ကိုသန်းလွင် – တံခါးဖွင့်ဝါဒ

July 29, 2015

 

ကိုသန်းလွင် – တံခါးဖွင့်ဝါဒ

(မိုးမခ) ဇူလိုင် ၂၉ ၊ ၂၀၁၅

(၁)

နိုင်ငံစီးပွားရေးတွင် တံခါးဖွင့်ဝါဒကျင့်သုံးမှသာ အောင်မြင်နိုင်မည်ဟု ထင်ရှားစေသော ဥပမာ တစ်ခုမှာ ဗီယက်နမ်နိုင်ငံ၏ဥပမာပင်ဖြစ်သည၊် အမေရိကန်နှင့် နှစ်၅၀ကြာစစ်ပွဲသည် ၁၉၇၅ ခုနှစ်ဧပြီလတွင် ပြီးဆုံးခဲ့သည်၊ နှစ်ပေါင်း၄၀အတွင်းဗီယက်နမ်နိုင်ငံ၏ပြောင်းလဲမှုများမှာသိသာသောပြေင်းလဲမှုများဖြစ်သည်၊ ဆင်းရဲနှိမ့်ကျသော နိုင်ငံငယ်အဖြစ်မှ စီးပွားရေး တဟုန်ထိုး တိုးတက်သောနိုင်ငံတခုဖြစ်လာခဲ့ပါသည်၊

 

အောင်ပွဲရ ကွန်မြူနှစ်ပါတီက တောင်နှင့်မြောက်ပူးပေါင်းမိအပြီး နိုင်ငံတော်အသစ်ကို ပေါ်လစီ အမှား တွေဆက်တိုက်ချမှတ်ခါ တိုင်းပြည်ကို ပို၍ချွတ်ချုံကျစေခဲ့သည်၊ အစာရေစာရှားပါးခြင်း၊ အလုပ်လက်မဲ့ များပြားလာခြင်း၊ ပြည်သူလူထုအတွင်းမကျေနပ်မှုများ များပြားလာနေခြင်း တို့ကို သတိထားမိသော အစိုးရက ၁၉၈၆ခုနှစ်တွင်တံတားဖွင့်ဝါဒနှင့် စီးပွားရေးစံနစ်ကို ပြုပြင်ရမည်ဟုဆုံးဖြတ်ချက်ချခဲ့ကြသည်၊ စိုက်ပျိုးရေးကို လွတ်လပ်ခွင့်ပေးခြင်း၊ နိုင်ငံခြားရင်းနှီးမြုပ်နှံမှုကို ဖိတ်ခေါ်ခြင်းတို့ဖြင့် ပေါ်လစီကိုပြောင်းခဲ့ကြသည်။

 

အစိုးရကနှောက်ယှက်ခြင်းကင်းသော မိမိဖာသာ လွတ်လပ်စွာစိုက်ပျိုးလုပ်ကိုင်ခွင့်ရရှိသွားကြသော ဗီယက်နမ် လယ်သမားများက ဆန်တင်ပို့သောကမ္ဘာ့ နိုင်ငံများတွင် အဆင့် ၄ ရောက်အောင် စိုက်ပျိုးထုတ်လုပ် နိုင်ခဲ့ကြသည်။ ရေနံကို နိုင်ငံခြားသို့တင်ပို့နိုင်သော နိုင်ငံဖြစ်လာသည်၊ လူအသုံးအဆောင်ပစ္စည်းများကို ပြည်ပသို့ တင်ပို့နိုင်သော နိုင်ငံဖြစ်လာခဲ့သည်။

 

၁၉၇၅ခုနှစ်က နှစ်စဉ်ပို့ကုန်တန်ဘိုး အမေရိကန်ဒေါ်လာ ၁.၇ဘီလီယံရှိခဲ့ရာမှ ယခုအခါ ၁၃၁ ဘီလီယံအထိ တိုးတက်လာသည်၊  ပို့ကုန်၏ လေးပုံတစ်ပုံမှာ အမေရိကန်နိုင်ငံ သို့ဖြစ်သည်၊   နိုင်ငံခြား မှရင်းနှီးမြုပ်နှံမှုမှာ သက္ကရာဇ် ၂၀၀၀က၂.၄ဘီလီယံရှိခဲ့ရာမှ လွန်ခဲ့သော၁၅နှစ်အတွင်း ၁၂.၃၅ဘီလီယံ အထိ တိုးတက်လာခဲ့ သည်၊ နိုင်ငံခြား ရင်းနှီးမြုပ်နှံမှုကို လိုလားနေသောအစိုးရက အကောက်ခွန်ကို လျော့ချပေးပြီး ကြိုးနီစနစ်၏ အကျွင်းအကျန် လုပ်ထုံးလုပ်နည်း များကို ဖယ်ရှားပေး ခဲ့သည်။

 

ယခုအခါ ဗီယက်နမ်နိုင်ငံသည် ၁၂ နိုင်ငံပါဝင်သော (Trans Pacific Partnership) တွင်ပါဝင်နိုင်ရေး အတွက် စေ့စပ် ဆွေးနွေးလျက်ရှိသည်၊ စီးပွားရေးလုပ်ရာတွင် ချုပ်ချယ်မှုဥပဒေ များပြားသောအိန္ဒိယလိုနိုင်ငံအဖို့ ဤအဖွဲ့အစည်းတွင် ပါဝင်ရန်မဖြစ်နိုင်ပေ။

 

ဗီယက်နမ်နိုင်ငံက မျှော်မှန်းသည်မှာဤ၁၂နိုင်ငံအုပ်စုတွင်းသို့ဝင်ခွင့်ရပြီဟုဆိုလျင် မိမိနိုင်ငံတွင်းတွင် အလုပ် အကိုင်အခွင့်အလမ်းများတိုးတက်လာခြင်းပင်ဖြစ်သည်၊ ယနေ့လူငယ်ဦးရေတိုးပွားများပြားလာလျင် အလုပ် မပေးနိုင်သောအဖြစ်ကိုအလိုမရှိပေ။ 

 

ကမ္ဘာ့ဘဏ်မှ၂၀၁၅အတွက်ထုတ်ပြန်လိုက်သော စီးပွားရေးလုပ်ငန်းလုပ်ရန်လွယ်ကူသောနိုင်ငံများအလိုက်  Index ကို ထုတ်ပြန်ခဲ့ရာဗီယက်နမ်နိုင်ငံ၏ အဆင့်သည်(ရ၈)ဖြစ်လာသည်၊ အိန္ဒိယက (၁၄၂)နှင့်တရုပ်ပြည်က (၉၀) မြန်မာနိုင်ငံက (၁ရ၈) လိုက်ပါသည်။

 

(၂)

 

သက်တန်းသုံးနှစ်ကျော်ခဲ့ပြီဖြစ်သော မြန်မာနိုင်ငံဒီမိုကရေစီနိုင်ငံတော်၌ စီးပွားရေးဖွံဖြိုးတိုးတက်မှုကိုအားရ ကျေနပ် ဖွယ်အခြေအနေရှိသည်ဟုကျွန်တော်မထင်ပါ၊ မိမိနိုင်ငံအတွင်းသို့နိုင်ငံခြားရင်းနှီးမြုပ်နှံမှုများဝင် ရောက် မလာဘဲနှင့်စီးပွားရေး အောင်မြင်ရန်မှာမဖြစ်နိုင်ပါ၊ နိုင်ငံခြား ရင်းနှီးမြှုတ်နှံမှုမှ တိုင်းပြည် ၀င်ငွေရရှိနိုင် သည့်အပြင် မြန်မာလူထုအဖို့ အလုပ်အကိုင် အခွင့်အလန်းရရှိနိုင်ကြသည်မှာ အများအသိပင်ဖြစ်ပါသည်၊  ဖွံဖြိုးတိုးတက်သည့်နိုင်ငံတိုင်း၌ သူတို့ အတွေ့အကြုံသင်္ခမ်းစာ အများ အပြားကို အလွယ်တကူမြင်နိုင် သိနိုင် ကြပါပြီ။

 

နိုင်ငံတခုသည်တံခါးဖွင့်ဝါဒကို ကျင့်သုံးပြီဟူ၍ တံခါးကိုဖွင့်ထားရုံဖြင့်ရင်းနှီးမြုပ်နှံမည့်သူတွေအလိုအလျောက် ၀င်ရောက်လာမည်မဟုတ်ပါ၊ မိမိအိမ်တံခါးကိုဖွင့်ပြီးသည်ဆိုသည်နှင့် ဧည့်သည်ဝင်ရောက်လာလိုစိတ်ရှိစေရန် အမှိုက်သရိုက်တို့ကိုရှင်းလင်းထားကြရန်လိုပါသည်၊  အထူးသဖြင့်အတွင်းသို့ ၀င်ရာလမ်းကြောင်းတလျောက် ၌ကျော်လွှား  ရမည့် အခက်အခဲတွေရှိလျင် ၄င်းတို့ကိုဖယ်ရှားပေးရပါမည်၊  ဧည့်သည်ဝင်ရောက်လာပြီးပါက သူ့လုပ်ငန်း အတွက်အခက်အခဲတွေမရှိရအောင်၊ လုပ်ငန်းအဆင်ပြေရအောင် အိမ်ရှင်ဖြစ်သူက အကူအညီပေး ရပါမည်။

 

ရင်းနှီးမြှုတ်နှံမည့် လုပ်ငန်းရှင်များကို နိုင်ငံအနေဖြင့် လည်းဖိတ်ခေါ်ရန်လည်းလိုအပ်ပါသည်၊ မြန်မာ့ရင်းနှီး မြှုတ်နှံရေး ကော်မီရှင်သည် နိုင်ငံတွင်းမှတော်ပေ့၊ တတ်ပေ့ ဆိုသည့် လူငယ် တက်ကြွသူများကို အရာရှိများ အဖြစ်ခန့်ထားသင့်ပါသည်၊ ကမ္ဘာ့ တက္ကသိုလ်ကြီးများမှ ဘွဲ့ရလာသည့် လူငယ်များကို ခေါ်ယူခန့်ထားသင့်ပါ သည်၊ စင်္ကာပူမှ Economic Development Board ကဲ့သို့ နိုင်ငံခြားလုပ်ငန်းရှင်များကို ပြည်တွင်း ရင်းနှီးမြှုတ်နှံရေးအတွက် တနေရာထဲတွင်ပြီးစီးသွားအောင် လုပ်ပေးနီုင်သည့် အဖွဲ့အစည်း တခုမြန်မာပြည်တွင် လိုအပ်နေပါသည်၊

 

စကာင်္ပူနိုင်ငံသို့ပဋ္ဌမဆုံးရောက်လာသည့် လုပ်ငန်းရှင်များတွင် Texas Instrument  ကုမ္ပဏီသည် အစောဆုံး ကုမ္ပဏီများတွင်ပါဝင်သည်၊ ထို့နောက် တစတစ တိုးပွားလာနေသော ကုမ္ပဏီအသစ်များနှင့်အတူ စီးပွားရေး လူမှုရေး အဆင့်အတန်း မြင့်မားလာခါ ယခုအချိန်တွင် စင်္ကာပူသည်ပဌမ ကမ္ဘာနီုင်ငံတခုဖြစ်နေပါပြီ၊ ယနေ့အခြေအနေမှာ တကမ္ဘာလုံး နိုင်ငံပေါင်းစုံမှ ကုမ္ပဏီကြီးများ မှာ မိမိစက်ရုံမရှိ လျင်ရှိစေ သူတို့ ဆက်သွယ်ရေးရုံးများ စင်္ကာပူတွင်ရှိနေကြပါပြီ၊  ထိုကမ္ဘာအဆင့် ကုမ္ပဏီအကြီးအကဲများက နိုင်ငံတခုတွင် ရင်းနှီးမြုပ်နှံမှုမပြုမှီ  ဘယ်လိုစဉ်းစားဆုံးဖြတ်ကြ သည်ဆိုသော အချက်ကိုသိထားကြရပါမည်။

 

စက်ရုံဆောက်မည့် မြေနေရာ၊ ရေနှင့် လျှပ်စစ်မီးရရှိနိုင်မှု၊ အလုပ်သမားများရရှိနိုင်မှု၊ ကုန်ပစ္စည်းရွေ့လျားမှု အတွက်အဆင်ပြေမှု စက်ရုံအတွက်လိုအပ်သော ကုန်ကြမ်းကုန်ချော အဆက်မပြတ်ရရှိရေး၊ လုပ်သားများနှင့် ဆက်ဆံရေးပြဿနာ၊ ကုန်ထုတ်လုပ်မှု ရပ်ဆိုင်းသွားအောင်အနှောက်အယှက်ရှိမရှိ၊   ကျွမ်းကျင်လုပ်သား အင်ဂျင်နီယာများ ရှိနိုင်ရေး၊ ပညာတတ် စာရေးစာချီ ပေါများခြင်း၊ ဘဏ်လုပ်ငန်း ငွေပေးငွေယူ အဆင်ပြေမှု၊ တိုင်းပြည်မှကုန်ထုတ်လုပ်ငန်း အဆင်ပြေရေး၊ အကောက်ခွန်ကိစ္စ၊  ထိုကုမ္ပဏီအုပ်ချုပ်သူများ၏ လိုအပ်ချက် မှန်သမျှကို ဖြေရှင်း ပေးနိုင်စွမ်းရှိကြရပါမည်။

 

ကမ္ဘာပေါ်တွင် စီးပွားရေး လုပ်ရန်အလွယ်ကူဆုံး နံပါတ်(၁) ရသည့်စင်္ကာပူနိုင်ငံတွင် နိုင်ငံခြားရင်းနှီးမြုပ်နှံလိုသူ လုပ်ငန်းရှင်များကို အီးဒီဘီ အရာရှိများက အစအဆုံးလိုက်လံ အကူအညီပေးကြပါသည်၊ အိမ်နီးချင်းနိုင်ငံများ က တရုပ်၊ ကိုရီးယား၊အိန္ဒိယ၊စင်္ကာပူ၊စသည်ဖြင့် လုပ်ငန်းရှင်ကြီးများ မြန်မာပြည်တွင် စီးပွားရေးလုပ်ကိုင် နေကြပြီဖြစ်ရာ ထိုလုပ်ငန်းရှင်များထံမှ အကြံပြုချက်၊ လုပ်ငန်းအတွေ့ အကြုံ အခက် အခဲ များကိုနားထောင်ရန်၊ ၄င်းတို့အားပြောရေးဆိုခွင့်ရှိအောင်လမ်းဖွင့်ပေးသော ကွန်ဖရင့်ကြီးများ ကျင်းပ ပေးရန် လိုအပ်ပါသည်။ အရေးကြီးသည်မှာ အမေရိကန်အပါအ၀င် ဥရောပ စသောအနောက်နိုင်ငံများမှ ကမ္ပဏီကြီးများရောက်လာရေး ပင် ဖြစ်ပါသည်၊

 

HP ကုမ္ပဏီ၏အကြီးအကဲဖြစ်သူ Mr Packard မှာသူ့စက်ရုံထောင်မည့်နိုင်ငံသို့ လူကိုယ်တိုင်မသွားမှီ အထောက်တော်များအကြိမ်ကြိမ်လွှတ်သည်ပာုကြားရဖူးသည်၊ သေချာရေရာမှု့မရှိဘဲ လုပ်ငန်းလုပ်ရန် မဆုံးဖြတ်တက်သော အမေရိကန်၊ ဥရောပ ကုမ္ပဏီကြီးများအတွက် မိမိနိုင်ငံ အခြေအနေများ (infrastructure) ကို အဆင်သင့်ဖြစ်စေရန်ပြုပြင်ထားကြရပါမည်၊ 

 

ဂျပန်နိုင်ငံသည်သူတို့မှာရှိသည့်လျပ်စစ်ပါဝါဆပ်ပလိုင်း အခြေအနေ၊ တိကျသည့် (Precision) စက်မှု့ပစ္စည်း ကရိယာများကို ဘယ်နိုင်ငံမှလိုက်မမှီဘူးပာုအယူအဆရှိသည်၊ ထို့ကြောင့် သူတို့သည် နိုင်ငံ ရပ်ခြားတွင် သူတို့စက်ရုံထောင်ရန် ၀န်လေးတတ်ကြပါသည်၊ ဂျပန်ကုမ္ပဏီများရောက်လာပြီဆိုလျှင် ကျွန်တော်တို့ အခြေအနေသည် မဆိုးတော့ပါပာုဆိုနိင်ပါပြီ၊ ဂျပန်ရေနံချက်စက်ရုံများ Petro Chemical Plant များ ရောက်လာဖို့ကတော့ ဂျပန်အစိုးရ၏ သြဇာလွှမ်းမိုးမှု့ ကြောင့် လုပ်နည်းလုပ်ပာန် အလွန်ရှုတ်ထွေးသည်ပာု ကြားရဖူးသည်၊ တနေ့တွင် ဂျပန်နိုင်ငံမှ Petro Chemical Plant များမြန်မာပြည်တွင် လည်ပါတ်နေပြီဆိုသော ကာလကိုမျှော်လင့်နေမိပါသည်။

 

 (၃)

 

အမေရိကန်အပါအ၀င် ဥရောပနှင့် အနောက်နိုင်ငံများ၏ ယဉ်ကျေးမှု့သည် ဂရိယဉ်ကျေးမှု့တွင် အခြေခံသည် ပာုဆိုကြသည်၊   သူတို့သည် မိမိအမြင်၊  အယူအဆကိုပွင့်လင်းစွာဖော်ပြသော အကျင့်ရှိသည်၊ ဖီလော်ဆော်ဖါ များက အရှေ့တိုင်းနိုင်ငံများသည် စက်မှု့ဖွံဖြိုးသည့်အနောက် နိုင်ငံများလိုအဘယ့် ကြောင့်မဖြစ်လာခဲ့ကြသည် ကို ကိုးကွယ်သည့် ဘာသာအယူဝါဒပေါ်တွင် မူတည်သည်ပာုရှင်းပြလေ့ ရှိကြသည်၊  

 

မိမိခံစားချက်ကို ပွင့်လင်းစွာ အများတကာသိရှိအောင်ပြောပြရန် အခွင့်အလမ်းများရှိခြင်း၊ လူလူခြင်းမတရား သောနည်းလမ်းဖြင့် အနိုင်ယူလိုစိတ်မရှိကြခြင်း၊ ဒီမိုကရေစီသဘောအရသာတူညီမျှ အခွင့် အရေးတန်းတူရှိ ခြင်းစသည်တို့သည် အမေရိကန်အင်အားအကြီးဆုံးနိုင်ငံဖြစ်လာရခြင်း၏ အခြေခံ အချက်များဖြစ်ကြပါသည်။

 

ဥပဒေသည် တမျိုးတည်းဖြစ်၍ လူတိုင်းလိုက်နာကြရပါမည်၊ ပွင့်လင်းမြင်သာသော ဥပဒေများဖြစ်ရန်လည်းလိုပါ သည်၊ အထက်တာဝန်ရှိသူများနှင့် သိကျွမ်းမှသာ စီးပွားရေးလုပ်လို့ရမည်ဟူသော အဖြစ်မျိုးမဖြစ်သင့်ပါ၊

 

ယခင်တပါတီစံနစ် ခေတ်က ထောက်လှမ်းရေးအရာရှိများကို မြို့ပြအုပ်ချုပ်ရေးလုပ်ငန်းများသို့ ဦးစီးရန် အသုတ်လိုက်စေလွှတ်ခဲ့ကြဘူးသည်၊ ထိုစဉ်က ရည်ရွယ်ချက်မှာ ပြည်သူလူထုအတွင်း အဖြစ်အပျက်များကို ထောက်လှမ်းပြီး အစီရင်ခံရန်ဖြစ်သည်၊ ၄င်းတို့၏ တင်ပြချက်များ ကို အသုံးပြု၍ လူကြီးများက ပိုမိုထိရောက်စွာ အုပ်ချုပ်နိုင်ကြလိမ့်မည်ဟု ယူဆခဲ့ကြခြင်းဖြစ်သည်၊ ထိုသို့ ထောက်လှမ်းရန် စေလွှတ်ခြင်းမှ စပြီး နောင်တွင် အုပ်ချုပ်ရန၊် စီမံခန့်ခွဲရန်၊ ကိစ္စအ၀၀ ဆောင်ရွက်ရန် စစ်မှုထမ်းများကို စေလွှတ်ကြတော့သည်၊

 

ထိုသို့စစ်မှုထမ်းဟောင်းများကို နေရာစုံသို့စေလွှတ်ခြင်းဖြင့် တိုင်းပြည်ကြီးချွတ်ချုံကျခဲ့ရပုံကို တွေ့မြင်ခဲ့ကြပြီး ဖြစ်ပါသည်၊ စီးပွားရေး လုပ်ငန်းများကို တပ်မတော်မှ၎င်း၊ အစိုးရမှ၎င်း လုပ်ဆောင်ရန်မလိုပါ၊  တိုင်းသူ ပြည်သား စီးပွားရေး လုပ်ငန်းရှင် များကလုပ်ကြပါလိမ့်မည်၊ အများပြည်သူက အကောက်ခွန်ရုံးတွင် တန်းစီ တိုးဝှေ့ပြီး ပစ္စည်းရွေးထုတ်နေကြချိန်တွင် အဆက်အသွယ်ကောင်းသူများက မိမိပစ္စည်းကို အလွယ်တကူ ထုတ်ယူ သွားနိုင်ကြခြင်းမှာ ပြည်သူတို့ကို လွဲမှားသော အမြင်ကိုသာ ဖြစ်စေပါသည်၊ အစိုးရ၏အလုပ်မှာ ပြည်သူပြည်သား အားလုံး အခွင့်အရေးတန်းတူရရှိအောင် ဆောင်ရွက်ပေးရေးသာဖြစ်ပါသည်၊ သမာသမတ် ရှိသော ဥပဒေများ နှင့် သမာသမတ်ရှိသော တရားစီရင်ရေး ကို ဖန်တီးပေးရန်သာဖြစ်ပါသည်၊

 

ကျွန်တော်တို့ နိုင်ငံတော်သီချင်းတွင် “ခွင့်တူညီမျှ ၀ါဒဖြူစင်တဲ့မြေ” ပာုပါဝင်ပါသည်၊ သို့ပါသော်လည်း စီပွားရေးလုပ်ကိုင်ကြရာတွင်အားလုံး တန်းတူ ညီတူညီမျှမပာုတ်ပဲ၊ စစ်တပ်နှင့်ဆက်နွယ် နေသူများမှာ အခွင့်အရေး ရပုံတွင် တဖက်စီးနင်းဖြစ်နေခြင်း၊ ဌာနဆိုင်ရာလုပ်ထုံး လုပ်နည်းများတွင် စီးပွားရေးလုပ်သူတိုင်း၌ အခွင့်အရေး မညီမမျှဖြစ်နေခြင်း၊ အကောက်ခွန်နှုံးထားမြင့်မားနေခြင်း စသောမှားယွင်းသည့် အချက်များကို အစိုးရက တခုပြီးတခု ဖြေရှင်းပေးရန်လိုပါသည်။

 

ကျွန်တော်တို့နိုင်ငံနောက်မှ နောက်ကျန်နေရစ်ခဲ့သော ဗီယက်နမ်နိုင်ငံသည် အခုကျွန်တော်တို့နိုင်ငံအရှေ့သို့ ရောက်သွားပါပြီ၊ နောက်အချိန်ကြာလာသည်နှင့်အမျှ ဘယ်လိုမှလိုက်မမှီနိုင်သော နိုင်ငံကြီးအဖြစ် အခြေအနေ တွေ ကွာမသွားစေရန်အရေးကြီးပါသည်။

 

ကျွန်တော်တို့သည်စီးပွားရေးလုပ်ငန်းများ ဖွံဖြိုးတိုးတက်မှု့ကို တားဆီးပိတ်ပင်စေသည့် ဥပဒေများကို ပြုပြင်ဖယ်ရှား ပစ်ရန်လိုအပ်ပါသည်။ တံခါးဖွင့်ဝါဒအရ တံခါးဖွင့်ထားသည် ဆိုရုံဖြင့် လိုရာပန်းတိုင်ရောက်ပြီဟု မဆိုနိုင်ပါ၊

 

ကိုသန်းလွင်


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

Related posts

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ကိုသန်းလွင်, သတင်းဆောင်းပါး

One Response to ကိုသန်းလွင် – တံခါးဖွင့်ဝါဒ

  1. Zarni Gyi on July 29, 2015 at 8:49 pm

    သိပ်ကောင်းတဲ့ တခါးဖွင့်ဂါဒ အကြောင်း ဆောင်းပါး။ ကွန်မင့် ရေးခွင့်ပြုစေလိုပါတယ်။

    /////
    စစ်တပ်ခေါင်းဆောင်များ စည်းကမ်းလိုက်နာပြီး စည်းကမ်းတကယ်ရှိစေလိုပါတယ်။

    စစ်ဗိုလ်သင်တန်း အိပ်ယာလိပ်အတု လုပ်ခွင့်ပေးခြင်းကအစ စစ်တပ်က မဆိုင်တဲ့ စီးပွားရေး ဦးပိုင် မြေသိမ်း အဆုံး … ရပ်တန်းမရပ်သရွေ့ စင်ကာပူ ဂျပန် မဆိုနဲ့ ဗီယက်နမ် အမြှီးကပ်နိုပ်ဖို့ နေနေသာသာ လာအိုတောင်မှီမှာမဟုတ်ပါ။ လက်ရှိက ဖိလစ်ပိုင်လိုဖြစ်နေပါတယ်။

    သမ္မတအကြံပေး ဒေါက်တာအောင်ထွန်သက်က ကိုးရီးယားက KDI လို စင်ကာပူက ကိုသန်းလွင်ရေးခဲ့တဲ့ EDB လိုမျိုး လုပ်ဖို့ ရှိတယ်တဲ့ လေထဲမှာပဲလုပ်နေဆဲပါ။ 🙁

    ၂၅% လွှတ်တော်အမတ်ကိုထာပါတော့
    လက်ရှိ တိုင်းရင်းသားလက်နက်ကိုင် များလေးစားလောက်အောင် တဖက်သတ် ပစ်ခတ်ရပ်ဆိုင်းပြပါ။ စစ်တပ်ကအစ စည်းကမ်းရှိစွာ စစ်တပ်အလုပ်ပဲလုပ်ရင် တခါးဖွင့်ခြင်း အောင်မြင်မှာပါ။
    /////

    ဒါမှ လက်ရှိ စနစ် ဖိလစ်ပိုင် အငယ်စား တံခါးဖွင် စနစ်က ဗီယက်နမ်အဆင့်မှီဖို့ ဖောက်ထွက်နိုင်မှာပါ။

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ

By

ဒေါက်တာခင်မောင်ဝင်း(သချာင်္)၏ Fuzzy Logic & Set Theory ဆောင်းပါးများ ထွက်ပြီ မိုးမခစာအုပ်စင်၊...

Read more »

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ

By

ဂျူနီယာဝင်း ဘာသာပြန်တဲ့ ၂၁ရာစု ဂျာနယ်လစ်ဇင် ထွက်ပြီ (မိုးမခစာအုပ်စင်) ဇန်န၀ါရီ ၃၁၊ ၂၀၁၉...

Read more »

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)