ငြိမ်းချမ်းအေး – နွားနို့ပို့သူများသာ အလိုရှိသည်

July 12, 2014

နွားနို့ပို့သူများသာ အလိုရှိသည်
ငြိမ်းချမ်းအေး
ဇူလိုင် ၁၂၊ ၂၀၁၄

အလုပ်ကြမ်းနဲ့ ထောင်ဒဏ် (၁၀) နှစ်ချခံလိုက်ရတဲ့ ယူနတီ သတင်းထောက် နဲ့ သူ့ ကလေး ငယ် ဓာတ်ပုံ ကို တွေ့တော့ ရင်စို့ရတယ်။  ကွယ်လွန်သွားရှာပြီ ဖြစ်တဲ့ တေးရေး/တေးဆို ဗဒင် ရေး “အတူတူနေချင်တယ်” သီချင်းလေးလည်း စိတ်ထဲက ရွတ်ဆိုမိတယ်။  သီချင်းက မိသားစု အိမ်ထောင်ကွဲ ဖြစ်ရပ်မှာ ကလေးငယ်ရဲ့ ကြေကွဲဖွယ် ခံစားမှု ကို ဖွဲ့ထားတာ ဖြစ်ပေမယ့် ဒီလို အလိုမတူဘဲ မိသားစု နဲ့ ဝေးရတဲ့ ဖြစ်စဉ်တွေကိုလည်း ပုံဖော်နိုင်တော့ သီချင်း စာသား တပိုင်းတစ ညည်းမိတယ်။

“…. အိမ်မှာ.. လူစုံ.. ထမင်းစား.. စားပွဲမှာ..
ထိုင်ခုံ.. တနေရာ.. လွတ်လို့.. နေခဲ့ပြီ..
ဒါကိုမြင်ရင်.. သားရဲ့.. စိတ်မှာ..
သံမှိုတွေနဲ့.. ရိုက်ဆွဲထားသလိုမျိုး..ငြိမ်းချမ်းတဲ့.. မိသားစုတွေကြားမှာ..
အတားအဆီးမဲ့တဲ့.. မျက်ရည်တွေနဲ့..
အဖေ့ကို.. မျှော်မိတယ်..ရင်မှာ.. ရင်မှာ.. ရင်မှာ.. ပြည့်နေ..
အတောင့်တဆုံးနဲ့.. အရှိသင့်ဆုံးဟာ..
အဖေရယ်.. အမေရယ်.. သားရယ်..
အတူတူ.. နေချင်တယ်…”အတူတူနေချင်တယ် (Two Versions)၊ သံစဉ်/စာသား – ဗဒင်၊ တေးဆို – သားထွေး (၁၉၉၁) ၊ ဗဒင် (၁၉၉၉)
Music Video URL: [http://youtu.be/uHhme9kknPM]

 

ခေတ်ပြောင်းပြီလို့ ဆိုကြတဲ့ ခွေးတူဝက်တူ ဒီမိုကရေစီ ကလိယုဂ်ခေတ်ကြီးမှာ အရင် ထောင်နှုတ်ခမ်း နင်းနေသူ နိုင်ငံရေးသမားများ ထဲက တချို့ ဝစီပိတ် ကျင့်နေကြတယ်၊ တချို့ ပေါင်းစားနေကြတယ်၊ တော်လှန်ရေးသမားများ ပါမစ် လဲစားကြတယ်၊ သတင်းသမားတွေကတော့ ဝမ်းနည်းဖွယ် နှစ်ရှည် ထောင်ဒဏ်ထိနေတယ်။


ဟိုအရင်တုန်းကတော့ ဒီ “အတူတူနေချင်တယ်” သီချင်းလေးကို ၈၈ မျိုးဆက် ကိုဂျင်မီ၊ မနီလာသိန်း တို့ ရဲ့ ကလေးငယ် ဓာတ်ပုံကို တွေ့တိုင်း သတိရတယ်။  အခု သူတို့ အတူတူ နေနိုင်ပြီ ဖြစ်လို့ ဝမ်းသာရတယ်။

