ဟံသာဝတီ ဦးဝင်းတင် – ကဏန်းမျက်စိ

April 21, 2014

ကဏန်းမျက်စိ

ဟံသာဝတီ ဦးဝင်းတင်

အတွေးအမြင်၊ ၁၉၈၈ မေလ (မိုးမခ ပြန်လည်ဆန်းသစ်ခြင်း)

ဧပြီ ၂၁၊ ၂၀၁၄

မျှဝေသူ ကိုအောင်မျိုးထွန်း

@ https://www.facebook.com/aungmyo.tun.52?fref=nf

မိတ်ဆွေ တဦးက ပြောပြသည်။  ကဏန်းကောင်သည် ခြင်ကိုက်ခံရလျှင် သေသည် ဟူသတတ်။

ကဏန်းကောင်သည် ရေ သတ္တ၀ါဖြစ်သည်။  သံချပ်ကာ စစ်ယာဉ်နှင့်တူသည်ဟူ၍ နှိုင်းခိုင်းရဖွယ် ရှိလောက်အောင် အင်အားခိုင်ဖြီးသော အကောင်မျိုးဖြစ်သည်။  နူးညံ့သောအသားကို ထူထဲ မာကျောသော အခွံဖြင့် ဖုံးကာထားသည်။  အသား နေရာလပ် မကျန်။  ခြေချောင်း၊ လက်ချောင်းတို့ သည်ပင်လျှင် သံချောင်းတမျှ မာကျောသောအခွံဖြင့် လွှမ်းအုပ်လျက်ရှိသည်။

ကဏန်း၏အခွံသည် အခွံ ဟု ဆိုရသော်လည်း သာမန် ငါး ပုစွန်တို့ ၏ အကြေးခွံမျိုး မဟုတ်။  သတ္တ၀ါနှင့် မမျှအောင် မာကျောသောအခွံ၊ ထူထဲသောအခွံဖြစ်သည်။  နူးညံ့ ပျော့ပျောင်းသော ၀မ်းဗိုက်သား နေရာတွင်ပင်လျှင် ငါးကြင်းမြီးကွက် အကြေးခွံထက် ပိုမို မာကျောထူထဲသော အခွံများ အချပ်အချပ် ထပ်လျက် ဖုံးကာထားသေးသည်။  ကဏန်းကောင်တွင် အသားပေါ်သည့်နေရာ အလျဉ်းမရှိဟူ၍ ဆိုရမလောက်ဖြစ်သည်။

ယင်းသို့ သော အအုပ် အခွံ၊ အကာအကွယ်ကြောင့် ထိုသတ္တ၀ါသည် မသေနိုင်၊ မပျောက်နိုင်သော အဆင့်အခြေသို့  မရောက်။  အလွယ်နှင့်ပင် သေနိုင်သည်။ ဆင်ပြောင်ကြီး နင်းခံရ၍ သေခြင်းမျိုး မဟုတ်၊ ခြင်ကောင်လေး ကိုက်၍ သေခြင်းမျိုး ဖြစ်သည်။  ထိုအချက်သည် မယုံချင်စရာပင် ဖြစ်သည်။

မိတ်ဆွေဖြစ်သူက ထိုအချက်ကို အခိုင်အမာ ဆိုသည်။ သက်သေထူနိုင်သည်ဟု ဆိုသည်။ ရေဖြည့်အိုးခွက် စသည်တို့ တွင် အဖုံးအကာ အလုံပိတ်၍ ကဏန်းကို ထည့်ထားမှသာ စိတ်ချရသည်ဟု ဆိုသည်။ သို့မဟုတ်ပါက အခန်းတွင်းရှိ ခြင်ကောင်တို့ က ကဏန်းကို ကိုက်လိမ့်မည်၊ ခြင်ကိုက်ခံရလျှင် ကဏန်းသေလိမ့်မည်။

