မောင်မောင်စိုး ● အမျိုးသားရင်ကြားစေ့ရေး ငြိမ်းချမ်းရေး

May 9, 2016

မောင်မောင်စိုး ●  အမျိုးသားရင်ကြားစေ့ရေး ငြိမ်းချမ်းရေး

(မိုးမခ) မေ ၉၊ ၂၀၁၆

 

● အမျိုးသားရင်ကြားစေ့ရေး

အမျိုးသားရင်ကြားစေ့ရေးသည် ဒီချုပ်၏ ရွေးကောက်ပွဲမတိုင်မီကတည်းက ကြွေးကြော်သံဖြစ်သည်။ ဒီချုပ်ရွေးကောက်ပွဲတွင်အနိုင်ရရှိပါက အမျိုးသားရင်ကြားစေ့ရေးကိုဦးတည်လုပ်ဆောင်မည်ဟုဆိုခဲ့သည်။ ရွေးကောက်ပွဲအနိုင်ရပြီးသောအခါ၌လည်း ထိုခြေလှမ်းများ စတင်လှမ်းခဲ့သည်ဟု ဆိုနိုင်သည်။

မြန်မာပြည်၏ အမျိုးသားရင်ကြားစေ့ရေးတွင် အပိုင်း ၂ ပိုင်း ပါဝင်သည်။ တပိုင်းမှာ ဒီမိုကရေစီအင်အားစုများနှင့် စစ်ခေါင်း ဆောင်များကြားဖြစ်သည်။ နောက်တပိုင်းကား တိုင်းရင်သားများနှင့် ရင်ကြားစေ့နိုင်ရေးဖြစ်သည်။ ရွေးကောက်ပွဲအပြီးမှစ၍ မြန်မာစစ်ဖက်ခေါင်းဆောင်များနှင့်ရင်ကြားစေ့လုပ်ဆောင်မှု ခြေလှမ်းများစတင်ခဲ့သည်။ ၎င်းပြဿနာမှာ ဦးစွာကိုင်တွယ်ရ မည့်ပြဿနာဖြစ်ပေရာ အငြင်းပွားဖွယ်မရှိပေ။ ၎င်းအပိုင်းမှာလည်း တထိုင်တည်း ပြေလည်အောင် ဖြေရှင်းနိုင်မည်တော့ မဟုတ်။ တဆင့်ခြင်းသာ သွားရမည့်သဘောရှိသည်ဟုဆိုရမည်။

တိုင်းရင်းသားအရေးနှင့် ပတ်သက်၍မူ ယခင်အစိုးရဟောင်းလက်ထက်မှ အပစ်ရပ်စာချုပ်ကို ဆက်ခံထားပြီး အခိုင်အမာခြေလှမ်းများကိုမူများမကြာမှီတွေ့ရမည့် အလားအလာရှိသည်။ ဒေါ်အောင်ဆန်းစုကြည်ကလာမည့် နှစ်လ သုံးလအတွင်း ၂၁ ရာစု ပင်လုံကို ဖေါ်ဆောင်သွားမည်ဟုဆိုခဲ့သည်။ လက်ရှိအချိန်တွင် အမျိုးသားရင်ကြားစေ့ရေးနှင့် ငြိမ်းချမ်းရေးကော်မီတီ NRPC အား ဒေါက်တာတင်မျိုးဝင်းအား စတင်တာဝန်ပေးခဲ့သည်ကို တွေ့ရသည်။ နောက်ထပ်ခြေလှမ်းများလည်း မကြာ မှီတွေ့ရမည်ဟု မျှော်လင့်ရသည်။

● တိုင်းရင်းသားများနှင့်ရင်ကြားစေ့ရေး

တိုင်းရင်းသားများနှင့်ရင်ကြားစေ့ရေးအပိုင်းနှင့်ပတ်သက်၍ ဒေါ်အောင်ဆန်းစုကြည်က အပစ်ရပ်လက်မှတ်မထိုးသေးသောအဖွဲ့နှင့် အပစ်ရပ်လက်မှတ်ထိုးပြီးအဖွဲ့များကို ခွဲခြားဆက်ဆံမဟုတ်ဟု ဆိုခဲ့သည်။ ထို့ပြင် သူမပြောဆိုခြင်းမရှိသော်လည်း တိုင်းရင်းသားပြဿနာကို တိုင်းရင်းသားလက်နက်ကိုင်အဖွဲ့များနှင့်သာမက တိုင်းရင်းသားပါတီများနှင့်ပါ အဆိုပါညီလာခံ တွင် ဆွေးနွေးဖြေရှင်းသွားဖွယ်ရာရှိသည်ဟူ၍သာ ခန့်မှန်းရသည်။

ထို့အတူ မြို့ပေါ်တရားဝင်တိုင်းရင်းသားပါတီများနှင့်လည်း ရွေးကောက်ပွဲမတိုင်မှီကရော ရွေးကောက်ပွဲအပြီး ယခုအချိန်ထိပါ မည်သည့်တွေ့ဆုံဆွေးနွေးမှုမှမရှိပေရာ တိုင်းရင်းအရေးနှင့်ပတ်သက်ပြီး အားလုံးအတူတကွ တွေ့ဆုံဆွေးနွေးချိန်မှသာ မြို့ပေါ်တိုင်းရင်းသားပါတီများ ပါဝင်လိမ့်မည်ဟုသာမျှော်လင့်ရသည်။

သို့သော် တိုင်းရင်းသားပါတီများနှင့်ဆွေးနွေးခြင်းမရှိသော်လည်း တိုင်းရင်းသားပါတီများ ခေါင်းဆောင်တချုို့အား လွှတ် တော်နှင့် အစိုးရအဖွဲ့တွင်တာဝန်ပေးခဲ့သည်ကိုတွေ့ရသည်။ ဤသို့တာဝန်ပေးခြင်းနှင့်ပတ်သက်၍ တိုင်းရင်းသားပါတီများနှင့် ညှိနှိုင်းခြင်းမရှိခဲ့၍ တိုင်းရင်းသားပါတီများက ကျေလည်မှု မရှိခဲ့သည်ကို တွေ့ရသည်။ NLD အနေနှင့် မိမိပါတီဝင်တယောက် ပါတီဆုံးဖြတ်ချက်ကို မနာခံဘဲ မိမိသဘောနှင့် ပြုမူဆောင်ရွက်ပါက လိုအပ်သလို ကိုင်တွယ်အရေးယူနေသည်မှာ ပါတီ စည်းရုံးရေးစည်းကမ်းအရ မူပြဿနာအဖြစ် သဘောထားသကဲ့သို့ တိုင်းရင်းသားပါတီများမှ လူပုဂ္ဂိုလ်များကို တဦးချင်း ခေါ်ယူတာဝန်ပေးခြင်းမှာ ထိုပါတီများအတွက် စည်းရုံးရေးစည်းကမ်းပြဿနာဖြစ်သည်ကို အထူးသတိပြုသင့်သည်။

● ၂၁ ရာစုပင်လုံ

လပိုင်းအတွင်းကျင်းပနိုင်ရန် ဆော်သြခဲ့သော ဒုတိယပင်လုံနှင့်ပတ်သက်၍ မတူသောအမြင်များရှိသည်မှာ အံ့သြဖွယ်တော့ မဟုတ်ပေ။ ပုံမှန်အားဖြင့် အပစ်ရပ်သဘောတူညီချက်ရယူပြီးမှ နိုင်ငံရေးဆွေးနွေးရမည်ဟု ယခင်အစိုးရလက်ထက်က ချ မှတ်ထားသော သဘောထားဖြစ်ပေရာ ယခုအပစ်မရပ်သေးသောအဖွဲ့များ အချိန်တိုတွင်း အပစ်ရပ်နိုင်မည်လော မေးခွန်း များပေါ်လာသည်။

တကယ်တမ်းအားဖြင့်ဆိုလျင် တိုင်းရင်းသားလက်နက်ကိုင်တပ်ဖွဲ့ပြသနာမှာ နိုင်ငံရေးပြဿနာဖြစ်သည်။ နိုင်ငံရေးအရ ဆွေးနွေးအဖြေရှာမှသာ ဖြေရှင်းနိုင်မည်ဖြစ်သည်။ နိုင်ငံရေးအရ မဖြေရှင်းနိုင်ပါက အပစ်ရပ်အနေအထားလည်း ပျက်ပြယ် မည်သာဖြစ်သည်။ သို့ဖြစ်ရာ တိုင်းရင်းသားဖြေရှင်းရာတွင် နိုင်ငံရေးပြဿနာဖြေရှင်းခြင်းကို အလေးတင်းသင့်သည်။ ပြီးခဲ့ သောဦးသိန်းစိန်၏ သမ္မတသက်တမ်းတွင် အပစ်ရပ်ရေးသဘောတူညီချက်ရရေးနှင့်သာ အချိန်ကုန်ခဲ့သည်။ နိုင်ငံရေး ဆွေး နွေးပွဲများ မပြုလုပ်နိုင်ခဲ့ပေ။ ဤဖြတ်သန်းခဲ့မှု သင်္ခန်းစာယူသင့်သည်။

အပစ်ရပ်သဘောတူညီချက်ရရေးအတွက် နယ်မြေ တပ်လှုပ်ရှားမှုများနှင့်ပတ်သက်၍သာ အချိန်ကုန်မခံသင့်ပေ။ ထို့ပြင် အ ပစ်ရပ်သဘောတူညီချက်အရ တိုင်းရင်းသားလက်နက်ကိုင်တပ်ဖွဲ့များ တပ်အင်အားမတိုးချဲ့ရေးအတွက် ထိမ်းချုပ်မှုသည် လည်း နိုင်ငံရေးအရပြဿနာမရှင်းဘဲ အောင်မြင်နိုင်မည်မဟုတ်ပေ။ လက်တွေ့တွင် အပစ်ရပ်လက်မှတ်ထိုးသည်ဖြစ်စေ မထိုးသည်ဖြစ်စေ တိုင်းရင်းသားလက်နက်ကိုင်တပ်ဖွဲ့တိုင်းသည် မိမိတပ်ဖွဲ့ အင်အားတောင့်တင်းရေးကို ရှေ့ရှု လုပ်ဆောင် နေကြသည်မှာ ငြင်းမရသည့်အချက်ဖြစ်နေသည်။ နိုင်ငံရေးအရ ပြဿနာဖြေရှင်းသဘောတူပြီးသည့်အချိန်မှ ၎င်း လက်နက် ကိုင်တပ်ဖွဲ့ပြဿနာကို မည်သို့ဖြေရှင်းမည်ဆိုသည်ကို သဘောတူညီချက်ရယူရန် ပိုမိုလွယ်ကူမည့်အပြင် ပိုမိုအဆင်ပြေလျင် မြန်စွာလည်းဖြေရှင်းနိုင်ပေမည်။ သို့မဟုတ်က နိုင်ငံရေးပြဿနာဆီ မရောက်နိုင် မဖြေရှင်းနိုင်ဘဲ လက်နက်ကိုင်တပ်ကိစ္စနှင့် ငြင်းခုံကြရင်း ပဋိပက္ခပြန်လည်ဖြစ်ပွားရင်း သံသရာလည်ဖွယ်ရှိသည်။

သို့ဖြစ်ရာ ၂၁ ရာစုပင်လုံကို အမြန်ဆုံးကျင်းပနိုင်ဖို့ တိုင်းရင်းသားပြဿနာကို နိုင်ငံရေးအရ ဆောလျင်စွာဖြေရှင်းနိုင်ဖို့ဆို လျင် လိုရင်းရောက်ဖို့ အချို့အဆင့်များက်ို ကျော်လွှားရမည်ဟု သုံးသပ်ရပါသည်။

● အပစ်မရပ်ဘဲ ဆွေးနွေး၍ မရနိုင်သလော

တကယ်တမ်းဆိုလျင် အပစ်ရပ်သဘောတူညီချက်ရရေးဆွေးနွေးပွဲများသည် အပစ်မရပ်ဘဲ ဆွေးနွေးခဲ့ကြခြင်းဖြစ်သည်။ သို့ ဖြစ်ရာ အပစ်မရပ်ဘဲ နိုင်ငံရေးဆွေးနွေး၍ မရစရာမရှိပေ။ သက်ဆိုင်သူများ စစ်ရှိန်လျှော့ချရန်သာ လိုသည်။ နယ်မြေဆိုင်ရာ အငြင်းပွားမှုများ တိုက်ပွဲငယ်များဖြစ်ပွားမှုများသည် နိုင်ငံဆွေးနွေးပွဲအားကောင်းလာလေ လျှော့ချနိုင်လေသာ ဖြစ်ပေမည်။ ပြဿနာဇစ်မြစ်ဖြစ်သော နိုင်ငံရေးအရဆွေးနွေးရေးကို မြန်ဆန်စွာဖြေရှင်းနိုင်ရေးအတွက် ရှိနေသည့်အတားအဆီးများကို ကျော်လွှားသွားရန်လိုသည်။ နိုင်ငံရေးပြဿနာကို ဖြေရှင်းနိုင်ပါက လက်နက်ကိုင်ပဋိပက္ခကို ပို၍လွယ်ကူစွာဖြေရှင်းနိုင် သည်ဟူသော သဘောထားရှိပါက မဖြစ်နိုင်စရာ အကြောင်းမရှိဟု ဆိုရပါမည်။

ထိုသို့သာဆောင်ရွက်နိုင်မည်ဆိုပါက အပစ်ရပ်ရေးအတွက် အချိန်ကုန်နေမည့်အစား နိုင်ငံရေးဆွေးနွေးပွဲသို့ လျင်မြန်စွာ ရောက်ရှိသွားနိုင်ပေမည်။

● နားလည်မှု တည်ဆောက်ရေး

လက်ရှိ တိုင်းရင်းသားပြဿနာကို ဖြေရှင်းရာတွင် အဓိကကျသည့် ပြဿနာတရပ်မှာ နှစ်ဖက်နားလည်မှု ယုံကြည်မှု တည် ဆောက်ရေးဖြစ်သည်။ တဖက်နှင့်တဖက် မတူသည့် ကြည့်မြင်သုံးသပ်ပုံများကို အပြန်အလှန်နားလည် ဆွေးနွေးနိုင်ဖို့ အ ရေးကြီးသည်။ တဖက်နှင့်တဖက် ယုံကြည်မှု နားလည်မှု မတည်ဆောက်နိုင်ပါက ကြည့်မြင်သုံးသပ်ပုံခြင်းပုံခြင်း မတူပါက သဘောတူညီမှုတခုရရှိရန် ခက်ခဲပေလိမ့်မည်။

ဥပမာအားဖြင့် ၂၀၁၆ မေလ ၄ ရက်နေ့ အမျိုးသားလွှတ်တော်တွင် ကာကွယ်ရေးဝန်ကြီး ဒုဗိုလ်ချုပ်ကြီးစိန်ဝင်း၏ရှင်းလင်း ဆွေးနွေးချက်အရ မြန်မာစစ်ဖက်ခေါင်းဆောင်များက လက်ရှိအစိုးရတပ်အား ပြည်ထောင်စုတပ်မတော်အဖြစ် ခံယူသည်။ တိုင်းရင်းသားလက်နက်ကိုင်များက သူတို့၏တပ်ဖွဲ့များသည် သူတို့၏တိုင်းရင်းသားများကို ကိုယ်စားပြုသည်ဟု ယူဆသည်။

မြန်မာစစ်ဖက်ခေါင်းဆောင်များအနေနှင့် AA ကဲ့သို့ တိုင်းရင်းသားလက်နက်ကိုင်အဖွဲ့တခု၏ ပုန်ကန်တိုက်ခိုက်မှုသည် အစိုးရလွှတ်တော် တရားစီရင်ရေးစသည့် ဒီမိုကရေစီစနစ်ကို တိုက်ခိုက်ခြင်းဖြစ်သည်ဟု ရှုမြင်သည်။ တိုင်းရင်းသားအဖွဲ့ များကမူ သူတို့ တိုင်းရင်းသားလူမျိုးအကျိုးအတွက် တိုက်ပွဲဝင်သည်ဟု ခံယူသည်။

မြန်မာစစ်ဖက်ခေါင်းဆောင်များအနေနှင့် ပြည်ထောင်စုတပ်မတော်တစ်ခုတည်းရှိရမည်ဟု ခံယူသည်။ တိုင်းရင်းသားလက်နက်ကိုင်အဖွဲ့များက မိမိတိုင်းရင်းသားများကို ကိုယ်စားပြုကာကွယ်သည့် လက်နက်ကိုင်တပ်ဖွဲ့ရှိရမည်ဟု ယူဆကြသည်။

မြန်မာစစ်ဖက်ခေါင်းဆောင်များက လက်ရှိဒီမိုကရေစီစနစ်အရ မိမိတို့လိုလားချက်ကို ပြောရေးဆိုခွင့်ရှိနေသည်ဖြစ်ရာ ကျေ နပ်မှု မရှိတိုင်း လက်နက်ကိုင်ပုန်ကန်တိုက်ခိုက်ခြင်းနှင့် ထိုအဖွဲ့များအား လိုက်လံအသိမှတ်ပြုခြင်းသည် မလိုအပ်ဟု ယူဆသည်။ တိုင်းရင်းသားများကမူ လွတ်လပ်ရေးရပြီးကထဲက တိုင်းရင်းသားအခွင့်အရေးများမရခဲ့သဖြင့် အခွင့်အခါသင့် သလို တုန့်ပြန်တိုက်ခိုက်ခွင့်ရှိသည်ဟု ယူဆကြသည်။

မြန်မာစစ်ဖက်ခေါင်းဆောင်များက ၂၀၀၈ အခြေခံဥပဒေကို ကာကွယ်မည်ဟူ၍ ရပ်ခံကြသည်။ တိုင်းရင်းသားလက်နက်ကိုင် အဖွဲ့များက ၂၀၀၈ အခြေခံဥပဒေအရ တိုင်းရင်းသားများ ပြည်နယ်အလိုက် အစိုးရဖွဲ့စည်းခွင့်ဥပဒေပြုခွင့် တရားစီရင်ခွင့် မရှိသဖြင့် ၂၀၀၈ အခြေခံဥပဒေကိုပြင်ဆင်ရန်လိုသည်ဟု ယူဆကြသည်။

အဆိုပါအချက်များသည်တဖက်နှင့်တဖက် မတူကွဲပြားသည့်မမြင်များဖြစ်သည်။ ထိုသို့ ကွဲပြားသောအမြင်များအား တဖက် နှင့်တဖက်နားလည်မှုရှိအောင် ဆွေးနွေးတည်ဆောက်မှသာ နိုင်ငံရေးပြဿနာများကို ဖြေရှင်းနိုင်ပေလိမ့်မည်။ တဖက်နှင့် တဖက် နိုင်ငံရေးအရ ကြည့်မြင်ပုံမတူပါက ညှိနှိုင်းသဘောတူညီမှု ရရန်ခက်ခဲပေသည်။

● ယုံကြည်မှု တည်ဆောက်ရေး

ရှည်ကြာသောစစ်ပွဲများကြောင့်၎င်း လွတ်လပ်ရေးရပြီးနောက်ပိုင်းတိုင်းရင်းသားဒေသများတွင် ဖွံ့ဖြိုးတိုးတက်မှု နိမ့်ပါးခြင်း ကြောင့်လည်းကောင်း၊ တိုင်းရင်းသားများ၏ရပိုင်ခွင့်များဆုံးရှုံးသည်ဟု ခံစားခဲ့ကြရ၍လည်းကောင်း၊  တိုင်းရင်းသားများအနေ နှင့် ပြည်မအစိုးရအပေါ်လည်းကောင်း၊ မြန်မာစစ်ဖက်အပေါ်လည်းကောင်း ယုံကြည်မှုပျက်ပြားခဲ့ကြသည်။

အလားတူပင် မြန်မာစစ်ဖက်ခေါင်းများသည်လည်းကောင်း၊ ပြည်မနိုင်ငံရေးအင်အားစုများသည်လည်း တိုင်းရင်းသားတို့၏ ပုန်ကန်တိုက်ခိုက်မှု တိုင်းရင်းသားအချို့၏ခွဲထွက်လိုမှုကြောင့်လည်းကောင်း၊ ရှည်ကြာသောစစ်ပွဲများကြောင့်လည်း ကောင်း၊ တိုင်းရင်းသားများအပေါ် ယုံကြည်မှု လျော့ကျခဲ့သည်။

အထူးသဖြင့် ရှည်ကြာသောစစ်ပွဲအတွင်း အသက်အိုးအိမ်များစွာ ထိခိုက် ဆုံးရှုံးရမှု များပြားခဲ့သဖြင့် နားကျည်းမှု မုန်းတီးမှု ဒဏ်ရာဒဏ်ချက်များစွာဖြစ်ပေါ်ခဲ့ပြီး တဖက်နှင့်တဖက် အလွယ်တကူယုံကြည်ရန်မဖြစ်နိုင်ပေ။ အထူးသဖြင့် မြန်မာပြည်အားနှစ်ရှည်အုပ်ချုပ်ခဲ့ပြီး နှစ်ပေါင်းများစွာ စစ်ပွဲဆင်နွှဲခဲ့သည့် မြန်မာစစ်ဖက်ခေါင်းဆောင်များနှင့် ယုံကြည်မှု တည်ဆောက်ရန် အတန်ငယ်ခက်ခဲသည်ဟုဆိုနိုင်သည်။ လက်ရှိအချိန် တိုင်းရင်းသားလက်နက်ကိုင်အဖွဲ့များက ဒေါ်အောင်ဆန်းစုကြည်အား မျှော်လင့်ချက်ထားကြသည်မှာ သူမရပ်တည်ဖြတ်သန်းမှုကြောင့်အပြင် သူမနှင့် တိုင်းရင်းသားအဖွဲ့များအကြား ယခင် ယုံကြည်မှု ပျက်ပြားခဲ့သည့် ကိစ္စရပ်မျိုးမရှိခဲ့၍ဖြစ်သည်ဟု ဆိုရမည်။

မည်သို့ဆိုစေ တိုင်းရင်းသားများနှင့် ရင်ကြားစေ့ရေး ငြိမ်းချမ်းရေးအောင်မြင်ရန် တစ်ဖက်နှင့်တဖက် ယုံကြည်မှု တည်ဆောက် ရန် လိုအပ်ပေလိမ့်မည်။ တဖက်နှင့်တဖက်ယုံကြည်မှုမရှိဘဲ ညိနှိုင်းသဘောတူညီမှုရရန်မလွယ်ကူလှပေ။

● ၂၁ ရာစု ပင်လုံနှင့် တိုင်းရင်းသားခေါင်းဆောင်အချို့၏အမြင်

SNLD ခေါင်းဆောင်ဖြစ်သူ ခွန်ထွန်းဦးက ၂၁ ရာစုပင်လုံညီလာခံမှာပင်လုံ၏အခြေခံအခွင့်အရေးတွေကို တိုင်းရင်းသားများကို ပေးအပ်ရန်လိုသည်ဟုဆိုခဲ့သည်။ မွန်ပြည်သစ်ပါတီ ခေါင်းဆောင်တဦးဖြစ်သူ နိုင်ဟံသာက ၂၁ ရာစုပင်လုံညီ လာခံ ကျင်းပမည်ဆိုပါက အထွေထွေလွတ်ငြိမ်းချမ်းသာခွင့်ကြေငြာပေးရန်လိုကြောင်း ဆိုခဲ့သည်။ ရခိုင်အမျိုးသားပါတီခေါင်း ဆောင်ဒေါက်တာအေးမောင်က ပင်လုံညီလာခံဆိုလျင် ခွဲထွက်ခွင့်ပါကြောင်း ဆိုခဲ့သည်။

သို့သော် တရားဝင်တိုင်းရင်းသားပါတီများအနေနှင့် တိုင်းရင်းသားအရေးနှင့်ပတ်သက်၍ NLD အား အားကိုးရန်သိပ်မလွယ် တော့ဟု SNLD ခေါင်းဆောင် ခွန်ထွန်းဦးက တိုင်းရင်းသားခေါင်းဆောင်များအစည်းအဝေးတွင် ရခိုင်ပြဿနာကို ထောက်ပြ၍ ဆိုခဲ့သည်။ ဦးအေးသာအောင်ကလည်း ၂၁ ရာစု ပင်လုံခေါ်ရင် ဖက်ဒရယ်ပြည်ထောင်စု ဖြစ်လာနိုင်ဖို့ မလွယ် သေးကြောင်း တိုင်းရင်းသားတွေ အားမလျော့ဘဲ ထပ်မံကြိုးစားရန်လိုကြောင်းဆိုခဲ့သည်။

NLD ခေါင်းဆောင်များအနေနှင့် ရွေးကောက်ပွဲမတိုင်မှီက၎င်း ရွေးကောက်ပွဲပြီး ယခုအချိန်ထိလည်းကောင်း၊ မည်သည့်တိုင်း ရင်းသားပါတီနှင့်မှ ညှိနှိုင်းဆွေးနွေးခြင်း လုပ်ကိုင်ဆောင်ရွက်ခြင်းမရှိရာ မြို့ပေါ်တိုင်းရင်းသားပါတီများအနေနှင့် NLD အ ပေါ် မျှော်လင့်ချက်နှင့် ယုံကြည်မှု အတော်ပင်လျော့ပါးသွားပုံရသည်။ ရွေးကောက်ပွဲအပြီးတွင် တိုင်းရင်းသားပါတီများအနေနှင့် NLD ပါတီပူးပေါင်းဆွေးနွေးမှုကို မျှော်လင့်ခဲ့ကြသော်လည်း ယနေ့ ၆ လခန့်ကြာသည်အထိဖြစ်ပေါ်မလာ၍ စိတ်ပျက်နေကြ သည်ဟုဆိုရမည်။ ဤအချက်ကား စိတ်မသက်သာစရာပင်ဖြစ်သည်။

ဦးအေးသာအောင်၏ ယခုအကြိမ် ၂၁ ရာစုပင်လုံခေါ်ဖြစ်လည်း ဖက်ဒရယ်ပြည်ထောင်စုဖြစ်ပေါ်လာရန်မလွယ်သေးဆို သည်မှာလည်း တပ်၏ရပ်ခံမှုနှင့် NLD ကျော်လွှားနိုင်စွမ်းကို ဝေဖန်သုံးသပ်ပုံရသည်။ မည်သို့ပင်ဖြစ်စေ ခြေလှမ်းများတော့ လှမ်းရမည်သာဖြစ်သည်။ အဘယ်ကြောင့်ဆိုသော် လက်ရှိတိုင်းရင်းသားပြဿနာပြဿနာကို ဖြေရှင်းကြမည်မှာ ဘက် ၂ ဘက်ထဲသာမဟုတ်ချေ။ ပြည်မဒီမိုကရေစီအင်အားစု မြန်မာစစ်ဖက် နှင့် တိုင်းရင်းသား များ စသည့် ၃ ပွင့်ဆိုင်ပြဿနာဖြစ်နေ ၍ ဖြစ်ပါသည်။

● နိဂုံး

စားပွဲဝိုင်းတွင် နိုင်ငံရေးအရဆွေးနွေးဖြေရှင်းခြင်းကို အမြန်ဆုံးလုပ်ဆောင်နိုင်မှာ အမျိုးသားရင်ကြားစေ့ရေး ငြိမ်းချမ်းရေးအ တွက် ကောင်းမွန်သောရလဒ်များ ထွက်ပေါ်လာပေလိမ့်မည်။ သောင်းကျန်းသူ အမြစ်ဖြုတ်ရေးရော စစ်အစိုးရအပြု တ်တိုက် ရေးပါ အလုပ်မဖြစ်ခဲ့သည်ကတော့ မြန်မာပြည်၏ ငြင်းမရသော သမိုင်းဖြစ်ပါသည်။ တိတိကျကျပြောရလျင် မည်သည့်တိုင်းရင်းသားလက်နက်ကိုင်အဖွဲ့မှ အစိုးရကို ပြုတ်အောင်မတိုက်နိုင်ခဲ့သကဲ့သို့ ဗိုလ်နေဝင်း ဗိုလ်သန်းရွှေ ဗိုလ်သိန်းစိန်တို့သည် လည်း တိုင်းရင်းသားလက် နက်ကိုင်များကို အမြစ်ပြတ် မချေမှုန်းနိုင်သည်ကတော့ ဖြစ်ရပ်မှန်ဖြစ်သည်။

Mg Mg Soe (မောင်မောင်စိုး)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
No tags for this post.

