Aung Din – ဝင်ငွေခွန်ကောက်ခံခြင်းမူဝါဒ (Income Tax Policy)

March 23, 2014

(တူမောရိုးသတင်းဂျာနယ်၊ အတွဲ ၁၊ အမှတ် ၄၊ မတ်လ ၁၈၊ ၂၀၁၄)

မြန်မာနိုင်ငံအတွက် ကောင်းနိုးရာရာ (အပိုင်း ၂)

ဝင်ငွေခွန်ကောက်ခံခြင်းမူဝါဒ (Income Tax Policy)

 အောင်ဒင် ။ မတ် ၂၃၊ ၂၀၁၄

 #သက်သာခွင့်များ

 

ဝင်ငွေခွန်ကောက်ခံတဲ့နေရာမှာ ရတဲ့ဝင်ငွေအားလုံးအပေါ် ရာခိုင်နှုံးသတ်မှတ်ပြီး ကောက်ခံတာတော့ မဟုတ်ပါ၊ အခွန်ထမ်းဆောင်သူအတွက် သက်သာခွင့်တွေပေးထားပြီး သက်သာခွင့် (Deduction/Exemption) တွေကို ခုနှိမ်ပြီး ကျန်တဲ့ငွေကိုမှ ဝင်ငွေခွန်စည်းကြပ်သင့်သော ဝင်ငွေ (Taxable Income) လို့ သတ်မှတ်တာပါ၊ အမေရိကန်ပြည်ထောင်စုမှာတော့ သက်သာခွင့်များအဖြစ် အကြမ်းဖျင်းအားဖြင့် (၁) အိမ်ထောင်ဘက် (၂) မှီခိုသူသားသမီး (၃) တက္ကသိုလ်၊ ကောလိပ်ပညာသင်စားရိတ်၊ (၄) ကိုယ်ပိုင်လုပ်ငန်းလုပ်သူများအတွက် ကျန်းမာရေးအာမခံ၊ (၅) ရွှေ့ပြောင်းစားရိတ်၊ စတာတွေ သက်သာခွင့်ပြုပါတယ်၊ ၂၀၁၃ ခုနှစ်အတွက် ဝင်ငွေခွန်စည်းကြပ်မှုအရ ဥပမာအားဖြင့် အခွန်ထမ်းဆောင်သူဟာ လူလွတ်ဖြစ်မယ်ဆိုရင် ဒေါ်လာ ၆၁၀၀၊ အိမ်ထောင်ဦးစီးဖြစ်မယ်ဆိုရင် ဒေါ်လာ ၈၉၅၀ သက်သာခွင့်ပြုပါတယ်၊ အိမ်ထောင်ဘက်နဲ့ မှီခိုသူသားသမီးများအတွက် တစ်ယောက်ကို ဒေါ်လာ ၃၉၀၀ နှုံး သက်သာခွင့်ပြုပါတယ်၊ သားသမီး သို့မဟုတ် ကိုယ်တိုင်ရဲ့ တစ်နှစ်အတွင်းသုံးစွဲခဲ့တဲ့ တက္ကသိုလ်၊ ကောလိပ်ပညာသင်စားရိတ်ကို သက်သာခွင့်ပြုပါတယ်၊ နေအိမ်ရွှေ့ပြောင်းလို့ ကုန်ကျစားရိတ်၊ ကျန်းမာရေးအာမခံအတွက် ပေးရငွေများကို သက်သာခွင့်ပြုပါတယ်၊ အိမ်ထောင်ကွဲနေသူဖြစ်ရင် သူပေးဆောင်နေရတဲ့ မယားစားရိတ်၊ ကလေးစားရိတ်တွေကို သက်သာခွင့်ပြုပါတယ်၊ အရစ်ကျစနစ်နဲ့ အိမ်ဝယ်ထားတယ်ဆိုရင် အိမ်အတွက် လစဉ်ပေးဆောင်ရငွေ၊ အစိုးရထံက ပိုက်ဆံချေးပြီး ကျောင်းတက်ထားလို့ အကြွေးပြန်ဆပ်နေရတယ်ဆိုရင် လစဉ်ပေးသွင်းနေရတဲ့ အတိုးငွေ စတာတွေကို သက်သာခွင့်ပြုပါတယ်၊ ကိုယ်ပိုင်လုပ်ငန်းလုပ်ကိုင်သူများအတွက် အခြားသက်သာခွင့်များလည်း ရှိပါသေးတယ်၊ အဆိုပါ သက်သာခွင့်များအားလုံးကို ပေါင်းပြီး တစ်နှစ်တာဝင်ငွေထဲက နှုတ်ပြီးမှ ကျန်တာကို အခွန်စည်းကြပ်သင့်သောဝင်ငွေလို့ သတ်မှတ်တာပါ၊

