ထင်အောင် – ကျွန်တော်ကြိုက်ခဲ့ဘူးသော အငြိမ့်နှင့် ဇာတ်ပွဲများ

December 23, 2014

– ကျွန်တော်ကြိုက်ခဲ့ဘူးသော အငြိမ့်နှင့် ဇာတ်ပွဲများ
(မိုးမခ) ဒီဇင်ဘာ ၂၃၊ ၂၀၁၄

ကျွန်တော်ငယ်စဉ်က အပျော်အပါးကို အလွန်ကြိုက်ခဲ့ပါတယ်။ အဖိုးအဖွားတို့ နဲ့  ပုံမှန် သွားကြည့်ရသော ရုပ်ရှင် ပြဇာတ်များကို ပျော်ပွဲရွှင်ပွဲများအဖြစ် သတ်မှတ်ထားတာဖြစ်ပါတယ်။ တနင်္ဂနွေနေ့ တွင် ကန်တော်ကြီးသို့ သွားကာ အနားယူရင်း အဖေကစာရေးတတ်ပါတယ်။ မိသားစုလိုက် အားလုံး နံနက်စောစောထကြကာ ကန်တော်ကြီးကို သုံးဘီးကားနဲ့ သွားကြပါတယ်။ အရိပ်ကောင်းကောင်း၊ နေရာကောင်းကောင်းကို ရှာပြီး ဖျာခင်းရပါတယ်။ ယူသွားသောစားစရာများကို စားလိုက်၊ လမ်းလျှောက်လိုက်၊ ပြေးလွှားဆော့ကစားလိုက်၊ မောလာပါက ဖျာပေါ်တွင်လှဲအိပ်လိုက်နှင့် ညနေစောင်းတဲ့အထိ ပျော်စရာအချိန်လေးများကို ရယူခဲ့ပါ တယ်။

ညနေစောင်းလာသောအခါမှာ ပစ္စည်းများကိုပြန်သိမ်းစည်းကြပြီး တောင်ကုန်းလေးပေါ်မှာ ဖျာခင်းနေရာယူရပြန်ပါတယ်။ အခြားမိသားစုတွေလဲ ဖျာခင်းနေရာယူနေကြတာကို တွေ့မိပါတယ်။ မျက်နှာမူရာအရပ်မှာ အငြိမ့်စင်တစ်ခုရှိနေပါတယ်။ အပတ်စဉ်တနင်္ဂနွေနေ့တိုင်း နံမည်ကြီးအငြိမ့်အဖွဲ့တွေက လာရောက်ကပြကြတာဖြစ်ပါတယ်။ ယူတီစီမတင်ညွန့်၊ ကောလိပ်မြိုင် စတဲ့ ရန်ကုန်မှနံမည်ကြီးအငြိမ့်များက လာရောက်ကပြကြတာဖြစ်ပါတယ်။

ကျွန်တော်တို့ ပရိသတ်တွေ ဖျာခင်းနေကတည်းက စင်ပေါ်မှာ ဆိုင်းအဖွဲ့ တွေက ဆိုင်းဝိုင်းကို တီးခတ်ရန် ပြင်ဆင်နေကြပြီ ဖြစ်ပါတယ်။ စင်ပေါ်တွင်ဆိုင်းအဖွဲ့၊ လူပြက်(လူရွှင်တော်)၊  ရှေ့ထွက်မင်းသမီးနှင့် ခေါင်းဆောင်မင်းသမီးတို့က နေရာယူကြကာ ကပြဖြေဖျော်ကြမှာ ဖြစ်ပါတယ်။ အဖွင့်အပိတ်လုပ်ပေးသော ကတ္တီပါလိုက်ကာခန့်ခန့်ကြီး မပါပါ။ ဆိုင်းအဖွဲ့၏ အနောက်နားမှာ အဝတ်စပေါ်တွင် ရွှေချည်ငွေချည်များဖြင့်ရေးထိုးထားသော အငြိမ့်အဖွဲ့၏အမည်၊ ခေါင်းဆောင်မင်းသမီးအမည်တို့ကို စာလုံးအကြီးကြီးဖြင့် ရေးထိုးထားပြီး ရှေ့ထွက်မင်းသမီး၏အမည်၊ လူပြက်နှစ်ယောက်ရဲ့ အမည်တွေကိုတော့ ဘေးနှစ်ဘက်မှာ စာလုံးသေးသေးနဲ့ ရေးထိုးထားပါတယ်။ အဖွဲ့အမည်ကို ဦးစားပေးကာ မင်းသမီးအကကို အဓိကခံစား ကြည့်ရှုနေကြတဲ့ အချိန်ကာလဖြစ်ပါတယ်။

အငြိမ့်သဘင်တို့၏ သမားစဉ်အတိုင်း ဆိုင်းဝိုင်းကြီးမှ လူခေါ်အဖွင့်တီးခတ်သံကို ကြားလိုက်တာနဲ့  နေရာဦးထားတဲ့ဖျာတွေပေါ်မှာ ပရိသတ်က နေရာယူကြပါတော့တယ်။ ဆိုင်းတီးသံကို နားထောင်ရင်း လူပြက်နှစ်ယောက်ထွက်အလာလမ်း ကို စောင့်မျှော်နေကြပါတယ်။ ဆိုင်းက အားရပါးရတီးခတ်ပြီး လေပြေထိုးလိုက်ချိန်မှာ လူပြက်များက စင်၏တစ်ဖက်တစ်ချက်ဆီကနေ ထွက်လာကြပါတယ်။ ပရိသတ်တွေကတော့ ဘာပြက်လုံးမှ မထုတ်ရသေးဘဲ သူတို့ ရဲ့မျက်နှာပေးအမူအရာကို ကြည့်နေကာ ပျော်ရွှင်စွာ ရယ်မောနေကြပါပြီ။ ကျွန်တော်တို့ကလေးတသိုက်ကတော့ လူရွှင်တော်များ ဘာလုပ်လုပ် ရယ်စရာဖြစ်နေပြီး၊ ရယ်ရမည်ဟုသာ တွေးနေမိပါတယ်။

လူကြီးများက ယူတီစီက ဘယ်လိုအကကောင်းတာ၊ ကောလိပ်မြိုင်ကမောင်လေးလို့ခေါ်ပြီးရင် အကကို ထကလိုက်တာ ဆိုတာတွေကိုပြောကြရင်း မင်းသမီးအကကို အာရုံစိုက်နေချိန်မှာ ကလေးတွေကတော့ ဇာတ်ခုံကို နောက်ကြောပေးထိုင်နေတဲ့ လူပြက်များကိုသာ ကြည့်နေကြပါတယ်။ အက အပိုဒ်ပြီးမှ လူပြက်တွေရဲ့အလှည့် ရယ်စရာတွေကြားရမှာ ဆိုတော့ အကကို မြန်မြန် ပြီးစေချင်လှပြီ။

ရှေ့ထွက်မင်းသမီးလေးက အဆို အကနှစ်ကြော့ခန့် ပြီးသွားချိန်မှာ သီချင်းတစ်ပုဒ်ကို သီဆိုကနေရင်း စင်တစ်ဘက်နားကို ကပ်သွားပါတယ်။ ဒီအချိန်မှာ စင်၏အခြားတစ်ဘက်ကနေ ခေါင်းဆောင်မင်းသမီးက ဒီသီချင်းကိုပဲဆက်ဆိုရင်း ကနေရင်း ထွက်လာပါတယ်။ လူရွှင်တော်များနဲ့ ပီယဝါစာချစ်ဖွယ်သောစကားများကို ပြောလိုက်၊ ပရိသတ် ကြိုက်နှစ်သက်သောကကွက်လေးများကို ကပြလိုက်နှင့် နေညိုချိန်တွင် အငြိမ့်ပွဲ သိမ်းပါတော့တယ်။

တစ်ပတ်တကြိမ်ကပြသော ကန်တော်ကြီးဥယျာဉ်မှ အငြိမ့်ဖြေဖျော်ပွဲသည် ၀န်ထမ်းများ၊ အလုပ်သမားများကို အပမ်းဖြေစေနိုင်သောနေရာတစ်ခုဖြစ်နေပါတယ်။ နာရီပိုင်းလေးသာ ရယ်မောလိုက်ပေမဲ့၊ ပင်ပမ်းနွမ်းနယ်မှုများက ပြေလျော့သွားကာ လူတွေကို လန်းဆန်းသွားစေပါတယ်။ ကန်တော်ကြီးအငြိမ့်စင်ကိုကြည့်ခဲ့ရာမှ ကျွန်တော်ဟာ အငြိမ့်ပွဲကို စွဲလမ်းနှစ်သက်သူတစ်ယောက် ဖြစ်လာပါတော့တယ်။

ထိုအချိန်ကာလများတွင် သိမ်ဖြူကွင်း၌ အလင်္ကာကျော်စွာရွှေမန်းတင်မောင်က ညဝက်သဘင်ပွဲကို စတင်တီထွင်ကပြနေပါတယ်။ယခင်က မြန်မာ့ဇာတ်သဘင်တွေဟာ မိုးအလင်းကကြတာကြောင့် လူများအိပ်ရေးပျက်တာကြောင့် အင်မတန်ဝါသနာပါသူများသာ လာရောက်ကြည့်ရှု ကြပါတယ်။ အမေရိကန်ကိုလေ့လာရေးသွားခွင့်ရတဲ့ ရွှေမန်းက အနောက်နိုင်ငံသဘင်ကပြမှုစံနစ်က ကောင်းမွန်သင့်တော်မယ်ထင်တာကို ပြုလုပ်လိုက်တာပါ။ ယဉ်ကျေးမှုဋ္ဌာနအတွင်းဝန်လုပ်နေသော ဘကြီးဖြစ်သူက ခေါ်ဆောင်သွားမှုကြောင့် ညဝက်သဘင်မှာ လက်ဝဲသုန္ဒရဇာတ်ကို ကြည့်ရှုခွင့်ရခဲ့ပါတယ်။ ပြဇာတ်ကျေးဇူးကြောင့် “မဲဇာတောင်ခြေ”ရတုကို စ ကြားဘူးကာ သဘောကျသွားပါတော့တယ်။

ရွှေမန်းလိုပင် နိုင်ငံခြားတွင် အကပညာလေ့လာခဲ့ပြီး ခေတ်မီဇာတ်ခုံတည်ဆောက်မှုပညာများကို သင်ကြားတတ်မြောက်လာသူကက်နက်စိန်ကလည်း ပလေဒီယံရုပ်ရှင်ရုံ (နောင်တွင် ပပဝင်းရုံဟု အမည်ပြောင်းသည်။ ယခု ဟော်တယ်ကြီး ဖြစ်နေသောနေရာ) တွင် ကပြအသုံးတော်ခံခဲ့ပါတယ်။ ဇာတ်ခုံပေါ်မှာ ရေကူးပြခြင်း၊ ရေအောက်မြင်ကွင်းများနှင့် ကပြ အသုံးတော်ခံပါမည်ဆိုသော ကြော်ငြာကြောင့် လူကြီးများနှင့်အတူ ပလေဒီယံသို့  ရောက်ခဲ့ရပါတယ်။ ငယ်ရွယ်သေးလို့ လား မသိပါ၊ ကက်နက်စိန်၏ စိန်မဟာသဘင်ကို သိပ်မခံစားတတ်သေးပါ ။ အပြောကောင်းတဲ့ရွှေမန်းကို ပိုသဘောကျမိပါတယ်။ ဒါပေမဲ့ နောက်ပိုင်းမှာကတဲ့ဇာတ်ကိုတော့ သဘောကျ ကြည့်တတ်လာပါပြီ။

သီတင်းကျွတ်ပွဲတော်ကာလမှာရန်ကုန်အရှေ့ပိုင်းကခရစ်လမ်း၌ရာမဇာတ်တော်ကြီးကို ကပြလေ့ရှိပါတယ်။ ဇာတ်တော်ကြီးကို အပြည့်အစုံတင်ဆက်ကပြရန် ရက်ပေါင်းများစွာ ကပြရသည်ဟု ကြားခဲ့ဘူးပါတယ်။ ကျွန်တော်ကြည့်ခွင့်ရတဲ့အချိန်မှာတော့ သုံးညသာ ကပြပါတော့တယ်။ ပထမဆုံးညက လေးတင်ခန်းကို ကပြပါတယ်။ မယ်သီတာရဲ့ခမည်းတော်က လေးတင်ပွဲအတွက်ဖိတ်စာကို အပြည်ပြည်က မင်းများထံ ပေးပို့ ဖိတ်ကြားစေပါတယ်။ တရားအားထုတ်နေတဲ့ ပသျူးရာမမင်းက ဖိတ်စာကို လွှတ်ပစ်လိုက်ရာ ဒဿဂီရိဘီလူးမင်းထံ မထင်မှတ်ပဲရောက်သွားတဲ့အခန်းကနေ စ ကပြတာဖြစ်ပါတယ်။ ပွဲကြိုက်တဲ့အဖွားနဲ့ လိုက်ကြည့်ရင်း ရာမဇာတ်ကို စွဲလန်းသွားပါတယ်။ ဇာတ်ပွဲကို ပထမဆုံးမိုးအလင်း ကြည့်ခဲ့ရတာဖြစ်ပါတယ်။

မဟာဗန္ဓလပန်းခြံ၊ ပုဇွန်တောင်လိပ်ကန်ပန်းခြံတွေမှာလဲ အငြီမ့်များကို အပတ်စဉ်ညညအချိန်များမှာ ကပြလေ့ရှိပါတယ်။ မိုးအတော်ချုပ်မှ ပွဲက စကပြတော့ ကြည့်ခွင့်မရခဲ့ပါ။ ပွဲခင်းမှ ဈေးတန်းကိုသာ လျှောက်ကြည့်ခွင့်ရခဲ့ပါတယ်။ မကြည့်ရပေမယ့် အငြိမ့်အဖွဲ့တွေရဲ့အမည်တွေကိုတော့ နားရည်ဝနေပါပြီ။

တစ်ခုသော သီတင်းကျွတ်ကျောင်းပိတ်ရက်မှာ အမေရဲ့ဇာတိ မုဒုံမြို့ကို သွားလည်ခွင့်ရခဲ့ပါတယ်။ လမ်းမကြီးအရပ်က အမေရဲ့အမကြီးအိမ်မှာ တည်းကြပါတယ်။ အိမ်ရှေ့တဲ့တဲ့ လမ်းတစ်ဘက်က မြေကွက်လပ်ကြီးမှာ ဇာတ်ရုံကြီးထိုးတာကို တွေ့နေရပါတယ်။ စိန်ပိုးတီအငြိမ့်အဖွဲ့က ဇာတ်ရုံထဲမှာ ဇာတ်ပွဲလိုမျိုး ကပြမယ်ဆိုလို့  အံ့သြမိပါသေးတယ်။ ကြည့်ဘူး သလောက်က အငြိမ့်ဆိုရင် ဗလာပွဲ၊ ဇာတ်ဆိုမှ ရုံသွင်းပြီးပိုက်ဆံယူ ကပြတာလို့  သိထားတာပါ။ နယ်က သဘာဝအလျှောက် အငြိမ့်ကိုလဲ ပိုက်ဆံယူပြီး ရုံသွင်းကပြတာ ခုမှကြုံဘူးပါတော့တယ်။

အငြိမ့်ကို မိုးအလင်းမကြည့်ဘူးသေးတဲ့ ကျွန်တော်အတွက်တော့အတွေ့  အကြုံတစ်ခုရမှာဆိုတော့ ပျော်မဆုံးဖြစ်နေပါတော့တယ်။ဇာတ်ရုံရဲ့ရှေ့တဲ့တဲ့က အိမ်မှာ ဇာတ်သမားတွေ ရေလာချိုးနေကြလို့ သိရပါတယ်။  အလှည့်ကျ ရေလာချိုးတဲ့ယိမ်းသမတွေ၊ လူရွှင်တော်တွေကို ငေးကြည့်ရတာကလဲ အလုပ်တစ်ခုဖြစ်နေပါတယ်။ ထမင်းစားချိန်မှာ ထမင်းလာစား (အရပ်အခေါ်ထမင်းလာဆွဲ)တဲ့ ဆိုင်းအဖွဲ့ သားတွေ ကားဆွဲသမားများရဲ့ဟန်ရေးပြပြောနေကြတဲ့စကားသံများကိုလည်း လိုက်နားထောင်မိနေပါတယ်။ ဒီညပြဇာတ်က ဘာပြဇာတ်၊ နောက်ပိုင်းဇာတ်က ဘာဇာတ်ဆိုတာတွေကို သူတို့ပြောသံကြားရတာနဲ့ သိနေပါပြီ။ ဦးက ဒီညပြဇာတ်မှာ မင်းသားရဲ့အဖေ သူဋ္ဌေးကြီးအခန်းက ကရမှာကွလို့ ကြိုတင်အသိပေးရင်း သူဋ္ဌေးကြီးက ဆေးလိပ်တောင်းသောက်သွားပါတယ်။ ယခုထိ အဓိကမင်းသားနဲ့  ခေါင်းဆောင်မင်းသမီး စိန်ပိုးတီကို မတွေ့ ဘူးသေးပါ။

ဒီလိုနှင့်ပင် ညနေစောင်းလာ၍ ဆယ့်နှစ်ပွဲေ​ဈးသည်များက ပွဲေ​ဈးတန်းများကိုစတင် ခင်းကျင်းလာကြပါပြီ။ ဇာတ်ရုံမှလည်း လူခေါ်တေးသီချင်းများကို လော်စပီကာမှတဆင့် အကျယ်ကြီး ထွက်လာပါပြီ။ ပွဲေ​ဈးတန်းလျှောက်ကြမည့်သူများကလဲ စောစောကထဲက ရေမိုးချိုး၊ အဝတ်အစားလဲကာ လော်စပီကာသံကို မျှော်နေကြပါတယ်။ သီချင်းသံကြားတာနဲ့ လူစုကာ ပွဲခင်းဆီကို ဦးတည်လာနေကြပါတယ်။ ကျွန်တော်တို့ညီအစ်ကိုကလေးတစ်သိုက်ကတော့ ရုံတွင်းဝင်ကြည့်လိုက်၊ ပွဲေ​ဈးတန်းမှာ ဟန်ရေးပြလမ်းလျှောက်လိုက်၊  အိမ်ပြန်ပြီး မုန့်ဘိုးတောင်းလိုက် အပျော်ကြီးပျော်နေကြပါတယ်။ ဇာတ်ရုံက ဆိုင်းဝိုင်းက လူခေါ်ဆိုင်းစတီးချိန်မှာတော့ ကလေးအားလုံးက ရုံတွင်းကိုပြေးဝင်ကာ၊ ဆိုင်းတီးတာကို ငေးကြည့်နေပါတော့တယ်။ ဘာတီးလုံး တီးနေသည်ကို မသိနားမလည်ပေမယ့် ဆိုင်းဆရာတွေ အားရပါးရတီးနေမှုတ်နေတာကို နားထောင်ရင်း မကြာခင်အငြိမ့်ထွက်တော့မယ်ဆိုတာ သတိထားမိပြီး ဝမ်းသာနေ ကြပါတယ်။ ဝယ်ထားသောဖျာနေရာမှာသွားထိုင်လိုက်၊ ကိုယ်ဖျာပေါ်သူများတွေလာထိုင်မှာကို စိုးရိမ်ပြီး လူကြီးတွေကိုပြေးခေါ်လိုက်နဲ့၊ အငြိမ့်ကြည့်ဖို့အရေး အလုပ်များနေပါတယ်။

ခဏကြာတော့ ရုံအပြင်ကိုထွက်ရအောင်လို့  ညီငယ်တစ်ယောက်က လာပြောပါတယ်။ ဘာလို့ ထွက်ရမှာလဲ – အငြိမ့်က စကတော့မှာလေ။ အဲဒီအခါမှ ရုံခါတယ်ဆိုသော စကားကို စကြုံဘူးပါတော့တယ်။ ရုံထဲရောက်နေတဲ့သူအားလုံး အပြင်ကိုပြန်ထွက်၊ ပြီးမှ ဝယ်ထားတဲ့ လက်မှတ်ကိုပြပြီး ရုံထဲကို ပြန်ဝင်ရတာဖြစ်ပါတယ်။ ဒီအချိန်မှ အပျိုတွေ လူပျိုတွေ၊ လူကြီးတွေက ဖျာ၊ ကော်ဇော၊ စောင်၊ ခေါင်းအုံး – ထဲ့ထားတဲ့ခြင်းကြီးကို ဆွဲကာ ရုံထဲကိုဝင်လာကြပါတယ်။ စားစရာတွေကို ထဲ့ထားတဲ့ သုံးဆင့်ချိုင့်၊ လေးဆင့်ချိုင့်တွေကိုလည်း ဟန်နှင့် စတိုင်နှင့် ကိုင်လာကြကာ နေရာယူကြပါတော့တယ်။ ပဏာမအဖွင့်ဆိုင်းကို စတီးပြီး အပျိုတော်အက၊ ခုနှစ်ထွေအကကို စကပြတာနဲ့ လူကြီးစတိုင်ဖမ်းကာ ဟန်နဲ့ ပန်နဲ့ ကြည့်ခွင့်ရတာကိုပင် ကျေနပ်နေပါတယ်။

ပြဇာတ်ကတဲ့အချိန်မှာ မင်းသားမင်းသမီးတွေက ခေတ်ပေါ်အဝတ်အစားတွေကို ဝတ်စားထားပြီး၊ ဝင်းဝင်းရုံက ပြဇာတ်ပုံစံအတိုင်းကပြနေတာကို ပရိသတ်က အလွန်သဘောကျကာ အားပေးကြပါတယ်။ ရှေ့ထွက်မင်းသမီးရဲ့အက၊ လူရွှင်တော်များရဲ့ ရယ်မောစရာ ဟာသ သရုပ်ဆောင်ချက်များ၊ နောက်ပိုင်းမှထွက်သော ခေါင်းဆောင်မင်းသမီး စိန်ပိုးတီအကအလှများက ကျွန်တော်ကို အငြိမ့်ကြိုက်သူဖြစ်သွားစေပါတယ်။

သီတင်းကျွတ်မီးထွန်းပွဲတော်ကာလတွင် ရန်ကုန်အရှေ့ပိုင်းရှိ ၅၁ လမ်း၌ ကျားပျံမကောက်ဆေးပေါ့လိပ်က အမြဲတမ်းအငြိမ့်ပွဲကို တာဝန်ယူ ကပြစေပါတယ်။ မမမြိုင်လို့ သူကိုယ်သူပြောရင်း ကပြတတ်တဲ့ ကောလိပ်မြိုင်အငြိမ့်ကိ နှစ်စဉ်ကပြစေပါတယ်။ ပွဲခင်းသဘာဝအတိုင်းသောက်စားထားတဲ့ လူရှုပ်လူပွေ၊ လူနောက်လူပျော်များ ပါဝင်စမြဲဖြစ်ပါတယ်။ တစ်နှစ်မှာ ထုံးစံအတိုင်း ကောလိပ်မြိုင်က “မမရဲ့ကကြိုး နောက်တစ်မျိုးကို ကြည့်ကြအုံးမလားကွယ်” လို့  မေးလေးငေါ့ကာ မေးလိုက်ချိန်မှာ၊ စင်အောက်က လူရှုပ်တစ်ယောက်က “မကြည့်ချင်တော့ပါဘူး တော်ပါတော့ဗျို့”လို့ထအော်လိုက်ပါတယ်။ မမမြိုင်ကလဲစိတ်တိုသွားဟန်နဲ့ ”မကြည့်ချင်ရင်ပွဲသိမ်းတယ်” ဆိုကာ ပွဲကိုသိမ်းလိုက်ပါတော့တယ်။ အဲဒီနှစ်ကစပြီး ၅၁လမ်းကလူတွေ အငြိမ့်မကြည့်ရတော့ပါဘူး။

တစ်ကြိမ်မှာတော့ ကံကောင်းလာတယ်ဆိုရမလား ဖြစ်လာပါတယ်။ ဗိုလ်တစ်ထောင်ဘုရားပွဲမှာ အလင်္ကာကျော်စွာ ရွှေမန်းတင်မောင်က အော်ပဒါအသစ် – ၀ဏ္ဍပထ လှည်းသားငါးရာဇာတ်ကို ဘုရားနားက ဇာတ်ရုံမှာ စာနယ်ဇင်းသမားတွေကိုဖိတ်ပြီး ကပြပါတယ်။ အဖေက မေတ္တာလက်မှတ်ရလာတော့ ပွဲကြိုက်တဲ့ကျွန်တော်၊ အဖွားနဲ့ သွားကြည့်ခွင့်ရခဲ့ပါတယ်။ ပွဲပြီးတော့ အပြန်လမ်းတလျှောက်လုံး” လှည်းသားငါးရာ၊ လှည်းသားငါးရာ … မိသားစုစိတ်ကိုမွေးကာ…” ဆိုတဲ့ ရသမျှစာသားလေးတွေနဲ့ သီချင်းကိုဆိုလာရတာ မမေ့နိုင်တော့ပါဘူး။ သိပ်မကြာပါဘူး၊ ရွှေမန်းတင်မောင်ဆုံးသွားကြောင်း သတင်းစာထဲမှာ ဖတ်ရပါတယ်။

ရက်အနည်းငယ်အတွင်းမှာ နောက်ထပ်ဖိတ်စာတစ်စောင် ရလာပြန်ပါတယ်။ ရုပ်ရှင်မင်းသားကောလိပ်ဂျင်နေဝင်းပုံစံ ကပြီး ကျော်ကြားလာတဲ့ မြို့တော်သိန်းအောင်ဇာတ်အဖွဲ့က ဖိတ်စာပါ။ ပွဲကြိုက်တဲ့ မြေးအဖွားနှစ်ယောက် သွားရပြန်တာပေါ့။ ပွဲကြည့်ရန် စောင်ခေါင်းအုံး၊ လက်ဘက်သုပ်တွေ မလိုပါ။ ပြဇာတ်အသစ်ကိုသာ အဓိကထား ကပြတာကြောင့် နှစ်နာရီလောက်သာ ကြာပါတယ်။ မြို့တော်အဖွဲ့သား မောင်ယဉ်အောင်ဒါရိုက်တာလုပ်ထားတဲ့  “မိုးလား တိမ်လား မြူလား” ဆိုတဲ့ ပြဇာတ်အသစ်ကို ပြသတာပါ။ မင်းသမီးကို စစ်ဗိုလ်အဖြစ်သရုပ်ဆောင်ရတဲ့ မြို့ တော်သိန်းအောင်က ခေးရယ် – ခေးရယ်လို့ခေါ်တာရယ် ခေးကို ခွေးလားလို့နောက်ပြောင်ခေါ်တဲ့ ရဲဘော်ပေါစံကို သဘောကျ စွဲမက်သွားပါတယ်။ ယမ်းတွေ ဗျောက်အိုးတွေကို တဒိုင်းဒိုင်းနဲ့ ဖေါက်ပြ၊ ဆောင်းရုပ်ရှင်ကားထဲကလို တံတားကြီးကို ဇာတ်ခုံပေါ်မှာ ဖေါက်ခွဲချိုးပြလိုက်တဲ့ မောင်ယဉ်အောင်ရဲ့ တီထွင်မှုကို ချီးကျူးမိပါတယ်။ အားလဲကျမိပါတယ်။

ပဲခူးမြို က ရွှေမောဓေါဘုရားပွဲမှာ မြို့တော်အဖွဲ့က မောင်ယဉ်အောင်ရဲ့ဇာတ်လမ်းအသစ် “ကိုးဆယ်ဆသာလိမ့်မယ်” ကို စင်တင်ကပြပါတယ်။ ဒါရိုက်တာ၏ခမ်းနားဆန်းသစ်သော အပြင်အဆင်များ၊ ပါဝင်သရုပ်ဆောက်သူများ၏ သဘာဝကျကျ သရုပ်ဆောင်နိုင်မှုများကြောင့် ပရိသတ်သတ်များက သဘောကျနှစ်သက်သည့် အောင်မြင်သောပြဇာတ်တစ်ပုဒ် ဖြစ်သွားပါတော့တယ်။ ကပြလေရာ မြို့တိုင်း၊ နယ်တိုင်းမှာပရိသတ်တောင်းဆိုမှုကြောင့် ညတိုင်းကပြရသော ပြဇာတ်ဖြစ်လာပါတယ်။ ပြူစောထီးဗိုလ်သိန်းဆု၊ မင်းသမီးဂျင်းစိမ်းကို တဖက်သတ်သဘောကျနေသောတိမ်ညွန့်၊ ဘာပဲ ပြောပြော ပရိသတ်က သဘောကျနေသော ပေါစံတို့၏ အပြော၊အဆို သရုပ်ဆောင်မှုတွေကြောင့် အောင်မြက်တာ ဖြစ်ပါတယ်။

တပေါင်းလ ရွှေစာရံဘုရားပွဲမှာ “ထန်းရွက်ပုတီးလေး” သီချင်းက ပိုမိုထင်ရှားကာ ကျော်ကြား သွားပါတယ်။ “သိန်းဆုတဲ့ တစ်ဆုထဲရှိတယ်၊ နှစ်ဆုရှိရင် နှစ်ကျပ်နဲ့ ရောင်းစားလိုက်မယ်” ဆိုသောပြက်လုံးများ၊ အဖေ – သမီးဂျင်းစိမ်းကို ကျွန်တော်နဲ့ ပေးစားမှာနော် … လို့ပြောရင်း အညာသားမျက်ခမ်းစပ်ပုံနှင့် ရေပြေးပြေးခပ်နေသော တိမ်ညွန့် ၊ ‘ရွာထဲမှာ အပ်ကျတာကအစ သိတဲ့ အကောက် – နှမဗိုက်ကြီးတာ မသိလိုက်တာ နာသကွာ” စတဲ့ အပြောများ၊ ဟန်ပန်များတွေက လူကြိုက်များစေသော အချက်များဖြစ်နေပါတယ်။

အငြိမ့်တွေမှာလည်း အပြောကောင်းသောလူရွှင်တော်များ ရှေ့တန်းရောက်လာသောအချိန် ဖြစ်လာပါတယ်။ ယခင်က အကကောင်းသောမင်းသမီးကို ဦးစားပေးခဲ့ပါတယ်။ မဗေဒါအငြိမ့်သဘင်အဖွဲ့ – ဆောင်းမင်းသမီးလေး ဝင်းဝင်းအေးအငြိမ့်အဖွဲ့ စသဖြင့် သုံးခဲ့ကြပါတယ်။ နောက်ပိုင်းမှာတော့ လူရွှင်တော်များက ဦးဆောက်လာပါတယ်။ ဒီပါ၊ ချစ်စရာ၊ ထင်ပေါ်တို့ ပါဝင်ကပြတဲ့ အငြိမ့်လို့ ကြော်ငြာတဲ့ပုံစံ ဖြစ်လာပါတယ်။ ဒီလိုရှေ့ တန်းရောက်အောင်လဲ သူတို့တွေက စာဖတ်ရပါတယ်။ ကကွက်တည်ထွင်မှုတွေကို လုပ်ရပါတယ်။ ရှေးလူရွှင်တော်ကြီးတွေရဲ့ပြက်လုံးတွေနဲ့  ကွဲပြားအောင် ခေတ်မီသောပြက်လုံးတွေဖြစ်အောင် ထုတ်ရပါတယ်။ လူတိုင်းနားလည်အောင် ရုပ်ရှင်ထဲမှ ဇာတ်ကွက်ဝင်စကားလုံးများကို ပြက်လုံးထုတ်သောခေတ် ဖြစ်လာပါတယ်။

ဒဿဂီရိ မင်းသားဖြစ်လာချိန်မှာ အငြိမ့်တိုင်းက ဘီလူးအလွမ်းအကဇာတ် ကပြကြပါတော့တယ်။ လူပြက်ခေတ်ဖြစ်တာကလဲ သူတို့ ၏ လေ့လာ ကြိုးစားမှုများကြောင့် ဖြစ်လာတာပါ။ ကျရာပြက်လုံးကို ရယ်စရာဖြစ်သွားအောင် ပြောနိုင်တာကိုက အရည်အချင်းတစ်ခု ဖြစ်ပါတယ်။ ကနေရင်းမှာ အသံထွက်နေသော လော်စပီကာပျက်သွားကာ အသံမထွက်တော့တာကိုပင် နေရာဋ္ဌာနနဲ့လိုက်အောင် ချက်ခြင်း ပြက်လုံးဖြစ်အောင် ပြက်နိုင်သူများဖြစ်ကြပါတယ်။ ပရိသတ်ကလဲ ပြက်လိုက်သောပြက်လုံး၏ အဓိပ္ပါယ်ကိုနားလည်ကြပါတယ်။ အချို့ ပြက်လုံးတွေက အဓိပ္ပါယ် နှစ်ခွ ဖြစ်စေနေပါတယ်။ ညစ်ညမ်းသလိုဖြစ်နေပေမဲ့ ပရိသတ်က လက်ခံကြပါတယ်။ တွေးတွေးရင်းနဲ့မှ တဟားဟားရယ်ရသော ပြက်လုံးများကမူ နောက်တစ်နေ့ေ​ဈးထဲ၊ လက်ဖက်ရည်ဆိုင်များ၊ ကျောင်းများ၊ ရုံးများအထိ လူတိုင်းရဲ့ပါးစပ်ဖျားကို ရောက်သွားကြပါတော့တယ်။

မန္တလေးမှာအနေကြာလာတဲ့ ကျွန်တော်ဟာ ဘုရားပွဲများမှာ ဗလာပွဲများကို လိုက်လံ၍ ကြည့်တတ်လာပါတယ်။ နောက်ပိုင်း တည်ထောင်လာတဲ့အငြိမ့်အဖွဲ့တိုင်းမှာ တေးဂီတအစီအစဉ်ဆိုတာ ပါလာကြပါတယ်။ ထိုတေးဂီတ စတိတ်ရှိုးအစီအစဉ် မပါပါက – အငြိမ့်ငှားသူ မရှိ သလိုဖြစ်လာပါတယ်။ စိန်ပိုးတီအငြိမ့်ကို ကြည့်ရတုံးက ပြဇာတ်ကို ရုပ်ရှင်ဆန်ဆန်ကပြတာကို သဘောကျမိပေမဲ့၊ စတိတ်ရှိုးခေတ်ကျမှ အငြိမ့်ဝတ်စုံ၊ ထိုင်မသိမ်းအင်္ကျီနဲ့ကသော မင်းသမီးကို တမ်းတလာမိပါတယ်။ ရုပ်မြင်သံကြားတစ်ခေတ်ဆန်းလာချိန်မှာ ရုပ်မြင်သံကြားအငြိမ့်ခန်းများ ခေတ်စားလာပြန်ပါတယ်။ တစ်ပွဲထိုး သီချင်းတစ်ပုဒ် နှစ်ပုဒ်လောက် ကတာသင်ပေးသောသူများ ပေါ်ပေါက်လာပါတယ်။

အငြိမ့်အဖွဲ့ ထောင်ကာ ရုပ်မြင်ရိုက်စားသူတွေလဲ စီးပွားဖြစ်လာကြပါတယ်။ လူရွှင်တော်ဖြစ်ချင်သူများကလဲ အပျော်တမ်း ကပြလာကြပါတယ်။ ကလေးလေးတွေကို အကသင်ပေးကာ ရုပ်မြင်ထဲမှာ မိဘတွေက ကခိုင်းကြပါတယ်။ မြန်မာအက ကတာကောင်းပေမဲ့၊ ရုပ်မြင်ထဲပါဘို့သာ အဓိကထားနေတော့၊ စံနစ်တကျ ကပြတာ မဖြစ်လာတော့ပါ။ ယခုအခါ ဆိုကရေးတီးပြိုင်ပွဲတွေကြောင့် စံနစ်တကျ အချိန်ယူသင်ကြားကာ ပြိုင်ပွဲဝင်လာကြပါပြီ။ ဝါသနာပါသူများက ယဉ်ကျေးမှုကိုထိမ်းလာသလို၊ ပရိသတ်ကလည်း အားပေးဘို့ လိုအပ်ပါတယ်။ အားပေးသူမရှိပါက ထိန်းသိမ်းသူတွေ စိတ်ပျက်သွား နိုင်ပါတယ်။

ယခင်ကလို တနင်္ဂနွေနေ့တိုင်း ပန်းခြံများမှာကပြသော အငြိမ့်ပွဲများကိုမျှော်နေမိပါတယ်။ တက္ကသိုလ်ကျောင်းမှာ ကခွင့်ရသောကြောင့် ယူနီဗာစတီမြသန်းကြည်အမည်တပ်ရတာကို ဂုဏ်ယူနေသော အငြိမ့်အဖွဲ့ များကို တမ်းတမိလာပါတယ်။ မန္တလေးမှာလို ၁၆ လမ်းမှာ လမင်းတစ်ရာအငြိမ့်၊ ၃၂ လမ်းမှာ သစ်လွင်အငြိမ့် စသဖြင့် အပြိုင်ကနေသောကြောင့် ပရိသတ်က မိမိကြိုက်ရာကိုရွေးပြီး လိုက်အားပေးနေသော အချိန်များကို သတိရမိပါတယ်။ မန္တလေးက မျက်ပါးရပ်၊ ရန်ကုန်က ဝါးတန်းလမ်းတွေမှာ အငြိမ့်တွေအပြိုင်အဆိုင်အကတိုက်နေကြတာကို မြင်ယောင်နေမိပါတယ်။ ပွင့်လင်းရာသီပွဲတွေစကြတာနဲ့ ဘုရားပွဲမှာကနေရင်း၊ လူရွှင်တော်တွေကမ နက်ဖန် လမ်း၃၉မှာ၊ သဘက်ခါ ဆိုင်းတန်းမှာလို့  ပွဲဆက်တွေကို ကြော်ငြာနေတာကို ပြန်ဖြစ်စေချင်ပါတယ်။ ကျွန်တော်ကတော့ ကျွန်တော်အလွန်ကြိုက်တဲ့ အငြိမ့်တွေ ပြန်ကလာခဲ့ရင်၊ ဘယ်သူနဲ့  သွားကြည့်ရမလဲဆိုတာကို ကြိုစဉ်းစားရင်း၊ ပွဲအပြီး မိုးအလင်းမှာ အိမ်ကို ဘယ်လိုဘတ်စကားစီးပြန်ရပါလိမ့်လို့ တွေးနေမိပါတော့တယ်။

Photo Credit – https://mmfreethinker.wordpress.com/2014/11/14/copy-of-u-kyaw-thaungs-artwork/1404956_10202058727327541_1551039363_o/


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ရသဆောင်းပါးစုံ

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ

By

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ (မိုးမခစာအုပ်စင်) အောက်တိုဘာ ၁၈၊ ၂၀၁၈...

Read more »

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ

By

ဒေါက်တာခင်မောင်ဝင်း(သချာင်္) ၏ ခေတ်သစ်အတွက်ပညာရေး ထွက်ပြီ (မိုးမခ) အောက်တိုဘာ ၁၂၊ ၂၀၁၈ မိုးမခစာပေက...

Read more »

မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း

By

  မိုးမခမဂ္ဂဇင်း စက်တင်ဘာ ၂၀၁၈ နဲ့ ကာတွန်းရေစီးကြောင်း ထွက်တော့မယ် (မိုးမခ) စက်တင်ဘာ...

Read more »

ဒေါ်ခင်မျိူးချစ်၏ သတင်းစာလောက ထွက်ပါပြီ

By

ဒေါ်ခင်မျိူးချစ်၏ သတင်းစာလောက ထွက်ပါပြီ (မိုးမခ) သြဂုတ် ၂၄၊ ၂၀၁၈ စာရေးဆရာမကြီး ဒေါ်ခင်မျိူးချစ်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments