မထူးဆန်းတဲ့ အမှားများ

January 7, 2014
My Friend Tin Moe By Maung Swan Yi - Selection of MoeMaKa Articles

ငြိမ်းချမ်းအေး
ဇန်န၀ါရီ ၇၊ ၂၀၁၄
ဇော်မျိုးထွဋ် (မဇ္စ္ဈိမလှိုင်း) နာရေး သတင်းကို ကြေးမုံ က ဇော်မျိုးထွဋ် (Emperor) ပုံ နဲ့ တင်သတဲ့..။ ဗမာ့ စာနယ်ဇင်း ရဲ့ အရည်အသွေး ကို အစကတည်းက နားလည်ပြီးသားပါ။ ဒါပေမယ့် အခုခေတ်လို လူမှုကွန်ရက်စာမျက်နှာတွေမှာ ဝါသနာရှင်တွေက ဝမ်းနည်းတကြီးနဲ့ အမှတ်တရ ဓာတ်ပုံတွေ တင်နေကြတဲ့ ခေတ်မျိုးမှာ ဒီလို အမှားမျိုး ကျူးလွန်တာတော့ တော်တော့်ကို သောက်သုံးမကျကြောင်း ပေါ်လွင်တယ်။

 

ပြောမယ့်သာ ပြောရတယ်၊ တကယ်တော့ အမှားတွေ၊ အလွဲတွေ ဟာ သောက်တလွဲ စနစ် နဲ့ သောက်တလွဲ လူတွေ ရာစုနှစ်ဝက် ကြီးစိုး နေတဲ့ တိုင်းပြည်မှာ အသားကျနေခဲ့တာ ကြာခဲ့ပါပြီ။

 

ပိတ်ဆို့ထားတဲ့ တိုင်းပြည်မျိုးဆိုတော့ နည်းနည်း ကမ္ဘာနဲ့ စ ချိတ်မိခါစတုန်းက ATM စက် ကို “အလိုအလျောက် စကားပြောစက်” လို့ စာနယ်ဇင်း က ဘာသာပြန်ဖူးခဲ့တယ်။ အင်္ဂလိပ်စာ တလွဲပြန်မှုတွေက အခုအချိန်ထိလည်း အမြဲမပြတ်ပါပဲ။ ပြောတဲ့သူသာ အာပေါက် သွားပါမယ်။

 

အစစ အရာရာ အားနည်းတဲ့ တိုင်းပြည်မျိုးဆိုတော့.. အလုပ်သင်ဆရာဝန် က နှလုံး မှာ အခန်း (၃) ခန်းပါကြောင်း ပြောတယ်။ ကျောင်း က မြန်မာစာ ဆရာမလေး က “စာပုလွေ ရင်မှာပိုက် လို့” ကို စာလေးရယ်၊ ပုလွေလေးရယ် လုပ် စာသင်တတ်တယ်။

 

အဲ့သလို တိုင်းပြည် က ခေါင်းဆောင် အိမ်ရှေ့မင်းသား စစ်ဗိုလ်ကြီး က နိုင်ငံခြား ဟိုတယ် တခု ရှေ့က ပုခုံးဘားတွေအပြည့်နဲ့ အပေါက်စောင့်ကို အလေးပြုတယ်။ သူတို့လို ဘားတွေ အပြည့် ဝတ်ထားတော့ သူ့ခမျာ အလေးပြုမိတာပေါ့။ မဆလ ခေတ် တလျှောက် နိုင်ငံခြား လေ့လာရေး ခရီးသွားခွင့်ရတဲ့ စာရေးဆရာများ အေးတဲ့ အရပ်မှာ မျက်နှာသစ်ဖို့ပေးတဲ့ အငွေ့တထောင်းထောင်းထနေတဲ့ ရေနွေးငွေ့စိမ် Towel အသေးစားလေးတွေကို ကော်ပြန့်လိပ်မှတ်လို့ ကိုက်စားကြတယ်။

 

ဆရာဦးဝင်တင် က မဆလ ခေတ် သူခေါင်းဆောင်ပြီး ဥရောပ ကို ယဉ်ကျေးမှု ကပွဲ အဖွဲ့ ခရီးထွက်စဉ် ကိုယ်တွေ့ကြုံတွေ့ခဲ့ရတဲ့ မိမိအဖွဲ့သားတွေရဲ့ စိတ်ဓာတ်ပိုင်းဆိုင်ရာ စံလွဲမှုတွေကို ပြန်လာတော့ ဆောင်းပါး ရှည်ကြီး ရေးဖူးခဲ့တယ်။ သူ့ကို လူအတော်များများလည်း မေတ္တာပို့ခံထိတယ်။ တိုင်းပြည် က တံခါးပိတ် လိုက်တော့ အသိ၊ အမြင်၊ အယူအဆ တွေက တလွဲတွေချည်းဖြစ်ကုန်ကြောင်း၊ စီးပွားရေးကျဆင်းမှု နဲ့အတူ ရုပ်ဝတ္ထုပစ္စည်း ရှားပါးလာပြီး လူတွေရဲ့ အမူအကျင့်၊ အတွေးအခေါ် တွေ ပြောင်းလဲသွားကြောင်း၊ တန်ဖိုးထားမှု စံလွဲသွားကြောင်းကို ဦးဝင်တင် က ပုံဖော်ရေးခဲ့တယ်။ ရောမ က တကယ့် နိုင်ငံတကာ ကပွဲ ဇာတ်ခုံကြီးတွေမှာ မြန်မာ့ယဉ်ကျေးမှု အဖွဲ့ ကပြခွင့်ရပေမယ့် အဖွဲ့သား ပညာရှင်များဟာ အိမ်အပြန် ဓာတ်ဗူး လေး တလုံး ပါဖို့ အရေး အတွက် အသုံးစားရိတ် ကို ချွေတာ၊ မစားမသောက်ဘဲ နေကြ၊ အားပြတ်ပြီး ဖျားနာကြ ဖြစ်၊ နောက်ဆုံး တကယ် စင်ပေါ်မှာ တက်ကတော့ မကနိုင်တော့ကြောင်းတွေကို ဆောင်းပါး မှာ ဝမ်းပန်းတနည်းရေး ထောက်ပြခဲ့ဖူးတယ်။

 

ဒီလို အနုပညာရှင်၊ အသိပညာရှင်၊ အတတ်ပညာရှင် အားလုံး စနစ်နဲ့လိုက် မှားခဲ့၊ လွဲခဲ့တဲ့ တိုင်းပြည်မျိုးမှာ ၉၀ ခုနှစ်များ စစ်ထောက်လှမ်းရေး က ပြည်သူ့နားမျက်စိ စာနယ်ဇင်း လောက ကို ချုပ်ချင်တော့ စစ်ဗိုလ်ပြုတ်များ၊ အဟောင်းများ၊ အဆွယ်အပွား ဆွေတော်မျိုးတော် တသိုက် နဲ့ ဖျက်ဆီးခဲ့တဲ့ ဗမာ့စာနယ်ဇင်း ရဲ့ အဆင့် ဟာ အဖတ်ဆယ် မရ ဖြစ်ခဲ့ရတယ်။

 

ဟိုးအရင် ဂျာနယ်တွေ ပေါ်ဦးစ မှိုလိုပေါက်ချိန် သတင်းထောက် တယောက် က မန္တလေးသိန်းဇော် ရဲ့ Azada Gallery ဖွင့်ပွဲ ကို တက် သတင်းယူတော့ မန္တလေး သိန်းဇော် သွားပြီး “ဦးက အရင် ဘာလုပ်ငန်းလုပ်ခဲ့ပါသလဲ” လို့ မေးသတဲ့..။ နိုင်ငံကျော် ကဗျာဆရာ၊ ဇာတ်မင်းသား၊ အဆိုတော် လည်း စိတ်ပျက်ပျက်နဲ့ “ကျုပ် ဇာတ်က စားတယ် ဗျာ။ ဇာတ်ကစားတယ်” ဆိုပြီး ပြန်ဖြေဖူးတယ်။

 

နောက် တယောက်ကကျ VCD ထုတ်ဖို့ Live Show တွေ စလုပ်ကြချိန် မေဆွိ ပွဲ မှာ မြင့်မြင့်ခင် က နပန်းဆံ ဆိုတော့ သတင်းထောက် အချင်းချင်း ပြောသတဲ့..။ “ဒီ အဖွားကြီးက သီချင်းလည်း ဆိုတတ်တယ်နော်..” ဆိုပဲ..။

 

ဂျူး ဆို ၉၀ ခုနှစ်များ နှောင်းပိုင်း က စလို့ စာနယ်ဇင်း သတင်းထောက်တွေ ရဲ့ ပေါက်တတ်ကရ မေးခွန်းတွေ ဒဏ်မခံနိုင်လို့ အင်တာဗျူး ဆို အမြဲရှောင်တယ်လို့ ဆိုတယ်။ နိုင်ငံတကာ မှာလို အင်တာဗျူး အတွက် အချိန်သတ်မှတ် ပိုက်ဆံတောင်းဖို့ ကြံစည်နေကြာင်း ရေးဖူးတယ်။ အိမ်ထောင် ရှိသလား အမေးကို မရှိကြောင်း ဖြေအပြီးမှာ “ကလေးဘယ်နှစ်ယောက်လဲ” မေးတတ်သူမျိုးတွေနဲ့ တွေ့မှာ ကြောက်သွားဟန်တူတယ်။ ဒါမှမဟုတ် ဒါ့ထက်ဆိုးသူတွေနဲ့ ကြုံဖူးခဲ့လို့ ဖြစ်မယ်။

 

ဟိုတရက်က ဂျာနယ်တစောင်မှာ နေမျိုးဝေ က အမြင်သဘောထား တောင်းခံတဲ့ မေးခွန်းတခု အတွက် ဆဲဆို ဖြေခဲ့ကြောင်း အပြည့်အစုံ ဖော်ပြထားတာ တွေ့လိုက်တယ်။ မေးခွန်းကြည့်လိုက်တော့ နေမျိုးဝေ ဆဲတာ နည်းတောင် နည်းသေးတယ်လို့ တွေးမိတယ်။ မေးခွန်းက “အခုခေတ် မှာ အမျိုး၊ ဘာသာ၊ သာသနာ ရှေ့တန်းတင်လွန်းအားကြီးနေတဲ့ အပေါ်ဘယ်လိုမြင်သလဲ” သဘောမျိုး မေးတယ်။ နေမျိုးဝေလို သူများ ဘာသာသာသနာ ကို မဟုတ်တယုတ် အယုတ္တအနတ္တ တွေ အချိန်တိုင်း ပြောပြီး အမျိုး၊ ဘာသာ၊ သာသနာ ကာကွယ်စောင့်ရှောက်သူကြီး လုပ်၊ အောက်လမ်းနည်း နဲ့ နိုင်ငံရေးလမ်းဖောက်နေသူကို သွားပြီး ဒီလို မေးခွန်းမေးရင် ဒီလိုမျိုး ပြန်အဆဲခံထိရတာ အဆန်း မဟုတ်ဘူး။

 

ဟို ဟာသ ပုံပြင်လိုပဲ ဆိုရမယ်။ အမေ က ကလေး ကို ဈေးမှာ ဝက်ဆီ သွားဝယ်ခိုင်းတော့ ကလေးက ဈေးသွား ဝက်ဆီ ရှာတယ်၊ မတွေ့တော့ ပြန်လာပြီး မတွေ့ကြောင်း ပြောတယ်၊ အမေ က “ဟဲ့.. နင် မူဆာကြီး ဆိုင်ကော မေးခဲ့သလား” လို့ ပြန်မေးတော့ ကလေးက “မေးခဲ့တယ် အမေ” ဖြေတယ်။ အဲ့တော့ အမေ က “နင့်.. ရိုက်မလွှတ်လိုက်တာ ကံကောင်းတာပေါ့” ဆိုတယ်။ မူဆာကြီးဆိုင် သွားပြီး ဝက်ဆီရှိသလား မေးတာ ရိုက်မလွှတ်လိုက်တာ ကံကောင်းသလို အဲ့သလို မေးခွန်းမျိုး နေမျိုးဝေ ကို မေးလို့ အဆဲခံရတာ နည်းတယ် လို့ပဲ ဆိုရမယ်။

 

ဖြေသူဘက်က ဆဲလွှတ်တာဟာ မှားပေသိ စာနယ်ဇင်း သဘော မှာ တယောက်ယောက် ဆီက အမြင်သဘောထား တောင်းခံရင် လမ်းကြောင်းမေးမှုမျိုး မလုပ်အပ်ဘူး ဆိုတာ နားလည် လက်ခံ သိထားရမယ့် အခြေခံ သဘောဖြစ်တယ်။

 

ဟိုတလောက ပြည်တွင်း စာနယ်ဇင်း ဆောင်းပါးရှင် တယောက် စာတပုဒ် မှာ တင်မိုး ရဲ့ ဧည့်သည်ကြီး ကဗျာ ကို ယူသုံးပြီး ကဗျာဆရာ အမည် မသိလို့ ပြောပြပါ ဆိုတော့ ကဗျာဆရာ အကို တယောက် ဘုရား တရရှာတယ်။ ဆရာကြီး တင်မိုးလည်း သူတို့ လုပ်မှ “အမည်မသိ ရှေးစာဆို” ဖြစ်ရတော့မယ်။

 

ဗိုလ်နေဝင်း ဆက်စပ် ပုံပြင်တပုဒ် ဆိုရင် ဗိုလ်နေဝင်း က ဒဂုန်တာရာ ကို ဗိုလ်တာရာ အမှတ်နဲ့ “ခင်ဗျား မုဆိုးဝတ္ထုတွေ ရေးသေးလား” မေးသတဲ့..။ ဒါတော့ သောက်မြင်ကတ်လို့ ပြောတဲ့ ပုံပြင်ပဲ ဖြစ်မှာပါ။ တကယ် ဟုတ်ဟန် မတူပါဘူး။ ဘာလို့ဆို ဗိုလ်နေဝင်း က ဟိုစပ်စပ် ဒီ စပ်စပ် စာဖတ်တတ်သလို၊ မှတ်ဉာဏ်လည်း အင်မတန်ကောင်း၊ လူရည်လည် တဲ့ လူတွင်ကျယ် တယောက်ပါ။ အခုခေတ် စစ်ဗိုလ်ကြီးများ နဲ့ အရည်အချင်း က ဆီ နဲ့ ရေ ကွာ သလို ကွာပါတယ်။ ဒီခေတ် စစ်ဗိုလ်ကြီးများ ဗိုလ်နေဝင်း ထက် သာတာ တခုပဲ ရှိတယ်၊ အာဏာ အလွဲသုံးစားလုပ်၊ လက်ဝါးကြီး အုပ် ကိုယ်ကျိုးရှာတတ်မှုပဲ။ ဒါတော့ ဆရာ့ထက်တပည့် လက်စောင်းထက် ကြတယ်။

 

ဒီခေတ် စစ်ဗိုလ်ကြီးများရဲ့ အရည်အသွေး ကြည့်ပါ။ သမ္မတလုပ်နေသူ က နိုင်ငံခြား သတင်းထောက် တယောက်ယောက်ကများ မေးခွန်းမေးရင် အရပ်ကူပါ၊ လူဝိုင်းပါ အမြဲ ဖြစ်ရတယ်၊ အင်္ဂလိပ် စာတင် မတတ်တာ မဟုတ်၊ မြန်မာစာ ပါ မတတ်ကြောင်း ကို ပါရာဖတ် မိန့်ခွန်းပြောရင် စာသံပေသံ “သူမသည်..” တွေ ဘာတွေ အမြဲလုပ်တတ်တယ်။

 

ဗဟုသုတ ကြွယ်ဝမှုကလည်း လက်ဖျားခါလောက်တယ်။

 

အရင်လကပဲ ပြန်ကြားရေး ဒုဝန်ကြီး ဆိုသူက ဆရာငြိမ်း ရဲ့ “မန်းတောင်ရိပ်ခို” ကို “မြနန္ဒာ” လုပ်ခဲ့တယ်။ “ရက်ရွေးမနေပါနဲ့.. ကိုကိုရယ်.. အသက်ကလေးရယ်.. ရှည်စေလိုရင်ဖြင့်..” နဲ့ စတဲ့ ဆရာတင် ရဲ့ “မြနန္ဒာ” သီချင်း သပ်သပ်ရှိပါတယ်၊ ဆရာငြိမ်း သီချင်း နာမည်က “မန်းတောင်ရိပ်ခို” ပါ ဆိုတာ ခေတ်အဆက်ဆက် ဆရာတွေ အမျိုးစုံ ရှင်းပြခဲ့ဖူးတယ်၊ ဒါလည်း သောက်မှတ် က မရှိဘူး၊ မှားဆဲပဲ။ ဒါတောင် “မန်းတောင်ရိပ်ခို” က စစ်ဗိုလ် ဝန်ကြီး များ ပွဲသိမ်းခံ၊ အရက်ဝိုင်းနဲ့ မျောက်လို ကွေးနေအောင် က နေကျ သီချင်းနော်။

 

အဲ့သလို လူတွေ တိုင်းပြည် မှာ ကြီးစိုးခဲ့တော့ တီဗွီမှာ ကလေးတွေခေါ် ဉာဏ်စမ်းပြိုင်ပွဲလုပ်ရာမှာ ကလေးတယောက် က “မန်းတောင်ရိပ်ခို” သီချင်း ရဲ့ ဂီတစာဆို နာမည် မေးခွန်းအတွက် “ရင်ဂို ပါ” လို့ ဖြေတယ်။ ဖြစ်နိုင်၏၊ မဖြစ်နိုင်၏ အကျိုး၊ အကြောင်း မစဉ်းစားနိုင်မှု၊ အထွေထွေ ဗဟုသုတ နည်းမှုတွေ အတွက် ပညာရေးစနစ်အကြောင်း သိလို့ နားလည် ခွင့်လွှတ်ပေးနိုင်ပေမယ့် မသိတဲ့ မေးခွန်းအတွက် ဖြေရာမှာ မှန်လေမလားဟဲ့.. ဆိုတဲ့ စိတ်နဲ့ ရမ်းသန်းဆိုရဲမှု၊ ပြောထွက်မှု က တိုင်းပြည်ရဲ့ စာရိတ္တပိုင်းဆိုင်ရာ အားနည်းမှု ကို ပါ ဖော်ပြနေတယ်။

 

“ငါနဲ့ မထိုက်တန်တာကို ငါ မယူဘူးဟေ့” ဆိုတဲ့ စိတ်ဓတ် ဟာ လူ့အဖွဲ့အစည်းမှာ ပျောက်ကွယ်နေတာ ကြာပါပြီ။ အရာရာမှာ အချောင်လိုစိတ် သာ ဝမ်းနည်းဖွယ် ရှင်သန်အားကောင်းနေတယ်။ ဒါလည်း ကလေးသူငယ်၊ လူငယ်များ ကို အပြစ်ဆိုဖွယ် မရှိ။ လူကြီးဆိုသူများ ကိုယ်တိုင် ခေတ်အဆက်ဆက် ကိုယ်နဲ့ မထိုက်တန်တဲ့ ရာထူး၊ နေရာ၊ အာဏာ၊ စည်းစိမ်၊ လုပ်ပိုင်ခွင့် တွေ မတရား အဓမ္မယူ ကြီးစိုးခဲ့တော့ ဒီလို လူ့မှုအဖွဲ့အစည်း၊ စနစ် ရဲ့ သားကောင် ကလေးလူငယ် များ စာမတတ်ဘဲ စာမေးပွဲအောင်ချင်တာ၊ ဗဟုသုတ မရှိဘဲ အမှတ်လိုချင်တာမျိုးဟာ ဖြစ်တတ်တဲ့ ဓမ္မတာပဲ ဖြစ်တယ်။

 