 

မြန်မာနိုင်ငံမှာတော့ သက်သာခွင့်တွေ သိပ်မများလှပါ၊ အိမ်ထောင်ဘက်တစ်ဦးအတွက် ကျပ် သုံးသိန်း၊ ကလေးတစ်ယောက်အတွက် ကျပ် ၂သိန်း သက်သာခွင့်ပေးတယ်လို့ သိရပါတယ်၊ လက်ရှိဥပဒေအရ ဥပမာအားဖြင့် တစ်နှစ်ကို ဝင်ငွေ ကျပ် (၁၅) သိန်းရသူတစ်ဦးဟာ အိမ်ထောင်ဘက်အတွက် ကျပ် (၃) သိန်း၊ ကလေး (၂) ယောက်အတွက် ကျပ် (၄) သိန်း၊ စုစုပေါင်း ကျပ် (၇) သိန်းသာ သက်သာခွင့်ရပြီး ကျန်တဲ့ကျပ် (၈) သိန်းအပေါ်မှာ ဝင်ငွေခွန်ဆောင်ရမှာဖြစ်ပါတယ်၊ သက်သာခွင့်နည်းတော့ အခွန်စည်းကြပ်ရမည့် ဝင်ငွေများပြီး ဝင်ငွေခွန်ပမာဏလည်း များပြားပါတယ်၊ သက်သာခွင့်စုစုပေါင်းဟာ ဝင်ငွေရဲ့ ၂၀ ရာခိုင်နှုံး သို့မဟုတ် ကျပ် သိန်း (၁၀၀) ထက်မကျော်ရလို့လည်း ကန့်သတ်ထားပါတယ်၊

မြန်မာနိုင်ငံမှာ အထက်ကဖော်ပြခဲ့တဲ့ အတိုင်း တစ်နှစ်ဝင်ငွေ ကျပ် (၂၄) သိန်းရှိသူတွေတောင်မှ ကုန်ဈေးနှုံးကြီးမြင့်မှုနဲ့ အထွေထွေစီးပွါးရေးကြပ်တည်းမှုကြီးအတွင်းမှာ မနိုင်မနင်းရုန်းကန်လှုပ်ရှားနေကြရတာမို့ လူလတ်တန်းစားလို့ မခေါ်နိုင်ပါ၊ သူတို့လည်း ဆင်းရဲနွမ်းပါးသူများဖြစ်ကြပါတယ်၊ ဒီတော့ ဝင်ငွေခွန်ကောက်ခံရာမှာ သက်သာခွင့်တွေ ပိုပြီးပေးသင့်ပါတယ်၊ မြန်မာနိုင်ငံမှာ မြေမဲ့၊ ယာမဲ့၊ နေအိမ်မဲ့ပြည်သူတွေက များလွန်းလှပါတယ်၊ 

 

