ဇာနီကြီး – မြန်မာအစိုးရ၏ System & Structure စနစ်နှင့်အကောင်ထည်ဖေါ်ခြင်း (အခြေခံဥပဒေ)

June 4, 2014

မြန်မာအစိုးရ၏ System & Structure  စနစ်နှင့်အကောင်ထည်ဖေါ်ခြင်း (အခြေခံဥပဒေ)
ဇာနီကြီး
ဇွန် ၄၊ ၂၀၁၄
 

ကာတွန်း – လမင်း (လေးထောင့်ကန်)

ကျွန်တော်ကတော့ လူသားအရင်းမြစ် အခြေခံသမားဖြစ်လို့ စနစ်နဲ့အကောင်ထည်ဖေါ်မှု ဒီ ၂ ခုကို အသေးစိတ်မရေးတော့ပါဘူး။ လူတော် လူကောင်းအများစု ဦးဆောင်တယ်ဆိုရင် နိုင်ငံတိုးတက်ပါမယ်..လို့ခံယူပါတယ်။ တစ်ချိုက လူကိုမပြောပဲ စနစ်ကိုတိုက်ခိုက်ပြီး စည်းရုံးရေးလုပ်သင့်တယ် ပြောကြပါတယ်။ သေချာတာကတော့ အာဏာရထားပြီးရင် တွန်းမချမချင်း ထိုင်ခုံကမဆင်းကြပါဘူး။ တွန်းချဖို့နည်းလမ်းကတော့ ပြည်သူလူထု အင်အားပဲဖြစ်ပါတယ်။ စနစ်တစ်ခုကို တည်ထောင်ချင်ရင် အခြေခံအဆောက်အဦကို အရင်ပျိုးထောင် (အကောင်ထည်ဖေါ်ခြင်း) လုပ်ရပါတယ်။ စနစ် System ကတော့ သီအိုရီဆန်ပါတယ်။ အကောင်ထည်ဖေါ်မှု Structure ကတော့ လက်တွေ့လုပ်ဆောင်မှုဖြစ်ပါတယ်။ လက်ရှိမြန်မာနိုင်ငံဖွဲ့စည်းပုံဥပဒေဟာ ပြည်နယ်/တိုင်း ဒေသအစိုးရကို အာဏာလုံးဝနီးပါး ပေးမထားပါဘူး။ ဗဟိုဦးစီးစနစ်နဲ့ ပြည်နယ်/တိုင်းများကို အထွေထွေအုပ်ချုပ်ရေးဌာနက၊ ဌာနဆိုင်ရာများနဲ့အုပ်ချုပ်နေဆဲဖြစ်ပါတယ်။

စနစ်တစ်ခုကိုအကောင်ထည်ရာမှာ လူထုမပါပဲလုပ်တာမျိုးတွေ အဘက်ဘက်က အလွန်နစ်နာပါတယ်။

အမေရိကန်နိုင်ငံ
အခုခေတ်ဘိုးအေ အအောင်မြင်ဆုံးဒီမိုကရေစီနိုင်ငံကြီးကို စစ်ဗိုလ်ချုပ်ကြီး ဂျော့ဝါရှင်တန် ဦးဆောင်တည်ထောင်ခဲ့ပါတယ်။ ပြည်သူနဲ့ တစ်သားတည်းကျတဲ့ အစိုးရဖြစ်တော့၊ အင်္ဂလိပ်ကိုလိုနီကို စစ်နိုင်ပြီးတဲ့နောက်ပိုင်း ဖွဲ့စည်းပုံအခြေခံဥပဒေကိုဆွဲပါတယ်။ ပညာရှင်များက ၁၇၈၉ နှစ်မှာ ၈လအတွင်းအတွင်းရေးဆွဲပြီး အခုချိန်ထိ ၂၄ကြိမ်ပြင်ဆင်ခဲ့ပြီးဖြစ်ပါတယ်။

ထိုင်းနိုင်ငံ
အိမ်နီးခြင်းထိုင်းနိုင်ငံမှာ ဘုရင်စနစ်ကိုပယ်ဖျက်ပြီးတဲ့ ၁၉၃၂ခုနောက်ပိုင်း ဖွဲ့စည်းပုံအခြေခံဥပဒေပေါင်း ၁၈ခု အသစ်ရေးဆွဲပြဌာန်းခဲ့ပါတယ်။ နောက်ဆုံးအသစ်ရေးဆွဲတာကတော့ ၂၀၀၇ခုနှစ် စစ်တပ်အာဏာသိမ်းပြီးချိန်မှာပါ။ အခု ၂၀၁၄မှာ စစ်တပ်အာဏာထပ်သိမ်းပါတယ်။ ထိုင်းနိုင်ငံကတော့ အခြေခံဥပဒေ ၁၉၉၂ကတော့ အကောင်းဆုံးလို့ပြောနိုင်ပါတယ်။ ဘွဲ့တစ်ခုရမှ အမတ်ဖြစ်ရမယ် ကန့်သတ်ထားပါတယ်။ ၂၀၀၇မှာ စစ်တပ်အာဏာသိမ်းပြီး ဖျက်သိမ်းခဲ့ပါတယ်။ ထိုင်းနိုင်ငံကတော့ မြန်မာအိမ်နီးချင်း အဓိကစီးပွားနိုင်ငံလည်းဖြစ်။ မြန်မာလူမျိုး ၄သန်းကျော် သွားရောက်အလုပ်လုပ်နေတဲ့ နိုင်ငံလည်းဖြစ်တော့ ထိုင်းနိုင်ငံရဲ့လွှမ်းမိုးမှုတွေ မြန်မာစစ်အာဏာပိုင်တွေမှာ အများဆုံးရှိပါတယ်။

အရှေ့တောင်အာရှနိုင်ငံများ
အင်ဒိုနီးရှားဖွဲ့စည်းအုပ်ချုပ်ပုံကတော့ ၁၉၄၅ခုနှစ် ဒုတိယကမ္ဘာစစ်ပြီးတဲ့နောက် ရေးဆွဲအတည်ပြုခဲ့ပြီး၊ အခုချိန်ထိ ပြင်ဆင်တာတွေပဲရှိပါ တယ်။ အင်္ဂလိပ်လက်အောက်နေခဲ့တဲ့ စင်ကာပူ၊ မလေးရှားနိုင်ငံများရဲ့ ဖွဲ့စည်းအုပ်ချုပ်ပုံအခြေခံဥပဒေတွေလည်း အသစ်ရေးဆွဲစရာမလိုခဲ့ပါ။ ဥပဒေဘောင်အတွင်းကပဲ ပြုပြင်ပါတယ်။ ဖိလစ်ပိုင်နိုင်ငံကတော့ အာဏာရှင်စစ်ဗိုလ်ချုပ်က သူစိတ်ကြိုက်ဖွဲ့စည်းပုံအသစ်ရေးဆွဲခဲ့တာကြောင့် ၁၉၈၇ခုနှစ် လူထုအုံကြွဖြုတ်ချခံရပြီး ဖွဲ့စည်းအုပ်ချုပ်ပုံအသစ်ရေးဆွဲ အတည်ပြုခဲ့ပါတယ်။