ဒါပေမယ့် လူထူ အများစု ဘဝတွေမှာတော့ ရန်သူမျိုး (၅) ပါး စာရင်းဝင် ခေါင်သူကြီး မင်းအစိုးရရဲ့ မတရား ဖိနှိပ် အဓမ္မမှုများကြောင့် ရပ်ပြစ် (၈) ပါး ဖြစ်နေတဲ့ ဗမာပြည်မှာ လူမှု၊ စီးပွား၊ စစ်ပွဲ၊ နိုင်ငံရေး ဒဏ်အမျိုးမျိုး နဲ့ မိသားစုများ အတူတူ မနေနိုင်ကြသေးပါဘူး။  ထောင်ထဲမှာ၊ တောထဲမှာ၊ နိုင်ငံရပ်ခြားမှာ အများအပြား တကွဲတပြား ရှိနေဆဲပါ။  ကလေးငယ်များလည်း “အတူတူနေချင်တယ်” ရေရွတ် ယောင်ယမ်း လက်ကမ်း ငိုကြွေးနေရဆဲပါ။

အခု ယူနတီ သတင်းသမားတွေ ကိစ္စ မှာ စစ်အုပ်စု ဒူးမနာသားများ က နိုင်ငံတော်လုံခြုံရေး ဆိုပြီး ကာကွယ်ပြောဆို ဖာသည် လုပ်ကြတယ်၊ ဝမ်းသာအားရလည်း ရှိနေကြတယ်။  လူ့အန္ဓ ဗာလာနံ တချို့ကလည်း ထောင်နှစ်ရှည်ကျရင် နိုင်ငံရေး အကျဉ်းသမား ဖြစ်မယ်၊ လွှတ်ဖို့ ဝိုင်းအော်ကြမယ်၊ လွတ်တဲ့ အချိန် သူရဲကောင်းလို ကြိုဆိုခံရမယ်၊ နာမည်ကြီးမယ်၊ စာရေးဆရာ ဖြစ်မယ် ဆိုပြီး ပြက်ရယ်ပြုနေကြတယ်။

သူတပါး မိသားစု ဘဝ ကို ကိုယ်ချင်း မစာနာနိုင်ကြတာ အံ့သြတုန်လှုပ်ဖွယ်ပါပဲ။  စစ်အာဏာရှင်စနစ်ရဲ့ ဆယ်စုနှစ်များစွာ မှိုင်းတိုက် ဖျက်စီးခဲ့မှုဟာ ဦးနှောက်၊ အသိဉာဏ်၊ အတွေးအခေါ် ကိုတင်မက နှလုံးသား ကိုပါ ထိခိုက်စေခဲ့ကြောင်း သက်သေ ထပ်ပြုနေသလိုပါပဲ။

တကယ်တော့ ဇနီး မယား၊ လင် ယောက်ျား၊ သား သမီး မိသားစု အတွက်က သူရဲကောင်း မလိုဘူး၊ နာမည်ကြီး မလိုဘူး၊ မိမိ ခင်ပွန်း၊ ဇနီး၊ အဖေ၊ အမေ မိသားစု နဲ့ အတူတူ ရှိနေဖို့ပဲ လိုတယ်။  ဘဝ ကြင်ဖော်ကြင်ဖက် ပါရမီဖြည့်ဖက် ဖြစ်လို့ ဇနီး/ခင်ပွန်း က မိမိ အိမ်ထောင်ဖက် ရဲ့ အလုပ် ဝတ္တရား (သို့မဟုတ်) ယုံကြည်ချက် တာဝန် ပြုမှု ရဲ့ နောက်ဆက်တွဲ ရလဒ် မိသားစု နဲ့ ဝေးရာ ရောက်နေမှု ကို နားလည် ပေးနိုင်ကောင်းပေမယ့် လူမမည်  ကလေးငယ်တွေ အတွက်တော့ “မိသားစု မှာ အဖေရယ်၊ အမေရယ်၊ သားသမီးရယ် အတူတူနေချင်တယ်” ဆိုတဲ့ ဆန္ဒ တောင့်တမှုက သာ အဓိက ဖြစ်တယ်။

ကလေးငယ် အရွယ်ရောက် သိတတ်နားလည်ချိန်မှာ သူ့ အဖေ/အမေ သူရဲကောင်း ကြီး ဖြစ်လို့၊ နိုင်ငံအကျိုး ပြုသူကြီး ဖြစ်လို့ ဝမ်းသာ ဂုဏ်ယူတတ်လာနိုင်ပေမယ့် ငယ်ဘဝ မှာ အလိုချင်ဆုံး အရာကတော့ နွေးထွေးလုံခြုံ ပြည့်စုံတဲ့ မိသားစု ဘဝလေးရယ်သာ ဖြစ်မယ် ဆိုတာ ကိုယ့်ဘဝနဲ့ နှိုင်းယှဉ် စာနာ နားလည်သင့်ကြပါတယ်။

