ငြိမ်းချမ်းအေး ● ‘ပင်လုံ’ ကို ‘ပလုံ’ မဖြစ်စေဖို့ရာ

August 31, 2016

ငြိမ်းချမ်းအေး ● ‘ပင်လုံ’ ကို ‘ပလုံ’ မဖြစ်စေဖို့ရာ
(The Ladies News / မိုးမခ) သြဂတ်စ် ၃၁၊ ၂၀၁၆

အမျိုးသားဒီမိုကရေစီ အဖွဲ့ချုပ် (NLD) ဦးဆောင်တဲ့ လက်ရှိ အစိုးရသစ် ဖြေရှင်းရမယ့် အဓိက ပြဿနာကြီးတစ်ခုဟာ တိုင်းရင်းသား လူနည်းစုများနဲ့ အမျိုးသားပြန်လည်သင့်မြတ်ရေးပဲ  ဖြစ်ဆိုတာ ရှင်းလင်းတဲ့ အချက် ဖြစ်ပါတယ်။  ဒီအတွက် အခု ကျင်းပမယ့် ၂၁ ရာစု ပင်လုံကနေ ငြိမ်းချမ်းခရီးသစ် ခရီးရှည် အတွက် ခြေလှမ်းတွေ စတင်မယ်ဆိုတာလည်း မြင်နိုင်ပါတယ်။  တည်ဆဲ ၂၀၀၈ နာဂစ် စစ်ဖွဲ့စည်းပုံအောက်မှာ အစိုးရသစ်ဟာ သီးခြားလွတ်လပ်အာဏာတည်ရှိခွင့်ရနေမြဲဖြစ်တဲ့ တပ်မတော် အပေါ် သြဇာညောင်းမှု အားနည်းနေသေးဒါလည်း အမှန်ပါပဲ။  လူမျိုးစုတော်လှန်ရေး လက်နက်ကိုင် တပ်တွေပါဝင်တဲ့ ပြည်ထောင်စုငြိမ်းချမ်းရေး ညီလာခံ ပူတွဲကော်မတီ အစည်းအဝေးစတင်ကျင်းပရာမှာကို ကိုယ်စားပြု တက်ရောက်သူ ကိုယ်စားလှယ်များရဲ့ နာမည်တွေမှာ ရာထူးတွေ မဖော်ပြမှုနဲ့အတူ ၂၁ ရာစု ပင်လုံဟာ ဝေဖန်မှုများနဲ့ စတင်ခဲ့ရတာက သက်သေပါပဲ။  တန်းတူညီမျှမှု၊ သဘောထားတွေ ဖြောင့်မတ်မှုနဲ့ အပြည်အလှန် လေးစားမှုက နှစ်ဘက် တင်းမာနေမှုကို ဖြေလျှော့မယ့် ငြိမ်းချမ်းရေးဆွေးနွေးပွဲတွေမှာ အသက်တမျှ အရေးကြီးပါတယ်။

ကာတွန်း ဆလိုင်းစွမ်းပီ – ၂၁ ရာစု ပင်လုံဆိုင်

ဒီနေရာမှာ လွတ်လပ်ပြီး တိုင်းပြည်ရဲ့ ခေတ်သစ်သမိုင်းမှာ အချိန်အများစု ကြီးစိုးနေတဲ့ တပ်မတော်နဲ့ စစ်ဗိုလ်ချုပ်များ ဦးဆောင်ကြီးစိုးတဲ့ တော်လှန်ရေးကောင်စီ၊ မဆလ၊ နဝတ၊ နအဖကနေ ပြီးခဲ့တဲ့ ဒီမိုကရေစီအမည်ခံ ဗိုလ်ဦးသိန်းစိန် စစ်တစ်ပိုင်းအစိုးရခေတ်အထိ နာမည်အမျိုးမျိုးခံ အစိုးရများရဲ့ စနစ်အမှား၊ မူအမှား၊ လုပ်ရပ်အမှားများကို အခြေခံကျကျ နားလည် သုံးသပ် သမိုင်းသင်ခန်းစာ ယူနိုင်ဖို့ လိုပါတယ်။  ဒါမှသာ ပြည်ထောင်စုအရေးအတွက်  ဘယ်လိုသဘော၊ အလုပ်ဖော်ဆောင်မှုတွေ ရှောင်ကြဉ်ရမလဲ ဆိုတာ သိနိုင်ပါမယ်။

၁၉၆၂ ခုနှစ် ပြည်ထောင်စုပြိုကွဲမှာစိုးလို့ ဆိုတဲ့ အကြောင်းပြချက်နဲ့ တိုင်းပြည်အာဏာကို အဓမ္မတက်ယူခဲ့ချိန်ကစလို့  စစ်ဗိုလ်ချုပ်ကြီးများရဲ့ အစိုးရအဆက်ဆက်ရဲ့ မပြောင်းလဲတဲ့ လက္ခဏာ ၃ ရပ် ရှိခဲ့ပါတယ်။  ဒါတွေကတော့

၁) ပြည်တွင်းစစ်အပေါ်ရှုမြင်ပုံ
၂) ပြည်ထောင်စုကို ပုံဖော်ပုံနဲ့
၃) တိုင်းရင်းသားအရေးကို ကိုင်တွယ်ပုံပါ။  ဒီ လက္ခဏာ ၃ ရပ်ကို အခြေခံကျကျ ပြင်နိုင်မှသာ  ငြိမ်းချမ်းရေးဆွေးနွေးပွဲတွေဟာ ရလဒ်ကောင်းတွေ မြင်ရမှာ ဖြစ်ပါတယ်။

စစ်ဗိုလ်ချုပ်များ ဟာ လွတ်လပ်ပြီးခေတ်ကတည်းက ပြည်တွင်းစစ်ကို အာဏာနဲ့ စစ်တပ်ကြီးထွားမှု အလို့ငှာ အသုံးချခဲ့ကြပါတယ်။  ဒီလို အသုံးချရာမှာ လူထုကို ဝါဒဖြန့်ဖို့ရာအတွက်တော့ တိုင်းရင်းသားစည်းလုံးညီညွတ်ရေး မပြိုကွဲရေး၊ အချုပ်အခြာ အာဏာ တည်တံ့ခိုင်မြဲရေး ဆိုတဲ့ အကြောင်းကြီးတွေကို ရှေ့ကာ အဖြစ် ဆွဲကိုင် ထားပါတယ်။  ပြည်တွင်းစစ်ဟာ လိုအပ်ချက်၊ ပြည်ထောင်စု အတွက် ကာကွယ်ရမယ် ဆိုတဲ့ ရှုမြင်ပုံပါပဲ။  ဒီသဘောကို ဦးစွာ ပြင်နိုင်ရပါမယ်။

အပြင်သင့်ဆုံးတော့ လူနည်းစုတိုင်းရင်းသားဒေသတွေကို မိမိလက်အောက်ခံကိုလိုနီအသွင် သယံဇာတရှာ ကုန်ကြမ်းယူရုံ၊ ကုန်ချောရောင်းချရုံ သက်သက်ထက်မပိုလှတဲ့ တစ်ဖက်စောင်းနင်း နိုင့်ထက်စီးနင်း ဆက်ဆံရေးကိုပါပဲ။  ရေအားလျှပ်စစ်ယူ၊ ကျောက်စိမ်းယူ၊ ကျွန်းသစ်ယူ၊ အခြား တွင်းထွက်မျိုးစုံးယူရုံသက်သက် အသုံးချခြင်းပါ။  ဒါဟာ အင်္ဂလိပ်အရင်းရှင်နယ်ချဲ့ရဲ့ ကိုလိုနီစနစ်ဆိုးကို တိုက်ရိုက်ဆက်ခံခြင်းလို့လည်း ဆိုနိုင်ပါတယ်။

နောက်တစ်ချက်ကတော့ လူမျိုး၊ ဘာသာစုံ ပြည်ထောင်စုကြီးကို တစ်မျိုး တစ်ဘာသာ ပုံစံ တစ်ပြည်ထောင် စနစ် ဇွတ် အတင်း ပုံဖော်ခြင်းပါပဲ။  ပြည်ထောင်စုမှာ မြန်မာ- ဗုဒ္ဓ ဝင်တွေချည်းနေဟန် ပုံဖော်တဲ့ လူမျိုးကြီးဝါဒအခြေခံ လူမျိုးတစ်မျိုးရဲ့ တိုင်းပြည် တစ်ပြည်ထောင်စနစ် ကျုံးသွင်းမှုကိုလည်း ပြင်နိုင်ရပါမယ်။  ဒါဟာ တပ်မတော်ရဲ့ ကနဦး ဆရာ အရင်းဖြစ်ခဲ့တဲ့ အစွန်းရောက် အမျိုးသားရေးဝါဒ ဖက်ဆစ်စနစ်ရဲ့ အမွေဆိုးကို အမွေခံပြီး လက်ဆင့်ကမ်းခြင်းလို့လည်း ဆိုနိုင်ပါတယ်။

ဒါကြောင့် ခြုံသုံးသပ်ရင် ပြီးခဲ့တဲ့ ရာစုဝက်ရဲ့အစိုးရစနစ်မှာ တိုင်းရင်းသား လူနည်းစုအရေး ကိုင်တွယ်ပုံဟာ အရင်းရှင်နယ်ချဲ့အင်္ဂလိပ်နဲ့ ဖက်ဆစ်ဂျပန် စနစ် နှစ်ခုပေါင်းဆိုးမွေခံခြင်းလို့ ဆိုနိုင်ပါတယ်။

ဘယ်လိုဆက်ခံခဲ့သလဲ၊ ဘယ်လို ပြင်ရပါမလဲ။

ကယားပြည်နယ် ဇွတ်လုပ် နာမည်သစ်ထွင်ယူထားလို့ ကရင်နီပြည်နယ် အဖြစ် ပြန်ပြောင်းလဲဖို့ ဒေသခံလူမျိုးများ အခု တောင်းဆိုနေကြသလို နာမည်ကိစ္စက အစပါ။  နာမည်ပြဿနာ ဟာ နိုင်ငံနဲ့ လူမျိုးနာမည် မြန်မာလား၊ ဗမာလားကနေ ခေတ်အဆက်အဆက် လူနည်းစုဒေသတွေမှာ မြန်မာမှုပြု၊ မြန်မာသံစစ်စစ်လုပ်ထားတဲ့ မြို့ရွာနာမည်များအရေး အထိ ပါပါတယ်။  ဒီလို လူနည်းစု ဒေသတွေမှာ ဒေသခံအသံထွက်များကို ဖျောက် မြို့ရွာနာမည်များပြောင်းခြင်းလိုမျိုးနဲ့ လူအများစုကိုးကွယ်တဲ့ ဘာသာရေး သာသနိက အဆောက်အအုံတွေ ဇွတ်အတင်းဆောက်ခြင်းလိုမျိုးတွေဟာ အရာရာ မြန်မာဖြစ်လုပ်ချင်တဲ့ Myanmarnization မူဝါဒပါ။  ဒါဟာ အင်္ဂလိပ်တွေ ကိုလိုနီခေတ်ကောင်းစဉ်က ကမ္ဘာပတ်ပြီး လူဖြူ အရှင်သခင်ကြီးများ အဖြစ် ခရစ်ယာန်သာသနာပြု လိုက်၊ အင်္ဂလိပ်ဇာတ်သွင်းလိုက်လုပ်ခဲ့တဲ့ Englishnization လုပ်ချင်ခဲ့မှုနဲ့ အတူတူပါပဲ။

ဒီလို ဘာသာဗေဒ၊ ယဉ်ကျေးမှု သဘော ကိုလိုနီ ကျွန်ပြုခြင်း သဘောအပြင် လွတ်လပ်ပြီးခေတ် စစ်အစိုးရ အဆက်ဆက်ဟာ (အခုအချိန်အထိ) အင်္ဂလိပ်ကိုလိုနီခေတ်အတိုင်း လူနည်းစု လူမျိုးစုတွေကို ပုံစံ တစ်မျိုး ခွဲခြားပြီးလည်း ဆက်ဆံပါတယ်။  လူမျိုးစု တွေ အချင်းချင်း အမြင် မကြည်လင်အောင်၊ မတည့်အောင် သွေးခွဲပါတယ်၊ ကရင်လူမျိုး တစ်မျိုးတည်းတောင် နှစ်ဖွဲ့ကွဲအောင် ဘာသာရေးနဲ့ သပ်လျှိုပြီးမှ အနိုင်ယူခဲ့ပါတယ်။  နိုင်ငံရေးအရ စစ်မှန်တဲ့ သဘောထားနဲ့ ဖြေရှင်းရင် ချက်ချင်း ရပ်နိုင်တဲ့ ပြည်တွင်းစစ်ကို မျှဉ်းမျှဉ်းဆွဲ ထားပြီး လူများစု မြန်မာတွေကို “တွေ့လား.. လူနည်းစု သောင်းကျန်းသူ သူပုန်တွေ အများကြီး၊ ငါတို့ ရှိမှ ဖြစ်မယ်၊ တပ်မတော် အင်အားရှိမှ တိုင်းပြည် အင်အား ရှိမယ်” ပုံဖော် အုပ်ချုပ်ခဲ့ပါတယ်။  ဒီသဘောဟာ အင်္ဂလိပ် ကိုလိုနီ အမွေ ဆိုး Divide and Rule အတိုင်းပါပဲ။

ငါတို့က လူများတယ်၊ လုပ်ချင်ရာ လုပ်မယ် ဆိုတဲ့ စိတ်ဓာတ်အခြေခံက အခုအထိ မပျောက်သေးကြောင်းကိုလည်း  ပြည်နယ်မှာ မနောတိုင် ဖျက်၊ ကရင်ပြည်နယ်မှာ ခရစ်ယာန်ဘုရားကျောင်းထဲ ဗုဒ္ဓဘာသာဘုရား၊ ကျောင်းလာဆောက်ခြင်း ဖြစ်စဉ်များက သက်သေပြနေပါတယ်။

တကယ်တမ်းက တိုင်းပြည်မှာ “မြန်မာ (ဗမာ)” လူမျိုး မဟုတ်သူ အရေအတွက်ဟာ အရှေ့တောင်အာရှ နိုင်ငံတချို့ရဲ့ လူဦးရေ ထက် ပိုပါတယ်။  သူတို့ အားလုံးမှာ မတူညီတဲ့ ဘာသာစကား၊ အသံထွက်၊ စာပေ၊ ဓလေ့၊ ထုံးစံ၊ ယဉ်ကျေးမှု၊ ကိုးကွယ်ယုံကြည်မှု အသီးသီး ရှိကြတယ်။  ဒီလို တိုင်းပြည် နောက်ခံအနေအထားမှာ တမျိုး၊ တဘာသာ ချီးမြှောက် Ethnocentric တရားလွန်ဖြစ်၊ “မဟာမြန်မာ” စိတ်နေ သဘောထား၊ ခေတ်နောက်ပြန်ဆွဲ ပဒေသရာဇ်ခေတ် မင်းစိတ်ပေါက်ရုံမက ဆိုခဲ့သလို ကိုလိုနီနယ်ချဲ့နဲ့ အစွန်းရောက်အမျိုးသားရေးဝါဒ ဖက်ဆစ်အမွေကိုပါခံတဲ့ စစ်အာဏာရှင်တွေရဲ့ အပြုအမူစနစ်ကြောင့် လူမျိုးစု ပြဿနာ၊ ပဋိပက္ခတွေ ရာစုဝက်ကျော်ကြာနေရခြင်း ဖြစ်ပါတယ်။

ဒါကို ၂၁ ရာစု ပင်လုံကနေ အခြေခံကျကျ အမှန်မြင်၊ ပြင်နိုင်ရပါမယ်။

လူမျိုးစု ပြဿနာများကို စစ်အစိုးရများ အဆက်ဆက်ဟာ နှစ်ပေါင်း ၆၀ ကျော် က “အင်္ဂလိပ်ကိုလိုနီ အမွေဆိုး” လို့လည်း လူထူထူရှိရင် “ငပြူးက ပြဲ” ထမင်းရည်ပူ လျှာလွှဲလည်း အမြဲ လုပ်လေ့ရှိခဲ့ပါတယ်။  သူတို့ရဲ့ မမှန်ကန်တဲ့ သဘောထား၊ တစ်ဖက်စောင်းနင်း ဖြစ်နေတဲ့ အပြုအမူ၊ လူမျိုးကြီးဝါဒ ပုံဖော်ထားတဲ့ စနစ် ကိုတော့ ပြင်ဖို့  ဘယ်တုန်းကမှ မကြံစည်ခဲ့ပါဘူး။  အနည်းဆုံးအဆင့် တိုင်းပြည်ရဲ့ ပုံရိပ်မြှင့်ဖို့၊ ခရီးသွားလုပ်ငန်း တိုးတက်ဖို့ ဝါဒဖြန့်ချိတဲ့ ရုပ်သံတွေကိုပဲ ကြည့်ပါ။  အပေါ်ယံသဘော သိပ်ဆန်ပါတယ်။  ထိုင်းနိုင်ငံမှာလည်း “Tourist Trap” ခရီးသွားလုပ်ငန်း ထောင်ခြောက် စားကျက်အဖြစ် လုပ်စားခံနေရရှာတဲ့ ကယန်း (ပဒေါင်) လိုမျိုး ထူးခြားတဲ့ အသွင်အပြင် ယဉ်ကျေးမှု ရှိသူများကို ကြော်ငြာအဖြစ် ဓာတ်ပုံ၊ ဗီဒီယို ထည့်ရိုက်ကောင်း ရိုက်မယ်၊ ကရင် ဒုံးယိမ်း၊ ကချင်မနောပွဲ အကအလှတွေ ပါကောင်းပါမယ်။  ဒါပေမယ့် အများစုကတော့ ဘုရားကျောင်းကန်၊ စေတီပုထိုးနဲ့ မြန်မာများရဲ့ လက်နက်အင်ပါယာနိုင်ငံတော် ပုဂံ အခြေပြု ပုံဖော်မှုသာ ဖြစ်တာ များပါတယ်။  ပိုမို အရေးကြီးတဲ့ ပညာရေးစနစ်၊ သမိုင်းပုံဖော်မှုလိုမျိုးမှာတော့ ပိုသာဆိုးပါတယ်။  တစ်မျိုး တစ်ဘာသာ အသားပေးမှု သမိုင်းလိမ်၊ သမိုင်းဝှက်တွေဟာ တင်းကျမ်းဖြစ်နေပါတယ်။

ဒီလို အခြေခံ အတွေးအခေါ်၊ စနစ်ပုံဖော်မှု အလုပ်တွေမှာအထိပါ ပြင်နိုင်မှ တိုင်းရင်းသာအရေး အေးမှာဖြစ်ပါတယ်။ စစ်မှန်၊ မှန်ကန်၊ မျှတတဲ့ သဘောထား၊ ယုံကြည်မှုများနဲ့ အခြေမတည်ရင် စစ်အစိုးရအဆက်ဆက် ပါမစ်ငြိမ်းချမ်းရေး၊ သေနတ်ထောက်ငြိမ်းချမ်းရေးတွေလိုပဲ “စလယ်ဝင် ဖင်မမည်းခင်” ဇာတ်လမ်းခင်းနေဦးမှာသာ ဖြစ်ပါတယ်။  အနှစ်မပါတဲ့ စကားအလှ ဟိုတယ်ခန်းဆွေးနွေးပွဲတွေ အောင်မြင်ပြရုံနဲ့ အမှန်တကယ် ခွင့်တူညီမျှ ပြည်ထောင်စုစစ်စစ် စိတ်ဓာတ် တည်ဆောက်လို့ မရပါဘူး။  လူမျိုးစုပြဿနာများကို အင်္ဂလိပ်သွေးထိုးခဲ့မှု၊ ကိုလိုနီခေတ်ဟောင်းစနက် အပြစ်ပုံချချင်တဲ့ စိတ်အရင်းခံလောက်နဲ့လည်း မရပါဘူး။

တကယ်တော့ ဒီလိုစနစ်ဆိုးတွေ ပုံဖော်ခဲ့လို့ လူအများစု မြန်မာများကောင်းစားသလား ဆိုရင်လည်း မဟုတ်ပါဘူး။  သူတို့လည်း တုံးအောက်က ဖားချည်းမို့ လူမွေးလူရောင် မပြောင်ခဲ့ပါဘူး။  နိုင်ငံသား လူမျိုး၊ ဘာသာစုံဟာ လူမှုရေး၊ ပညာရေး၊ စီးပွားရေး၊ ကျန်းမာရေး၊ ဘာသာရေး ကဏ္ဍစုံ လူစဉ်မမီ ခြင်းအကျိုးဆက်အဖြစ် ကိုယ့်စားရိတ်နဲ့ကိုယ် သူများတိုင်းပြည်တွေကို သွားခိုလှုံ၊ အလုပ်လုပ် လိုလိုချင်ချင် ကမ္ဘာလှည့်ကျွန်ခံနေရပါတယ်။  လူဦးရေ အဆမတန်နည်းလာတဲ့ ပြည်နယ်၊ ချင်းပြည်နယ်တွေက သက်သေပါပဲ။  မြန်မာအများစု ရှိရာ အညာဒေသမှာလည်း လုပ်အားရှားပါးမှု ပြဿနာ ဖြစ်နေတာ ကြာခဲ့ပါပြီ။

ဒီလို လူသားအရင်းအမြစ်တင် ဆုံးရှုံး ခေတ်သစ်ကျွန်ဇာတ်လမ်းခင်းနေရတင် မကသေးပါ။  အားလုံးသိတဲ့အတိုင်း ပြည်မအစိုးရ ဗိုလ်ချုပ်ကြီးများကို ပိုက်ဆံပုံပေး၊ လက်နက်ထောက်ပံ့နိုင်တဲ့ ဒေသတွင်းနဲ့ အနောက်နိုင်ငံကြီးတွေက ကုမ္ပဏီကြီးများကိုလည်း ကိုယ့်ဆီရှိတဲ့ သဘာဝ အရင်းအမြစ် ရေနံ၊ သဘာဝ ဓာတ်ငွေ့များကိုလည်း တင်ပို့ ဆက်သနေရပါသေးတယ်။  ပြည်မအစိုးရနဲ့ ဒေသခံ တော်လှန်ရေးသမားများကြား ပဋိပက္ခနဲ့ စနစ်ဆိုးမှာ လသာနေတုန်း ဗိုင်းငင်သလို တူးဆွ ယူငင်ခံနေရတဲ့ ဖားကန့်ဖြစ်စဉ်ကိုပဲကြည့်ပါ။  သဘာဝဓာတ်ငွေ့ကမ်းလွန်သိုက်တွေ ကျောကပ်ရပ်တည်ရှိပေမယ့် ဓာတ်ငွေ့ပိုက်လိုင်းကြီးတွေ ပြည်နယ်ဗဟိုအသည်းနှလုံးကိုခွဲ ဖြတ်ဖောက် ရောင်းစားခြင်းခံရပြီး ကိုယ့်ဆီတော့ မီးမလာ၊ မီရတဲ့ ဒေသကျလည်း မီတာခ ဈေးကြီးပေးနေရတဲ့ ရခိုင်ပြည်နယ်ကို မြင်ကြည့်ပါ။  သယံဇာတ သစ်တော သဘာဝအလှစုံလင်လှပေမယ့် ဝေးလံခေါင်သီ လမ်းပန်းဆက်သွယ်ရေးခက်ခဲ၊ ဆင်းရဲတွင်းနက်၊ ဖွံ့ဖြိုးတိုးတက်မှု နောက်အကျဆုံး ဖြစ်နေတဲ့ ချင်းပြည်နယ်နဲ့ ချင်းလူထုကို ကြည့်ပါ။

ဒါကြောင့် ၂၀၁၆ ခုနှစ် အမျိုးသားဒီမိုကရေစီအဖွဲ့ချုပ် ပါတီ အစိုးရအသစ် ဦးဆောင်ပြီ ၂၁ ပင်လုံ ကနေ တဆင့် တိုင်းရင်းသားအရေး ဖြေရှင်းနိုင်မလား မေးခွန်းအတွက် ဆောင်းပါးမှာ ဆိုခဲ့တဲ့ အစိုးရစနစ်ယန္တရား မူဝါဒမှာ အရိုးစွဲ စိမ့်ဝင် အမြစ်တွဲ နေပြီ ဖြစ်တဲ့ လူနည်းစုရေးရာကို ကိုလိုနီစနစ်နဲ့ ဖက်ဆစ်စနစ် အမွေခံ စဉ်းစား၊ ကျင့်သုံး မူဝါဒတွေ ဖော်ဆောင်နေခြင်းကို အလုံးစုံရပ်တန့်နိုင်ရင်တော့ မျှော်လင့်စရာ ရှိမယ် ဆိုနိုင်ပါတယ်။  လူနည်းစုများဘက်ကလည်း အတိတ်သမိုင်းဆိုးရလဒ် မြန်မာ (ဗမာ) လူမျိုးအပေါ် မယုံကြည်မှု၊ အမုန်း၊ အာဃာတတွေ ဖျောက်နိုင်ရပါမယ်။  ဒါမှသာ တိုင်းပြည်မှီတင်းနေထိုင်နေသူ လူမျိုး၊ ဘာသာ အားလုံး ညီညွတ်မျှတ ခရီးလမ်းပန်းတိုင်တူ လျှောက်လှမ်းနိုင်ပါမယ်။

နိဂုံးချုပ်ရရင် အမှန်တကယ် မတူကွဲပြားမှုတွေကို အင်အားအဖြစ်စုစည်း သာတူညီမျှ ပြည်ထောင်စု စစ်စစ် တည်ဆောက်လိုတယ် ဆိုရင်ဖြင့် တစ်မျိုး၊ တစ်ဘာသာ ဗဟိုပြု ဖက်ဆစ်စရိုက်အကျင့်တွေကို အလုံးစုံ စွန့်ခွာရမှာ ဖြစ်သလို ရာစုဝက်ကျော်ကြာ လိုလိုလားလား အင်တိုက်အားတိုက် အမွေခံလာခဲ့တဲ့ သယံဇာတယူရုံ ဗိုလ်ကျ ခြယ်လှယ် ကိုယ်ကျိုးရှာရုံ သက်သက် ကျွန်ပြုလိုတဲ့ နယ်ချဲ့ကိုလိုနီစိတ်ဓာတ်အကျင့်အလုပ်၊ ပြဋ္ဌာန်းချက်တွေကို  စနစ်မှာ၊ အခြေခံဥပဒေမှာ အထိပါ အခြေခံကျကျ ဖျောက်ဖို့ လိုပါတယ်။  ဒါမှသာ ‘ပင်လုံ’ ဟာ သိက္ခာရှိရှိ ‘ပင်လုံ’  အဖြစ် အောင်မြင်နိုင်ပြီး ‘ပလုံ’ မဖြစ်မှာ ဖြစ်ကြောင်းပါ။

ငြိမ်းချမ်းအေး
(ဆောင်းပါးပါ အာဘော်ကို ဝေဖန်ရန် nyeinchanaye81@gmail.com )

The Ladies News ဂျာနယ်တွင် မူလ ဖော်ပြခဲ့သည်။
http://theladiesnewsjournal.com/articles/tue-2016-08-30-1333/3161


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa Old Archives

Related posts

Tags: , , ,

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:သူတို့အာဘော်, ငြိမ်းချမ်းအေး

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ

By

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ (မိုးမခ)...

Read more »

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်