တရုတ်နှင့် အိန္ဒိယ
မြန်မာနိုင်ငံရဲ့ အကြီးမားဆုံးအိမ်နီးချင် နိုင်ငံကြီး၂ခုဖြစ်ပြီး၊ အထူးသဖြင့် တရုတ်စီးပွားရေး၊ နိုင်ငံရေး လွမ်းမိုးမှုကို မြန်မာ့ခေါင်းဆောင်များ ခံစားနေရပါတယ်။ တရုတ်နိုင်ငံမှာ ကွန်မြူနစ်စနစ်ခေတ် ၁၉၅၂မှာ ဖွဲ့စည်းပုံအခြေခံဥပဒေဆွဲခဲ့ပြီး၊ ပြည်သူ့တော်လှန်ရေးနောက်ပိုင်း ၁၉၈၈မှာ စီးပွားပြုပြင်ပြောင်းလဲမှုနဲ့လိုက်လျောညီတဲ့ ဖွဲ့စည်းပုံအခြေခံဥပဒေ အသစ်ဆွဲခဲ့ပါတယ်။ ၃ကြိမ် ပြင်ဆင်ခဲ့တာ ၂၀၀၄မှာ နောက်ဆုံးပြင်ဆင်ခဲ့ပါတယ်။ အိန္နိယမှာတော့ အင်္ဂလိပ်ထံမှလွတ်လပ်ရေးရပြီးနောက် ၁၉၄၉မှာ အတည်ပြုခဲ့ပါတယ်။ အသစ်ရေးဆွဲစရာ မလိုပဲ ယခုအချိန်ထိ ပြင်ဆင်မှုပေါင်း ၁၂၀ လုပ်ခဲ့ပြီးဖြစ်ပါတယ်။ တစ်နှစ်မှာ ၂ခါ ပြင်ဆင်နေတဲ့ အိန္နိယဖွဲ့စည်းပုံအခြေခံဥပဒေဖြစ်ပါတယ်။

တောင်ကိုးရီးယား
ဒါနဲ့ လက်ရှိမြန်မာနိုင်ငံ သမ္မတဖြစ်သူ အမေရိကားခရီးစဉ်တုံးက ပြောခဲ့ပါတယ်။ သူအလွန်အားကျတဲ့ အာရှတိုက်က စစ်ဗိုလ်ချုပ်၊ တောင်ကိုးရီးယားသမ္မတပတ်ချုံဟီး ဆိုသူအကြောင်းပါ။ စစ်ဗိုလ်ချုပ်တွေ အလွန်အာဏာရှိတာ လူတိုင်းလက်ခံပါတယ်။ လူတော်လူကောင်း ဗိုလ်ချုပ်တွေလည်း မြန်မာပြည်မှာအများကြီးရှိပါတယ်။ လက်ရှိသမ္မတလည်း သမိုင်းမျာတော့ လူတော်လူကောင်းစာရင်းဝင်ဖို့ လမ်းများပါတယ်။ တောင်ကိုးရီးယားမှာ သမ္မတပတ်ချုံဟီး ၁၉၆၂မှာ သမ္မတရွေးကောက်ခံရပြီး၊ တိုင်းပြည်ပြုပြင်ပြောင်းလဲရေးတွေ လုပ်ပါတယ်။ စံနမူနာလုပ်ငန်းများစွာ လုပ်ကိုင်ရင်း၊ သမ္မတအလုပ်ကို ၁၆နှစ်တိုင်အောင် အာဏာရှင်ပုံစံ အုပ်ချုပ်လာပါတယ်။ အတိုက်အခံတွေကို နှိပ်ကွပ်ခဲ့ရင်း ၁၉၇၉မှာ သူ့ရဲ့ထောက်လှမ်းရေးအကြီးကဲရဲ့ လုပ်ကြံခံရပြီးသေဆုံးခဲ့ပါတယ်။ သူ့သမီးဖြစ်သူ Park Geun hye လည်းနောက်ပိုင်းမှာ အတိုက်အခံခေါင်းဆောင်ဖြစ်လာခဲ့ပြီး၊ သူမဖခင် သမ္မတဘဝက အတိုက်အခံတွေကို အပြင်းထန်နှိပ်ကွပ်ခဲ့မှုတွေအတွက် နောင်တရခဲ့တယ်လို့ ဆိုပါတယ်။ သူမဟာ အခု၂၀၁၂မှာ ကမ္ဘာ့စီးပွားရေးထိပ်တန်းဖြစ်နေတဲ့ တောင်ကိုးရီးယားနိုင်ငံရဲ့ သမ္မတအဖြစ်ရွေးကောက်တင်မြှောက်ခံရပါတယ်။ တောင်ကိုးရီးယားနိုင်ငံ သမ္မတပတ်ချုံဟီးဆိုတာ အသက်၅၀အရွယ် မြန်မာများစွာ အမှတ်ရပါတယ်။ မြန်မာ့ဘော်လုံး အာရှထိပ်သီးဖြစ်ခဲ့တုန်းက ပတ်ချုံဟီးဖလားပွဲကို မြန်မာအသင်းအနိုင်ရဗိုလ်စွဲဖူးလို့ပါ။ တောင်ကိုးရီးယားနိုင်ငံ ကမ္ဘာ့ထိပ်တန်းကို တက်လာခြင်းဟာ ဖွဲ့စည်းပုံအခြေခံဥပဒေကောင်းလွန်းလို့ မဟုတ်ပါဘူး။ အုပ်ချုပ်သူခေါင်းဆောင်များမှာ သမ္မတပတ်ချုံဟီးလို လူတော်လူကောင်း၊ စစ်ဗိုလ်ချုပ်တွေ ၊ နိုင်ငံရေးခေါင်းဆောင်တွေ အများကြီးဦးဆောင်ခဲ့လို့ဖြစ်ပါတယ်။ ခေါင်းဆောင်ပိုင်းတွေမှာ လာဘ်စားမှု မကောင်းသတင်းတွေ အများကြီးရှိပေမဲ့ ထိရောက်စွာအရေးယူ၊ ထောင်ဒဏ်ချမှတ်နိုင်ခဲ့တာ မမေ့သင့်ပါဘူး။