ဒါကြောင့်မို့ မိသားစုတစ်စုရဲ့ ဘဝကို လေ့လာကြည့်မယ်ဆိုရင် သူတို့ရှာဖွေရရှိတဲ့ တစ်လတာဝင်ငွေရဲ့ အများစု (၄၀ ကနေ ၆၀ ရာခိုင်နှုံးလောက်) ကို အိမ်ငှါးခအဖြစ် သုံးစွဲနေကြရပါတယ်၊ ရန်ကုန်ကို ဗဟိုပြုပြီး အိမ်ငှါးခတွေကို လေ့လာကြည့်တဲ့အခါ မြို့စွန်မြို့ဖျားတွေမှာ အိမ်လခ တစ်လ ကျပ် ခြောက်သောင်းကနေ တစ်သိန်းကျော်၊ ဆင်ခြေဖုန်းမြို့နယ်တွေမှာ ကျပ် တစ်သိန်းနဲ့ နှစ်သိန်းကြား၊ ရန်ကုန်မြို့လယ်က တိုက်ခန်းတွေက တစ်လကို ကျပ် နှစ်သိန်းကနေ လေးသိန်းအထိရှိကြပြီး ဒီနှုံးတွေအားလုံးဟာ အိမ်သေးသေးလေးတစ်လုံးရဲ့ တစ်ခြမ်း၊ ဒါမှမဟုတ် ပေ ၂၀ X ပေ ၄၀ တိုက်ခန်းကျဉ်းကလေး အတွက်ဖြစ်ပါတယ်၊ ပြီးတော့ လစာကို တစ်လတစ်ကြိမ်ပေးရတာ မဟုတ်ပဲ ခြောက်လစာ၊ တစ်နှစ်စာပေါင်းပြီး ကြိုပေးကြရတာပါ၊ စာချုပ်သက်တမ်းတိုးတာနဲ့အမျှ အိမ်လခလည်း တိုးပါသေးတယ်၊ ဝင်ငွေထဲက အများစုကို နေဖို့အတွက် မဖြစ်မနေသုံးလိုက်ရပြီး ကျန်တဲ့ပိုက်ဆံက လမ်းစားရိတ်၊ စားသောက်စားရိတ်တွေနဲ့ မြန်မြန်ဆန်ဆန်ကုန်ဆုံးသွားတာပါ၊ ဒါကြောင့်မို့ အစိုးရက သာမာန်ပြည်သူများရဲ့ ဘဝအခက်အခဲတွေကို စာနာတဲ့အနေနဲ့ ဝင်ငွေခွန်သက်သာခွင့်တွေ ပိုပြီးခွင့်ပြုဖို့လိုအပ်ပါတယ်၊

 

#ဝင်ငွေခွန်စည်းကြပ်နှုံး

 

မြန်မာနိုင်ငံမှာ လက်ရှိကျင့်သုံးနေတဲ့ ဝင်ငွေခွန်စည်းကြပ်တဲ့ နှုံးက သိပ်မများလှပါ၊ ဒါပေမည့် မမျှတပါ၊ အောက်ပါဇယားကို ကြည့်ပါ၊

 

သတ်မှတ်ထားသော သက်သာခွင့်များခုနှိမ်ပြီးနောက် အခွန်စည်းကြပ်ထိုက်သည့် ဝင်ငွေနှင့် အခွန်နှုံးထား

စဉ်

မှ (ကျပ်)

အထိ (ကျပ်)

စည်းကြပ်ရန်အခွန်နှုံး

ပေးဆောင်ရမည့် အခွန်ငွေ (ကျပ်)

ပေးဆောင်ရမည့် အခွန်ငွေပေါင်း(ကျပ်)

၅ သိန်း

၁ ရာခိုင်နှုံး

၅,၀၀၀

၅,၀၀၀

၅၀၀,၀၀၁

၁၀ သိန်း

၂ ရာခိုင်နှုံး

၁၀,၀၀၀

၁၅,၀၀၀

၁,၀၀၀,၀၀၁

၁၅ သိန်း

၃ ရာခိုင်နှုံး

၁၅,၀၀၀

၃၀,၀၀၀

၁,၅၀၀,၀၀၁

၂၀ သိန်း

၎ ရာခိုင်နှုံး

၂၀,၀၀၀

၅၀,၀၀၀

၂,၀၀၀,၀၀၁

၃၀ သိန်း

၅ ရာခိုင်နှုံး

၅၀,၀၀၀

၁၀၀,၀၀၀

၃,၀၀၀,၀၀၁

၄၀ သိန်း

၆ ရာခိုင်နှုံး

၆၀,၀၀၀

၁၆၀,၀၀၀

၎,၀၀၀,၀၀၁

၆၀ သိန်း

၇ ရာခိုင်နှုံး

၁၄၀,၀၀၀

၃၀၀,၀၀၀

၆,၀၀၀,၀၀၁

၈၀ သိန်း

၉ ရာခိုင်နှုံး

၁၈၀,၀၀၀

၄၈၀,၀၀၀

၈,၀၀၀,၀၀၁

၁၀၀ သိန်း

၁၁ ရာခိုင်နှုံး

၂၂၀,၀၀၀

၇၀၀,၀၀၀

၁၀

၁၀,၀၀၀,၀၀၁

၁၅၀ သိန်း

၁၃ ရာခိုင်နှုံး

၆၅၀,၀၀၀

၁၃ သိန်း ၅၀၀၀၀

၁၁

၁၅,၀၀၀,၀၀၁

၂၀၀ သိန်း

၁၅ ရာခိုင်နှုံး

၇၅၀,၀၀၀

၂၁ သိန်း

၁၂

၂၀၀ သိန်း ၁ ကျပ်နှင့်

အထက်

၂၀ ရာခိုင်နှုံး

 