ကဏန်း၏ ကိုယ်ပေါ်တွင် ခြင်ကိုက်စရာ နေရာမရှိ။ မှန်သည်။  သို့ရာတွင် ခြင်ကောင်က ကိုက်၍ရသည့် နေရာကို ရှာတတ်သည်။ ထိုနေရာမှာ ကဏန်း၏ မျက်စိဖြစ်သော ဟူ၏။

ကဏန်းမျက်စိသည် မျက်နှာအပြင်၏ အပေါ်သို့  စူးထောင် ထွက်နေသည်။  မှိတ်၍ မရ၊ ပိတ်၍ မရ။ မျက်လုံးအိမ်အတွင်း ငုပ်လျှိုးသွင်း၍ မရ။ ဇက်ပုသလို ပုရုံ ပု၍ ရသည်။  ခရုခွံထဲ ခရုကောင် လျှိုးဝင်သလို လျှိုးဝင်၍ မရ။ မျက်စိက အပြူးသား ကျန်မြဲ ကျန်သည်။  ထိုမျက်စိကို ခြင်ကောင်က ကိုက်သည်။  မျက်စိ ခြင်ကိုက်ခံရသော် ကဏန်း သေသည်။

သံချပ်ကာ စစ်ယာဉ်လို ထူထဲသော အအုပ်အခွံ ကာဖုံးထားသည့် ကဏန်း၏ မျက်စိကို ခြင်ကိုက်နိုင်သည်။ မျက်စိ ခြင်ကိုက်ခံရလျှင် ကဏန်း သေသည်။

ထိုအချက်နှင့် ဆက်စပ်လျက် တွေးကြည့်စရာ သဘောတရပ် ပေါ်လာသည်။  ထိုသဘောမှာ ဤသို့ ဖြစ်သည်။

မည်မျှလောက် အထိပင် ဂုဏ်ဟိတ်သိက္ခာ၊ အင်အားစွမ်းရည် ကြီးမားသော အရာပင်ဖြစ်စေ ပျော့ကွက်၊ ဟာကွက်၊ အားနည်းချက် ရှိသည်သာ ဖြစ်ရသည် ဆိုသော အချက်ပေတည်း။ ထို ပျော့ကွက်၊ ဟာကွက်၊ အားနည်းချက်ကို ထိုးနှက် ဖျက်ဆီးခြင်း ခံရသည့်အခါ ထိုအရာသည် ကြီးမားသော အကာအကွယ်များ ရှိနေသည့်ကြားမှပင် ပြိုကွဲပျက်စီးခြင်းအဖြစ်သို့  ရောက်ရသည်သာ ဖြစ်သည် ဆိုသော အချက်ပေတည်း။

ထိုသဘောသည် ရှေးပဝေဏီအခါမှစ၍ လူ့ သမိုင်းတွင် ထင်ရှားခဲ့သောအချက် ဖြစ်သည်။  ထိုသဘောကို ထင်ရှားစေသော ဖြစ်ရပ်များသည် မြန်မာ့သမိုင်းတွင် အကျော်အကြား တည်ရှိခဲ့သည်။

ပုဂံ အနော်ရထာမင်း သထုံပြည်ကို ချီတက်သိမ်းပိုက်ရာ၌ မြို့ အစောင့်အကြပ် ထူပြော၍ လုပ်ကြံမရနိုင် ဖြစ်နေသည်။  နောက်ဆုံးတွင်မှ မြို့ ရိုးတနေရာ၌ အကာအကွယ် ကြက်မ တ၀ပ်စာ အလစ်အလပ်ရှိကြောင်း သိလာသည်။   ထိုနေရာမှ ၀င်တိုက်သည်။ သထုံကျသည်။

“ကဏန်းမျက်စိ” သဘောကို ထင်ရှားစေသော သမိုင်းဖြစ်ရပ်တခု ဖြစ်လေသည်။

မွန် သူရဲကောင်း သမိန်ဗရမ်းနှင့် တရုတ်စစ်သည်ကျော် ဂါမဏိတို့ ၏ စီးချင်းထိုးပွဲလည်း ထိုသဘော၏ ထင်ရှားသော ပြယုဂ်ဖြစ်သည်။

ဂါမဏိသည် သံကွန်ချာ ချပ်ဝတ်တန်ဆာကို ကိုယ်လုံးပြည့် ၀တ်လျက် သမိန်ဗရမ်းနှင့် စီးချင်းထိုးသည်။  ဂါမဏိ၏ သံကွန်ချာ ချပ်ဝတ်တန်ဆာသည် ဓားမပေါက်၊ လှံမပေါက်၊ မီးမပေါက် အကာအကွယ်ဖြစ်သည်။ ဤသည်မှာ အပြင်ပန်းအမြင် ဖြစ်သည်။  သမိန်ဗရမ်းက ထိုသို့ မမြင်။ သမိန်ဗရမ်း မြင်သည်မှာ ဂါမဏိ၏ သံကွန်ချာ ချပ်ဝတ်တန်ဆာ လက်မောင်းချိုင်းကြား၌ လှံတဖျားစာ အကွက်အလပ်၊ အလစ်အဟင်းရှိနေသည် ဆိုသောအချက် ဖြစ်သည်။

သမိန်ဗရမ်းသည် ထိုအကွက်အလပ်ကို အဲ မောင်း လှံ ပျံ စိုက်သည်။ ဂါမဏိကျသည်။

အနောက်တိုင်း စာပေနှင့် သမိုင်းတို့ တွင်လည်း တ်သဘောတည်းသော အချင်းအရာ ဖြစ်စဉ်ဖြစ်ရပ်တို့ ကို မော်ကွန်းမှတ်တမ်းများအဖြစ် တွေ့ နိုင်သည်။

ခေါမစာဆိုကြီး ဟိုးမား၏ အီလိယက် မော်ကွန်းကဗျာကြီးမှ သူရဲကောင်းတဦးဖြစ်သူ အာချိလိဖြစ်ရပ်သည်လည်း ထိုသဘော၏ ပြယုဂ်ဖြစ်သည်။

အာချိလိ မွေးကင်းစအရွယ်တွင်ဖြစ်သည်။ မိခင်ဖြစ်သူ ပင်လယ်နတ်သမီးက စတိုက်မြစ်ထဲတွင် သားကို ရေနှစ်သည်။ မြစ်ရေဖြင့် တကိုယ်လုံးကို စွတ်စိုစေသည်။  သားဖြစ်သူအား ဓားလှံကျည်မီး ပြီးငြိမ်းလုံခြုံစေရန် ဖြစ်သည်။  မိခင်ဖြစ်သူက သားငယ်အား အသက်ရှည်စွာ အနာမဲ့ကြောင်း ဆေးစွမ်းကောင်းဖြင့်  ထုံမွှမ်း ကာကွယ်ပေးခြင်း ဖြစ်သည်။ သို့ရာတွင် မိခင်လက် ဆုပ်ကိုင်ခဲ့သော သားငယ်၏ ဖနောင့်ခြေဖျားသည် စတိုက်မြစ်ရေ စွတ်စိုနိုင်ခြင်း မရှိခဲ့။  သို့ဖြင့် ထိုနေရာသည် ဓားလှံမီးပေါက် ကူးရောက်ထိရှမှု ကင်းလွတ်ခြင်း မရှိချေလေ။

အာချိလိ လူလားမြောက်ချိန်နှင့် ဟယ်လင်မင်းသမီးကို အကြောင်းပြု၍ ထရိုဂျင် စစ်ပွဲကြီးဖြစ်ပွားချိန် ဆုံကြိုက်သည်။  ထိုစစ်ပွဲကြီးတွင် အာချိလိ ၀င်ရောက် တိုက်ခိုက်သည်။ အောင်ပွဲအလီလီ ရသည်။ ထရိုဂျင်ခေါင်ချုပ် သူရဲကောင်း ဟက်တာကို စီးချင်းထိုးပြီး သုတ်သင်သည်။  နောက်ဆုံး အာချိလိ ကိုယ်တိုင်လည်း တိုက်ပွဲတွင်ကျသည်။ ရန်သူ့ ဘက်မှ ပစ်လွှတ်သောမြားက အာချိလိ၏ ခြေဖနောင့်ကို လာစိုက်သည်။  ဓားကျိုး၍လှံခွေ မနာမသေသူဟု ကျော်ကြားသော မဟာသူရဲကောင်းကြီး အာချိလိကျသည်။

(စကားစပ်၍ဆိုရလျှင် ထရိုဂျင် သူရဲကောင်း ဟက်တာ ကျဆုံးရသည်မှာလည်း ဟက်တာ၏ သံချပ်ဝတ်တန်ဆာ ကိုယ်ထည်နှင့် ခေါင်းစွပ်အဆက် လည်ပင်းနေရာ၌ အလပ်ပေါ်သည်ကို အာချိလိ လှံပစ်စိုက်၍ ကျဆုံးရခြင်း ဖြစ်သည်)

ထိုသမိုင်း ဒဏ္ဍာရီကို အကြောင်းပြုလျက် အနောက်တိုင်း ဆိုရိုးစကား၌ “အာချိလိဖနောင့်” ဟူသော ဝေါဟာရ အသုံးတွင်လာခဲ့သည်။

ဧရာမ အရာဝတ္ထု၊ တိုင်းပြည်နိုင်ငံ၊ လူပုဂ္ဂိုလ်တို့ ၏ ပျော့ကွက်၊ ဟာကွက်၊ ပြိုကွက်၊ ပျက်ကွက်တို့ ကို ရည်ညွှန်းတင်စားသော ဝေါဟာရဖြစ်သည်။

ကမ္ဘာ့ သမိုင်းတွင် “အာချိလိဖနောင့်” ဖြစ်ရပ်ပေါင်း မြောက်မြားစွာ ရှိခဲ့သည်။  ထိုအာချိလိဖနောင့် ဖြစ်ရပ်တို့သည် လူ့ ဖွဲအစည်းများ ပျက်စီးခြင်း၊ လက်နက် နိုင်ငံတော်ကြီး ပြိုကွဲခြင်း၊ မင်းဧကရာဇ်များ၊ စစ်သူကြီး၊ စစ်သူရဲကောင်းများ၊ ပုဂ္ဂိုလ်ကျော်များ၊ “လျှောကျနောက်ဆုံး ရှိချေ၏” အဖြစ်သို့ ရောက်စေခဲ့သည်။

လူမှုရေး၊ နိုင်ငံရေး၊ စီးပွားရေး၊ အချင်းကိစ္စ များစွာ၌သာ အာချိလိဖနောင့် ရှိသည်မဟုတ်။  မျက်မှောက်ခေတ်၌ အထွတ်အထိပ်သို့  ရောက်လျက်ရှိသော စက်မှုနည်းပညာကဲ့သို့  နည်းကျစနစ်ကျ လုပ်ငန်းများ၌ပင်လျှင် ပျော့ကွက်၊ ဟာကွက်၊ အားနည်းချက်များ ရှိနေ၍ ဧရာမ လုပ်ငန်း စီမံချက်ကြီးများ ပျက်ပြားရသည့် အဖြစ်မျိုး ကြုံနေကြရသည်။  ငွေကြေးကုဋေကုဋာ ဆုံးရှုံးမှုများ ပေါ်ပေါက်နေရသည်။  လူပေါင်းများစွာ သေကြေမှုများ ဖြစ်ပွားနေရသည်။

ဆိုဗီယက်နှင့် အမေရိကန်ပြည်ထောင်စုတို့ တွင် အဏုမြူဓာတ်ပေါင်းဖိုကြီးများ ဓာတ်ရောင်ခြည် ယိုစိမ့်ခြင်း၊ ပေါက်ကွဲခြင်း စသည်တို့  ဖြစ်ပွားနေရသည်မှာ အမှိုက်ကစ ပြသာဒ်မီးလောင် ဆိုသကဲ့သို့  “အာချိလိဖနောင့်” ကိစ္စများ၏ ချွတ်ယွင်းမှုကြောင့် ငွေကြေးကုဋေကုဋာ ဆုံးရှုံးမှုကြီးများ ကြုံတွေ့ နေခြင်းဖြစ်သည်။

အိန္ဒိယပြည်၌ ဘိုပါးလ်မြို့  ဓာတ်ငွေ့ စက်ရုံကြီး ပေါက်ကွဲမှုကြောင့် လူပေါင်းထောင်ပေါင်းများစွာ အသက်ဆုံးရှုံးခဲ့ရခြင်းမျိုးသည်လည်း အသေးအဖွဲ စက်ကိရိယာတခု၏ ပျော့ကွက်၊ အားနည်းချက်ကြာင့် ဖြစ်ပွားခဲ့ရခြင်းဖြစ်သည်။

အမေရိကန် အာကာသ လွန်းပျံယာဉ်ကြီး “ချဲလင်ဂျာ” ပေါက်ကွဲမှုမှာလည်း ပစ္စည်းလေးတခု၏ အားနည်းမှုကြောင့် ဖြစ်ပေါ်ခဲ့ရခြင်း ဖြစ်သည်။  တွန်းတင်ဒုံးပျံကြီး၏ ကိုယ်ထည်နှစ်ပိုင်း အဆက်နေရာတွင် ကြားခံထည့်ထားသည့် “အိုကွင်း” ခေါ် ဆီလုံကွင်းနေရာမှ မီးလောင်ပေါက်ထွက်ပြီး ဒုံးပျံကြီးတခုလုံး ပျက်စီးခဲ့ရခြင်းဖြစ်သည်။  အမြင့်ပေ ၁၅၀ နီးပါး တွန်းတင်စွမ်းအား ပေါင်ချိန် သုံးသန်း နီးပါးရှိသော ဒုံးပျံကြီး၏ ဧရာမ ကိုယ်ထည်ကြီး နှစ်ခုကြားမှ ဆီလုံကွင်းလေးသည် “ကဏန်းမျက်စိ” ပင် ဖြစ်ချေ၏။  ထို ဆီလုံကွင်းလေး ပျော့ကွက်ကြောင့် ဒေါ်လာ ကုဋေ ၃၀၀ ကျော် ရင်းနှီးမြှုပ်နှံထားရသည့် အာကာသ လွန်းပျံယာဉ် စီမံက်ိန်းကြီး ပျက်ရမတတ်ဖြစ်ခဲ့ရသည်။

လောက၌ မည်သည့်အရာမှ လုံးဝဥဿုံ ခိုင်မြဲခြင်း၊ လုံခြုံခြင်း၊ အားကြီးခြင်း၊ ဘေးမဲ့ခြင်းဟူ၍ မရှိချေ။ အရာရာ၌ “အာချိလိဖနောင့်” ဟူ၍ ရှိမြဲ။ အရာရာ၌ “ကဏန်းမျက်စိ” ဟူ၍ ရှိမြဲ။ လူမှုရေး၊ နိုင်ငံရေး၊ စီးပွားရေး ကိစ္စရပ်များ၌ သူ့ အား ကိုယ့်အား ချင့်တွက်ချိန်ဆရာ၌ ထိုသဘောကို  စေ့စေ့နှလုံးသွင်းတတ်၊မြဲမြဲနှလုံးသွင်းနိုင်ဖို့  လိုအပ်လှပေသည်။

ဝင်းတင်

(၁၉၈၈ ခုနှစ်၊ မေလထုတ် “အတွေးအမြင်” စာစောင်တွင် ပါရှိသော ဆရာဦးဝင်းတင်၏ “ကဏန်းမျက်စိ” ဆောင်းပါးကို ကူးယူ ဖော်ပြခြင်းဖြစ်ပါသည်။  စာရိုက်မူရင်းမျှဝေသူ ကိုအောင်မျိုးထွန်းကို  မိုးမခက ကျေးဇူး အထူးတင်ရှိကြောင်း  မှတ်တမ်းတင်အပ်ပါသည်။)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:U Win Tin, ဟံသာဝတီ ဦးဝင်းတင်, ဦးဝင်းတင်

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ် ထွက်ပြီ

By

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်