တက္ကသိုလ် ပထမနှစ်တက်ချိန် အဆောင်မှာ ဘာသာရပ်တခု တက်နေတဲ့ မဟာ တန်းက အကိုကြီးတွေနဲ့ အတူနေဖူးတယ်။ ကိုယ့်ကျောင်းမှာကလည်း အဲ့ဒီဘာသာက အဓိက ဖြစ်တော့ သူတို့ဆီက အကူအညီ အများကြီး ရခဲ့တယ်။ သူတို့အားလုံး စာတော်၊ သဘောကောင်း၊ ဘုရားတရား ကိုင်းရှိုင်းကြတယ်။ သူတို့နဲ့ နေစဉ်ကဆို ဘုရားကြီး မျက်နှာတော်သစ် ကို အပတ်တိုင်းလိုလို ရောက်တယ်။ ဆိုချင်တာက သူတို့အားလုံးဟာ အများ သူသူ ငါငါ လိုပဲ တန်းတူ ပညာ၊ ကိုယ်ကျင့်တရား၊ သီလ ရှိတယ်။

 

တရက် သူတို့နဲ့ စကားဝိုင်းဖွဲ့ရင်း အခွင့်အရေး အကြောင်း ရောက်သွားတယ်။ တယောက်က “ငါတို့လည်း အခွင့်အရေး သာ ရရင် အလွဲသုံးစား လုပ်မှာပဲ၊ ကိုယ်ကျိုးရှာမှာပဲ၊ အခုခေတ် ဗိုလ်ချုပ်တွေလို ဖြစ်မှာပဲ၊ ကျောင်းပြီး အလုပ်လုပ်ရင် ငါတို့လည်း အခွင့်အရေး ရှာမှာပဲ” ဆိုတဲ့ သဘောမျိုး ဆိုတယ်။ “ခိုးစားမှ နပ်မှန်မယ့် စနစ်” အကြောင်းကို နားလည် ပေမယ့် အဲ့ဒီလို မြိန်ရေရှက်ရေ ကြိုတင် ကြံစည် ဆိုတာ ကြားရတော့ ဆိုလိုချင်တဲ့ သဘောကို နားလည်သိတိုင် ကိုယ်နေထိုင်ရာ လူ့အဖွဲ့အစည်းအတွက် တုန်လှုပ်ခြောက်ခြားသွားခဲ့တယ်။ စာရိတ္တ မဏ္ဍိုင် ယိုင်ဆင်း မှုဟာ တဦးချင်း သဘော မဟုတ်ကြောင်း၊ အခွင့် မရလို့သာ မခိုးဘဲ နေမယ် ရရင်တော့ ခိုးမယ့် လူ အများကြီး ဖြစ်ကြောင်း ကို အသက် (၁၈) နှစ် အရွယ် မှာ ကောင်းကောင်း သဘောပေါက်သွားခဲ့တယ်။

 

ဒီလိုနဲ့ တိုင်းပြည် ရဲ့ ကဏ္ဍ တိုင်းမှာ အမှား တွေ သာ တွင်ကျယ်နေကြောင်း၊ အမှန်တွေက အမှားဖြစ်၊ အမှားတွေ က အမှန်ဖြစ်နေကြောင်း၊ အဓမ္မ က ဓမ္မ ကို နိုင်နေကြာင်း၊ သစ္စာတရား က အိမ်မှာ ဖိနပ်ကြိုးချည်နေစဉ် မုသာဝါဒ က တိုင်းပြည်အနှံ့ ခရီးထွက်ပြီးပြီ ဖြစ်ကြောင်းကို ငယ်ငယ်ရွယ်ရွယ်မှာ ရှင်သန်ရာ လူ့ပတ်ဝန်းကျင်ကို ကြည့်ပြီး သင်ခန်းစာ ရခဲ့ရတယ်။

 

မသူတော်များ ကြီးစိုး ဖျက်ဆီးရာ နိုင်ငံရေး စနစ် ပျက်စီးမှု ကနေ စခဲ့တဲ့ တိုင်းပြည်ရဲ့ ကပ်ရောဂါဟာ လူမှု၊ စီးပွား၊ ကျန်းမာ၊ ပညာ၊ တရားရေး၊ အုပ်ချုပ်ရေး၊ စာနယ်ဇင်း၊ အနုသုခုမပညာ စတဲ့ အစစ အရာရာ ကို စွဲကပ်ခဲ့ပြီး အဖက်ဖက်မှာ ကိုယ်ခံအားတွေ ကျခဲ့၊ ယုတ်လျော့ခဲ့ရတယ်၊ ချွတ်ခြုံကျ ခဲ့ရတယ်။ ရုပ် ဝတ္ထု ပစ္စည်းတွေ၊ အဆောက်အအုံတွေ လဲပြိုအပြီး နောက်ဆုံး စာရိတ္တပိုင်းဆိုင်ရာ၊ ကျင့်ဝတ်ပိုင်းဆိုင်ရာ၊ နာမ်ပိုင်းဆိုင်ရာ ဆောက်တည်မှုတွေ အားလုံး ပြိုလဲပျက်စီး ဖြစ်ခဲ့ရတယ်။

 

ဒီလို နောက်ခံမှာ ဗမာ့ စာနယ်ဇင်း ရဲ့ အမှားများဟာ အထူးအဆန်း မဟုတ်တော့ပါဘူး။ ဒါပေမယ့် လူထု ရဲ့ အသိ၊ အမြင် ကို ဖွင့်ပေး၊ မြှင့်ပေးရမယ့် စာနယ်ဇင်း ဟာ တတ်နိုင်သလောက်တော့ အမှားနည်းအောင် ကြိုးစားစေချင်တယ်။ အထူးသဖြင့် အခုလို ခလုတ်တချက်နှိပ်ရင် အရာရာ ဆိုသလို ရှာဖွေ ဗဟုသုတ တိုးပွားလို့ ရတဲ့ ခေတ်ကြီး၊ နိုင်ငံတကာ စံနှုန်း၊ စံထား တွေကို အလွယ်တကူ လေ့လာ သိမြင်လို့ ရတဲ့ ခေတ်ကြီးမှာ ဗမာ့ စာနယ်ဇင်း က လူငယ်များ အလေးထား ကြိုးစား မိမိ အရည်အချင်းကို မိမိ မြှင့်ကြဖို့၊ မိမိ ကျင့်ဝတ်၊ သိက္ခာ ကို စောင့်တည်ကျဖို့ တိုက်တွန်းလိုတယ်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ရသဆောင်းပါးစုံ, ငြိမ်းချမ်းအေး

2 Responses to မထူးဆန်းတဲ့ အမှားများ

  1. မောင်ရင်ငတေ on January 7, 2014 at 10:51 pm

    နောက်နေ့မှ
    အမှားပြင်ပေးပါမယ်၊
    ဒီကနေ့တော့
    သည်းခံကြပါအုံး။
    (ကြေးမုံကိုယ်စား)
    https://www.facebook.com/photo.php? fbid=732891426723987&set=a.103426853003784.7136.100000094105776&type=1&theater

    • soe on January 8, 2014 at 12:06 pm

      စာရေးသူ ခင်ဗျားလည်းအမှားတွေရေးတာပြင်ပါ
      စာရေးဆရာသတ်တာ ပိုဆိုးပါတယ်

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ရခိုင်ပြည်မြောက်ပိုင်းအရေး မိုးမခဆောင်းပါးများ ထွက်ပါပြီ

By

  ရခိုင်ပြည်မြောက်ပိုင်းအရေး မိုးမခဆောင်းပါးများ ထွက်ပါပြီ (မိုးမခ) နိုဝင်ဘာ ၁၅၊ ၂၀၁၇ ယခုစာအုပ်မှာ...

Read more »

မိုးမခမဂ္ဂဇင်း နောက်ဆုံးထုတ်ကို WE မှာ ဝယ်ပါ

By

မိုးမခမဂ္ဂဇင်း နောက်ဆုံးထုတ်ကို WE မှာ ဝယ်ပါ (မိုးမခ) စက်တင်ဘာ ၂၀၊ ၂၀၁၇...

Read more »

မိုးမခထုတ် မောင်စွမ်းရည်စာအုပ် WE မှာ ဝယ်ပါ

By

မိုးမခထုတ် မောင်စွမ်းရည်စာအုပ် WE မှာ ဝယ်ပါ (မိုးမခ) စက်တင်ဘာ ၂၀၊ ၂၀၁၇...

Read more »

မိုးမခ သြဂတ်စ် ထွက်ပြီ

By

မိုးမခ သြဂတ်စ် ထွက်ပြီ သြဂတ်စ် ၁၅၊ ၂၀၁၇ ပြည်တွင်း ပြည်ပ ကလောင်ရှင်တွေရဲ့...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်