၁၉၇၀ ခုနှစ်များက ကျော်ကြားတဲ့ ပေပါလေ့စ် အင်္ဂလိပ် ဂီတအဖွဲ့ရဲ့ ဗီယက်နမ် စစ် နာမည်ကြီး စစ်ဆန့်ကျင်ရေး သီချင်း “သူရဲကောင်း မဖြစ်ချင်ပါနဲ့ ဘီလီရယ်” မှာ အမေရိကန် ပြည်တွင်းစစ်ကာလ စစ်ထွက်သွားရတော့မယ့် ပြည်ထောင်စု တပ်သား ဘီလီကို သူ့နဲ့ လက် ထပ်တော့မယ့် ဇနီးလောင်း အမျိုးသမီးငယ်က အခုလို မှာရှာတယ်။

“…ဘီလီ သူရဲကောင်း မဖြစ်ချင်ပါနဲ့နော်..  နင့်အသက်နဲ့ရင်း အရူးမလုပ်ပါနဲ့..
ဘီလီရေ.. သူရဲကောင်း မလုပ်ပါနဲ့နော်.. ငါ့ဆီသာ ဆက်ဆက် ပြန်လာပြီး လက်ထပ်ပါ..
ဘီလီ အချစ်ရေ.. နင့်ရဲ့ လှပတဲ့မျက်နှာ /  ဦးခေါင်းကို (စစ်ပွဲမှာ) ငုံ့သာထားနော်..
ဘီလီရေ.. သူရဲကောင်း မဖြစ်ချင်ပါနဲ့.. ငါဆီသာ ပြန်လာဖြစ်အောင် ပြန်ခဲ့ပါ…”

တကယ် ရှေ့တန်း စစ်မျက်နှာ ရောက်တော့ ဘီလီဟာ သူရဲကောင်း ပီသတဲ့ အပြုအမူတခုကို ဆန္ဒအလျောက် စွန့်စားဆောင်ရွက်ရင်း ကျ သွားရှာတယ်။   စစ်တပ်က ဒီသတင်းကို ဘီလီရဲ့ ချစ်သူဆီ စာပို့အသိပေးတော့ “မင်း ဘီလီအတွက် ဂုဏ်ယူသင့်တယ်၊ သူဟာ သူရဲကောင်း တယောက်လို ကျဆုံးသွားခဲ့တယ်” လို့ ရေးထားတယ်။  ဒါပေမယ့် သူရဲကောင်းတယောက်ကို အလိုမရှိဘဲ မိမိချစ်သူ ခင်ပွန်း လောင်းကိုသာ အသက်ရှင်လျက် အလိုရှိသူ မိန်းမငယ်ဟာ စာကို လွှင့်ပစ်လိုက်တယ်။

ထိလို့မရသူများ (၁၉၈၇) ရုပ်ရှင် မှာ ရဲအိုကြီး ရှောင်ကွန်နရီ က နောင် သူ့ရဲ့ အထက်အရာရှိ ဖြစ်လာမယ့် အက်ဖ်ဘီအိုင် အထူး ရဲစုံထောက် ကီဗင်ကော့စနာ ကို ဒုစရိုက်သမားများ ကြီးစိုးရာ အယ်လ်ကပုန်း ရဲ့ ရှိကာဂိုမြို့ လင်းအားကြီး အချိန်မှာ စတွေ့တော့ ဆိုတယ်။

“ဥပဒေဘက်တော်သား ရဲသားများ ပထမဆုံးလိုက်နာရမယ့် စည်းကမ်းကတော့ အလုပ်တာဝန်ပြီးချိန်မှာ အိမ်ကို အသက်ရှင်လျက် ပြန်နိုင်ဖို့ပဲ..။”

အပြင်မှာ ဘာကြီးပဲ ဖြစ်နေနေ၊ ဘယ်လို ကောင်းမှု အများအကျိုးပဲ ဆောက်ရွက်နေနေ၊ ဘယ်လောက် နာမည်ကြီး ကြီးကျယ်ခမ်းနား အောင်မြင်တဲ့ ပုဂ္ဂိုလ်ကြီးပဲ ဖြစ်စေ မိသာစု အတွက် အရေးအကြီးဆုံးကတော့ အသက်ရှင်လျက် အတူတကွ အနားမှာ ရှိနေနိုင်မယ့်၊ မိသားစု တာဝန် ကျေပွန်မယ့် လင်၊ သား သမီး၊ ဇနီး မယား၊ မိဘ သာ ဖြစ်တယ်။

အောင်မြင်မှု နောက် လိုက်လွန်းသူ၊ အလုပ် တာဝန် ကို ဦးစားပေးလွန်းသူလို့ နာမည်ကြီးတဲ့ မန်ချက်စတာယူနိုက်တက် ရဲ့ နည်းပြဟောင်းကြီး ဆာအဲလက်စ် ဖာဂူဆန် လို လူမျိုးတောင် အိမ်မှာတော့ နွားနို့ပို့တဲ့ မိသားစု တာဝန် ယူပေးရတယ်။

၁၉၇၀ ကျော်က လှုပ်ရှားမှု အသားပေး သည်းထိတ်ဖို ဇာတ်ကား ကို ပြန်ရိုက်တဲ့ “ဖီလန် ၁၂၃ ရထား ပြန်ပေးဆွဲမှု (၂၀၀၉)” ရုပ်ရှင်မှာ ရထားလမ်း ကြီးကြပ်ကွပ်ကဲရေး ဝန်ထမ်း ဒန်ဇယ်လ်ဝါရှင်တန်ဟာ မထင်မှတ်ဘဲ ရထားပြန်ပေးမှုကို ကြားကနေ စေ့စပ်ညှိနှိုင်းသူ လုပ်ပေး နေရတယ်၊ နောက်ဆုံး ပြန်ပေးငွေ ကို လူဆိုးတွေဆီ (အသက်ကို စတေးပြီး) ကိုယ်တိုင်သွားပေးဖို့အထိ ဖြစ်လာတော့ သူ့ဇနီးကို ဖုန်းခေါ်တယ်။

သူ့တို့ ကလေး ကျောင်း ရေကူးပွဲ အတွက် သူ လေ့ကျင့်ပေးနေတဲ့ နည်းတခု ကို မမေ့အောင် ကလေး ကို ထပ်ပြောဖို့ ဇနီးသည်ကို မှာတယ်။  ပြန်ပေးမှု ကို ရုပ်သံ သတင်းကနေ စောင့်ကြည့်ရင်း အန္တရာယ် အတိမ်အနက် ကို ကျက်မိနေတဲ့ ဇနီး ဖြစ်သူ ဟာ လင်သား တယောက်၊ ဖခင် တယောက် အတွက် ပို အရေးကြီးတဲ့ မိသားစု တာဝန် အသက်ရှင်နေနိုင်မှု မရှိမဖြစ် အရေးကြီးပုံ ကို သွယ်ဝိုက် သတိပေးလိုတာကြောင့် လိမ္မာ ပါးနပ်စွာနဲ့ ဒေါသသံ ဟန်ပြု ပြောတယ်။

“… ဒီမှာ ရှင့်ဘာသာ ရှင် (ကလေးကို) တွေ့တော့မှ ကိုယ်တိုင် မှာ၊ သင်ပေး၊  ဒီမှာ ကျူပ် ပြောမယ် နားထောင်၊ ရှင် လုပ်ရမယ့် အလုပ် ကို လုပ်၊ ဒါပေမယ့် အိမ်မှာ နွားနို့ ကုန်နေပြီ၊ ရှင် နွားနို့ တစ်ဂါလံ ပုံး အိမ်အပြန်မှာ ကိုယ်တိုင် ဆွဲခဲ့၊ ဒါပဲ လိုချင်တယ်..”

ဆိုပြီး ငိုနေတဲ့ မျက်ရည်တွေကို ထိန်းရင်း ခပ်တည်တည် အမိန့်ပေးဟန်ပြု ဖုန်းထဲ က ပြန်ဆိုတယ်။  ဇာတ်လမ်း အပြီး မှာ ဒန်ဇယ်လ်ဝါရှင်တန် တယောက် ကုပ်ချောင်းချောင်းနဲ့ နွားနို့ဂါလံပုံးဆွဲရင်း အိမ်ပြန်သွားတဲ့ မြင်ကွင်းကို မြင်ရတော့ ရုပ်ရှင်ကြည့်ပရိသတ်ဟာ မိသားစုဘဝ အရေးကြီးမှုကို ခံစားကြရတယ်။

တကယ်တော့ မိသားစု တိုင်း အတွက် အဓိက လိုအပ်တာက အချိန်တန် ညနေ နေဝင်ချိန် ရောက်ရင် မသေမပျောက်၊ ကျန်းကျန်းမာမာ ဇနီး မယား သား သမီး ထံ နွားနို့ပုံး ဆွဲလျက် ပြန်လာမယ့် ဖခင် လင်ယောက်ျားရယ်ပါ။  မိသားစု အိမ်မှုကိစ္စကို ဝင်ကူ၊ သားသမီးနဲ့ တီတီတာတာ ပြောဆို ဆော့ကစားမယ့် ဖခင် တွေရယ်ပါ။

 

လူမှု အသိုင်းအဝန်း က သတ်မှတ်ပုံဖော် ဖန်တီးပေးထားတဲ့ အလုပ် တာဝန် ဝတ္တရား၊ အများ အကျိုး ဆောင်ရွက်မှု၊ စွန့်လွတ် အနစ်နာခံမှု သူရဲကောင်း ဆိုတာတွေဟာ မိသားစု အတွက် တကယ်တော့ မျက်ရည် အခြေတည် ရင်နဲ့ ပေးဆပ်ရင်း ကြံဖန် ဂုဏ်ယူနေရတာမျိုးပါပဲ။  ဒေါ်အောင်ဆန်းစုကြည် ရဲ့ သား အငယ် ကင်မ် အတွက် ငယ်ဘဝ မှာ အလိုချင် အတပ်မက်ဆုံးက အနားမှာ ရှိနေနိုင်မယ့် မိခင် ပဲ ဖြစ်မှာပါ၊ ဒီမိုကရေစီ သူရဲကောင်း နိုဗယ်လ် ငြိမ်းချမ်းရေးဆုရှင် မဟုတ်နိုင်ပါဘူး။  ဒေါ်အောင်ဆန်းစုကြည် ရဲ့ ငယ်ဘဝ မှာလည်း အဖြစ်ချင်ဆုံး ဆန္ဒ က အနားမှာ အသက်ရှင်လျက် ရှိကာ သူ့ခေါင်းကို တယုတယ ဖြီးပေးနိုင်မယ့် ဖခင် တယောက်ပဲ ဖြစ်မှာပါ၊ အမျိုးသားခေါင်းဆောင် အာဇာနည် တယောက် ဆိုတာက ဦးစားပေး မဟုတ်နိုင်ပါဘူး။

အခု ယူနတီ သတင်းသမားတွေ ကို စာနာ မပေးနိုင်၊ ပြယ်ရယ်ပြုချင် ကြသူများဟာ ဗမာပြည်မှာ လူဆိုး လူမိုက်များ ရဲ့ မုဒိန်းကျင့်ခံထိထားတဲ့ တရားစီရင်ရေး စနစ်ဆိုး၊ မတရားတဲ့ ဥပဒေ တွေ အကြောင်း၊ ပြည်သူလူထု ရဲ့ သတင်း ရယူ သိခွင့် တွေ အကြောင်း အလှမ်းမမီ လို့ ဖြစ်စေ၊ သဘောမတူ အာဏာရှင် စိတ်ဓာတ်ဝင်နေလို့ ဖြစ်စေ နေနိုင် ပြောနိုင် လှောင်သံ ငေါ့သံ ပြုချင် ပြု နိုင်ကြပေမယ့် ဓာတ်ပုံပါ ကလေးငယ် နဲ့ မိခင် ဇနီးသည် ဟာ ညနေ အိမ်ကို နွားနို့ပုံးထမ်း ပြန်လာမယ့် ဖခင် လင်သား ကို မျှော်နေမယ် ဆိုတာလေးကို တွေးမိ စာနာ စိတ် ထားသင့်ကြပါတယ်။

သူတို့အတွက် “နွားနို့ပို့သူများသာ” အလိုရှိပါတယ်။  ကလေးငယ်ဟာ “အတူတူနေချင်တယ်” သာ ဟစ်အော်နေရတယ်။

ဗမာပြည် အနှံ့က စစ်ပွဲ၊ ရန်ပွဲ၊ အမုန်း၊ ပဋိပက္ခကြားက တကွဲတကွာဖြစ်နေတဲ့ မိသားစုအားလုံးဟာလည်း “နွားနို့ပို့သူများကိုသာ” အလိုရှိနေပါတယ်။  ကလေးငယ်များ ဟာ “အတူတူနေချင်တယ်” သာ ညည်းညူ နေကြမှာပါ။

အလျဉ်မမီနိုင်တဲ့ စားဝတ်နေရေး အတွက် တိုင်းတပါးမှာ ဝမ်းစာ ရှာဖွေ ဝေးကွာနေရတဲ့ မိသားစု များ အတွက်လည်း အတူတူ အနားမှာ ရှိနေနိုင်မယ့် ချစ်ခင်မြတ်နိုးရသူ “နွားနို့ပို့သူများကိုသာ” အလိုရှိပါတယ်။  မိဘ၊ ဇနီး၊ မယား၊ ခင်ပွန်း သားသမီး များ ဟာ “အတူတူနေချင်တယ်” ကိုသာ ရွတ်ဆို တမ်းတ နေကြရတယ်။

ကျနော်တို့ အားလုံးဟာ “နွားနို့ပို့သူများသာ” အလိုရှိသူတွေပါ၊ “အတူတူနေချင်တယ်”ကို ရေရွတ် နေရသူတွေပါ။  ဘဝတူတွေပါ။  စာနာစိတ် ထားသင့် လှပါတယ်။

ငြိမ်းချမ်းအေး
ဇူလိုင် ၁၂၊ ၂၀၁၄

မှတ်ချက် – ဓာတ်ပုံများ သည် လူမှုကွန်ရက်စာမျက်နှာများပေါ်တွင် ပျံ့နှံ့နေသည့် အဖမ်းဆီးခံ သတင်းထောက်နှင့် မိသားစုပုံ ဖြစ်သည်။  မူရင်း ဓာတ်ပုံဆရာနှင့် မျှဝေသူကို မသိပါ။  သက်ဆိုင်သူများကို ကျေးဇူးတင်ရှိကြောင်း မှတ်တမ်းပြုပါသည်။  အခကြေးငွေ အလို့ငှာ ယူငင် သုံးစွဲခြင်း မဟုတ်ပါ။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ရသဆောင်းပါးစုံ, ငြိမ်းချမ်းအေး

One Response to ငြိမ်းချမ်းအေး – နွားနို့ပို့သူများသာ အလိုရှိသည်

  1. nyeinchanaye81 on July 17, 2014 at 8:40 am

    ဆောင်းပါး ပထမ ဆုံး စာကြောင်း ပါ “ရင်စို့” အစား “ရင်ဆို့” ဟု ပြင် ဖတ်ပေးပါရန်။ လုံးဝ အဓိပ္ပာယ် မတူညီသည့် စကားနှစ်လုံးကို မှားယွင်းသုံးမိခြင်း ဖြစ်ပါသည်။

    ရင်စို့ (နာမ်) = ရင်ဘတ်အထက်ပိုင်း

    ရင်ဆို့ (ကြိယာ) = မောလွန်း၍ ဖြစ်စေ၊ ပူပင်သောက ရောက်လွန်း၍ ဖြစ်စေ ရင်၌ ပူလောင်တစ်ဆို့သည်။

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ

By

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ (မိုးမခစာအုပ်စင်) အောက်တိုဘာ ၁၈၊ ၂၀၁၈...

Read more »

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ

By

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ (မိုးမခ) အောက်တိုဘာ ၁၂၊ ၂၀၁၈ မိုးမခစာပေက...

Read more »

မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း

By

  မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း ထွက်တော့မယ် (မိုးမခ) စက်တင်ဘာ...

Read more »

ဒေါ်ခင်မျိူးချစ်၏ သတင်းစာလောက ထွက်ပါပြီ

By

ဒေါ်ခင်မျိူးချစ်၏ သတင်းစာလောက ထွက်ပါပြီ (မိုးမခ) သြဂုတ် ၂၄၊ ၂၀၁၈ စာရေးဆရာမကြီး ဒေါ်ခင်မျိူးချစ်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments