ဘ၀ထဲက ရတနာ၊ ရင်ထဲက ကဗျာ (၃၅) – treasure of my life, poems from my heart

July 22, 2012


တင်မိုး
ဇူလိုင် ၂၂၊ ၂၀၁၂

၁။
အင်း … ဘာလိုလိုနဲ့ အသက် (၇၀) ပြည့်တော့မှာပါကလား။ အသက်ကြီးတော့လဲ အဖိုးကြီးဖြစ်ရတော့မှာပ။ မဖြစ်ချင်လို့လဲ မနေရ။ ပွင့်လာရင် ကြွေရမှာ ဓမ္မတာပါပဲ။

အသက် (၇၀) စစ်တမ်းထုတ်ကြည့်တော့ ဘာကိုမှလဲ ဟုတ္တိပတ္တိ မလုပ်ခဲ့ရသေး။ ကဗျာလိုလို တထွာတညှိုနဲ့ပဲ ဇရာအိုစာရင်း ပေါက်ချေပြီ။
အသက်ကြီးလာတော့ အသီးအပွင့်တွေ မြိုင်မြိုင်ဆိုင်ဆိုင်နဲ့ ကိုယ့်ချည်တိုင်မှာ မြဲမြဲချည်ပြီး စိတ်ကြည်လက်အေး ဖင်တနွေးစာမျှ နေခွင့်မရ။ ဟိုပြည်ပြေး၊ သည်ပြည်ပြေးနဲ့ “ပြည်ပြေးစာဆို ဇရာအို” မျှ ဖြစ်ခဲ့ရလေပြီ။

၂၀၀၃ ခုနှစ် နိုဝင်ဘာ (၁၉) ရက်ဆိုရင် မွေးနေ့ (၇၀) ပြည့်။ အိုခြင်းဟာလဲ ရင့်ကျက်ခြင်းတမျိုး။ မင်္ဂလာတပါးလို့ ဆိုရမည်ပ။ အိုကံကောင်းလို့ ဆိုနိုင်ပါရဲ့။

(၂)
အိုတော့ အိုပြီ။ ဘယ်လိုအိုမလဲ။ အအိုတတ်ဖို့ လိုအပ်လှပါတယ်။ ဆရာကြီးသခင်ကိုယ်တော်မှိုင်းကတော့ တိုင်းပြည်ငြိမ်းချမ်းရေးရအောင် တသက်လုံးဟောပြော၊ ဆုံးမ၊ လမ်းပြခဲ့တယ်။ အသက် (၉၀) နီးပါး ရောက်တဲ့အထိ မနားမနေ ကြိုးပမ်းခဲ့တယ်။
ဆရာကြီးဦးဖေမောင်တင်လဲ (၈၅) နှစ်ခန့်အထိ ဗုဒ္ဓတရားတော်တွေကို အင်္ဂလိပ်ဘာသာပြန်ဆိုရင်း အချိန်ကို တန်ဖိုးရှိရှိ အသုံးချခဲ့တယ်။
ဆရာဇော်ဂျီဆိုရင်လဲ(၈၅) နှစ်ခန့်မျှ ဗေဒါလမ်းကဗျာ၊ ပုဂံကဗျာစုများသီကုံးရင်း နှလုံးမြတ်အရင်းခံနဲ့ ပလေးတိုးနိဒါန်းကို မြန်မာပြန်ခဲ့တယ်။
ဆရာမင်းသုဝဏ်ကတော့ အခုထက်ထိ အသက်ရှည်ပါပဲ။ အသက် (၉၅) ခန့်ရှိပြီ။ နိုင်ငံရဲ့လွတ်လပ်ရေး၊ ဒီမိုကရေစီရေး၊ ငြိမ်းချမ်းရေးအတွက် တတပ်တအား ပါဝင်ထမ်းရွက်တုန်းပါပဲ။
လူထုဒေါ်အမာဆိုရင်လဲ အသက်က (၉၀) နားနီးနေပြီ။ ကလောင်မချတမ်း စာရေးနေတုန်း၊ အတွေး အခေါ်တွေ ထွန်းပြနေတုန်းပါပဲ။

ဒီလို အအိုလှလှနဲ့ ဘ၀ကို တန်ဖိုးရှိရှိနေကြတဲ့ပုဂ္ဂိုလ်တွေ မြန်မာနိုင်ငံမှာ အများသား။ ရင့်ကျက်တဲ့ အသိပညာတွေ ဖြန့်ဝေနေကြတဲ့ သမိုင်းပါမောက္ခ ဒေါက်တာသန်းထွန်းလို၊ ဆရာပါရဂူလို ရှစ်ဆယ်ကျော်ဆရာကြီးများလဲ မနည်းလှပေဘူး။

အိုကြီးအိုမတိုင်အောင် ဒုက္ခတွေပေးခဲ့တဲ့ပုဂ္ဂိုလ်တွေလဲ အထင်ကရပါ။ ဦးနေ၀င်းဆိုတဲ့ စစ်ဗိုလ်ချုပ်ကြီးဟာ မြန်မာနိုင်ငံမှာ ဒီမိုကရေစီရုပ်သိမ်းပြီး စစ်အာဏာရှင်စနစ်ခိုင်မြဲအောင် ထိန်းသိမ်းမွေးမြူခဲ့တဲ့အတွက် တိုင်းပြည်တပြည်လုံး ကြိမ်မီးအုံးထားသလို ညှိုးချုံးပူဇာ ဝေဒနာခံစားခဲ့ရတဲ့ သမိုင်းလဲအရှိ။ ယခုထက်ထိ သူမွှေးခဲ့တဲ့မီး၊ သူပျိုးခဲ့တဲ့ စနစ်ဆိုးကြောင့် မြန်မာနိုင်ငံဟာ နာလန်မထူနိုင်ဘဲ ပက်လက်လန် ဂျွမ်းပြန်ကျနေဆဲဆိုတာ ဘယ်သူမှမမေ့ပါ။ ဦးနေ၀င်းဟာ အသက်(၉၃) နှစ်ထိအောင် နေသွားခဲ့ပါတယ်။ ဒါပေမယ့် သူပျိုးထောင်ခဲ့တဲ့ စစ်မျိုးဆက်က သူ့အမွေဆိုးကိုဆက်ခံပြီး ဒုက္ခပေးလျက်ရှိတုန်းမို့ ဒီအဖိုးကြီးရဲ့ ဒဏ်ရာဒဏ်ချက်တွေက သစ်လွင်လတ်ဆတ်ဆဲ ရှိပါသေးတယ်။ မေ့ကောင်းဖွယ်မရှိပါ။

(၃)
အဖိုးကြီးတွေရဲ့သဘာဝကို စဉ်းစားခန်းဝင်မိတယ်။ စရိုက်အမျိုးမျိုးနဲ့ အမိုက်အိုးတွေလဲတွေ့ရဲ့။ လေးစားဂုဏ်ယူဖွယ်ရာ သီလ၊ သမာဓိ၊ ပညာနဲ့ပြည့်စုံတဲ့ “အဖိုးကြီး” တွေလဲတွေ့ရဲ့။
အခုကဗျာကတော့ “အဖိုးကြီးစစ်တမ်း” ကဗျာပါ။
ဖတ်ကြည့်ပါဦး။

အသက်ကလေးထောက်ခါမှ
အရက်ခွက်ကလေး တမြှောက်မြှောက်
ချက်အောက်စကားတွေတပြောပြောနဲ့
တသောသောနေပြီး
အမောဖြေတတ်တဲ့အဖိုးကြီး။

သေရိပ်နီးခါမှ၊ စိတ်ပုတီးနာနာကိုင်
မဟာမြိုင်တောရမှီးပေမယ့်
ဒေါသကလဲကြီးတတ်သေးရဲ့
လောဘမီးကလဲ အရှိန်ဟပ်
အိမ်မကပ်နိုင်တဲ့အဖိုးကြီး။

ရွာလယ်မှာ စွာကျယ်စွာကျယ်နဲ့
ငါဟယ်မင်းဟယ် ငြင်းမယ်လို့မကြံနဲ့
မင်းတုိ့ကမမှန် ငါသာလျှင်အမှန်လို့
ငါမာန်တွေတက်၊ ငါအရိုးမျက်လက်တို
အခက်ပို အမျက်သိုနေတဲ့အဖိုးကြီး။

ဒီလိုအဖိုးကြီးမျိုးတော့
ဆောရီး ဆောရီး မဖြစ်ချင်ပေါင်။

ကြွေခါနီးတဲ့သစ်သီးလို
အသက်ကြီးတော့လဲ
အဖိုးကြီးဖြစ်မှာပေါ့လေ
ဒါပေမယ့် ရိုးရိုးကုပ်ကုပ်
ပုဆိုးစုတ်ကလေးနဲ့ပဲဖြစ်ဖြစ်
ကိုယ့်အလုပ်ကိုယ်ဆင်း၊ ကိုယ့်ယာခင်းကိုယ်စိုက်
လျှာအလိုမလိုက်၊ ဘာကိုမှမကြိုက်
ပျော်ပိုက်ရာ တော်ထိုက်ရာနေ
စာပေလဲမပြတ်၊ ကဗျာတွေလဲဖတ်
ရပ်သူရွာသားတွေနဲ့
ထပ်တူမခြားနေတတ်တဲ့
စရပ်ငုံးတို တာတမံခရိုးအနီးက
မပြတ်ပြုံးချိုနေတဲ့ သာမန်အဖိုးကြီးပဲ
ဖြစ်ချင်တယ်။

အထက်ပါကဗျာထဲကအတိုင်း သာမန်လူသားမျှသာဖြစ်တဲ့ လောကချစ် လူသားချစ်အဖိုးကြီးတယောက် ဖြစ်ခွင့်ရရင်ကိုပဲ ဆုကောင်းလာဘ်ကောင်းရသလို လောကမှာ နေပျော်လှပါပြီ။ ဘာကို မက်မောနေမလဲ။
ဘာကိုတွယ်တာနေမလဲ။ ဘာကို တပ်မက်နေဦးမလဲ။

အသက်ကြီးပြန်တော့ တန်ဖိုးရှိရှိ အိုနည်းကလေးတွေးပြီး ကဗျာကလေး ဟိုရေးဒီရေး ရေးမိပါရဲ့။ ။

ခေတ်ပြိုင်ဂျာနယ် အတွဲ (၁၂၆)၊ နိုဝင်ဘာ ၂၀၀၃


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ပင်တိုင်ကဏ္ဍ

One Response to ဘ၀ထဲက ရတနာ၊ ရင်ထဲက ကဗျာ (၃၅) – treasure of my life, poems from my heart

  1. မောင်ပျာလောင် on July 23, 2012 at 11:10 am

    ကျနော်တို့ လှည်းတန်းဈေးရှေ့ က လက်ဘက်ရည်ဆိုင်စကားဝိုင်းကို တခါတရံ ဆရာတင်မိုး ရောက်လာတပ်ပြီး သူပြောတဲ့ စကားစုတွေကို အားလုံးကမှတ်ထားကြ ပြန်ပြောကြနဲ့ အမြဲစည်ကားလျှက်ရှိပါတယ်။ ဟေ့ မောင်ပျာလောင် ဆရာရေးတဲ့ ကဗျာတွေ မင်းဖတ်ဖူးသလာလို့ ဆရာတင်မိုး ထောင်ကထွက်လာကာစ လက်ဘက်ရည်ဆိုင်ထဲမှာ ကျနော့ကိုမေးဘူးပါတယ်။ မဆိုင်းမတွဘဲ ကျနော် -ဆေးလိပ်လည်းတို နေလည်းညိုပြီ- ကဗျာကိုရွတ်ပြလိုက်ပါတယ်။
    ဟေ့ – ဟေ့ တော်ပြီ တော်ပြီ ဆက်မရွတ်နဲ့ ၊ ဒီကဗျာကြောင့် ငါထောင်ကျသွားတာ ပြီးခဲ့တဲ့အပတ်ကမှ ပြန်လွတ်လာတာ၊ ငါ့ကိုပြန်မပို့ ပါနဲကွာလို့ ပြောတာကို ၀ိုင်းတော်သားမျာကြားပြီး အတင်းမေးတာကြောင့်၊ အသံအုပ်အုပ်ခလေးနဲ့ ဆရာ
    ဖြေကြား တာကတော့။ ကောလိပ်ဂျင်နေ၀င်း ဆုံးပြီး သူ့ အမျိုးတွေက သူကြိုက်တဲ့ ဒီကဗျာကလေးကို သူ့ ဂူမှာရေးခွင့်တောင်းပြီး၊ ပုံ နေ၀င်း ဆိုပြီး အောက်ဆုံးမှာ ကဗျည်းတပ်ထားတာကြောင့်၊ ဦးနေ၀င်း (မဆလ မယားပြိုင် ဥက္ကဌကြီး) ကသူ့ ကို စောင်းရေးပါတယ်ဆိုပြီး ထောင်ချတာပါဘဲတဲ့။ စစ်ဒနီမြို့ ဟောပြောပွဲမှာလည်း အဲဒီ့အကြောင်း ပြောသွားဘူးတယ်လို့  ကျနော့အပေါင်းအသင်းများကပြောဘူးပါတယ်။ အော် ဦးနေ၀င်း ရယ် ဆရာတင်မိုးကိုထောင်ချလိုက်တော့ကော ဒီကဗျာက ကွယ်ပျောက်သွားတာမှမဟုတ်ဘဲ၊ ဦးနေ၀င်းကော ဆရာတင်မိုးကော ကွယ်လွန်ခဲ့ပါပြီ၊ ဒါပေမဲ့ ” ဆေးလိပ်လည်းတို၊ နေလည်းညိုပြီ၊ ငါ့ကိုပြန်ပို့ ကြပါလေ ” ကဗျာကတော့ ကျန်ခဲ့ပါပြီ နောင်လာမဲ့ အာဏာရှင် ပေါက်စတွေ သတိထားပါဗျာ။

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ

By

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ မိုးမခစာအုပ်စင်၊...

Read more »

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ

By

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ (မိုးမခစာအုပ်စင်) ဇန်န၀ါရီ ၃၁၊ ၂၀၁၉...

Read more »

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)