တူမောင်ညို – လူထုအင်အားနဲ့ ဖိအားပေးအကြပ်ကိုင်ရန် ပျက်ကွက်နေသမျှ ကျိုးနွံနာခံနေရလိမ့်မည်

August 12, 2014

တူမောင်ညို – လူထုအင်အားနဲ့ ဖိအားပေးအကြပ်ကိုင်ရန် ပျက်ကွက်နေသမျှ ကျိုးနွံနာခံနေရလိမ့်မည်
သြဂုတ် ၁၂၊ ၂၀၁၄
 

ပြည်သူအများစုနဲ့အတူ ကျနော်မျှော်လင့်ထားတာက “ပုဒ်မ၄၃၆ပြင်ဆင်ရေးဆန္ဒပြု လက်မှတ်ရေးထိုးတဲ့လှုပ်ရှားမှု” ရလဒ်တွေ အတိအကျ ရေတွက်ပြီးတဲ့နောက်  တိုင်းပြည်နဲ့လူထုထံ တင်ပြ၊ ရှင်းလင်း၊ အသိပေးတဲ့အခါမှာ ဒီချုပ်ပါတီဥက္ကဋ္ဌ ကိုယ်တိုင်တက်ရောက် ပြီး“၂၀၀၈အခြေခံဥပဒေပြင်ဆင်ရေး”ဘယ်လိုရှေ့ခရီး ဆက်ကြမယ်ဆိုတာကိုပါ ပြတ်ပြတ်သားသား ညွန်ပြပြောဆိုလိမ့်မယ်လို့ မျှော်လင့် မိတာဖြစ် ပါတယ်။

ဘာကြောင့်ဒီလို မျှော်လင့်သလဲဆိုတော့ “ပုဒ်မ ၄၃၆ ပြင်ဆင်ရေးကိစ္စ” က  ဒီချုပ်ပါတီကြားဖြတ်ရွေးကောက်ပွဲဝင်စဉ်က တိုင်းပြည် နဲ့ လူထုထံ တင်ပြခဲ့တဲ့ လုပ်ငန်းတာဝန် ၃ ရပ်ထဲက အချက်အချာကျတဲ့လုပ်ငန်းတာဝန်တစ်ခုဖြစ်တဲ့ “၂၀၀၈ အခြေခံ ဥပဒေ ပြင်ဆင်ရေး”ကိစ္စနဲ့ တိုက်ရိုက်ဆက်စပ်နေတဲ့ကိစ္စဖြစ်တယ်။ ဒီချုပ်ပါတီ  လွှတ်တော်ထဲ “ဝင်”သွားတာဟာ “ ပြင်” ဖို့ ဝင်သွားတာ မဟုတ် ပါလား။

“၂၀၀၈ အခြေခံဥပဒေ” ပြင်ဆင်ရေးအတွက် ပုဒ်မ ၄၃၆ ပြင်ဆင်ရေးဟာ သော့ချက်အကျဆုံး ပြင်ဆင်မှုဖြစ်တယ်လို့ ဒီချုပ် ဥက္ကဋ္ဌ အပါအဝင် ဟောပြောသူအများစုက အတန်တန်ဟောပြောနေတဲ့ကိစ္စဖြစ်နေတာကလည်း တကြောင်းပေါ့။ ဒါကြောင့်ဒီလို အချက် အချာ ကျတဲ့ကိစ္စကြီးတစ်ခုကို အဓိကကျတဲ့ပုဂ္ဂိုလ်ကတက်ရောက်ပါဝင်ရှင်းလင်းမှာပဲဆိုတာ သဘာဝကျတဲ့ မျှော်လင့်ချက်ဖြစ်ပါတယ်။ ဒါပေမယ့် လက်တွေ့ရှင်းလင်းတဲ့အခါမှာတော့ ဒီချုပ်ပါတီဥက္ကဋ္ဌ ပါဝင်ခြင်းမရှိဘဲ။ ဒီချုပ်ပါတီ ဗဟိုအလုပ်အမှုဆောင် ဦးဉာဏ်ဝင်းနဲ့ ၈၈ ငြိမ်းပွင့်က တာဝန်ရှိသူတစ်ဦး တက်ရောက်ရှင်းလင်းတာတွေ့ရပါတယ်။ အဖြစ်က ဘာနဲ့တူနေသလဲဆိုတော့ အမေတွေ့ချင်ဇောနဲ့ ပြန် လာတဲ့ အဝေးရောက်သားကို မြေပဲနှုတ်စရာရှိနေလို့ဆိုပြီး အမေကိုယ်တိုင် ဘူတာဆင်း မကြိုဘဲ၊ ဘဒွေးနဲ့နွားလှည်းပဲ လွှတ်ပြီးကြိုခိုင်း လိုက်သလိုမျိုးဖြစ်နေပါတယ်။

ဦးဉာဏ်ဝင်းက ဘယ်လိုရှင်းသလဲဆိုတော့ “အခုလက်ရှိ ဖွဲ့စည်းပုံအခြေခံဥပဒေကြီးကို စောင့်ကြည့်လို့ကတော့ ဘယ်လိုမှ ပြင်လို့လည်းမရဘူး။ ဘာမှလည်းလုပ်လို့မရဘူး။ လုပ်လို့မရအောင်လည်း ပြဋ္ဌာန်းထားတယ်။ သို့သော် ပြည်သူအများ ဆန္ဒရှိလာပြီဆိုရင် နည်းလမ်းတွေ့လာမှာပါ။ အဲဒီလို နည်းလမ်းကို ကြိုးစားဖော်ထုတ်ပြီးတော့ ဆက်လက်ဆောင်ရွက်သွားဖို့ရှိပါတယ်” တဲ့။

အထက်မှာဖော်ပြထားတဲ့ ဦးဉာဏ်ဝင်းပြောစကားကို ၂ ပိုင်းခွဲပြီး တစ်ပိုင်းစီအပေါ် ကျနော့်အမြင်ကို သုံးသပ်တင်ပြပါရစေ။

ပထမအပိုင်း ( “အခုလက်ရှိ ဖွဲ့စည်းပုံအခြေခံဥပဒေကြီးကို စောင့် ကြည့်လို့ကတော့ ဘယ်လိုမှပြင်လို့လည်းမရဘူး။ ဘာမှ လည်းလုပ်လို့မရဘူး။ လုပ်လို့မရအောင်လည်း ပြဋ္ဌာန်းထားတယ်” ) တဲ့ ။  ဒီချုပ်ပါတီ ဗဟိုအလုပ်အမှုဆောင်လည်းဖြစ်၊ ကိုယ်တိုင်ဥပဒေ ပညာရှင်တစ်ဦးလည်းဖြစ်တဲ့ ဦးဉာဏ်ဝင်းက ဥပဒေရှုဒေါင့်အရရော ၊ ဒီချုပ်ပါတီ လွှတ်တော်ထဲဝင်သွား ပြီးတဲ့နောက် ရရှိလာခဲ့တဲ့ မနည်း လှတဲ့ အတွေ့အကြုံတွေနဲ့သင်ခန်းစာတွေအပေါ်ကနေရော  နိဂုံးချုပ်ပြီး ပြောတာမို့ ထင်ပါတယ်။ ဖွဲ့စည်းပုံပြင်ဆင်ရေးသမားတွေ ရင်ဆိုင် တွေ့ကြုံတွေ့နေရတဲ့ ပကတိအခြေအနေဟာ ကွက်ကွက်ကွင်းကွင်းပေါ်လွင်လှပါတယ်။

ဒုတိယအပိုင်း၊ ဒီအပိုင်းက  ပကတိရင်ဆိုင်နေရတဲ့  စိန်ခေါ်မှုတွေကို ရင်ဆိုင်ဖြေရှင်းပြီး ရှေ့ဆက်ရမယ့် လုပ်ငန်းစဉ် အပိုင်း လိုဖြစ်တာကြောင့် ပိုပြီးတိကျရှင်းလင်းဖို့လိုအပ်ပါတယ်။ ဒါပေမဲ့ ဦးဉာဏ်ဝင်းက ရှေ့လုပ်ငန်းစဉ်ကို အခုလိုပြောပါတယ်။ ( “ပြည်သူ အများဆန္ဒရှိလာပြီဆိုရင် နည်းလမ်းတွေ့လာမှာပါ။ အဲဒီလိုနည်းလမ်းကို ကြိုးစားဖော်ထုတ်ပြီးတော့ ဆက်လက်ဆောင်ရွက်သွားဖို့ရှိပါ တယ်”)တဲ့။

ဒီလိုပြောလိုက်တာကိုတော့  ဒီချုပ်ပါတီ ထုံးစံလို့ပဲ ရှေ့မျက်နှာနောက်ထားပြီး အားနာနာနဲ့ ပြောရပါလိမ့်မယ်။ ဒီချုပ်ပါတီဟာ “သဝေထိုး (ေ) ကဲ့သို့” အတွင်းထဲ ဝိုက်ခွေဝင်သွားတာကို တွေ့ရပါလိမ့်မယ်။

ဒီချုပ်ပါတီက ဦးစီးဆောင်ရွက်ခဲ့သော  “၂၀၀၈ အခြေခံဥပဒေပြင်ဆင်ရေးလူထုဟောပြောပွဲ”တွေမှာ ပြည်သူတွေက ပြင်ဆင် ရေးဆန္ဒကို ဖော်ထုတ်ခဲ့ကြပြီးပြီ။ အခုလည်း “ပုဒ်မ ၄၃၆ပြင်ဆင်ရေး”အတွက်လည်း လက်မှတ်ထိုးဆန္ဒပြုခဲ့ကြပြီ၊ မလုံလောက်သေးဘူး လား။

ဦးဉာဏ်ဝင်းအပြောအရဆိုရင် ပြည်သူအများဆန္ဒရှိလာပြီဆိုရင်နည်းလမ်းတွေ့လာမှာမို့ ဆန္ဒဖော်ထုတ်ရေးလှုပ်ရှားမှု ထပ်မံပြီး လုပ်ကြရဦး မယ့် သဘောဖြစ်နေပါတယ်။

သြဂုတ်လ ၁ ရက်နေ့မှာ ပုဒ်မ ၄၃၆ ပြင်ဆင်ရေးနဲ့စပ်လျဉ်းပြီး  ဒေါ်အောင်ဆန်းစုကြည် ကနဦး ရှင်းလင်းပြောကြားတဲ့ အခါ က “ကျမ ရဲရဲဝံ့ဝံ့ပြောနိုင်တာက ဒီနိုင်ငံရဲ့သမိုင်းမှာ ဒီလို လူ ၅ သန်းကျော်က ကိစ္စတခုကို လက်မှတ်ထိုးပြီးတော့ မိမိတို့ဆန္ဒအရ လျှို့ဝှက် မဟုတ်ပဲ ပွင့်ပွင့်လင်းလင်း လက်မှတ် ထိုးပြီး ထောက်ခံခဲ့တယ်ဆိုတာ တခါမှ မရှိခဲ့ဖူးဘူး။ ဒါဟာ ဒီနိုင်ငံမှာ ပထမဦးဆုံးပဲ” လို့ မှတ်ချက်ပေးသွားခဲ့ပါတယ်။
ဒေါ်အောင်ဆန်းစုကြည် ပြောသလို ပထမဦးဆုံး ဟုတ်ချင်လည်း ဟုတ်မှာပါ။ ဒီကိစ္စတွေက နိုင်ငံရေးဗေဒ သုတေသီတွေလုပ် ကြပါလိမ့်မယ်။ ဒီနေရာမှာ အတိအကျပြောနိုင်တဲ့ အချက်တစ်ခုတော့ရှိပါတယ်။ အရေးကြုံလာတဲ့အခါတိုင်း ပြည်သူတွေဟာ သူတို့ ဆန္ဒကို ဗြောင်ရော/ လျို့ဝှက်ရော စွန့်စွန့်စားစား၊ ရဲရဲဝံ့ဝံ့ထုတ်ဖော်ပြသစမြဲဖြစ်တယ်ဆိုတဲ့အချက်ပါပဲ။

“၂၀၀၈ အခြေခံဥပဒေ” ပြည်သူ့ဆန္ဒခံယူစဉ်မှာလည်း ပြည်သူတစ်သန်းကျော် (၁ ၃၇၅ ၄၈၀ ) ဟာ နာဂစ်မုန်းတိုင်းကြီး ကြုံနေရတဲ့ကြားထဲကနေ ရဲရဲဝံ့ဝံ့ “ကန့်ကွက်မဲပေး” ပေးခဲ့ကြပါတယ်။ အဲဒီတုန်းက ဒီချုပ်ပါတီက ကန့်ကွက်မဲပေးဖို့ ပြည်သူတွေကို ဆော် သြခဲ့တယ် မဟုတ်ပါလား။ ပုဒ်မ ၄၃၆ ပြင်ဆင်ရေးမှာလည်း ပြည်သူ ၅ သန်းနီးပါး ( ၄ ၉၄၁ ၉၉၈ ) က လက်မှတ်ထိုးဆန္ဒပြုခဲ့ကြပြီ။ ပြည်သူလူထုဘက်က တာဝန်ကျေပါတယ်။  တာဝန်ပျက်ကွက်တာ မရှိခဲ့ပါဘူး။

(နဝတ-နအဖ) စစ်အစိုးရဟာ  လူထုဆန္ဒကို ဘယ်တုန်းကမှ မလေးစားခဲ့ပါဘူး။ အရေးမထားခဲ့ပါဘူး။ လက်မခံခဲ့ဘူး။ လူထု ဆန္ဒကို ဗြောင်ဖျက်သိမ်းပစ်ဖို့ ဝန်မလေးသလို၊ အဓမ္မရယူဖို့ကလည်း သူတို့အတွက် ထမင်းစားရေသောက်ကိစ္စသာဖြစ်ပါတယ်။ လူထု လှုပ် ရှား တွေကို အကြမ်းဖက်ဖိနှိပ်ချေမှုန်းခဲ့ပြီး၊ ပြည်သူလူထုတစ်ရပ်လုံးက လက်နဲ့ရေး ဖော်ပြခဲ့ကြတဲ့ “ ၁၉၉၀ ရွေးကောက်ပွဲရလဒ်” ကို (နဝတ-နအဖ) စစ်အစိုးရက ခြေနဲ့ဖျက်ခဲ့ကြပြီးဖြစ်တယ်မဟုတ်ပါလား။ ဒီလိုနဲ့ (နဝတ-နအဖ) စစ်အစိုးရဟာ “ထန်းလျက်ခဲ ခွေး လျက် တဲ့”နည်းနဲ့ “ ၁၉၉၀ ရွေးကောက်ပွဲရလဒ်နဲ့ ဒီချုပ်ပါတီ” ကို လုံးပါး ပါးစေခဲ့ပြီးဖြစ်တယ် မဟုတ်ပါလား။

ဗိုလ်နေဝင်း စစ်အုပ်စုက ဖွဲ့စည်းပုံအခြေခံဥပဒေ (၁၉၄၇) ကိုဖျက်ပြီး၊ ဖွဲ့စည်းပုံအခြေခံဥပဒေ (၁၉၇၄) စိတ်ကြိုက်ရေးခဲ့တယ်။ (နဝတ-နအဖ) စစ်အုပ်စုက ဘမျိုးဘိုးတူ ဆိုသလို “၁၉၉၀ ရွေးကောက်ပွဲ” ဖျက်သိမ်းပြီး၊ “၂၀၀၈ ဖွဲ့စည်းပုံအခြေခံဥပဒေ” စိတ်ကြိုက်ရေး ဆွဲပြီး အဓမ္မအတည်ပြုခဲ့ကြတယ်။ ၂၀၁၀ နိုဝင်ဘာရွေးကောက်ပွဲမှာ စိတ်ကြိုက်ရလဒ်ထွက်အောင်  “ကြိုတင်မဲ” တွေနဲ့ (ကြံ့ဖွံ့ပါတီ အနိုင်ရအောင်) လုပ်ဆောင်ပြခဲ့တယ်မဟုတ်ပါလား။

လူထုဆန္ဒဆိုတာနဲ့ပတ်သက်လာရင်“စိတ်ကြိုက်ရလဒ်မဟုတ်လျှင် မျက်ကွယ်ပြုဖျက်သိမ်း၊ စိတ်ကြိုက်ရလဒ်ဖြစ်အောင် အဓမ္မ လုပ်ကြံဖန်တီး”ဆိုတာ ယနေ့(ဗိုလ်)ဦးသိန်းစိန်ကြံ့ဖွံ့အစိုးရအပါအဝင် (နဝတ-နအဖ)စစ်အစိုးရတို့ရဲ့ အရင်းခံမူဝါဒနဲ့အခြေခံသဘောထား ပဲဖြစ်ပါတယ်။

ဒါကြောင့် လူထုဆန္ဒဆိုတာကို ထိုက်သင့်သလို ဆောင်ရွက်ပေးပါမည့်အကြောင်း အသနားခံ တင်ပြနေလို့ မဖြစ်တော့ပါဘူး။ လူထုဆန္ဒကို အုပ်စိုးသူအစိုးရ လေးစားကျိုးနွံ၊ နာခံလာတဲ့အထိ လူထုအင်အားနဲ့ ဖိအားပေးအကြပ်ကိုင်ကြရမှာပါ။

ဆောင်းပါးနိဂုံးကို  သြဂုတ်လ ၁၁ ရက်နေ့၊ သတင်းစာရှင်းလင်းပွဲမှာ အမတ်ချုပ် (ဗိုလ်) ဦးရွှေမန်း ပြောတဲ့စကားကို ကောက် နုတ်ပြီး နိဂုံးချုပ်ပါရစေ။

အမတ်ချုပ်ကြီးက လူထုဆန္ဒ၊ လူထုဆန္ဒလက်မှတ်ရေးထိုးဖော်ပြမှု စတဲ့စကားလုံးတွေကို တမင်ရှောင်ရှားပြီး “  signature campaign”၊ “ပြည်သူများရဲ့အသံ”လို့သာ သုံးနှုန်းပြောသွားခဲ့ပြီး။ “လွှတ်တော်ကဖွဲ့စည်းထားတဲ့  ဖွဲ့စည်းပုံအခြေခံဥပဒေ ပြောင်းလဲရေး ဆိုင်ရာ ကော်မတီ(၃၁ ဦးကော်မတီ) အပေါ်မှာ အကျိုးသက်ရောက်မှုမရှိပါဘူး” ဆိုတဲ့အချက်ကို  ဒုတိယအကြိမ်ထပ်မံအတည်ပြု ပြော ဆို သွားပါတယ်။

ဒါပေမဲ့ “လွှတ်တော် ဆောင်ပုဒ် သို့မဟုတ် မူဝါဒနဲ့ သက်ဆိုင်တဲ့ကိစ္စဖြစ်တဲ့အတွက် ပြည်သူများရဲ့အသံကိုတော့ သက်ဆိုင်ရာ လွှတ်တော်ကိုယ်စားလှယ်များ စဉ်းစားဆောင်ရွက်နိုင်တဲ့အတွက် ထိုက်သင့်တဲ့အကျိုးသက်ရောက်မှုတော့ရှိနိုင်တယ်လို့ဖြေလိုပါတယ်” လို့ ဖြေကြားသွားတာကြားလိုက်ကြရမှာပါ။

လူထုဆန္ဒ ၅ သန်းနီးပါးဟာ လွှတ်တော်ထဲက ကြံ့ဖွံ့အမတ်အများစုနဲ့စစ်သားအမတ်များရဲ့ စဉ်းစားပေးမယ့် အပေါ်မှာတည် တယ်လို့ ပြောတာပါ။ လွှတ်တော်ထဲမှာ “ထိုက်သင့်တဲ့ အကျိုးသက်ရောက်မှုကလေးရရှိဖို့အရေး” ကြံ့ဖွံ့အမတ်တွေကို ဒူးဖက်ပြီး လော်ဘီ လုပ်ရမယ့်ကိန်းဖြစ်နေပါတယ်။ ဒီချုပ်ကတော့ ၄၃၆ ပြင်ဆင်ရေးဆန္ဒတွေ လွှတ်တော်တင်ပြမယ်ဆိုတဲ့အချက်ကို တုန့်ပြန်တာလည်း ဖြစ် ပါတယ်။ သဘောကတော့ လွှတ်တော်ထဲ အများစုဖြစ်တဲ့ ကြံ့ဖွံ့အမတ်တွေ (စစ်သားအမတ်တွေ) က စဉ်းစားဆုံးဖြတ်ပေးလိုက်ကြလို့ (ဗိုလ်) ဦးရွှေမန်းက ညွန်းကြားတာပါ။

“လူထုဆန္ဒ”ဆိုတာထိုက်သင့်တဲ့အကျိုးသက်ရောက်မှုရှိဖို့ အုပ်စိုးသူများထံ ဒူးထောက် အသနားခံရမယ့်ကိစ္စမဟုတ်။ အုပ်စိုးသူ အစိုးရများ လေးစား၊ကျိုးနွံ၊ နာခံလာစေရန်အတွက် လူထုအင်အားနဲ့ ဖိအားပေးအကြပ်ကိုင်ရမယ့်ကိစ္စ ဖြစ်ပါတယ်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:တူမောင်ညို, သူတို့အာဘော်

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ် ထွက်ပြီ

By

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ်...

Read more »

မိုးမခလစဉ်မဂ္ဂဇင်း ဇွန် ၂၀၁၈ ၊ တွဲ ၅၊ မှတ် ၂၊ အချိန်မီ ထွက်ပါပြီ

By

  မိုးမခလစဉ်မဂ္ဂဇင်း ဇွန် ၂၀၁၈ ၊ တွဲ ၅၊ မှတ် ၂၊...

Read more »

ရဲဘော် မောင်တူးရဲ့ သက်ရှိပန်းချီ

By

  ရဲဘော် မောင်တူးရဲ့ သက်ရှိပန်းချီ  (မိုးမခစာအုပ်စင်) မေ ၃၊ ၂၀၁၈ ခေါင်းစဉ်...

Read more »

မိုးမခမဂ္ဂဇင်း မေ ၂၀၁၈၊ အတွဲ ၅၊ အမှတ် ၁ ထွက်ပြီ

By

  မိုးမခမဂ္ဂဇင်း မေ ၂၀၁၈၊ အတွဲ ၅၊ အမှတ် ၁ ထွက်ပြီ...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်