မောင်မောင်စိုး – မြစ်ဆုံပြဿနာ – အပိုင်း (၁)

April 19, 2016

ပြည်နယ် မြစ်ကြီးနားမြို့အနီး ဧရာဝတီမြစ်ပေါ်မှာတွေ့ရသည့် ကချင်တိုင်းရင်းသူတဦး (Photo : The Irrawaddy)
မောင်မောင်စိုး – မြစ်ဆုံပြဿနာ – အပိုင်း (၁)
(မိုးမခ) ဧပြီ ၁၉၊ ၂၀၁၆

● မြစ်ဆုံဆည်အစ
မြစ်ဆုံဆည်တည်ဆောက်ရေးအစသည် ၁၉၇၄ ခုနှစ်တွင် ဟင်္သာတမြို့၌ စိုးရိမ်ရေမှတ်အထက် ၄၇ လက္မထိရောက်ရှိလာပြီး ဧရာဝတီမြစ်ရေကြီးခြင်း မြစ်ဝကျွန်းပေါ်ဒေသ ရှိဆည်တမံများကျိုးပေါက်ခြင်းဖြစ်ပွါးခဲ့ရာမှ ထိုစဉ် ဆည်မြောင်းဦးစီးဌာန ဒု ညွှန်မှူးဒေါက်တာအုန်းမြင့်၏ ဧရာဝတီမြစ်ရေကြီးမှု အစီရင်ခံစာမှ အစပြုသည်ဟု ဆိုရပါမည်။

မြစ်ဝကျွန်းပေါ်ဒေသ၌ တမံပေါင်း ၁၈၀၀ ကျော်ရှိပြီး မြေနုကျွန်းပေါ်တွင်တည်ဆောက်ထားကြသည်ဖြစ်ရာ တမံများမြင့်လေ ခံနိုင်အားနဲလေဖြစ်ရာဧရာဝတီမြစ်ရေနိမ့်ကျစေရန် ရေသိုလှောင်သည့်စနစ်ကို စဉ်းစားခဲ့ကြရသည်ဟုဆိုပါသည်။ ဧရာဝတီ မြစ်ရေကြီးခြင်းကို ထိမ်းချုပ်ရန်အတွက် ဧရာဝတီမြစ်ပေါ်ရှိ တန်ဖရဲအနီး၌လည်းကောင်း၊ ချင်းတွင်းမြစ်ပေါ်၌ ထမံသီအနီး၌ လည်းကောင်း၊ ဆည်ဆောက်၍ မြစ်ရေထိမ်းသိမ်းရန် စဉ်းစားတွက်ချက်ခဲ့ကြသည်ဟုဆိုပါသည်။ ဒေါက်တာအုန်းမြင့်၏ အစီရင်ခံစာ၌ အချက်အလက်အချို့နှင့်ပြခဲ့သော်လည်း အသေးစိတ်အချက်အလက်များ မပါခဲ့ဟုဆိုပါသည်။

၂၀၀၂ ခုနှစ်တွင် ဆည်မြောင်းဦးစီးဌာန ညွှန်ကြားရေးမှူး (ဒီဇိုင်း) ဦးခင်မောင်ချစ်နှင့် ဦးဇော်ဝင်းရှိန်တို့မှ ဧရာဝတီမြစ်ဆုံ ဘက်စုံစီမံကိန်းကိုရေးဆွဲခဲ့ကြသည်ဟု ယနေ့အငြိမ်းစားယူထားပြီးသော ဦးခင်မောင်ချစ်က မော်ကွန်းဂျာနယ်နှင့်အင်တာဗျူး တွင်ပြောကြားခဲ့သည်ကို ၂၀၁၆ ဧပြီလထုတ် မော်ကွန်းဂျာနယ်အမှတ် ၃၄ တွင် ဖေါ်ပြထားသည်ကိုတွေ့ရှိရပါသည်။

တန်ဖရဲရွာအနီး၌ မြစ်ဆုံစီမံကိန်းရေးဆွဲရသည့်အကြောင်းရင်းမှာ တန်ဖရဲရွာအနီး၌ ရေဝင်ဧရိယာ ၁၆၀၀၀၀ စတုရန်းမိုင်ရှိပြီး ရေစီးရေလာ ဧက ပေသန်း ၁၀၀ ရှိရာ တနှစ်လျှင် ဧရာဝတီမြစ်၏ရေစီးရေလာ ဧက သန်း ၄၀၀ ခန့်ရှိရာ ဧရာဝတီမြစ်ကြီး ၏ရေစီးရေလာ လေးပုံတစ်ပုံရှိသည့် တန်ဖရဲအနီးကို ရွေးချယ်ရခြင်းဖြစ်သည်ဟု ဦးခင်မောင်ချစ်က ဆိုပါသည်။ အခြားရေ သိုလှောင်အားကောင်းသောနေရာတခုမှာ ဗန်းမော်မြို့အောက်နား၌ရှိသော်လည်း ဗန်းမော်မြို့ပါ ရေနစ်မြှုပ်သွားမည်ဖြစ်သ ဖြင့် ထည့်သွင်းရွေးချယ်ခြင်း မပြုခဲ့ကြဟုဆိုပါသည်။

ထို့ကြောင့် ၁၉၇၄ ခုနှစ် ဒေါက်တာအုန်းမြင့်၏အစီရင်ခံစာကို အခြေပြုပြီး နောက်ထပ်တိုင်းတာ တွက်ချက်မှုဖြည့်စွက်၍ တန်ဖရဲရွာအနီး ဧရာဝတီမြစ်ဆုံစီမံကိန်းကို ဆည်မြောင်းဦးစီးဌာနမှရေးဆွဲခဲ့ကြသည်။ အဆိုပါရေးဆွဲခဲ့သည့် စီမံကိန်းသည် အောက်ပါအချက်များပေါ်မူတည်သည်ဟု ဆိုပါသည်။

၁။ မြစ်ဆုံ၌ဆည်ဆောက်ပြီး ရေလှောင်လိုက်လျှင် ဟင်္သာမြို့၌ ဧရာဝတီမြစ်ရေ ၄ ပေခန့်လျော့ကျသွားပြီး မြစ်ဝကျွန်းပေါ် ဒေသ ရေကြီးခြင်းကို ကာကွယ်နိုင်မည်။

၂။ နွေရာသီ ဧရာဝတီမြစ်ရေနဲချိန် ဖေဖဝါရီ မတ်လများ၌ ဆည်ရေလွှတ်လျှင် ဧရာဝတီမြစ်ရေ ၄ ပေ မှ ၆ ပေထိ မြင့်တက် လာမည်ဟုဆိုပါသည်။

၃။ နွေမိုးဆောင်း သုံးရာသီလုံး လျှပ်စစ်ဓါတ်အားထုတ်လုပ်ပြီး ဧရာဝတီမြစ် ဘယ်ညာနှစ်ဖက်ရှိ စိုက်ပျိုးဧက ၂ သန်းအတွက် လျှပ်စစ်ရေတင်စနစ်ဖြင့် စိုက်ပျိုးနိုင်မည်။

၎။ နွေရာသီ မြစ်ရေနည်းချိန် ရေလွှတ်ပေးနိုင်သဖြင့် မြစ်ဝကျွန်းပေါ်ဒေသ၌ ပင်လယ်ဆားငံရေဝင်ခြင်း Sea water intrusion ကို သက်သာစေမည်။

၅။ နွေမိုးဆောင်း သုံးရာသီစလုံး လျှပ်စစ်မီဂါဝပ် ၆၀၀၀ မဂ္ဂါဝပ် ထုတ်လုပ်နိုင်မည် ဆိုသည့်ရည်ရွယ်ချက်များအပေါ်၌ အခြေခံ ရေးဆွဲခဲ့ခြင်းဖြစ်သည်ဟု ဆည်မြောင်းဦးစီးဌာနအငြိမ်းစားညွှန်ကြားရေးမှူး ဦးခင်မောင်ချစ်က ဆိုပါသည်။

ဤစီမံကိန်းမှာ ဆည်မြောင်းဦးစီးဌာမှ ဆွဲထားသောစီမံကိန်းဖြစ်ပြီး လက်ရှိတရုတ်တို့တည်ဆောက်ရန်ဆွဲထားသော မြစ်ဆုံ စီမံကိန်းနှင့် ကွာခြားမှုရှိသည်ဟုဆိုပါသည်။ ဆည်မြောင်းကရေးဆွဲသောစီမံကိန်းအရ ဆည်အမြင့်မှာ လက်ရှိ တရုတ်တို့ ဆောက်ရန်ရည်ရွယ်သည်ထက် ၁.၆  ဆမှ ၁.၈ အထိမြင့်နိုင်ပြီး ကုန်ကျစားရိတ်မှ အမေရိကန်ဒေါ်လာ ၈ ဘီလျံခန့် ကုန်ကျ နိုင်ကာ ရင်းနှီးမြှုပ်နှံမှုအရအဖြစ်စေ အတတ်ပညာအရဖြစ်စေ တရုတ်တနိုင်တည်းအကူအညီနှင့်မရဘဲ ကမ္ဘာ့ဘဏ်နှင့် နိုင်ငံ တကာမှ နည်းပညာအကူအညီများ ရယူရန်လိုအပ်သည်ဟု ဆိုပါသည်။

လက်ရှိ မြစ်ဆုံတွင် ဆောက်မည့် တရုတ်တို့၏ဆည်မှာ လျှပ်စစ်အားထုတ်ယူရန်အတွက်သာ ဒီဇိုင်းထုတ်ထားပြီး အမြင့်ပေ နိမ့်၍ ကုန်ကျစားရိတ် ၃ ဘီလီယံခန့်သာ ရှိမည်ဖြစ်သည်။ ထို့ပြင် ဧရာဝတီမြစ်ရေကြီးခြင်း ထိမ်းသိမ်းရန်စီမံချက် နွေအခါ ဧရာဝတီမြစ်ရေတိမ်ခြင်းအတွက် ရေစီးရေလာကောင်းမွန်ရေးစီမံချက်များ မပါဝင်သဖြင့် သူအနေနှင့် တရုတ်တို့၏ မြစ်ဆုံ စီမံကိန်းအား ကန့်ကွက်သည်ဟု ဦးခင်မောင်ချစ်က ဆိုပါသည်။

မည်သို့ဆိုစေ ၂၀၀၆ မှစ၍ တရုတ်တို့လက်တွင်းသို့ရောက်ရှိသွားသောမြစ်ဆုံစီမံကိန်း၏ ကနဦးအစသည် ၁၉၇၅ ခုနှစ် ဆည်မြောင်းဦးစီးဌာန၏ဧရာဝတီမြစ်ရေကြီးခြင်း အစီရင်ခံစာမှ အစပြုသည်ဟုဆိုရပေမည်။ ဆည်မြောင်းဦးစီးဌာန၏ အစီ ရင်ခံစာသည် စာရွက်ပေါ်တွင်ရှိနေဆဲမှာပင် တရုတ်တို့က လက်တွေ့ခြေလှမ်းများ လှမ်းလာခဲ့ကြတော့သည်။

● CPI နှင့် မြစ်ဆုံ
တကယ်တမ်း မြစ်ဆုံရေအားလျှပ်စစ်တည်ဆောက်ရေးကို အကောင်အထည်ဖေါ်ရန် ဝင်ရောက်လာသူကတော့ မြန်မာစစ်အစိုးရနှင့်ဆက်ဆံရေးကောင်းပြီး မြန်မာပြည်တွင် ရင်းနှီးမှုများစွာပြုလုပ်နေသူ တရုတ်အစိုးရပိုင် CPI China Power Investment ကုမ္ပဏီမှဖြစ်သည်။ ၂၀၀၆ ခုနှစ် MOU ထိုးခဲ့ပြီးနောက် လုပ်ငန်းများစတင်ခဲ့သည်။ ရှယ်ရာပိုင်ဆိုင်မှုအရ CPI မှ ၈၀ ရာခိုင်နှုန်း၊ မြန်မာအစိုးရမှ ၁၅ ရာခိုင်နှုန်း၊ Asia World ကုမ္ပဏီမှ ၅ ရာခိုင်နှုန်း ပိုင်ဆိုင်သည်ဟု ဆိုသည်။

၂၀၀၆ မှစတင်သော အဆိုပါစီမံကိန်း တွင် မြစ်ဆုံရေအားစီမံကိန်းတခုတည်းသာမက မလိခမြစ်ပေါ်ရှိ မလိယန် ရေအားလျှပ် စစ် မေခမြစ်ပေါ်ရှိချီဗွေရေအားလျှပ်စစ် ဝဆုတ်ရေအားလျှပ်စစ် ဖီဆာရေအားလျှပ်စစ် ခေါင်လန်ဖူးရေအားလျှပ်စစ်နှင့် ယေ နန် ရေအားလျှပ်စစ်တို့အပါ စုစုပေါင်း ဆည် ၇ ခုတည်ဆောက်ပြီး ရေအားလျှပ်စစ်ထုတ်ယူမည့် စီမံကိန်းကြီးဖြစ်သည်။ အရန်အားဖြင့် ချီဗွေငယ်ဟုခေါ်သည့် ချီဗွေချောင်းပေါ်တွင်ဆောက်မည့်ရေအားလျှပ်စစ်အငယ်တခုပါသည်။

တရုတ်တို့အနေနှင့် ၂၀၀၆ MOU ထိုးပြီးသည်နှင့် ဆည်ဆောက်မည့်နေရာများရွေးချယ်ခြင်း မြေသားစမ်းသပ်ခြင်း ရေစီးရေ လာ တိုင်းထွာခြင်းများပြုလုပ်ခဲ့သည်။ CPI အနေနှင့် အခိုင်အမာစာချုပ်ချုပ်ဆိုနိုင်ရန် မြန်မာနိုင်ငံ ရင်းနှီးမြှုပ်နှံမှုဥပဒေနှင့် အညီ ရေးဆွဲပြင်ဆင်ပြီး နအဖအစိုးရ၏ ပြည်ထဲရေးကာကွယ်ရေး၊ စီးပွားရေး၊ စီမံကိန်း၊ သတ္တုတွင်း၊ သစ်တော၊ ငါးလုပ်ငန်း၊ ဆောက်လုပ်ရေး၊ စိုက်ပျိုးရေး၊ အလုပ်သမား၊ စက်မှု ၁၊ ရှေ့နေချုပ်ရုံးအပါ ဝန်ကြီးဌာနအဆင့် ၁၅ ခုအား စာချုပ်ပါအကြောင်း အရာများကို ချပြရှင်းလင်းပြီးချုပ်ဆိုခဲ့သည်ဟု ဆိုပါသည်။

၂၀၀၆ ခုနှစ်၊ ဒီဇင်ဘာလက မြန်မာလျှပ်စစ်ဝန်းကြီးဌာနနဲ့ တရုတ် CPI ကုမ္ပဏီတို့ MOU လက်မှတ်ထိုးပွဲ အခမ်းအနား (Photo : Burma Rivers Network)

 

CPI အနေနှင့် အဓိကထား၍ မြေသားစမ်းသပ်တိုင်းထွာခြင်းလုပ်ငန်းများ ပြုလုပ်ခဲ့သည့်နေရာ ၃ ခုမှာ တန်ဖရဲရွာအနီး မြစ် ဆုံဆည် ဆွမ်ပရာဘွမ်အနီးရှိ မလိခမြစ်ပေါ်ရှိ မလိယန်ဆည် ချီဗွေအထက် မေခမြစ်ပေါ်ရှိ ချီဗွေဆည်တို့ဖြစ်သည်။ ထို့ပြင် မြစ်ဆုံဆည်နှင့် ချီဗွေဆည်ဆောက်လုပ်ရာတွင်လျှပ်စစ်ထောက်ကူဖြစ်စေရန် မေခမြစ်အတွင်း စီးဝင်သည့် ချီဗွေချောင်းပေါ် တွင် ရေအားလျှပ်စစ်ငယ်တစ်ခုတည်ဆောက်ခဲ့သည်။ အဆိုပါချီ ဗွေချောင်းသည် တရုတ်မြန်မာနယ်စပ် ကျောက်တိုင် ၄ ရှိ ပန်ဝါတောင်ကြားမှ မြစ်ဖျားခံစီးဆင်း၍ ချီဗွေမြို့အနီး၌ မေခမြစ်အတွင်းသို့စီးဝင်သည်။ ချီဗွေမြို့အထက်တွင် ချီဗွေရေအားလျှပ်စစ်ကိုတည်ဆောက်ခဲ့ရာ ၂၀၁၃ စက်တင်ဘာလတွင် ဆောက်လုပ်ပြီးစီးခဲ့သည်။

အဆိုပါချီဗွေရေအားလျှပ်စစ်စက်ရုံငယ်မှအပ ကျန် မြစ်ဆုံ၊ မလိယန်၊ ချီဗွေရေ ဆည် ၃ ခုမှာ မြေသားစမ်းသပ်တိုင်းထွာခြင်း ရေစီးရေလာတိုင်းထွာခြင်းများ ပြုလုပ်နေစဉ် သမတဦးသိန်းစိန်သက်တမ်းအတွင်း ၂၀၁၁ စက်တင်ဘာ၌ မြစ်ဆုံစီမံကိန်းအား သူ၏သမတသက်တမ်းအတွင်း ရပ်ဆိုင်းကြောင်း ကြေငြာခဲ့သည်။

မြစ်ဆုံနှင့်အတူတကွ ဆောက်လုပ်ရန်လျာထားသော ဆည် ၇ ခု၏အကြမ်းပြင်းအခြေအနေမှာ အောက်ပါအတိုင်းဖြစ်သည်။

● မြစ်ဆုံရေအားလျှပ်စစ်
မြစ်ကြီးနားအထက် တန်ဖရဲရွာအနီး မေခ မလိခမြစ်နှစ်သွယ်ဆုံရာအောက်ဖက် ဧရာဝတီမြစ်အပေါ်တွင် တည်ဆောက်မည့် မြစ်ဆုံဆည်သည်၂၀၀၉ ခုနှစ် CPI ၏တွက်ချက်ခန့်မှန်းမှုအရ လျှပ်စစ်ဓာတ်အား ၄၁၀၀ မဂ္ဂါဝပ် (4100 MW) ထွက်ရှိမည်ဟု ဆိုသည်။ (သို့သော် နောက်ပိုင်းရရှိသည့် လေ့လာတိုင်းထွာချ က်များအရ လျှပ်စစ်ဓါတ်အား ၆၃၀၀ မဂ္ဂါဝပ် (6300 MW )ထွက်ရှိနိုင်သည်ဟု CPI မှတာဝန်ရှိသူများက ၂၀၁၅ အောက်တိုဘာလတွင် အတည်ပြုပြောကြားထားပါသည်။)

မြစ်ဆုံဆည်တည်ဆောက်ရာတွင် ရေအောက်ရောက်ရှိသွားမည့် ရေမြုပ်ဒေသမှာ ၆၄၇၈၄ ဧက (ဝါ) ၂၆၂၃၈ ဟက်တာ ရှိ မည်ဖြစ်သည်။ မြစ်ကြီးနား ပူတာအိုကားလမ်းပေါ်ရှိ တန်ဖရဲနှင့် တိန်ယန်ဇွပ်ကြား  ၄၈ ကီလိုရှိ လမ်းပိုင်းသည်လည်းကောင်း၊  မြစ်ကြီးနား- ချီဗွေကားလမ်းပေါ်ရှိ ချောင်းဆုံတဝိုက်လမ်းပိုင်း ၆၄ ကီလို ခန့်သည်လည်းကောင်း၊ ရေနစ်မြှုပ်သွားမည်ဖြစ်သည်။ ထိုရေမြုပ်ဧရိယာများ ရွာပေါင်း ၄၇ ရွာအထိလူမှုဆိုင်ရာ သက်ရောက်မှုများရှိမည်ဖြစ်သည်။ အဆိုပါရေမြုပ်ဒေသတွင် ကျ ရောက်သည့် ရွာပေါင်း ၃၀ အိမ်ခြေပေါင်း ၅၀၀၀ မှ လူဦးရေ ၈၀၀၀ အားပြောင်းရွှေ့ပေးရမည်ဖြစ်သည်။ ထို့ပြင် ဧက  ၁၈၀၀၀ ခန့်ရှိမည့် သဘာဝသစ်တောများ သဘာဝရင်းမြစ်များ အားလုံး ရေအောက်ရောက်သွားမည်ဖြစ်သည်။ မြစ်ဆုံဆည် ဆောက်လုပ်ပြီးပါက အဓိကအားဖြင့် မြစ်ဆုံတဝိုက်နှင့်မြစ်ကြီးနား ချီဗွေကားလမ်းပေါ်ရှိ ချောင်းဆုံတဝိုက်တွင် အလျား ၁၂ မိုင်၊ အနံ ၁၀ မိုင်နီးပါးရှိ ရေအိုင်ကြီး ၂ ခုပေါ်ထွက်လာမည်ဖြစ်သည်။

ဤသို့ဖြင့် မြန်မာပြည်အတွက်လည်းကောင်း၊ ကချင်ပြည်နယ်အတွက်လည်းကောင်း၊ အထင်ကရဖြစ်သည့် မေခ မလိခ မြစ် ဆုံနှင့် သူ၏ သဘာဝအထိမ်းမှတ်လက္ခဏာသည်လည်း ထာဝရပျောက်ဆုံးသွားမည်ဖြစ်သည်။

အတိတ်၊ မျက်မှောက်၊ ပစ္စုပ္ပန်ကာလထိတိုင် မြန်မာပြည်၏ အသက်သွေးကြောဖြစ်နေဦးမည့် ဧရာဝတီအလှ (Photo : www.galenfrysinger.com)

● လာဆာ (မလိယန်) ရေအားလျှပ်စစ်
လာဆာ ခေါ် မလိယန် ရေအားလျှပ်စစ်ဆောက်လုပ်မည့်နေရာသည် မလိခမြစ်အား ပိတ်ဆောက်မည့် ရေအားလျှပ်စစ်ဖြစ် သည်။ ဆွမ်ပရာဘွမ်မြို့အနီးရှိ မလိယန်တွင်တည်ရှိသည်။ မြစ်ဆုံရေအားလျှပ်စစ်အထက် ၁၄၄.၂ ကီလိုမိုင် အကွာတွင်ရှိ သည်။ ၂၀၀၉ ခုနှစ် CPI ၏လေ့လာတွက်ချက်မှုအရ မလိယန်ရေအားလျှပ်စစ်မှ လျှပ်စစ်ဓါတ်အား ၁၉၄၀ မဂ္ဂါဝပ် ထွက်ရှိမည် ဖြစ်ပြီး ထိုဆည်တည်ဆောက်ပြီးဖြစ်ပေါ်လာမည့် ရေမြှုပ်ဒေသမှာ ၆၀၆၂၇ ဧက (ဝါ) ၂၄၅၅၄ ဟက်တာ ရှိမည်ဖြစ်သည်။ ထိုဆည်ဆောက်ပြီးပါက ရေကန်ကြီး ၄ ခုခန့် ဖြစ်ပေါ်လာမည်ဖြစ်ပြီး အကြီးဆုံးကန်ကြီးမှာ မလိယန်တဝိုက်တွင် ဖြစ်ပေါ်လာ မည်ဖြစ်သည်။

မလိယန်ရေအားလျှပ်စစ်ဆည်ကြောင့် အဓိက ရေမြုပ်သွားမည့်ရွာကြီးမှာ ကချင်လုမျိုးများနေထိုင်ကြသည့် ဆွတ်ပီယန်ရွာ ကြီးဖြစ်သည်။ အိမ်ခြေ ၂၀၀ နှင့် လူဦးရေ ၁၂၀၀ ခန့်ရှိသည့် ဆွတ်ပီယန်ရွာကြီးသည် မလိခ မြစ်ဘေးတလျောက် လယ်ဧက ၁၀၀ ခန့်ပိုင်ဆိုင်ပြီး အနီးတဝိုက်ရွာများကိုပါ ရိက္ခာဖူလုံစေသည့်ရွာကြီးဖြစ်သည်။ ထို့ပြင် အိမ်ခြေ ၂၀ ခန့်ရှိသော ဖုန်းအင်နှင့် နန့်စီယန်ရွာများကိုပါ နစ်မြှုပ်စေမည်ဖြစ်သည်။ ထို့အတူ မြစ်ကြီးနားပူတာအိုကားလမ်းပိုင်းရှိ ဆွတ်ပီယန်အပိုင်းကိုပါ ရေနစ် မြှုပ်စေမည်ဖြစ်သည်။

● ချီဗွေရေအားလျှပ်စစ်
ချီဗွေရေအားလျှပ်စစ်သည် မေခမြစ်ပေါ်၌ တည်ရှိသည် ။ မေခမြစ်သို့ ချီဗွေချောင်း ပေါင်းစီးဝင်ရောက်ရာနေရာ၏ အထက် ၂၀ ကီလိုမိုင်အကွာတွင်ရှိသည်။၂၀၀၉ ခုနှစ် CPI ၏ တိုင်းထွာချက်များအရ လျှပ်စစ်ဓါတ်အား ၂၈၀၀ မဂ္ဂါဝပ် ထွက်ရှိမည် ဖြစ်ပြီး ရေမြုပ်ဧရိယာမှာ ၇၉၃၅ ဧက (ဝါ) ၃၂၁၄ ဟက်တာ ခန့်ရှိမည်ဖြစ်သည် ။ ရေမြှုပ်ဧရိယာတွင်း ပါသွားမည့် ရွာများမှ ကောင်းလ၊ ဖလ၊ မန်တုန်စသည့် စုစုပေါင်း အိမ်ခြေ ၁၅ အိမ်ခန့်ရှိမည့် လချိတ်နှင့် လော်ဝေါ် မျိုးနွယ်စုများနေထိုင်သည့် ရွာများဖြစ်သည်။

● ဝဆုတ် ရေအားလျှပ်စစ်
မေခမြစ်ပေါ်တွင်ရှိသည်။ ပန်ဝါအထူးဒေသ ကန်ဖန်မြို့နယ်၏ အနောက်ဖက် တည့်တည့်တွင်ရှိသည်။ ၂၀၀၉ CPI ၏တိုင်း ထွာချက်အရ လျှပ်စစ်ဓာတ်အား ၁၈၀၀ မဂ္ဂါဝပ် ထွက်ရှိမည်ဖြစ်ပြီး ရေမြုပ် ဧရိယာ ၁၂၂၉ ဧက (ဝါ) ၄၉၈ ဟက်တာ ရှိမည်။ လော်ဝေါ် လာချိတ်မျိုးနွယ်စုများ နေထိုင်ရာ ရွာ ၃ ငယ်ခန့် ရေနစ်မြှုပ်မည်။

● ဖီဆာ ရေအားလျှပ်စစ်
မေခမြစ်ပေါ်တွင်တည်ရှိသည်။ ဝဆုတ်နှင့် ခေါင်လန်ဖူးကြားတွင်ရှိသည်။ ၂၀၀၉ ခုနှစ် CPI ၏ တိုင်းထွာချက်အရ လျှပ်စစ် ဓါတ်အား ၂၀၀၀ မဂ္ဂါဝပ် ထွက်ရှိမည်ဖြစ်ပြီး ရေမြှုပ်ဧရိယာ ၁၇၀၃ ဧက (ဝါ) ၆၉၀ ဟက်တာ ရှိသည်။

● ခေါင်လန်ဖူးရေအားလျှပ်စစ်
ပူတာအိုခရိုင် ခေါင်လန်ဖူးမြို့အနီး မေခမြစ်ပေါ်တွင်ရှိသည်။ ၂၀၀၉ ခုနှစ် CPI ၏တိုင်းထွာချက်အရ လျှပ်စစ်ဓါတ်အား၂၇၀၀ မဂ္ဂါဝပ် ထွက်ရှိမည်ဖြစ်ပြီး ရေမြုပ်ဧရိယာ ၅၉၄၈ ဧက (ဝါ) ၂၄၀၉ ဟက်တာ ရှိသည်။ ခေါင်လန်ဖူး ရေအားလျှပ်စစ်ဆောက် မည့်နေရာသည် ခေါင်လန်ဖူးမြို့နယ် ဆန်ခွန်ချက်ရွာအနီး မေခမြစ်နှင့် အဆန်းတီချောင်းဆုံရာအနီး၌ ရှိသည်။ ပေ ၁၀၀၀၀ ကျော်မြင့်သော အီမောဘွမ်တောင်၏ ရေဝေရေလဲဒေသဖြစ်သည်။ ရီဒန်၊ မဂါတ စသည့် ရဝမ်ကျေးရွာငယ် ၂ ခု ရေနစ်မြှုပ် နိုင်ပါသည်။

● ယီနန် ရေအားလျှပ်စစ်
ယီနန်ရေအားလျှပ်စစ်သည် ပူတာအိုခရိုင် ပန်နန်ဒင်မြို့နယ်ခွဲ အလိအောင်ရွာအနီး မေခမြစ်နှင့်ထရုံချောင်းဆုံရာအနီး၌ ရှိ သည်။ ၂၀၀၉ ခုနှစ်CPI ၏တိုင်းတာချက်အရ လျှပ်စစ်ဓါတ်အား ၁၂၀၀ မဂ္ဂါဝပ် ထွက်ရှိနိုင်ပြီး ရေမြုပ်ဧရိယာ ၂၂၆၅ ဧက (ဝါ) ၉၁၇ ဟက်တာ ရှိနိုင်သည်။ ဆည်ဆောက်လုပ်ပြီးပါက ပန်နန်ဒင်မြို့နယ်ခွဲအတွင်းရှိ ရဝမ် လီဆူး နှင့် ထရုန် ကျေးရွာများ ဖြစ်သော အလိအောင်မုန်းဒုန်၊ ထွန်ဂိုယင်၊ ဂမ်ဂို စသည့်ရွာများ ရေနစ်မြှုပ်နိုင်သည်။

ဆက်လက်ဖေါ်ပြပါမည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:သတင်းဆောင်းပါး, မောင်မောင်စိုး

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ

By

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ (မိုးမခ)...

Read more »

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်