ငြိမ်းချမ်းအေး – ရင်ဘတ်အရွယ်အစားထက် ဦးနှောက်အရွယ်အစားကို ရွေးချယ်ပါ

December 17, 2015

ငြိမ်းချမ်းအေး – ရင်ဘတ်အရွယ်အစားထက် ဦးနှောက်အရွယ်အစားကို ရွေးချယ်ပါ
(မိုးမခ) ဒီဇင်ဘာ ၁၇၊ ၂၀၁၅

အခုနှစ်ပိုင်းမှာ မယ်စကြာဝဠာ၊ မယ်ကမ္ဘာ၊ နိုင်ငံတကာအလှမယ် ပြိုင်ပွဲတွေကို မြန်မာပြည်က အလှမယ်များ ဝင်ရောက် ယှဉ်ပြိုင်ကြသလို ကျား-မ လူအများလည်း စိတ်ဝင်စားမှု ရှိကြတာတွေ့ရတယ်။  ပြည်တွင်းမှာ နိုင်ငံကိုယ်စားပြုဖို့ ရွေးချယ်တဲ့ အလှမယ်ပြိုင်ပွဲတွေကိုလည်း ရုပ်မြင်သံကြားအစီအစဉ်တွေက တိုက်ရိုက်ထုတ်လွှင့်ပြသကြတာတွေလည်း ရှိလာတယ်။  ပုံနှိပ်စာနယ်ဇင်းများ၊ အွန်လိုင်းမီဒီယာများကလည်း အလှမယ်များရဲ့ သတင်းဓာတ်ပုံတွေဝေဝေဆာဆာနဲ့ အချိန်နဲ့တပြေးညီ သတင်းလုပ်တင်ကြတာ သတိထားမိတယ်။ ဟိုအရင်ခေတ်များဆီကတော့ အဲဒီလိုရေကူးဝတ်စုံပြိုင်ပွဲမျိုးဆိုရင် ရွံ့တတ်ကြ၊ အလာဂျီဖြစ်တတ်ကြတယ်။

တိုင်းပြည်မှာ စစ်တပ် စတင်အာဏာယူကြီးစိုးချိန် ၁၉၆၂ ခုနှစ်ကစလို့ မယ်မြန်မာတွေကို နိုင်ငံတကာပြိုင်ပွဲတွေ မလွှတ် တော့ပါဘူး။  ပြည်တွင်းမှာလည်း နှစ်ပိုင်းဖြတ် အစနှစ်စ ရေကူးဝတ်စုံဝတ် ပြိုင်ရတဲ့ အလှပြိုင်ပွဲတွေ၊ အားကစားပွဲတွေ ပိတ်ခံထိခဲ့ပါတယ်။  အကြောင်းပြချက်ကတော့ မယ်မယ်ရရ မရှိလှပါဘူး၊ စစ်တပ်အာဏာတည်တံ့ဖို့ ရေလဲသုံး ဆေးတ ဖုံဖြစ်တဲ့ အမျိုး ဘာသာ သာသနာ ယဉ်ကျေးမှု ဗန်းပြ အစွန်းရောက် အမျိုးသားရေးဝါဒ တစိတ်တဒေသ အဖြစ် မြန်မာ့ရိုးရာ ဝတ်စားဆင်ယင်မှု ယဉ်ကျေးမှုနဲ့ ဆန့်ကျင်မကိုက် ဆိုတာပါပဲ။  ဆီသည်မလက်သုတ်ဝတ် အဖန်တရာတေ သရုပ်ပျက် ခေါင်းစဉ် အောက်ပို့ခဲ့ကြတယ်။

တခြား အားကစားနည်းတွေမှာလည်း ဒီလို အကြောင်းပြချက်မျိုးပေးပြီး အလားတူ ပိတ်ပင်တတ်ပါသေးတယ်။  ၁၉၈၈ ခုနှစ် ဒီဘက် နဝတ၊ နအဖ စစ်အစိုးရခေတ် အမျိုးသမီး သဲသောင်ပြင် ဘော်လီဘော ပြိုင်ပွဲ အမျိုးအစားကို အရှေ့တောင်အာရှ ပြိုင်ပွဲတွေမှာ စတင်ထည့်သွင်းကစားတော့ ရေကူး ဝတ်စုံဝတ်ရခြင်း အကြောင်းပြ မြန်မာအမျိုးသမီးအသင်းကို မလွှတ်ခဲ့ပါဘူး။  တကယ်တော့ အသစ်ထည့်တဲ့ ပြိုင်ပွဲတွေဆိုတာ နိုင်ငံတိုင်းလိုလို ‘တစ်ကစ’ ရလို့ ကိုယ့်အသင်းဝင်ယှဉ်ပြိုင်ပါနိုင်ရင် ဆုတံဆိပ် ချိတ်နိုင်တယ်၊ ရေရှည် အောင်မြင်ဖို့အတွက်လည်း လက်ဦးမှုယူနိုင်တယ်။

ဒါပေမယ့် ဆိုခဲ့သလို တလွဲဆံပင်ကောင်း အမျိုးသားရေး အမြင်ကြီးလှတဲ့ စစ်ဗိုလ်ချုပ်ကြီးများက ရေကူးဝတ်စုံကို မျက်မုန်းကျိုးခဲ့တယ်။  သူတို့ ရာစုဝက်ကျော် ထင်တိုင်းကြဲ ဖျက်ဆီးခဲ့တဲ့ တိုင်းပြည်မှာ ပါးလျ ချွတ်ခြုံကျလှတဲ့ လူမှု-စီးပွားဒဏ်ကြောင့် အမျိုးသမီးငယ်လေးပေါင်းများစွာ နေ့စဉ် ဘဝပျက် ပန်းကောင်းအညွန့်ချိုး လူကုန်ကူးခံ၊ ရောင်းစားခံ၊ နိုင်ငံတကာထွက် ကျွန်လှည့်ခံနေရတာမျိုးလို တကယ်အလေးထား အကာအကွယ်ပေးစောင့်ရှောက်ရမှာမျိုးကိုကျ မျက်ကွယ်ပြုထားကြတယ်။  လူတစ်စု တစ်ဖက်စောင်းနင်းမတရား ‘စံ’ စားခွင့်ရနေတဲ့ စနစ်ဆိုးကို အမှန်တကယ် အရင်းတိုင် ပြုပြင်ဖို့ကျ အခုထိ အမြင်မှန်၊ အမှန်မြင် အကောင်းအလုပ် အပြည့်အဝ မလုပ်ချင်ကြသေးပါဘူး။

နိုင်ငံတကာမှာ ဒီလိုရုပ်ရည်နဲ့ ခန္ဓာကိုယ်အလှ အသားပေး ပြိုင်ပွဲတွေကို ဆန့်ကျင်ကြရမှာ တိုက်ပုံသမား ခေတ်နောက်ပြန် ဆွဲတွေအပြင် တိုးတက်တဲ့ အမျိုးသမီးဝါဒီအဖွဲ့အစည်းတွေလည်းပါ ပါတယ်။  သူတို့ ကန့်ကွက်တာကြတော့ အလှမယ်ပြိုင် ပွဲရဲ့ အတွင်းအနှစ်သဘောကို ကန့်ကွက်တာပါ။  ဝါသနာ၊ ဆန္ဒ၊ ရွေးချယ်မှုအရ ပါဝင် ယှဉ်ပြိုင်သူ တစ်ဦးချင်း ကို၊ ဒါမှမဟုတ် ဝတ်စားဆင်ယင်ပုံကို မနှစ်လိုဆန့်ကျင်တာမျိုးမဟုတ်ဘဲ ‘ကာယအလှပြိုင်ပွဲ’ ဆိုတဲ့ သဘောကြီး တစ်ခုလုံးကို ထောက်ပြ လူ့အဖွဲ့အစည်းကို ဝေဖန်ဆန်းစစ် ခိုင်းကြတာပါ။

ကမ္ဘာ့လူ့အဖွဲ့အစည်းတိုင်းမှာ သမားရိုးကျဆိုရင် အမျိုးသမီးများဟာ အလှအပ၊ ဆွဲဆောင်မှု ရှိမှု အစရှိတဲ့ အရေပြား တစ်ထောက်စာ သဘောနဲ့သာ ညီမျှခြင်း ချခံရတတ်ပါတယ်။  အမျိုးသမီး စွမ်းဆောင်ရည်ဟာ အလှထက် ပိုကြောင်း သက်သေ သာဓက ဖြစ်စဉ် မြောက်မြားစွာ ရှိခဲ့၊ ရှိနေလည်း ‘မ’ နဲ့ ‘အလှ’ ဟာ ထပ်တူကျ ပုံဖော်ခံရလျက်ပဲ ရှိနေသေးပါတယ်။  ကျားကြီးများကြီးစိုးရာ မြန်မာပြည်မှာလည်း အလားတူပါပဲ။  ဥပမာ – ၂၀၁၅ နိုဝင်ဘာ ရွေးကောက်ပွဲ ဝင်အရွေးခံခဲ့တဲ့ အမျိုးသမီးကိုယ်စားလှယ်လောင်းတွေရဲ့ ပုံရိပ်မြှင့်တင်ရာမှာကို မဟာဖိုဝါဒီ အတွေးအခေါ်အပုပ်အသိုး ရုပ်ရည် ကိုယ်ခန္ဓာ အလှအသားပေး ပြောချင်၊ ဆိုချင် တင်ဆက်ချင်ကြတာ အင်တာနက် လူမှုကွန်ရက်စာမျက်နှာများမှာ မမြင်ချင်အဆုံး မြင်ခဲ့ရတာပါ။

အလှကို ဖန်တီးတတ်ခြင်း၊ မြတ်နိုးတတ်ခြင်းဟာ လူသားပီသမှု လူသားတရား မဟုတ်လား၊ ဒါကို ချီးမြှောက် စင်ပေါ်တင် ယှဉ်ပြိုင် မယ်ကမ္ဘာ၊ မယ်စကြာဝဠာ စသဖြင့် သရဖူ ဆောင်းခိုင်းတာ ဘာမှားသလဲ ဆိုရင် မမှားပါဘူး။  ဒါပေမယ့် အမျိုးသမီးဂုဏ်ရည်ဟာ အပေါ်ယံ အလှ၊ လိင်ဆွဲဆောင်မှု သက်သက် ‘ကျား’ သတ္တဝါကြီးများ တဏှာ အာသာ ငမ်းငမ်းထ အလှကြည့်ခံရာ ရုပ်ဝတ္ထု ပစ္စည်းထက် ပိုကြောင်း ကိုတော့ မဟာဖိုသမားများကို မပြတ်သတိပေး ထောက်ပြနေဖို့တော့ လိုပါတယ်။  လူ့အဝန်းအဝိုင်းမှာ အသားကျနေတဲ့ အမျိုးသမီးကို အလှတရားနဲ့သာ တွဲမြင်နေမှု သဘောကိုတော့ အလုံးစံ ပပျောက်အောင် ကြိုးစားရပါမယ်။

တကယ်တော့ ပြည်တွင်းနဲ့နိုင်ငံတကာ အလှမယ်ပြိုင်ပွဲတွေကလည်း ဒီလို အလှသက်သက်သဘောကို ချေဖျက်နိုင်အောင် တတ်နိုင်သလောက် စွမ်းဆောင်ကြပါတယ်။  ပြိုင်ပွဲ အမှတ်ပေးမှု စည်းမျဉ်းတွေမှာ ရုပ်ရည်၊ ခန္ဓာကိုယ် အချိုးအစား စတဲ့ အပေါ်ယံအလှတိုင်းထွာချက်တွေအပြင် ပြိုင်ပွဲဝင် အမျိုးသမီးငယ်များရဲ့ ဉာဏ်ရည်၊ ကိုယ်ရည်ကိုယ်သွေး၊ မိမိကိုယ်ကိုယ်ယုံကြည်စိတ်ချမှု၊ ပြောရဲဆိုရဲရှိမှု၊ သွက်လက်ချက်ချာမှု၊ ဖြတ်ထိုးဉာဏ်ရှိမှု၊ လူမှုဆက်ဆံရေးကောင်းမွန်မှု စတဲ့ လူသားတကိုယ်ရေ ပင်ကိုယ်အရည်အချင်း (Personality) နဲ့ အထွေထွေဗဟုသုတ (General Knowledge) ကိုလည်း စစ်ဆေးတဲ့ မေးခွန်းတွေ၊ လှုပ်ရှားမှုအစီအစဉ်တွေ ထည့်ရပါတယ်။   ဒါပေမယ့် ဒီလို လူ့ အတွင်းသဘော အနှစ် အရည်အသွေးကို ဖော်ထုတ်ပြသနိုင်မှု သတ်မှတ်ချက်တွေ အမှတ်ပေးစည်းမျဉ်း မှာ ထည့်ထားပေမယ့် အမှတ်ရာခိုင်နှိုင်း အများစုနဲ့ လူအများစိတ်ဝင်စားမှုအခံရဆုံးကတော့ အပေါ်ယံခန္ဓာကိုယ်နဲ့ အရေပြားတထောက်စာအလှက အဓိက သဘော ဖြစ်နေလျက်ပါပဲ။

ယထာဘူတကျကျ စဉ်းစား၊ မျက်မြင်လက်တွေ့ဘဝတွေကို ရင်ဘတ်နှလုံးသား၊ ဦးနှောက်မျက်စိတွေ ဖွင့်ကြည့်ပါ။  အမျိုးသမီးများရဲ့ အလုပ်၊ ဝါသနာ၊ စူးနစ်မှု၊ ထူးချွန်မှုဟာ အရေပြား အလှ၊ ခန္ဓာကိုယ် ဖွံ့ဖြိုးမှု၊ ဖက်ရှင်၊ အလှကုန်ပစ္စည်း၊ ဆံပင် အရောင်ဆိုးခြင်း၊ အလှအတွက် ခွဲစိတ်ပြုပြင်မှုထက် အများကြီး ပိုကြောင်းတွေ့ရပါမယ်။  ဒီလို အမှန်ဖြစ်ကြောင်းကိုလည်း မြန်မာပြည်က အမျိုးသမီးများ သမိုင်း အစဉ်အဆက် စာပေ၊ ဂီတ၊ ပညာ၊ စီးပွား၊ လူမှု၊ နိုင်ငံရေး အားကစား နေရာစုံမှာ ယောက်ျားဘသားဆိုကြသူများနဲ့ ရင်ပေါင်တန်း၊ တချို့ ပိုမို ထူးချွန် ထက်မြက် ဦးဆောင်မှု ကဏ္ဍ နေရာယူရင်း ပြသနိုင်ခဲ့ကြပြီးဖြစ်ပါတယ်။  ဒီအချက်ကို အသားပေး “Highlight” လုပ် ရှေ့တန်းတင် ပွဲထုတ်ကာ တချို့နေရာများမှာ အဖြစ်မရှိဘဲနဲ့ “ငါယောက်ျားပဲကွ..” ဆိုပြီး နေရာတက်ယူချင်၊ အခွင့်အရေး ပိုလိုချင်နေတဲ့ မြန်မာ ကျား သတ္တဝါ မဟာဖို သမားများ၊ အထူးသဖြင့် လိင်ခွဲခြားမှုအခံ အမြင် ဒီဂရီ အပြည့်ရှိလှတဲ့ စစ်အာဏာရှင်စနစ်ဆိုးနဲ့  အမွေခံစစ်ဗိုလ်ချုပ်အဟောင်း၊ အသစ်များ အကျွတ်တရား ရအောင် ကြံဆောင်ရပါမယ်။

မြန်မာပြည်ကစစ်ဗိုလ်ကြီးများ ဒေါ်အောင်ဆန်းစုကြည် နိုင်ငံရေး အာဏာ ရမှာ မနှစ်လိုခြင်းဟာ အာဏာထိုင်ခုံ မခွာလိုခြင်း၊ စစ်အုပ်စု လူတစ်စု အကျိုးစီးပွား မပျက်လိုခြင် အလိုလောဘ အရင်းခံအကြောင်းကြီးတွေအပြင် သူတို့ထက် ပိုသိ၊ ပိုတတ်၊ နိုင်ငံတကာမှာ၊ ပြည်တွင်းမှာ ပို လူရာဝင်၊ ပို လူချစ်ခင် ထောက်ခံမှု များတဲ့ “အမျိုးသမီးခေါင်းဆောင်” ဖြစ်တာကြောင့် ဆိုတဲ့ အချက်လည်း ပါပါတယ်။  တကယ်တော့ အမျိးသမီးမို့၊ ထဘီဝတ်မို့ ဘာထူးခြား ယုတ်လျော့ အောက်ကျစရာရှိမလဲ။  သုံးတောင်ဝတ်ဝတ်၊ ဆယ်တောင်မကလို့ အတောင် တစ်ရာ ဝတ်ဝတ် လူမှာ အကျင့်၊ သီလ၊ သမာဓိ၊ ပညာ ကသာ အခရာကျတာ မဟုတ်ပါလား။  နိုင်ငံရေး၊ အုပ်ချုပ်ရေးမှာ လိင်ခွဲခြားမှုက အဓိကမကျ၊ သမာသမတ်ကျမှု၊ ခေါင်းဆောင်မှု အရည်အသွေး၊ လုပ်ရည်ကိုင်ရည် အရည်အချင်း ရှိမှုနဲ့ ကိုယ့်ကျင့်သိက္ခာကိုပဲ ယှဉ်နိုင်ရမှာပေါ့။  ဒါကိုတော့ စစ်ဗိုလ်ချုပ်အဟောင်းကြီးများ မယှဉ်ရဲ၊ မယှဉ်ဝံ့ကြပါဘူး။  လာမယ့်နှစ်များမှာ ဒီလိုသဘောတွေ ဘယ်လောက်များ အခြေခံကျကျ ပြောင်းလဲနိုင်မလဲ။

အဓိကဆိုချင်တာက မြန်မာ့လူ့အဖွဲ့အစည်းမှာ ပညာ၊ သီလ၊ စိတ္တသတ္တိ၊ ကာယသတ္တိ ဘက်စုံ စွမ်းဆောင်ရည်မြင့်မားလှတဲ့ အမျိုးသမီးကြီးတွေ ကဏ္ဍတိုင်းမှာ ခေတ်အဆက်ဆက်မှာ ရှေ့ပြေးဦးဆောင်နိုင်ခဲ့ကြပေမယ့် လူမှုသတ်မှတ်ချက် အမြင် သဘော ခံယူချက်မှာတော့ ‘မ’ ဆိုရင် ‘ကျား’ ထက် တဆင့်နှိမ့် မြင်နေဆဲ ဖြစ်ပါတယ်။  အမျိုးသမီးဆိုရင် အလှအပ ခံစားမှု အသားပေး၊ ထမင်းချက်၊ အဝတ်လျှော်၊ ကလေးထိန်း အိမ်ထောင့် တာဝန် ထမ်းဖို့ သက်သက်၊ လိင်ဖျော်ဖြေလိုမှု အသုံးချ သက်သက်သာ ယောက်ျားကြီးများ မြင်နေဆဲ ဖြစ်သလို ပုံစံခွက်ထဲမှာ အသားကျပျော်ဝင် ဖိနှိပ်လို့ ဖိနှိပ်ခံနေရမှန်းမသိတဲ့ အမျိုးသမီး အများလည်း ခံယူနေဆဲ ဖြစ်ပါတယ်။  ဒီလို လက်သင့်မခံဖွယ် ရာစုနဲ့ချီနောက်ပြန်ဆွဲနေတဲ့ အတွေးအခေါ်၊ အမြင်၊ ဓလေ့တွေကိုတော့ တိုင်းပြည်မှာ ပျောက်အောင် အချိန်ယူ တိုက်ဖျက်ရပါဦးမယ်။

အခု အလှမယ်ပြိုင်ပွဲတွေ၊ ဖက်ရှင်သရုပ်ပြ အမျိုးသမီးငယ်တွေ ခေတ်စားလာပါတယ်၊  စီးပွားဈေးကွက်မှာလည်း အောင်မြင်၊ ဝင်ငွေရ လူသိများ ခေတ်စားနေပါတယ်။   ပြောင်းလဲလာတဲ့ လူမှု-စီးပွား ရေစီးကြောင်း နောက်ခံကြောင့်ပါ။  ကောင်းပါတယ်၊ ကြိုဆိုရပါမယ်။ ကြော်ငြာနဲ့အရောင်းမြှင့်တင်ရေးအဓိကကျတဲ့ အရင်းရှင်ဈေးကွက်စီးပွားရေးစနစ်မှာ အမျိုးသမီးငယ် အများ အပြား ပင်ကိုယ် အလှအပ၊ အရပ်အမောင်းကို အသုံးချ ကိုယ်ဟန်ပြမယ်တွေအဖြစ် အသက်မွေးဝမ်းကျောင်း လာနိုင်တာ လည်း ကျင့်ဝတ်ပိုင်းဆိုင်ရာ မေးခွန်းတချို့ ရှိနိုင်ပေမယ့် ဘာပဲဖြစ်ဖြစ် အလုပ်သဘော အသက်မွေးဝမ်း ကျောင်းအဖြစ် လက်ခံအပ်ပါတယ်။  မြန်မာအလှမယ်များ ပေါ်ပြူလာဖြစ် လူကြိုက်များမှုကို အသုံးချ လူမှုရေးလုပ်ငန်းတွေမှာ အားတက် သရော ဝင်ရောက် လုပ်ကိုင်နေကြတာလည်း အစွန်းထွက် အပိုအကျိုးကျေးဇူုးအဖြစ် ဝမ်းသာစရာ တစ်ခုပါပဲ။

ဒါပေမယ့် မြန်မာ အမျိုးသမီးငယ်များ”Two Pieces” ရေကူးဝတ်စုံ ဝတ်လျက်ကနေ ခေါင်းမော့ရင်ကော့ပြီး “ငါတို့ ဟာ ယောက်ျားကြီးတွေ မျက်စိအရသာခံ၊ တဏှာစိတ်ဖြေဖို့ သက်သက်မဟုတ်ဘူး၊ ငါတို့ ရင်ဘတ်အရွယ်အစားထက် ငါတို့ ဦးနှောက်အရွယ်အစားကို တန်ဖိုးထားတတ်ပါစေ” ဆိုပြီး အသံကျယ်ကျယ် ထွက်ဖို့တော့ လိုနေပါသေးတယ်။  မြန်မာပြည်က ကျနော်တို့ကျားကြီးများလည်း စိတ်နှလုံးနဲ့ ဦးနှောက် အခြေခံအတွင်းကျကျမှာကို ဒီသဘောကို နားလည် လက်ခံ အမှန်တကယ်လက်တွေ့ ကျင့်သုံးတတ်ဖို့လည်း လိုနေပါသေးတယ်။

နိဂုံးချုပ်ရရင် အနာဂတ်မှာ မြန်မာပြည်ရဲ့သမီးပျို အလှပဂေး နှမလေးများ မယ်စကြာဝဠာ၊ မယ်ကမ္ဘာအပါအဝင် နိုင်ငံတကာ အလှမယ်သရဖူများစွာ အများအပြားဆွတ်ခူးနိုင်ဖို့ ခေတ်လူငယ်မျိုးဆက်သစ်အနေနဲ့ အားပေးကြသလို ကမ္ဘာ့အဆင့် နိုဗယ်လ်ဆုတံဆိပ်ရှင်  ကိုယ်ကျင့်ပညာ မြင်မား မြန်မာအမျိုးသမီးကောင်းများ များများ ပေါ်ထွန်းရေးအတွက်လည်း တိုင်းပြည်မှာ အမျိးသမီးဖိနှိပ်နှိမ့်ချခွဲခြားရေး အလုပ်၊ အကျင့်ဆိုးတွေ၊ အတွေးအခေါ်တွေ ပပျောက်အောင် အသိပညာအမြင် ရေချိန်တွေမြှင့်ကြဖို့ နှိုးဆော် တိုက်တွန်းချင်ပါတယ်။  ၂၀၁၆ ခုနှစ် တိုင်းပြည်စနစ်အဖွဲ့အစည်းသစ်မှာလည်း အမျိုးသမီး ကောင်းအကြီးအငယ်များ ထိုက်တန်တဲ့ ခေါင်းဆောင်နေရာများရရှိနိုင်ပါစေ။  ကျား၊ မ၊ လိင်၊ လိင်တိမ်းညွတ်မှု၊ လူမျိုး၊ ဘာသာ၊ အသားအရောင် မတူကွဲပြားမှု အားလုံးအပေါ် ခွဲခြားမှုမရှိတဲ့ ခွင့်တူညီမျှ အမှန်တကယ်ဝါဒဖြူစင်တဲ့ အနာဂတ်တိုင်းပြည်ကို မျှော်ရည်လျက် ဆန္ဒပြုလိုက်ကြောင်းပါ ခင်ဗျား။

ငြိမ်းချမ်းအေး

(ဆက်သွယ်ရန်နှင့်ပြန်လည်ဝေဖန်ရန် nyeinchanaye81@gmail.com)

ဓာတ်ပုံ –  ဒီဇင်ဘာ ၂၀ ရက်နေ့၊ ၂၀၁၅ ခုနှစ် အမေရိကန် နိုင်ငံ လာဗေးဂတ်စ်တွင် ကျင်းပမည့် ၆၄ ကြိမ်မြောက် မယ်စကြာ ၀ဠာ ပြိုင်ပွဲဝင် မြန်မာနိုင်ငံကိုယ်စားပြု အလှမယ် မေဘရဏီသော်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:အင်တာဗျူး, ငြိမ်းချမ်းအေး

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ

By

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ (မိုးမခ) မတ် ၂၄၊ ၂၀၁၈...

Read more »

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ)

By

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ) မိုးမခစာအုပ်စင်၊ ဖေဖော်ဝါရီ ၂၈၊...

Read more »

 ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ

By

ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ (မိုးမခ) ဖေဖော်ဝါရီ ၅၊...

Read more »

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ 

By

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ  မိုးမခစာပေက ထွက်ပါပြီ။...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်