မြန်မာနိုင်ငံဖွဲ့စည်းပုံအခြေခံဥပဒေနှင့်စစ်တပ်
လက်ရှိ ကွာစီဂါးဗားမင့် လို့ နိုင်ငံတကာသတ်မှတ်ထားတဲ့ မြန်မာနိုင်ငံဖွဲ့စည်းပုံအခြေခံဥပဒေဟာ စစ်အစိုးရ စစ်ဗိုလ်ချုပ်ဟောင်းများ၊ စိတ်ကြိုက်၊ စနစ်တကျရေးဆွဲခဲ့တဲ့ ဖွဲ့စည်းပုံအခြေခံဥပဒေ ဖြစ်ပါတယ်။ ဒေါ်အောင်ဆန်းစုကြည် အစိုးရသစ်ရဲ့ လွှတ်တော်ထဲမဝင်ခင်ကတည်းက ဖွဲ့စည်းပုံကိုပြင်ဖို့ရည်ရွယ်ချက်နဲ့ အင်အယ်ဒီပါတီ လွှတ်တော်ထဲရောက်ခဲ့ပါတယ်။ အခု လွှတ်တော်သစ်၃နှစ်သက်တမ်းမှာ အစိုးရသစ်ရဲ့နည်းဗျူဟာအောင်မြင်သလား၊ အင်အယ်ဒီရဲ့နည်းဗျူဟာ မှားယွင်းနေသလား ဆန်းစစ်ကြည့်ရင်.. လူတွေအားလုံး ပိုက်ဆံနောက်ကိုလိုက်နေကြတာမြင်ပြီး၊ အစိုးရသစ်အောင်မြင်နေတယ်လို့ ပြောရပါမယ်..။ အခု ဒေါ်အောင်ဆန်းစုကြည် အခြေခံဥပဒေပြင်ဖို့ ၂လတာစည်းရုံးရေးလုပ်နေချိန်မှာ ရုတ်တရက် ထိုင်းနိုင်ငံမှာစစ်တပ်က အာဏာသိမ်းလိုက်ပါတယ်။ မြန်မာစစ်တပ်က စစ်ဗိုလ်ဟောင်းကြီးများကို ဆယ်သက်စားမကုန်အောင် လုပ်ပိုင်ခွင့်၊ လိုင်စင်တွေ၊ အိမ်မြေခြံတွေ ပိုင်ဆိုင်ခွင့်ရသွားပါပြီ။ ဒီတော့ ဒေါ်အောင်ဆန်းစုကြည်နဲ့ အင်အယ်ဒီပါတီအဖို့ အခြေခံဥပဒေကိုပြင်ဖို့လုပ်နေတာလည်း၊ လွှတ်တော်မှာ ပြင်ဆင်ရေးအဖွဲ့ကြီး ဖွဲ့ထားပြီးတော့ တောင်းဆိုတဲ့အတိုင်း ဆွေးနွေးနေကြပြီဖြစ်ပါတယ်။ ဟန်ပြလုပ်ဆောင်မှုပဲ ဖြစ်ပါတယ်။ နောက်ဆုံးတော့ နိုင်ငံရေးမငြိမ်သက်မှုဖြစ်ပြီး စစ်တပ်က ထိုင်းနိုင်ငံလို အာဏာသိမ်းတော့မလား ပြောဆိုနေကြပါတယ်။

စစ်တပ်က အာဏာသိမ်းစရာလမ်းမရှိပါဘူး။ စစ်တပ်လက်ရှိခေါင်းဆောင် စစ်ဗိုလ်များ နိုင်ငံအုပ်ချုပ်ဖို့အသင့်မရှိသေးပါဘူး။ နိုင်ငံအုပ်ချုပ်နေတာ လက်ဟောင်းစစ်ဗိုလ်ဟောင်းကြီးများပဲ ဖြစ်ပါတယ်။ ဟေ့.. ရန်ကုန်မှာ မာရှယ်လောထုတ်လိုက်ပါ..ပြောရင်၊ စစ်တပ်ခေါင်းဆောင်များက မာရှယ်လောလုပ်ပေးမဲ့အဆင့်ပဲ ရှိပါတယ်။ Eleven Media ပိတ်ထားလိုက် ပြောရင် သတင်းစာတိုက်လဲ ပိတ်ရမှာပါ။ နောက်ဆုံး အင်အယ်ဒီပါတီကို ရွေးချယ်ကော်မရှင်က တရားမဝင်ဘူးပြောရင်လဲ ဘာမှမတတ်နိုင်ပါဘူး။ ရွေးကောက်ကော်မရှင်ဥက္ကဌကိုယ်တိုင်၊ စစ်ဗိုလ်ချုပ်ဟောင်း၊ သမ္မတဦးသိန်းစိန်နဲ့တစ်ဖွဲ့ထဲ၊ ကြံခိုင်ရေးပါတီဗဟိုအလုပ်အမှုဆောင်ထိပ်တန်းရာထူး… ရွေးကောက်ပွဲကော်မရှင်က၊ လက်ရှိစစ်ဗိုလ်မှုးများ ရာနဲ့ချီပြီးခန့်ထားပါတယ်။ ဒီတော့ အစိုးရသစ်က စစ်တပ်ကို အာဏာသိမ်းခွင့်မပေးပါဘူး။ ၂၀၁၅ ရွေးကောက်ပွဲအပြီး အခြေအနေမလှရင်တော့ တစ်မျိုးပေါ့။ ဒီ ၅နှစ်အတွင်းမှာ မြန်မာနိုင်ငံရဲ့စီးပွားရေးအဓိကလုပ်ငန်းကြီးတွေအားလုံးနီးပါး စစ်ဗိုလ်ချုပ်ဟောင်းတွေနဲ့ခရိုနီတွေ အပိုင်စီးထားပြီးဆိုတော့ နောက်အစိုးရသစ်၊ ဒေါ်အောင်ဆန်းစုကြည် တက်လာရင်တော့ ဒီစနစ်ကြီးကိုပြင်ဖို့ အရမ်းကိုခက်သွားမှာပါ။

ဖွဲ့စည်းပုံ ပြင်ဖို့ နိုင်ငံရေးလှုပ်ရှားမှုတွေဟာ နိုင်ငံရေးအကွက်တွေပဲဖြစ်ပါတယ်။ တကယ်တော့ ဖွဲ့စည်းပုံအခြေခံဥပဒေဆိုတာ မ.ဆ.လ ပါတီဥပဒေအရာရှိကြီးပြောသလို စက္ကစုတ်လုပ်ပစ်လို့ရပါတယ်။ အသစ်ရေးဖို့လည်း သိပ်မခဲယင်းပါဘူး။ တိုင်းရင်းသားလက်နက်ကိုင်များလည်း သူတို့ရေးထားတဲ့ ဥပဒေမူကြမ်းရှိပါတယ်။ အင်အယ်ဒီလည်း ဥပဒေမူကြမ်းရှိပါတယ်။ တခြားပါတီတွေဖြစ်တဲ့ တ.စ.ည၊ အင်ဒီအက်ဖ်၊ ဒီငြိမ်း ..စတဲ့ ပါတီကြီးတွေလည်း သူတို့ရဲ့ ဥပဒေပညာရှင်ကြီးတွေ ရေးဆွဲထားတဲ့ အခြေခံဥပဒေ မူကြမ်းတွေရှိမှာပါပဲ။

ပြည်နယ်အုပ်ချုပ်ရေးအစိုးရ
ဖက်ဒရယ်အစိုးရလို့ရေးရင် လက်ရှိမြန်မာအစိုးရက မကြိုက်ပါ။ သူတို့ရေးခဲ့တဲ့ ဖွဲ့စည်းပုံကို လက်ရှိပြည်နယ်တိုင်း၊ အစိုးရအဖွဲ့တွေလည်း မကြိုက်လို့ ပြင်ချင်နေကြပါတယ်။ ပြည်နယ်အစိုးရကို ပြည်နယ်ကရွေးကောက်ခွင့်မရှိ၊ ဗဟိုကပဲ ဝန်ကြီးချုပ်၊ ပြည်နယ်ဝန်ကြီးများကို ခန့်ထားကတဲက ပြည်နယ်အစိုးရမှာ ဘာမှအာဏာမရှိပါ။ ပေးတာယူ၊ ကြွေးတာစား၊ ခိုင်းတာလုပ် အဆင့်ကမတတ်ပါဘူး။ အားလုံး အမိန့်ကိုစောင့်ပြီး လုပ်တဲ့စနစ်ကို ကျော်မလုပ်တတ်၊ မလုပ်ရဲကြပါ။ ဒေသအစိုးရလို့ခေါ်တဲ့ တိုင်းနဲ့ပြည်နယ်အစိုးရများကို ကိုယ်ပိုင်အုပ်ချုပ်ခွင့်မပေးတာကို၊ ဖြေရှင်းဖို့ကတော့ ဖွဲ့စည်းပုံအခြေခံဥပဒေမှာပဲ မူတည်နေပါတယ်။ အထူးလေ့ကျင့်နေတဲ့ ဧရာဝတီတိုင်း ဒေသအစိုးရမှာတောင်၊ ပြည်နယ်အစိုးရမှာ အာဏာမရှိပါဘူး။ ကုန်သည်ပွဲစားများက ပေးတာယူ၊ ကျွေးတာစား ဒါလောက်ပဲ လုပ်နေရပါတယ်။ အမေရိကန်၊ ထိုင်း၊ မလေးရှား၊ အင်ဒိုနီးရှား၊ ဗီယက်နမ် ပြည်နယ်အုပ်ချုပ်ရေးစနစ်များကို ယှဉ်ဖို့မပြောနဲ့၊ ကွန်မြူနစ်တရုတ်ပြည်ရဲ့ ပြည်နယ်အုပ်ချုပ်ရေး၊ အထူးအုပ်ချုပ်ရေး တွေကိုတောင် မမှီပါဘူး။ တိုင်းပြည်ကို ငြိမ်းချမ်းရေးရအောင် စေတနာထားတဲ့ အစိုးရဖြစ်ပါမှ၊ ပြည်နယ်လက်နက်ကိုင်အဖွဲ့များရဲ့ ယုံကြည်မှုရရှိမှာဖြစ်ပါတယ်။ ပြည်နယ်အုပ်ချုပ်ရေးစနစ်မှာ အဓိကတော့ သယံဇာတခွဲဝေခြင်းကနေ ယုံကြည်မှုတည်ဆောက်ရမှာဖြစ်ပါတယ်။ ခပ်ရှင်းရှင်းရေးရမယ်ဆိုရင် ပြည်နယ်စပ်ကုန်သွယ်ရေးမှာ အခွန်ကောက်၊ ရတဲ့ငွေ KIO , Myanmar Gov ခွဲဝေရေးကို မလုပ်ဆောင်ပဲ ကားပါမစ်၊ အလုပ်ပါမစ်၊လိုင်စင်များနဲ့ လာဘ်ထိုး၊ ခွဲထုတ်တဲ့လုပ်ရပ်တွေမလုပ်သင့်ပါဘူး။ ပြည်နယ်အစိုးရမှာ KIO ကိုယ်စားလှယ်များ ပါဝင်မှ ၊ ပြည်နယ်အစိုးရမှာ တိုင်းရင်းသားလက်နက်ကိုင်ကိုယ်စားလှယ် ပါဝင်မှ၊ ပြည်နယ်အစိုးရ အစစ်အမှန်ဖြစ်မှာပါ။ ဒှီေတာ့မှ တိုင်းရင်းသားလက်နက်ကိုင်များလဲ နယ်ခြားစောင့်တပ်မှာ ပါဝင်ပြီး၊ ငြိမ်းချမ်းရေးအလာအလာ ကောင်းမှာပါ။

အရေးအကြီးဆုံးကတော့ မြန်မာအစိုးရ ငြိမ်းချမ်းရေးဆွေးနွေးသူများ တကယ့်ညီအစ်ကိုစိတ်ရင်းနဲ့ ဖိတ်ခေါ်ရင်၊ အင်အားနည်းတဲ့ တိုင်းရင်းသားလက်နက်ကိုင်များ ပူးပေါင်းပါဝင်လာမှာဖြစ်ပါတယ်။ အစစ်အမှန်ငြိမ်းချမ်းရေး အချိန်တိုတွင်းရရှိမှာဖြစ်ပါတယ်။ ပြည်နယ်အုပ်ချုပ်မှု၊ ဖက်ဒရယ်မူလည်း ဖွဲ့စည်းပုံအခြေခံဥပဒေမှာ ပြင်ဆင်နိုင်မှာပါ။  ကားပါမစ်၊ လုပ်ငန်းလိုင်စင်များနဲ့ ဆွဲဆောင်၊ စည်းရုံးနေခြင်းဟာ အတုအယောင်ငြိမ်းချမ်းရေးပါ။

မြန်မာအစိုးရမင်းများကို မြန်မာစာနဲ့ဖက်ဒရယ်အုပ်ချုပ်ရေးအကြောင်း တင်ပြနေသူတစ်ဦး ပြောစကားကတော့ အားရစရာမရှိပါဘူး။ လက်ရှိလူကြီးတွေနားလည်အောင် အလွယ်ကူဆုံးစာလုံးများနဲ့ ရေးသားတင်ပြရကြောင်း၊ အခြေအနေကတော့ မကောင်းကြောင်း၊ တိုင်းရင်းသားတွေ အုံကြွတိုက်ပွဲတွေ ကြီးလာရင်တော့ ၁၉၈၈လို နယ်စပ်ထွက်ပြေးရဦးမလား မသိဘူး… ဟု အားမလိုအားမရပြောပါတယ်။ လက်ရှိလူကြီးများ အာဏာကိုဆက်လက်ဆုပ်ကိုင်မထားလိုပေမဲ့ သူတို့အနာဂါတ်၊ စည်းစိမ်စိတ်ချမှုကို လိုချင်နေကြပါတယ်။

အစိုးရ သဘောသဘာဝ
အစိုးရဆိုတာတော့ အင်အားကောင်းရင်၊ အတိုက်ခံပါတီတွေကိုဖြုတ်၊ ပါတီတွင်းသဘောထားမတူရင် ဖြုတ်၊ နောက်ဆုံးတော့ အာဏာရှင်စနစ်ကိုရောက်သွားလေ့ရှိပါတယ်။ ဒါကြောင့် အစိုးရအဖွဲ့ခေါင်းဆောင်က ဖွဲ့စည်းပုံအခြေခံဥပဒေကို တရားမျှတအောင်လုပ်ရပါတယ်။ ဒါမှ ခုရှုပ်မှနောင်ရှင်းဖြစ်မှာပါ။

ဖွဲ့စည်းပုံအခြေခံဥပဒေမှာ ဥပဒေပြုမှုအာဏာ၊ တရားစီရင်မှုအာဏာ၊ အုပ်ချုပ်မှုအာဏာ အဲဒီ(၃)မျိုးကို မျှတအောင်လုပ်ရပါတယ်။ အုပ်ချုပ်မှုအာဏာဟာ အရေးကြီးဆုံးဖြစ်လို့ အုပ်ချုပ်သူသမ္မတကို ၂ကြိမ်ထက်ပိုမအုပ်ချုပ်ဖို့ အခြေခံဥပဒေကိုဆွဲထားလေ့ရှိပါတယ်။ အုပ်ချုပ်သူသမ္မတကလည်း ထိုင်ခုံပေါ်ထိုင်ပြီးရင် အာဏာယစ်မူးသွားလေ့ရှိပါတယ်။ ဒါကြောင့် အုပ်ချုပ်ရေးအာဏာပိုင် အစိုးရအကြောင်း နည်းနည်းရေးချင်ပါတယ်။

အာဏာရတာနဲ့ System & Structure ကို လက်တွေ့လုပ်ဆောင်ရပါတော့တယ်။ ပထမဆုံးလုပ်ဆောင်ချက်ကတော့ အဖွဲ့အတွင်း အားလုံးသဘောတူညီချက်နဲ့ စတင်ရပါတယ်။ စိတ်သဘောထား တူညီသူများ ၇၅% ရှိရင် System & Sturcture ဆောက်တည်ရတာ လွယ်ပါတယ်။ ၈နှစ်အတွင်း စနစ်ကောင်း၊ လက်တွေ့ပေါ်လာပါတယ်။ ဒါကြောင့် အစိုးရအဖွဲ့အသစ်မှာ သဘောထားတူသူများပဲ ဝန်ကြီး၊ ဒု-ဝန်ကြီးများ လုပ်ရပါတယ်။ အများအားဖြင့် ပါတီတစ်ခုတည်းက လူတွေပဲ အစိုးရအဖွဲ့မှာ ပါဝင်ကြပါတယ်။ ပါတီတစ်ခုတည်းမှာပဲ အုပ်စုတွေရှိတော့ ပါတီတူပြီး၊ အုပ်စုတူတဲ့ လူတွေပဲ ဝန်ကြီး၊ ဒု-ဝန်ကြီးတွေ လုပ်ကြပါတယ်။

ဥပမာ.. မြန်မာနိုင်ငံအစိုးရ သမ္မတဦးသိန်းစိန် သူနဲ့အဆင်ပြေသူများကိုပဲ ဝန်ကြီးရာထူးတွေ ပေးပါတယ်။ လွှတ်တော်ဥက္ကဌ ဦးရွှေမန်းအုပ်စုကလည်း အာဏာရကြံ့ခိုင်ရေးပါတီခေါင်းဆောင်ဖြစ်ပေမဲ့၊ ဦးရွှေမန်းနဲ့နီးစပ်သူများ သမ္မတဦးသိန်းစိန်အစိုးရအဖွဲ့ထဲ သိပ်မရှိပါဘူး။ သမ္မတဦးသိန်းစိန် အစိုးရအဖွဲ့ထဲမှာ အတိုက်ခံ အင်အယ်ဒီပါတီဘက်တော်သား တစ်ယောက်မှမခန့်ထားပါဘူး။

စစ်မှန်တဲ့ နိုင်ငံခေါင်းဆောင်က Corruption & Nepotism ခြစားမှုနဲ့ကိုယ့်လူရာထူးခန့်တာမျိုး  မလုပ်ပါဘူး။ လူတော်လူကောင်းရွေးချယ်တတ်ခြင်းဟာ ခေါင်းဆောင်မှုအရည်အချင်းပဲဖြစ်ပါတယ်။ လူတော်လူကောင်း ၇၅% ရှိရင် ကမ္ဘာ့အကောင်းဆုံးအစိုးရလို့သတ်မှတ်ရပါမယ်။ အဲ.. လူတော်လူကောင်း ၂၅%ပဲရှိရင်တော့ တော်တော်ဆိုးတဲ့အစိုးရလို့ပဲ သတ်မှတ်ခံရမှာပါ။

အမေရိကန်အိုဘားမားအစိုးရနှင့် ထိုင်း၊ ချွန်လီပင်းအစိုးရ

ဥပမာ.. လက်ရှိအမေရိကန်သမ္မတ အိုဘားမားအစိုးရမှာ ပါတီတွင်းအတိုက်အခံကြီး ဟီလာရီကလင်တန်းကို ဝန်ကြီးခန့်ပါတယ်။ နောက် ရီပါဘလီကင်၊ အတိုက်ခံပါတီကြီးက လူ၂ဦးကိုလည်း ဝန်ကြီးခန့်အပ်ပါတယ်။ အိုဘားမား သမ္မတတာဝန် စတင်ချိန်မှာ အမေရိကန်နိုင်ငံကြီး စီးပွားအကြပ်တည်းထဲရောက်နေပြီး၊ အကြွေးပတ်လည်ဝိုင်းနေတာကို ကယ်တင်ဖို့ အစိုးရအဖွဲ့ခေါင်းဆောင် သဘောထားမတင်းမာသူ လူမည်းသမ္မတ အိုဘားမားကို ခေါင်းဆောင်တင်မြှောက်လိုက်ပါတယ်။ အိုဘားမားအတွက် အစိုးရအဖွဲ့ထဲမှာ အတိုက်ခံတွေ ပါလာတော့ တော်တော်ကို ဦးနှောက်ခြောက်မှာပါ။ အခု အိုဘားမားအစိုးရ ၅နှစ်ကျော်လာချိန်မှာ အမေရိကန်နိုင်ငံကြီး စီးပွားရေးအကြပ်တည်းက ရုန်းထွက်လာနိုင်စ ဖြစ်လာပါပြီ။

နောက်ဥပမာတစ်ခုကတော့ အိမ်နီးချင်းထိုင်းနိုင်ငံဖြစ်ပါတယ်။ ၁၉၉၇ခုနှစ် အရှေ့တောင်အာရှနိုင်ငံများစီးပွားပျက်ချိန် ထိုင်းနိုင်ငံရဲ့ စီးပွားတိုးတက်နှုန်း ၉% နဲ့ အမြင့်ဆုံးအခြေနေရှိချိန်ဖြစ်ပါတယ်။ ထိုင်းဘတ်ငွေ 1USD = 25Baht ကနေ 54Baht အထိ ရုတ်တရက်ဖြစ်သွားပါတယ်။ မြို့ကြီးတွေက ထိုင်းကုမ္ပဏီများ လုပ်ငန်းရပ်ဆိုင်း၊ အလုပ်သမားတွေ အလုပ်ပြုတ်ကြပါတော့တယ်။ အလုပ်သမားသန်းပေါင်းများစွာ အလုပ်လက်မဲ့ဖြစ်ပြီး တောရွာတွေကို ပြန်ရပါတယ်။ နိုင်ငံခြားသား ၆သိန်းကျော်လည်း ထိုင်းနိုင်ငံကထွက်ခွာရပါတယ်။ အဲဒီအချိန်က မြန်မာများစွာ ထိုင်းမှာအလုပ်စတင်နေပါပြီ။ စတော့အိတ်ချိန်းတန်ဖိုး ၇၅% ဈေးကျသွားပါတယ်။  ထိုင်းဝန်ကြီးချုပ် (ဗိုလ်ချုပ်ကြီးဟောင်း) ချာဘာလစ် ရာထူးကနှုတ်ထွက်ပြီး ပါလီမန်မှာ ယခင်ဝန်ကြီးချုပ်ဟောင်း ချွန်လီပင်းရဲ့ ညွန်ပေါင်းအစိုးရသစ် တက်လာပါတယ်။ နိုင်ငံတကာက ဒေါ်လာဘီလျှံပေါင်းများစွာ ချေးပေးပါတယ်။ ထိုင်းကုမ္ပဏီများစွာ ဒေဝါလီမခံအောင် အစိုးရက ကျားကန်ပေးပါတယ်။ ဝန်ကြီးချုပ်ချွန်လီပင်း ရဲ့ညွန့်ပေါင်းအစိုးရဟာ ပါတီပေါင်း၁၂ခု စုပေါင်းထားပြီး၊ ပျက်စီးသွားတဲ့နိုင်ငံစီးပွားရေးကို IMF ဥရောပဘုံဈေးချေးငွေ ဒေါ်လလာဘီလျံပေါင်း၂၀ကျော်နဲ့ ပြန်လည်ထူထောင်ပါတယ်။ IMF ရဲ့နည်း အကြံပေးချက်များကို လက်တွေ့အကောင်ထည်ဖေါ်ပါတယ်။ သဘောထားမတူတဲ့ ပါတီများက၊ ဝန်ကြီးများစွာကို အုပ်ချုပ်ရတဲ့ ဝန်ကြီးချုပ်အဖို့ အလွန်ခက်ခဲတဲ့ နိုင်ငံရဲ့ တာဝန်ကြီးဖြစ်ပါတယ်။ တစ်နိုင်ငံလုံး မျက်ရည်နဲ့ သူတို့ပိုင်ဆိုင်တဲ့ရွှေ၊ရတနာ၊ငွေကြေးများကို တိုင်းပြည်ထံအပ်နှံပြီး၊ အဲဒီပိုင်ဆိုင်မှုများကို ပြပြီး ငွေချေးနိုင်ပါတယ်။ နောက်နှစ်အနည်းငယ်မှာ ပြည်သူတွေရဲ့ ရွှေ၊ရတနာ၊ငွေကြေးများကို အစိုးရက ပြန်လည်ပေးအပ်နိုင်ခဲ့ပြီး၊ ထိုင်းနိုင်ငံစီးပွားရေး နလံပြန်ထူလာတာ ၄နှစ်အကြာ ၂၀၀၁မှာ 1US$=29Baht ဈေးနှုန်းပြန်လည်တည်ငြိမ်လာခဲ့ပါတယ်။ အလုပ်အကိုင်များလည်း ပေါများလာပြီး အခုဆို မြန်မာအလုပ်သမား ၄သန်းကျော် ထိုင်းနိုင်ငံမှာ ပျော်ပျော်ပါးပါး အလုပ်လုပ်နိုင်ကြပါတယ်။ လာဘ်စားမှုမှာသန့်ရှင်းတယ်လို့ နာမည်ကျော်တဲ့ ချွန်လီပင်းဟာ သူ့ဝန်ကြီးများလာဘ်စားမှုတွေကြောင့် ၂၀၀၁မှာ ရာထူးကနှုတ်ထွက်သွားပါတယ်။ မည်သို့ပင်ဖြစ်စေ ထိုင်းနိုင်ငံမှာ အခြေခံစားကုန်တွေကို ဈေးချိုအောင်လုပ်ထားပေး၊ ပံ့ပိုးပေးခြင်းဟာ မြန်မာနိုင်ငံအဖို့အလွန်အတုယူစရာကောင်းပါတယ်။ ပြည်တွင်းအင်အားစုမှ လာဘ်စားမှုတိုက်ဖျက်ရေးအဖွဲ့တွေ အင်အားကောင်းနေခြင်းဟာ ထိုင်းနိုင်ငံရဲ့အားသာချက်ပါ။

အင်ဒိုနီးရှားနိုင်ငံ
အခြားနိုင်ငံများနဲ့ နှိုင်းယှဉ်ခြင်းထက် ကိုယ့်နိုင်ငံနဲ့သင့်လျှော်တာကိုပဲဦးတည်သင့်တယ် ဆိုသူများဟာ တကယ်တော့ မြန်မာ့နည်းမြန်မာ့ဟန် ကိုကြိုက်နှစ်သက်သူတွေဖြစ်ပါတယ်။ ဆင်းရဲမွဲတေတဲ့မြန်မာလူမျိုးများကို ကမ္ဘာ့အဆင့်မြင့်တင်ဖို့ ပြည်တွင်း၊ပြည်ပ မြန်မာအားလုံး ညီညွတ်စွာလုပ်ဆောင်ဖို့ဆိုရင် ပတ်ဝန်းကျင်နိုင်ငံများနဲ့ နှိုင်းယှဉ်ခြင်းအလွန်အရေးကြီးပါတယ်။

မြန်မာနိုင်ငံနဲ့အသင့်လျှော်ဆုံး နိုင်ငံရေးစနစ်ကတော့ အင်ဒိုနီးရှားနိုင်ငံဖြစ်ပါတယ်။ အတိုက်ခံနဲ့အစိုးရခေါင်းဆောင်လူကြီးများကြားမှာ ညှိနှိုင်းပေးတဲ့ဝန်ကြီးများ ထိရောက်လုပ်ဆောင်နိုင်ပါတယ်။ မြန်မာနိုင်ငံမှာတော့ ဦးအောင်မင်း၊ ဦးစိုးသိမ်းတို့လို့ဝန်ကြီးများရှိပါတယ်။ လက်ရှိသမ္မတယိုဒိုယိုနို အရင်သမ္မတများလက်ထက်က ထမ်းဆောင်ခဲ့တဲ့ရာထူး Co-ordinating Minister လို ဝန်ကြီးရာထူးဖြစ်ပါတယ်။ အင်ဒိုနီးရှားအုပ်ချုပ်ရေးစနစ်မှာ ယခင်က စစ်တပ်ခေါင်းဆောင်များ ပါဝင်ခဲ့ပေမဲ့အခုတော့ စစ်တပ်က မပါတော့ပါဘူး။ လက်ရှိအင်ဒိုနီးရှားသမ္မတ ယူဒိုယိုနိုလည်း စစ်ဗိုလ်ချုပ်ဟောင်းပါပဲ၊ အနောက်နိုင်ငံမှာပညာဆည်းပူးခဲ့ဖူးပြီး၊ ကာကွယ်ရေးဦးစီးချုပ်ဘဝကနေ သတ္တုတွင်း/စွမ်းအင်ဝန်ကြီးအဖြစ် ၁၉၉၉မှာ တာဝန်ယူခဲ့ပြီး နောင်ပိုင်း သမ္မတ၂ဆက်လက်အောက်မှာ Co-ordinating Minister အဖြစ်တာဝန်ထမ်းဆောင်ခဲ့ပါတယ်။ ၂၀၀၄မှာတော့ လက်ရှိသမ္မတမာဂါဝတီ နဲ့ယှဉ်ပြိုင်အနိုင်ရရှိခဲ့ပါတယ်။ အင်ဒိုနီးရှားနိုင်ငံကို ဒီမိုကရေစီအလေ့ကျင့်များ၊ အများကြီးပြုပြင်ပြောင်းလဲမှုတွေ လုပ်ပေးခဲ့ပါတယ်။ ၂၀၀၉မှာ ဒုတိယသက်တမ်း ဆက်လက်အရွေးခံခဲ့ရပါတယ်။ လာဘ်စားများစွာပြည်နှက်နေတဲ့ အင်ဒိုနီးရှားအစိုးရကို သန့်ရှင်းသူလို့သတ်မှတ်ခံရတဲ့ သမ္မတ ယူဒိုယိုနို အစွမ်းကုန်ကြိုးစားတိုက်ဖျက်ပါတယ်။ မလွယ်လှပါဘူး။ အခု ၂၀၁၄မာတော့ ပြည်သူ့ကြားက သမ္မတလောင်း ဂျိုကိုဝီ ရေပန်းစားနေပါတယ်။ ဂျိုကိုဝီဟာ ပြည်သူ့ကြားကမြို့တော်ဝန်အဖြစ် တကယ့်ကို ဆင်းရဲမွဲတေမှုပျောက်အောင် လုပ်ဆောင်ပြီး၊ သမ္မတလောင်းအဖြစ် ယခင်သမ္မတဟောင်း မဂါဝတီကိုယ်တိုင် နေရာပေးခံရသူဖြစ်ပါတယ်။ စစ်တပ်ဗိုလ်ချုပ်ကြီးများကို အင်ဒိုနီးရှားသမ္မတရွေးပွဲမှာ မဲဆွယ်မပါဖို့၊ ပါဝင်ချင်ရင်လဲ စစ်တပ်ကထွက်ဖို့ လက်ရှိသမ္မတ စစ်ဗိုလ်ချုပ်ဟောင်း ယူဒိုယိုနိုက သတိပေးထားပါတယ်။ ဒါကြောင့် အင်ဒိုနီးရှားနိုင်ငံရေးဟာ မြန်မာအစိုးရက ဆက်လက်နမူနာယူနေဆဲဖြစ်ပါတယ်။ အင်ဒိုနီးရှားနိုင်ငံဟာ အရှေ့တောင်အာရှနိုင်ငံများမှာ အတိုးတက်ဆုံး၊ ဆင်းရဲမွဲတေမှုတိုက်ဖျက်ရေးအလုပ်ဆောင်နိုင်ဆုံးအဖြစ် ကမ္ဘာ့ရင်းနှီးမြှတ်နှံသူများရဲ့ ဦးစားပေးနိုင်ငံဖြစ်နေပါတယ်။ မဲညစ်မှုတွေနဲ့အနိုင်ရသွားတဲ့ မလေးရှားအစိုးရအဖွဲ့ ၂၀၁၃မှာ ဖြစ်ခဲ့ပါတယ်။ ဒါကို သဘောကျနေတဲ့ မြန်မာစစ်ဗိုလ်ချုပ်ဟောင်းအပေါင်းပါများက မလေးရှားစတိုင်ရွေးကောက်ပွဲနဲ့လုပ်ချင်ပါတယ်။ စစ်တပ်က နိုင်ငံရေးမပါဘူးဆိုတဲ့ထိုင်းနိုင်ငံကတော့ ၂၀၁၄ နိုင်ငံရေးအကြပ်အတည်းကြောင့် စစ်တပ်အာဏာသိမ်းထားပေမဲ့ မကြာခင်ဖွဲ့စည်းပုံအသစ်ပေါ်လာပြီး၊ နိုင်ငံစီးပွားရေးပုံမှန်သွားမဲ့သမိုင်းအစဉ်လာရှိပါတယ်။ အင်ဒိုနီးရှား ညွန့်ပေါင်းအစိုးရဟာ မြန်မာခေါင်းဆောင်တွေ စံနမူနာယူရပါမယ်။ ညွန့်ပေါင်းအစိုးရဖြစ်ဖို့ လက်ရှိအစိုးရက ပြည်သူ့အကျိုးအတွက် မပေးချင်လဲ၊ အင်အယ်ဒီပါတီမှ ဝန်ကြီးတစ်ဦးဖြစ်စေ တာဝန်ပေးသင့်နေပါပြီ။

လက်ရှိမြန်မာနိုင်ငံ
ကျွန်ုပ် မြန်မာပြည်ခရီးစဉ် ကျေးရွာ၊မြို့များစွာ ၂ လခရီးစဉ် (ဧပြီ၊မေ ၂၀၁၄) မှာ တွေ့ရှိချက်များကတော့၊ မြန်မာပြည်သားများဟာ အလွန်သနားစရာကောင်းပါတယ်။ အထူးသဖြင့် အမျိုးသမီးများနဲ့ကလေးများဘဝဟာ ရောင်းစားခံရတာကမှ လူလိုသူလို နေရသေးတယ် ဆိုတဲ့အခြေအနေမှာရောက်နေပါတယ်။ သူဌေးများ၊ ပညာတတ်အစိုးရဝန်ထမ်းများ၊ ကုမ္ပဏီကြီးများရဲ့ဝန်ထမ်းများ ဘဝကတော့ ပိုပြီးအဆင်ပြေလာပါတယ်။ အခွန်ကောက်ခြင်းနဲ့ဘတ်ဂျတ်ချပေးငွေ အသုံးပြုခြင်းတွေမှာ ဥပဒေစိုးမိုးလာဖို့ မျှော်လင့်ပါတယ်။ တစ်နိုင်ငံလုံး ပြည်သူလူထုပိုင် (အစိုးရပိုင်) စက်ရုံ၊ လုပ်ငန်း၊ မြေနေရာများကို ပုဂ္ဂလိကလွဲပြောင်းယူနေပုံတွေ ဥပဒေလက်တစ်လုံးခြား လုပ်နေပုံတွေ မြင်ရတာ အင်မတန်ရင်နာဖို့ကောင်းပါတယ်။ နိုင်ငံပိုင်ပစ္စည်းများကို စစ်တပ်နဲ့အစိုးရက ကာကွယ်ရမှာ၊ အခုတော့ သတို့ပဲ အလွဲသုံးစားနေကြတာတွေ အရေးယူမဲ့တနေ့တော့ ရောက်လာမှာပါ။ တနေ့တလံ ပုဂံဘယ်ပြေးမလဲ….။ ပြည်သူလူထုကတော့ အောက်ခြေ မှတ်ပုံတင်ရုံး၊ ကျောင်းဝင်ကြေး၊ လမ်းတံတားဖြတ်ခကောက်၊ ရဲနဲ့တာဝန်ခံများရဲ့မတရားဖမ်းဆီးမှု… ဒါတွေပဲမြင်ကြပါတယ်။ High Level Corruption ဆိုတာ တိုးတက်တဲ့နိုင်ငံကြီးတွေမှာတောင် ရှိပါတယ်။ အခုတော့ မြန်မာနိုင်ငံမှာ Medium Level Corruption တွေကို ထိန်းဖို့တောင် မရနိုင်ပါဘူး။ ငွေပေးပြီး တရားနိုင်တဲ့ ခေတ်ဖြစ်နေလို့ တရားဥပဒေစိုးမိုးရေးကော်မရှင် ဥက္ကဌ ဒေါ်အောင်ဆန်းစုကြည်လဲ ပိုက်ဘောမိပြီး၊ ဘာလုပ်ရမှန်းမသိ၊ ဒီတော့ ဥပဒေစိုးမိုးရေး ဘာမှမလုပ်ပဲ၊ ထိပ်ဆုံးက အခြေခံဥပဒေပြင်ဆင်ရေးပဲ လုပ်နေပုံရပါတယ်။

အားလုံးသိတဲ့အတိုင်းပါပဲ။ မြန်မာအစိုးရဟာ ရွေးကောက်ပွဲအနိုင်ရတဲ့ ၆၀% ကြံ့ခိုင်ရေးအမတ်များနဲ့ ဖွဲ့စည်းထားပါတယ်။ စစ်တပ်က ၂၅% ထည့်ထားပြီး၊ အတိုက်ခံများအင်အယ်ဒီနဲ့တိုင်းရင်းသား ပါတီများဟာ ၂၀%လောက် ရှိနေပါတယ်။ ၃နှစ်အုပ်ချုပ်တဲ့ကာလအတွင်း အခက်ခဲများစွာကြုံတွေ့ရာမှာ၊ အများစုကတော့ ပြုပြင်ပြောင်းလဲမှုကို မလိုလားတဲ့ နောက်ကြောင်းပြန်လိုသူအုပ်စုဖြစ်ပါတယ်။ အခုတော့ သူတို့လိုလာတဲ့ စီးပွားရေးလုပ်ငန်းလိုင်စင်၊ ပါမစ်တွေ ပေးလိုက်တဲ့အတွက် ငြိမ်သွားတဲ့ပုံစံပါ။ အခုတော့ ဘာအခွင့်အရေးမှမရှိ၊ အာဏာမရှိ၊ ငွေမရှိတဲ့ အတိုက်ခံပါတီကြီး အင်အယ်ဒီက ပြည်သူလူထုအင်အားသုံးပြီး အားစမ်းမှုစတင်လာပါတယ်။ ဖွဲ့စည်းပုံအခြေခံဥပဒေ ပြင်ဆင်ရေး လှုပ်ရှားမှုတွေနဲ့ လှုပ်လှုပ်ရှားရှားဖြစ်နေပါတယ်။

လက်ရှိအစိုးရအဖွဲ့ ဝန်ကြီးများကတော့ အလုပ်အလွန်ရှုပ်နေတော့ ဖွဲ့စည်းပုံအခြေခံဥပဒေပြင်ဆင်ရေးကို ဂရုစိုက်နိုင်မှာမဟုတ်ပါဘူး။ ပြည်သူ့လွှတ်တော်တွင်းမှာလည်း ကော်မတီဖွဲ့ပြီးလုပ်နေကြပါတယ်။ လွှတ်တော်တွင်းမှာ အာဏာရပါတီအင်အားကြီးတော့ ပြင်ဆင်တယ်ဆိုရုံပဲ လုပ်ကြမှာသေချာပါတယ်။ စစ်တပ်ကတော့ အာဏာသိမ်းခွင့်လဲ မရှိပါဘူး။ လက်ရှိအစိုးရခေါင်းဆောင်များ (စီနီယာစစ်ဗိုလ်ချုပ်ဟောင်းကြီးများ) ရဲ့ ထိမ်းချုပ်မှုအောက်မှာပဲ (Circle of Influence of ex-generals) ရှိနေပါတော့တယ်။ မြန်မာနိုင်ငံရဲ့ဖွဲ့စည်းပုံပြင်ဆင်ရေးကို လက်ရှိမြန်မာအစိုးရကိုယ်တိုင် သဘောတူပေမဲ့ အတိုက်အခံပါတီများ အုပ်ချုပ်ရေးကိုဝင်လာမှာ စိုးရိမ်တဲ့သဘောရှိပါတယ်။ မြန်မာလွှတ်တော်ကတော့ ပြင်ဆင်ရေးကော်မတီ ၃၂ဦးနဲ့ ဖွဲ့စည်းထားပြီး၊ အင်အယ်ဒီကိုယ်စားလှယ်၂ဦး၊ ကြံခိုင်ရေးနဲ့စစ်တပ်ကိုယ်စားလှယ်အများစု ဖြစ်နေတဲ့အတွက် အင်အယ်ဒီပါတီတောင်ဆိုမှုတွေ ရရှိဖို့မလွယ်လှပါဘူး။

နိဂုံး…
မြန်မာ့နိုင်ငံရေးခေါင်းဆောင်၊ လူထုခေါင်းဆောင်၊ စစ်တပ်ဗိုလ်ချုပ်ဟောင်းများ၊ လက်ရှိဗိုလ်ချုပ်ကြီးများ သူတို့ရဲ့ အချင်းချင်းလူမှုဆက်ဆံရေးအခြေအနေကောင်းရင် မြန်မာနိုင်ငံတိုးတက်လာမှာပါ။  သေချာတာကတော့ စစ်တပ်ဗိုလ်ချုပ်ကြီးများပဲ အသာရနေတာ နှစ်ပေါင်း၆၀ကြာပါပြီ။ အတိုက်အခံများကို ဝန်ကြီးနေရာများပေးပြီး၊ အင်ဒိုနီးရှား၊ ထိုင်း၊ မလေးရှား နိုင်ငံများလို့အစိုးရဖွဲ့မျိုးကိုမျှော်လင့်ပါတယ်။ နိုင်ငံရေးသမားတွေ မညီညွတ်ရင် ထိုင်းနိုင်ငံလို စစ်တပ်အာဏာသိမ်းတာတွေ ဖြစ်လာဦးမှာပါပဲ။  လက်ရှိလွှတ်တော်ဥက္ကကြီးက ၂၀၁၅ကျမှ ညွန့်ပေါင်းအစိုးရဖြစ်နိုင်မယ်လို့ပြောပါတယ်။ အောက်ခြေပြောင်းလဲမှုနဲ့အထက်ပိုင်ပြောင်းလဲမှု ၂မျိုးစလုံးတစ်ပြိုင်တည်း ပြောင်းလဲနေရမှာဖြစ်ပါတယ်။

တကယ်တော့ ဖွဲ့စည်းပုံအခြေခံဥပဒေကို ပြင်ဆင်တာထက် အရေးကြီးတာကတော့ မြန်မာ့အစိုးရနဲ့အတိုက်ခံခေါင်းဆောင်ကောင်းများ အကြောက်တရား၊ အမုန်းတရားတွေ မေ့ထားဖို့၊ တပ်မတော်နဲ့ပြည်သူ၊ နိုင်ငံရေးပါတီများနဲ့ပြည်သူ ပိုမိုနီးကပ်ဖို့လိုပါတယ်။ ဒေါ်အောင်ဆန်းစုကြည်ကို သမ္မတကိုယ်တိုင် ထပ်ပြီးတွေ့ဆုံဖို့ ညှိနှိုင်းပေးမဲ့သူလိုနေပါတယ်။ ကာ/လုံ စည်းဝေးလည်း ဆက်ပြီးလုပ်ဆောင်သင့်ပါတယ်။ ခေါင်းဆောင်တွေကြားမှာ ညှိနှိုင်းပေးသူများ အလွန်အရေးကြီးပါတယ်။ ရန်ငြိမ်းအောင်လုပ်ပေးနိုင်သူများဟာ ယခုဘဝ၊ နောင်ဘဝမှာလည်း စိတ်ချမ်းသာစွာ နေနိုင်ပါတယ်။ ဘယ်ဘာသာတရားမဆို ကြားဝင်ညှိနှိုင်းပေးသူများကို လူနတ်၊သာဓုခေါ်ကြပါတယ်။ မြန်မာပြည် အဲဒီလို စွန့်လွှတ်အနစ်နာခံ၊ လုပ်ဆောင်၊ ပြောဆိုနိုင်သူတွေ များလာပြီး၊  မမျှော်လင့်တဲ့ ဖြစ်ရပ်တွေပေါ်လာရင်တော့၊ တိုင်းပြည်ပိုကောင်းလာမလားလို့…။ 


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ရသဆောင်းပါးစုံ, သတင်းဆောင်းပါး

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ

By

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ မိုးမခစာအုပ်စင်၊...

Read more »

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ

By

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ (မိုးမခစာအုပ်စင်) ဇန်န၀ါရီ ၃၁၊ ၂၀၁၉...

Read more »

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)