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:သူတို့အာဘော်, မောင်မောင်စိုး

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ကြပါစေ …

မိုးမခ လစဉ်ထုတ်မဂ္ဂဇင်း သြဂတ်စ် ၂၀၁၇ ထွက်ပြီ

မိုးမခမှာ ကြော်ငြာပါ

မိုးမခကို အိမ်အရောက် ပို့ပေးမည်

Help MoeMaKa

မိုးမခမာတိကာစဉ်

မိုးမခနဲ့ ပတ်သက်သမျှ

မိုးမခ ဇူလိုင် ထွက်ပါပြီ …

By

မိုးမခ ဇူလိုင် ထွက်ပါပြီ … (မိုးမခ) ဇူလိုင် ၁၈၊ ၂၀၁၇ မိုးမခ...

Read more »

မိုးမခမဂ္ဂဇင်း ဇွန်လထုတ် အသစ် ဝန်ဇင်းမှာ ဝယ်ယူနိုင်ပါပြီ

By

မိုးမခမဂ္ဂဇင်း ဇွန်လထုတ် အသစ် ဝန်ဇင်းမှာ ဝယ်ယူနိုင်ပါပြီ (မိုးမခစာအုပ်စင်) ဇွန် ၉၊ ၂၀၁၇...

Read more »

မိုးမခ မဂ္ဂဇင်း မေလထုတ် အသစ် ဝန်ဇင်းတွင် ရပြီ

By

    မိုးမခ မဂ္ဂဇင်း မေလထုတ် အသစ် ဝန်ဇင်းတွင် ရပြီ (မိုးမခ) မေ...

Read more »

စိုးလွင် (၂၁၁) (ဝမ်ခ) ရဲ့ “ဝမ်ခ (ဟောင်း) တိုက်ပွဲ နှင့် ကြမ်းကြမ်းတမ်းတမ်း ဘဝလမ်းများ” စာအုပ်

By

  စိုးလွင် (၂၁၁) (ဝမ်ခ) ရဲ့ “ဝမ်ခ (ဟောင်း) တိုက်ပွဲ နှင့်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

ကဏ္ဍများအလိုက်

Maung Swan Yi Myanmar Now ကချင် ကမ်လူဝေး ကာတွန်း Joker ကာတွန်း OKKW ကာတွန်း ကိုခေတ် ကာတွန်း ဇာနည်ဇော်ဝင်း ကာတွန်း ညီပုချေ ကာတွန်း ညီထွေး ကာတွန်း မိုးသွင် ကာတွန်း သွန်းခ ကာတွန်း ဆွေသား ကာတွန်း ရွှေဗိုလ် ကာတွန်း ရွှေလူ ခက်ဦး စိုးနေလင်း ဆန်ဖရန် ဇင်လင်း ဇာနီကြီး ထက်ခေါင်လင်း (Myanmar Now) ထင်အောင် ဒီလူည နရီမင်း မင်းကိုနိုင် မာမာအေး မိုးသွင် ရခိုင် လင်းခါး လင်းသက်ငြိမ် သွန်းခ အင်တာဗျူး အရှင်စန္ဒိမာ (မွန်စိန်တောရ) အိချယ်ရီအောင် (Myanmar Now) ဦးကိုနီ ကျော်မောင် (တိုင်းတာရေး) ဆောင်းဖြူ နေ၀န်းနီ (မန္တလေး) မောင်စိုးချိန် မောင်ဥက္ကလာ မောင်မောင်လတ် (ရွှေအင်းလေးစာပေ) သောင်းပြောင်းထွေလာ ပြည်တွင်းစစ် ၂၁ ရာစု ပင်လုံ ဖြိုးသီဟချို (Myanmar Now)
ကဏ္ဍများအလိုက် မာတိကာစဉ်