 

 

အထက်ပါဇယားအရ မြန်မာနိုင်ငံမှာ ဝင်ငွေခွန်ကောက်ခံတဲ့ အဆင့် (၁၂) ဆင့်ရှိပြီး ဝင်ငွေခွန်နှုံးက အနည်းဆုံး (၁) ရာခိုင်နှုံးကနေ အများဆုံး (၂၀) ရာခိုင်နှုံးအထိရှိတာတွေ့ရပါတယ်၊ ဒါပေမည့် လက်တွေ့မှာ သတ်မှတ်ထားတဲ့ ရာခိုင်နှုံးထက် ပိုနည်းပါတယ်၊

 

ဥပမာ၊ အခွန်စည်းကြပ်နိုင်တဲ့ ဝင်ငွေ ကျပ်(၃၀) သိန်းကနေ ၄၀သိန်း အထိကို (၆) ရာခိုင်နှုံးနဲ့ ဝင်ငွေခွန် ကျပ် ၆သောင်း စည်းကြပ်ပါတယ်၊ (၁) ကျပ်ကနေ ကျပ် (၃၀) သိန်းအထိအတွက် စည်းကြပ်တဲ့ ဝင်ငွေခွန် တစ်သိန်းကျပ်နဲ့ ပေါင်းလိုက်တော့ စုစုပေါင်း ကျပ် ၁သိန်း ၆သောင်း အခွန်ဆောင်ရပါတယ်၊ ဒါကြောင့်မို့ သက်သာခွင့်များခုနှိမ်ပြီး တစ်နှစ်ဝင်ငွေ ကျပ် (၄၀) သိန်း ရှိသူတစ်ဦးဟာ ကျပ် တစ်သိန်းခြောက်သောင်း အခွန်ဆောင်ရတာမို့ ဝင်ငွေရဲ့ (၄) ရာခိုင်နှုံးသာဖြစ်ပါတယ်၊

 

အလားတူပဲ သက်သာခွင့်များခုနှိမ်ပြီး ဝင်ငွေ ကျပ်သိန်း (၁၅၀) နဲ့ သိန်း (၂၀၀) အတွင်းကို အခွန်ငွေ (၁၅) ရာခိုင်နှုံးကောက်ခံတယ်လို့ ဆိုပါတယ်၊ ဒါပေမည့် အမှန်တကယ်ပေးရတာက ကျပ် (၂၁သိန်း) ဖြစ်လို့ (၁၀ ဒဿမ ၅) ရာခိုင်နှုံးသာဖြစ်ပါတယ်၊ ကျပ် သိန်း (၂၀၀) နဲ့အထက်ဝင်ငွေရှိသူတွေကို (၂၀) ရာခိုင်နှုံးအခွန်ကောက်တယ်လို့ ဆိုပါတယ်၊ ကျပ် သိန်း (၄၀၀) ဝင်ငွေရှိသူရဲ့ အမှန်တကယ် အခွန်ဆောင်ရငွေက ကျပ် (၆၁) သိန်းသာဖြစ်လို့ (၁၅ ဒဿမ ၂၅) ရာခိုင်နှုံးသာ ရှိပါတယ်၊ 

 

အမေရိကန်ပြည်ထောင်စုမှာ ဝင်ငွေခွန်ကောက်ခံနှုံး (၇) ဆင့်ရှိပြီး အနည်းဆုံး သက်သာခွင့်များခုနှိမ်ပြီးသား ဝင်ငွေရဲ့ (၁၀) ရာခိုင်နှုံးကနေ အများဆုံး (၃၉ ဒဿမ ၆) ရာခိုင်နှုံးအထိ အခွန်စည်းကြပ်ပါတယ်၊ ကြွယ်ဝချမ်းသာသူလို့ သတ်မှတ်ခံရတဲ့ တစ်နှစ်ဝင်ငွေ ဒေါ်လာ တစ်သိန်းအထိ ရသူတွေဟာ ပျမ်းမျှခြင်း (၁၉ ဒဿမ ၅) ရာခိုင်နှုံး အခွန်ဆောင်ရပါတယ်၊ ဒေါ်လာ လေးသိန်းအထိ ရရှိသော လူလွတ်တွေ (Single) ဟာ (၂၉) ရာခိုင်နှုံး၊ ဒေါ်လာ ငါးသိန်းနဲ့အထက်ဝင်ငွေရှိသူ အိမ်ထောင်ဦးစီးတွေ (Head of Household) ဟာ (၃၀) ရာခိုင်နှုံး အခွန်ဆောင်ရပါတယ်၊ 

