မင်းကိုနိုင် ● နို့ဖြတ်ခံရတဲ့ ကြောင်ကလေး

July 29, 2016

● နို့ဖြတ်ခံရတဲ့ ကြောင်ကလေး
(မိုးမခ) ဇူလိုင် ၂၉၊ ၂၀၁၆

ကိုမင်းကိုနိုင် လူမှုကွန်ရက်စာမျက်နှာပေါ်မှ ပြန်လည်ကူးယူသည်။

အင်းစိန်ကနေ စစ်တွေကိုပြောင်းခါစ သားအငမ်းမရလိုက်ရှာတာ ကြောင်တကောင်ပါပဲ အမေ။ လူအဖော်မရှိတာ အကျင့်ရ နေပြီမို့ သားအတွက် ပြဿနာမဟုတ်ပေမယ့် ကြောင်မရှိရင်တော့ အဖော်မဲ့ဘ၀ကို သိသာစေတယ်။ အဖော်မဲ့တာထက် လူသူမဲ့တာက တော်သေးတယ်ပဲ ပြောပါတော့။

မကြာခင်ပဲ ကြောင်တကောင် သားဆီရောက်လာတယ်။ “အမ” ကလေးဖြစ်ပါစေ ဆုတောင်းတာတော်သေးတာပေါ့ ဆု တောင်းပြည့်တယ်။ သားအခန်းထဲ သူအရွယ်ရောက်လာတော့ ထုံးစံအတိုင်းအပြင်နယ် တခါတရံပျောက်၊ အကြာကြီးနေမှပြန် လာ။ နောက်ဆုံး လိုရင်းပြောရရင် ခိုရာလိုက်ပြေးသွားပါရော။ အခန်းရှေ့က ရိုးခနဲ ရိပ်ခနဲ ဖြတ်ပြေးပြီး သားကို မမြင်ချင် ယောင်ဆောင်သွားတဲ့အခါသားက ကြောင်အပျိုမအဖေ အတွေ့အကြုံတွေများနေပြီဆိုတော့ “နင် အချိန်တန်ရင် ပြန်လာရ မှာပဲ” လို့ လှမ်းပြောလိုက်တာပေါ့။

ပြောတဲ့အတိုင်း တနေ့ပြန်ရောက်လာတာပဲ။ သူ့ကိုယ်ဝန်ကြီးနဲ့ ဟိုပေါ် ခုန်တက်လိုက်၊ ခုန်ချလိုက် လုပ်နေလို့ “တ ဟဲ့..ဟဲ့ ” ငေါက်ရသေးတယ်။ “နင်ငြိမ်ငြိမ်နေ ..အထဲက ကလေးတွေရှိသေးတယ်။ ဘာအတွေ့ အကြုံမှလည်း မရှိပဲနဲ့” စသဖြင့် မြည် တွန် တောက်တီးရင်း ကြောင်မီးနေသည်စောင့် ၀ါရင့်ပီပီ ပုဆိုးဟောင်းလေး၊ စောင်စုတ်လေး သန့်စင်ပြီး အခန်းထောင့်မှာ အသင့်လုပ်ထားရတာပေါ့။ အရင်လို ဘယ်မှ မသွားဘဲ စားသောက်ပြီးတိုင်း ဗိုက်ကြီးတကားကားနဲ့ စိတ်ချ လက်ချ အိပ်နေပုံ များ အဖေ့အိမ် ပြန်ရောက်ပြီ။ လုံခြုံပြီဆိုတဲ့စိတ်နဲ့ တူပါရဲ့။

အရင်ကြောင်သမီးတွေ အတွေ့အကြုံအရ ကလေးတွေအများကြီးမွေးမယ်အောက်မေ့တာ သူကျမှ တကောင်တည်းဆိုတော့ ဒီတခါ နာမည်ပေးတာ ဘာမှမခက်ဘူး။ တကောင်ဖွားပဲပေါ့။
…..*-*-*…….

“ကြောင်ကလေးတကောင်ရဲ့ဘ၀မှာ နို့ဖြတ်ချိန်ဟာ သနားစရာ အကောင်းဆုံးပဲလို့ ထင်ပါတယ်”
…..*-*-*…….

သူ့ရဲ့သားဦးလည်းဖြစ်တဲ့ တကောင်ထဲသောသားကိုဘယ်လောက် ချစ်တယ်ဆိုတာ သားပြောပြဦးမယ်။ ဒီကောင်လေးကို မွေးတဲ့ညမှာပဲ လက်နှစ်လုံးလောက်ဟနေတဲ့ ကြမ်းကြားကို ပြုတ်ကျသွားသေးတယ်။ (ကွပ်ပြစ်က သမံတလင်းနဲ့ လက်တ၀ါး ပဲ မြင့်တာပါ) ကျပြီဆိုတာနဲ့ အာပြဲအောင် အော်တာပဲ။ သူ့အမေခမျာပြာယာခပ်ပြီး ယူမရ၊ ကယ်မရ အယောင်ယောင်အမှားမှားနဲ့ ကြမ်းပေါက်ကြားကို လူတွေလို လက်နဲ့ နှိုက်ကြည့်သေးတယ်။ သူတို့လက်က လူလို ကိုင်ဆုပ်ယူမရတာ သူမေ့သွားပုံပဲ။

သားကို အကူညီတောင်းတဲ့ အကြည့်နဲ့ တောင်းပန်နေပုံများ အမေရာl သားကလဲ သူ့ကလေးကို ၀ါးခြမ်းပြားကလေးနဲ့ မ နည်းကော်ပြီး ထုတ်ပေးရတယ်။ ရလဲရရော ကြောင်မက အဲဒီအနားမှာ မထားဝံ့တော့ဘူး။

ကြောင်မတွေမှာ ထူးဆန်းတဲ့အသံ အကြောင်းဆုံမှပေါ်လာတတ်တာ သားသတိထားမိတယ်။ ဒီကြောင်မဟာ အရင်က သားကို ဆိုးနွဲ့ဂျီတိုက်သံ၊ အလိုမကျရင်ရန်တွေ့သံတွေပဲ လုပ်တတ်တာ။ အခုတော့ အပြင်ခဏထွက် အခန်းဝပြန်ရောက်တာနဲ့ ကရုဏာသံလုို့ခေါ်ရမလား ညင်သာတဲ့ အသံတမျိုးနဲ့ ခေါ်တတ်တာသတိထားမိတယ်။ သူ့တသက်အရင်က တခါမှ မထွက်
ဖူးတဲ့ အသံမျိုးပဲ။ ကြောင်ပေါက်လေးကလည်း သားနဲ့ဆော့နေရင်းတန်းလန်းတောင် သူ့အမေ့ဆီက အဲဒီအသံကြားရင် သားဘယ်လိုမှ ဖြားယောင်းလို့မရ သူ့အမေ့ဆီ တန်းပြီးပြေးတာပဲ။

ကြောင်ပေါက်လေး တကောင်အတွက် မိခင်နို့ထက်သာတဲ့ သွေးဆောင်စရာ သားဖြင့် မတွေ့ဘူး အမေ။

ညဘက်တွေဆိုရင် သားက အခန်းထောင့်ကွယ်ရာနံရံမှာ စာအတိုအစတွေ ခိုးကြောင် ခိုးဝှက် ရေးနေရင်သူတို့သားအမိက သားနံဘေး ကွေးကွေးလေးတွေအိပ်နေကြ။ ခိုးကြောင်ခိုးဝှက်ဆိုတာ ကြောင်တွေရဲ့အမူအကျင့်က လာတဲ့စကားပဲလို့ အခုမှ သတိပြုမိတယ်။ဒီကြောင်မ ငယ်ငယ်က အပြစ်တခုခုလုပ်ပြီး အခန်းထဲပြန်ဝင်လာတဲ့ပုံရိပ်တွေ ပြန်မြင်ယောင်မိပါတယ်။
…..*-*-*…….

ကြောင်လေးကို နို့ဖြတ်တဲ့နေ့ ရောက်လာပြီ။

သူ့သားက ခါတိုင်းလို အမေတွေ့တာနဲ့ ခေါင်းပြေးထိုးပြီး နို့စို့ဖို့ကြံတယ်။သူ့အမေက ခွီးကနဲ မာန်ပြီးလက်နဲ့ ပုတ်ထုတ်ပစ် လိုက်တာ။ ဟာ…ကြောင်ကလေး သိပ်အံ့သြသွားတယ်။ တခါမှ သူ့တသက် မကြုံဖူးတဲ့အဖြစ်ဆိုး။ သူအမြဲစိတ်ချထားတဲ့ သူ့အမေရဲ့ စိမ်းကားမှုကို သူမယုံသလို၊ အရိပ်အခြေကြည့်ပြီးမှ အမေက ဆော့ကစားကျီစယ်သလားလို့ သူတွေးပုံရပါရဲ့။ နောက်တခါ ထပ်ပြီး အနားကပ်ဖို့ ကြိုးစားတယ်။ ဒီတခါ သူ့အမေ တုန့်ပြန်ပုံက ပိုတောင်ပြတ်သားသေးတယ်။ အသံကျယ် ကျယ်နဲ့ သုံးလေးချက်တီးထည့်လိုက်တာပေါ့။

ကြောင်ပေါက်လေး နေစရာမရှိအောင် လန့်သွားပြီ။ ပြီးတော့ သိပ်စိတ်ထိခိုက်သွားတဲ့ပုံနဲ့ အသာလေးကုပ်နေတာ သား တောင် သနားသွားလို့ ကြောင်မကို “နင်ကလဲဟာ…ကလေးစိတ်ထိခိုက်သွားပြီ” လို့ ဆူမိလိုက်သေးတယ်။

ကြောင်မကတော့ ဂရုမစိုက်ဘူး အမေ။ သူ့သားမဟုတ်သလိုလိုနဲ့  နောက်ကျောတောင် ခိုင်းထိုင်နေ လိုက်သေး။ နင်တို့က လည်း သည်းချင်တုန်းကတမျိုး၊ ဖြတ်ချင်တော့တမျိုး၊ တတ်လဲတတ်နိုင်တယ်လို့ သားဝေဖန်တာတောင် မှုပုံမရဘူး။ တနေ့ လုံး အကပ်မခံပဲနေလာတာ ကြောင်ကလေးလဲ သားကျွေးတဲ့ ထမင်းဟင်းကိုပဲ မျက်နှာလေးငယ်ငယ်နဲ့ စားပြီး ညကျတော့ အခန်းဝထွက်ထိုင် မှိုင်နေရှာတယ်။ သူ့အမေ ကြောင်မကတော့ ခပ်လှမ်းလှမ်းမှာလဲလျောင်းရင်း ပိုးကောင်တွေ ဖမ်းစားဖို့ပဲ အာရုံရောက်နေလေရဲ့။

တော်ကြာမှ ကြောင်ကလေးက မသိမသာ သူ့အမေအနားကပ်ကြည့်ဖို့ ကြိုးစားပြန်တော့ ဒေါသတကြီးမောင်းထုတ်သံပဲ ကြားလိုက်ပါတယ်။ ကြောင်ကလေးပုပြီး သားအခန်းဝပြန်ပြေးလာ၊ လုံးဝ ၀မ်းပန်းတနဲ မှိုင်နေတော့တာပဲ။ သားက ချော့ဖို့ ဆော့ဖို့ ခေါ်တောင်မလာတော့ဘူး။

ညလဲရောက်ရော ကြောင်ကလေး… စူးခနဲ အော်သံကြားတယ်။ သားခေါင်းထောင်ကြည့်တော့ အပြင်က ကြောင်ထီးကြီး တကောင်ရောက်နေပြီး ကြောင်ပေါက်လေးကို ရန်ရှာဖို့ မာန်ဖီနေတာ တွေ့လိုက်ရတာပဲ။ ဒီမှာတင် ကြောင်မကြီး လွှားကနဲ ရောက်လာပြီး ကြောင်ထီးကြီးကို တဝေါင်းဝေါင်းမြည်အောင် တိုက်လွှတ်လိုက်တာပေါ့။

ကြောင်ပေါက်လေးကတော့ ကြောက်လွန်းလို့ ရေအိုးစင်အောက်ထဲ ၀င်ပုပြီး တုန်နေပြီ။ ကြောင်ထီးကြီးလဲထွက်ပြေးရော ကြောင်မက ကြောက်လွန်းလို့ တုန်နေတဲ့သူ့သားကို “ဘာမှ မကြောက်နဲ့သား… အမေရှိတယ်” လို့ အားပါးတရ ပြောလိုက်ပါ တယ်။

ပါးစပ်နဲ့တော့ စကားဘယ်ပြောမလဲ အမေရာ။ ကြောင်ကလေးမွေးခါစက ကြောင်မကြီးက နို့တိုက်ဖို့ခေါ်သလို အသံပြုတာ ပေါ့။ ကရုဏာသံအပြည့်ပါတဲ့ စုပ်သပ်ချော့မော့သံနဲ့ သူ့သားကို အကြောက်ပြေအောင် လျှာနဲ့လျက်ပေးနေတာပေါ့။

ကြောင်ကလေးလဲ ခုမှလုံခြုံမှုရပြီး သူ့အမေရင်ခွင်ထဲခေါင်းလေးတိုးလို့။ အဲဒါပါပဲ အမေရာ…ကြောင်ကလေးနို့ဖြတ်တဲ့နေ့မှာ အမေ့ကို သတိအရဆုံးဆိုတာ သားပြောချင်တာပါပဲ။

“တကယ်တော့ မင်းကို မင်းအမေဟာ နို့သာဖြတ်တာပါကွာ၊ မေတ္တာတော့ ဘယ်တော့မှမဖြတ်ပါဘူး” လို့ သားက၀င်ပြောလိုက် ချင်တာပဲ အမေရာ။

– ‪#‎မင်းကိုနိုင်‬
[ပြည်သူ့အရေးဂျာနယ် အတွဲ၂၊ အမှတ် ၉၄ ဆောင်းပါးမှ]


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ရသဆောင်းပါးစုံ

One Response to မင်းကိုနိုင် ● နို့ဖြတ်ခံရတဲ့ ကြောင်ကလေး

  1. sky tower on August 3, 2016 at 12:15 pm

    မင်းကိုနိုင်ရေးတဲ့” နို့ဖြတ်ခံရတဲ့ ကြောင်ကလေး” ကိုဒီနေ့ဖတ်ဖြစ်တယ်။ ခိုကြောင် ခိုးဝှက် ဆိုတဲ့စကားလုံးကို ထိထိမိမိနှင့် အနက်ဖွင့်ပြတာ အရင်က လုံးဝမတွေးဖူးဘူး။ ဒီစကားလုံးကို ရှင်းပြရန် ကြိုးစားရာမှာလည်း ကြောင်တကောင် ၏ သဘောသဘာဝ/အမူအကျင့်များကို ဖော်ပြပေး တဲ့အတွက် အရေးအသား တင်ဆက်မှုဟာ အလွန်ကောင်းမွန်လှပါတယ်။ မင်းကိုနိုင် ဆိုတာ စစ်အစိုးရ ခေတ်တလျှေက် ကျောင်းသား ခေါင်းဆောင်အနေနဲ့သာ သိရှိအသိအမှတ်ပြု ခဲ့တာပါ။ စာပေ အရေးအားကောင်းမွန်ပြီး ထိမိရှမိလှတာကြောင့်ပဲထင်ပါတယ် စစ်အစိုးရက မလွှတ်ရဲတာ။
    ဒီခေါင်းစဉ်ရဲ့ အကြောင်းအရာပိုင်းနှင့်ပတ်သက်၍ “နို့ဖြတ်ခြင်း”ကို ကြောင်မကြီနှင့် သူ၏သား vs အမေစုနှင့် ပြည်သူ အဖြစ်နားလည်ရပါသည်။ အထူးသဖြင့် ခေတ်သစ် မြန်မာ့ဒီမိုကရေစီ တိုက်ပွဲ ကာလတလျှေက် ဒေါ်စုကို ဝန်းရံပြီး ဒုက္ခဆင်းရဲခံသော ကျောင်းသားများ(အထူးသဖြင့် ၈၈/ငြိမ်းပွင့် ခေါင်းဆောင်များ) ကို ၂၀၁၅အထွေထွေ ရွေးကောက်ပွဲတွင် line up မပါတာ ကို အားလုံးအသိပဲဖြစ်ပါတယ်။ ဝေဖန် ပြောဆ်ုမှုတွေ /အမေစု က သူ့ကလေးများကောင်းစားရေးကို တကယ်မလို လားလို့ပဲလား။ ဒီကျောင်းသားများဟာ အသုံးချခံသက်သက်ပဲလား။ ကိုယ်ကောင်းစား နေချိန်မှာ အောက်ခြေ လွတ်နေတာလား? ဤသို့သော” လား”ပေါင်းများစွာ သော မေးခွန်းကို ကြောင်မကြီးတကောင် ကို ပမာပြု၍ ရှင်းပြလိုဟန်ဖြစ်ကြောင်းတွေ့ရသည်။ “သူ”့သားက ခါတိုင်းလို အမေတွေ့တာနဲ့ ခေါင်းပြေးထိုးပြီး နို့စို့ဖို့ကြံတယ်။သူ့အမေက ခွီးကနဲ မာန်ပြီးလက်နဲ့ ပုတ်ထုတ်ပစ် လိုက်တာ။ ဟာ…ကြောင်ကလေး သိပ်အံ့သြသွားတယ်။ တခါမှ သူ့တသက် မကြုံဖူးတဲ့အဖြစ်ဆိုး။ သူအမြဲစိတ်ချထားတဲ့ သူ့အမေရဲ့ စိမ်းကားမှုကို သူမယုံသလို၊ အရိပ်အခြေကြည့်ပြီးမှ အမေက ဆော့ကစားကျီစယ်သလားလို့ သူတွေးပုံရပါရဲ့။ နောက်တခါ ထပ်ပြီး အနားကပ်ဖို့ ကြိုးစားတယ်။ ဒီတခါ သူ့အမေ တုန့်ပြန်ပုံက ပိုတောင်ပြတ်သားသေးတယ်။ အသံကျယ် ကျယ်နဲ့ သုံးလေးချက်တီးထည့်လိုက်တာပေါ့။”
    “ကြောင်မကတော့ ဂရုမစိုက်ဘူး အမေ။ သူ့သားမဟုတ်သလိုလိုနဲ့ နောက်ကျောတောင် ခိုင်းထိုင်နေ လိုက်သေး။ နင်တို့က လည်း သည်းချင်တုန်းကတမျိုး၊ ဖြတ်ချင်တော့တမျိုး၊ တတ်လဲတတ်နိုင်တယ်လို့ သားဝေဖန်တာတောင် မှုပုံမရဘူး။ တနေ့ လုံး အကပ်မခံပဲနေလာတာ ကြောင်ကလေးလဲ သားကျွေးတဲ့ ထမင်းဟင်းကိုပဲ မျက်နှာလေးငယ်ငယ်နဲ့ စားပြီး ညကျတော့ အခန်းဝထွက်ထိုင် မှိုင်နေရှာတယ်။ သူ့အမေ ကြောင်မကတော့ ခပ်လှမ်းလှမ်းမှာလဲလျောင်းရင်း ပိုးကောင်တွေ ဖမ်းစားဖို့ပဲ အာရုံရောက်နေလေရဲ့။

    တော်ကြာမှ ကြောင်ကလေးက မသိမသာ သူ့အမေအနားကပ်ကြည့်ဖို့ ကြိုးစားပြန်တော့ ဒေါသတကြီးမောင်းထုတ်သံပဲ ကြားလိုက်ပါတယ်။ ကြောင်ကလေးပုပြီး သားအခန်းဝပြန်ပြေးလာ၊ လုံးဝ ၀မ်းပန်းတနဲ မှိုင်နေတော့တာပဲ။ သားက ချော့ဖို့ ဆော့ဖို့ ခေါ်တောင်မလာတော့ဘူး။”
    ဒါပေမဲ့ အခုလို နို့ ချိုဖြတ်တောက် လိုက်တာ ဟာ ကြောင်မကြီက သူ့သားကို ရင်ကျက်စေလိုရင်းထြစ်သည်။ မိခင်ကိုယ်တိုင် နို့ဖြတ်ခြင်းကြောင့် မည်မျှခာံးရသည်ကိုလည်းဖြန်ကျက်တွေးတောမိပါသည်။ ထိုထက်မက အသင့်ရှိနေသော နို့ချိုကို သာ မှီခို ရန်မဟုတ်ပဲ ကိုယ်တိုင် အစာရှာပြီး ပရိရယ် ကြွယ်သောလောကကြီးအကြောင်း ကို ပိုမို သိရှိ ရင်ဆိုင်ကျော်လွှားတတ်အောင် training ပေးခြင်း ဖြစ်တယ်လို့နားလည်ရပါသည်။
    နောက်တုံးတွင် ကြောင်ပေါက်စလေး တကယ် အရေးရယ် အကြောင်းရယ်လို့ပေါ်လာလို့ရှိရင် မိခင်ကြီသည် အသက်ကို စွန့်ပြီး မားမားမတ်မတ် ရပ်တည်ကာ သားငယ်ကို ကာကွယ်လေ့ရှိကြောင်း မှတ်သားမိပါတယ်။

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ဒေါ်ခင်မျိူးချစ်၏ သတင်းစာလောက ထွက်ပါပြီ

By

ဒေါ်ခင်မျိူးချစ်၏ သတင်းစာလောက ထွက်ပါပြီ (မိုးမခ) သြဂုတ် ၂၄၊ ၂၀၁၈ စာရေးဆရာမကြီး ဒေါ်ခင်မျိူးချစ်...

Read more »

ဂီတအနုပညာရှင်ကြီး မာမာအေး စိန်ရတုမွေးနေ့ အမှတ်တရ မိုးမခစာအုပ်ထုတ်

By

ဂီတအနုပညာရှင်ကြီး မာမာအေး စိန်ရတုမွေးနေ့ အမှတ်တရ မိုးမခစာအုပ်ထုတ် (မိုးမခစာအုပ်စင်) သြဂုတ် ၁၇၊ ၂၀၁၈...

Read more »

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ

By

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ (မိုးမခ)...

Read more »

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်