ၏ဂုဏ်ကျေးဇူးကိုသိတတ်၍ မိဘကို ရိုသေလေးစားသူ၊ ကုသိုလ်ကောင်းမှုတို့၌ အလွန်မွေ့လျော်တတ်သူ ရောင့်ရဲတတ်သော စိတ်နှလုံးရှိသူ၊ လုံ့လ၀ီရိယဇွဲရှိသူ၊ နူးညံ့ သိမ်မွေ့သူ၊ ပညာရှိသူ၊ ယဉ်ကျေးလိမ္မာသူ၊ မိန်းမပီသသူ စသည့်အချက်များဖြင့် ပုံလောင်း၍ ရုပ်လုံးထုရာ၌ ၀တ္ထုထဲ၌သာရှိသော စိတ်ကူး ယဉ်ဇာတ်ကောင်မျိုးမဖြစ်စေဘဲ တကယ့်လူ့လောကထဲ၌ရှိသော သဘာဝကျနသည့် ဇာတ်ကောင်ကလေးဖြစ်စေရန် အားထုတ်ဖို့ကြိုးစားရမည်ဖြစ်နေသည်။

မြန်မာအမျိုးသမီးတို့၏ မျိုးရိုးစဉ်လာ၊ ထုံးတမ်း၊ ကျင့်ဝတ်စရိုက်၊ ယဉ်ကျေးမှုတို့ဖြင့် ဖီလာဆန့်ကျင်ဘက်နိုင်သော အနောက်တိုင်းစရိုက်တုကာ လျှပ်ပေါ်လော်လီ၍ပုံပျက်ပန်းပျက် သရုပ်ပျက်ပုံစံများကို ဟုတ်လှပြီ၊ ကောင်းလှပြီဟု မျက်စီမှောက်နေကြသော အမျိုးသမီးတို့နှင့် နှိုင်းယှဉ် ၍ ချိန်းထိုးပြရန်ပါ ရည်ရွယ်ချက်အကြမ်းအားဖြင့် ချမှတ်လိုက်သည်။

ဆက်လက်ဖော်ပြပါမည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:Uncategorized

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ

By

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ (မိုးမခ) နိုဝင်ဘာ ၁၄၊ ၂၀၁၈ မိုးမခစာပေက ထုတ်ဝေပြီး...

Read more »

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ

By

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ (မိုးမခစာအုပ်စင်) အောက်တိုဘာ ၁၈၊ ၂၀၁၈...

Read more »

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ

By

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ (မိုးမခ) အောက်တိုဘာ ၁၂၊ ၂၀၁၈ မိုးမခစာပေက...

Read more »

မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း

By

  မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း ထွက်တော့မယ် (မိုးမခ) စက်တင်ဘာ...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)