 

မြန်မာနိုင်ငံမှာ အမေရိကန်ပြည်ထောင်စုလောက် ဝင်ငွေခွန်နှုံးမြင့်မားဖို့ မသင့်ပေမည့် လက်ရှိနှုံးထားများကို ပြုပြင်သင့်ပါတယ်၊ သက်သာခွင့်တွေခုနှိမ်ပြီး တစ်နှစ်ဝင်ငွေ ကျပ်သိန်း (၁၀၀) နဲ့ အထက်ရှိသူများဟာ နိုင်ငံတော်သမ္မတ၊ ပြည်ထောင်စုဝန်ကြီးများ၊ လွှတ်တော်ဥက္ကဋ္ဌများ၊ တပ်မတော်ကာကွယ်ရေးဦးစီးချုပ်နဲ့ ဗိုလချုပ်ကြီးများ၊ တိုင်းဒေသကြီး နဲ့ ပြည်နယ်ဝန်ကြီးချုပ်များ၊ ဝန်ကြီးများစတဲ့ အစိုးရထိပ်တန်းခေါင်းဆောင်များနဲ့ ကိုယ်ပိုင်လုပ်ငန်းရှင်များ၊ ပုဂ္ဂလိကစီးပွါးရေးသမားများသာ ဖြစ်ကြပါလိမ့်မယ်၊ လစာနှုံး ကျပ် နှစ်သိန်းလေးသောင်းနဲ့ တစ်နှစ်ကို ကျပ် ၂၈သိန်း ၈သောင်းသာရရှိမည့် ညွှန်ကြားရေးမှူးချုပ်၊ ဦးဆောင်ညွှန်ကြားရေးမှူးဆိုတဲ့ အစိုးရဋ္ဌာနက အမြင့်ဆုံးအရာရှိများ၊ တစ်လကို ကျပ် သုံးသိန်းနဲ့ တစ်နှစ်ကို ကျပ် ၃၆သိန်းလောက်သာဝင်ငွေရှိတဲ့ ပြည်ထောင်စုလွှတ်တော်ကိုယ်စားလှယ်များ၊ တစ်လကို ကျပ်နှစ်သိန်းနဲ့ တစ်နှစ်မှ ကျပ် ၂၄သိန်းသာ ရရှိမည့် တိုင်းဒေသကြီး/ပြည်နယ်လွှတ်တော်ကိုယ်စားလှယ်များ မပါဝင်နိုင်ပါ၊ 

 

ဒါကြောင့်မို့ တစ်နှစ်ဝင်ငွေ ကျပ် သိန်း (၁၀၀) အထိကို ဝင်ငွေခွန် (၁၁) ရာခိုင်နှုံးကောက်ခံတာ သင့်တော်ပေမည့် ကျပ် သိန်း (၁၀၀) ကနေ သိန်း (၂၀၀) အထိကို ဝင်ငွေခွန် (၂၀) ရာခိုင်နှုံး ၊ ကျပ်သိန်း (၂၀၀) ကနေ ကျပ် သိန်း (၅၀၀) အထိကို ဝင်ငွေခွန် (၂၅) ရာခိုင်နှုံး ၊ ကျပ် သိန်း (၅၀၀) နဲ့အထက်ကို ဝင်ငွေခွန် (၃၀) ရာခိုင်နှုံး ကောက်ခံသင့်ပါတယ်၊

 

# အစိုးရ၊ ပြည်သူနှင့် အခွန်ဆောင်ခြင်း

 

ဘယ်တိုင်းပြည်မှာမဆို သတ်မှတ်ထားတဲ့ အခွန်ငွေပေးဆောင်ခြင်းဟာ နိုင်ငံသားတိုင်း မဖြစ်မနေထမ်းဆောင်ရမည့် တာဝန်တစ်ခုဖြစ်ပါတယ်၊ အစိုးရရဲ့ အသုံးစားရိတ်တွေအားလုံးကို တိုင်းသူပြည်သားများပေးဆောင်တဲ့ အခွန်ငွေ၊ နိုင်ငံပိုင်စီးပွါးရေးနဲ့ ကုန်ထုတ်လုပ်ငန်းများမှ ရရှိငွေ၊ နိုင်ငံပိုင် မြေပေါ်မြေအောက်သယံဇာတပစ္စည်းများ ထုတ်လုပ်ရောင်းချခြင်းမှ ရရှိငွေများနဲ့ ကျခံရပါတယ်၊ အစိုးရဘဏ္ဏာငွေဆိုတာ ပြည်သူလူထုပိုင်တဲ့ ပိုက်ဆံပါ၊ အစိုးရကို ပြည်သူလူထုက ရွေးချယ်ခန့်အပ်ပြီး လစာပေးစေခိုင်းနေတာပါ၊ အစိုးရကလည်း ပြည်သူလူထုက အပ်နှင်းတဲ့ အာဏာနဲ့ ပေးအပ်တဲ့ ပိုက်ဆံတွေကို ပြည်သူလူထုအကျိုးစီးပွါးအတွက် မှန်မှန်ကန်ကန် ဖြောင့်ဖြောင့်မတ်မတ် စီမံခန့်ခွဲ သုံးစွဲရမှာပါ၊ အစိုးရက နိုင်ငံ့ဘဏ္ဏာငွေကို ဘယ်လိုသုံးစွဲသလဲဆိုတာကို ပြည်သူလူထုကို မှန်မှန်ကန်ကန်တင်ပြဖို့ တာဝန်ရှိပြီး အစစ်ဆေးလည်း ခံနိုင်ရမှာပါ၊

 

အောင်ဒင်
မတ်လ (၄)၊ ၂၀၁၄

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:သတင်းဆောင်းပါး, အောင်ဒင်

One Response to Aung Din – ဝင်ငွေခွန်ကောက်ခံခြင်းမူဝါဒ (Income Tax Policy)

  1. Zawni Gyi on March 25, 2014 at 5:25 am

    စာအုပ်ထဲမှာတော့ ဥပဒေက တော်တော်ကောင်းပါတယ်။ ဗျူးနေတာပဲ၊ မြန်မာဆိုရှယ်လစ်လမ်းစဉ်၊ န.အ.ဖ ခေတ် ပုံနှိပ်ထုတ်သမျှ စာအုပ်တွေမှာ ပါတဲ့ ဒို့အရေးတာဝန်၎ပါး တွေကို သတိရပါတယ်။ ရေးထားတာတွေက အကောင်ထည်မဖေါ်နိုင်တာချည်းပဲ ဖြစ်ခဲ့တယ်။ ဒီအခွန်ဥပဒေက အလွန်အရေးကြီးပါတယ်။ လူထုဝင်ငွေ တိုးတက်လာတာနဲ့ ဥပဒေက တရားမျှတမှဖြစ်ပါမယ်။

    စင်ကာပူမှာတော့ တစ်လ ဝင်ငွေ ဒေါ်လာ၂၀၀၀ (ကျပ်သိန်း ၁၆သိန်းဆို လုံးဝမကောက်ပါဘူး။ လျှော့ပေါ့မှုတွေကြောင့် ဖြစ်ပါတယ်။

    Corporate Tax ကို သေချာစွာ အကောင်ထည်ဖေါ်ရင် ခရိုနီများ နှစ်ပေါင်းများစွာ အခွန်မဆောင်ခဲ့ဘူး။ အစိုးရသစ် ၃နှစ်ခန့်လဲ အခွန်ရှောင်နိုင်တာ အဆုံးသတ်သွားမှာပါ။ နိုင်ငံဝင်ငွေ နဲ့ ဂျီဒီပီ တိုးတက်ပြီး % per GDP ကို ၂% ကနေ နိုင်ငံတကာအဆင့် ၄၀% ရောက်အောင် ဘယ်လိုလုပ်ကြမလဲ?။ ၅နှစ်စီမံကိန်း၊ ၁၀နှစ်စီမံကိန် Tax Implementation လုပ်ရပါဦးမယ်…။

ကြော်ငြာ … ကြော်ငြာ …

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

မိုးမခနဲ့ ပတ်သက်သမျှ

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ

By

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ မိုးမခစာအုပ်စင်၊...

Read more »

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ

By

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ (မိုးမခစာအုပ်စင်) ဇန်န၀ါရီ ၃၁၊ ၂၀၁၉...

Read more »

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags