ကျော်ထင် ● စာအုပ်ဆိုင်ခန်း၊ အလွမ်းပုံပြင်

October 3, 2017

● စာအုပ်ဆိုင်ခန်း၊ အလွမ်းပုံပြင်
(မိုးမခ) အောက်တိုဘာ ၃၊ ၂ဝ၁၇

(၁)
ဒီနှစ်သီတင်းကျွတ်ကျောင်းပိတ်ရက်တွေမှာ စာအုပ်တွေကို ကက်တလောက် လုပ်ထားမှဖြစ်တော့မယ်လို့ တွေးမိတယ်။  ဒီ အတွေးကလည်း ကြာပါပြီ။  နှစ်တိုင်းပဲ ပေါ်ပေါ်လာတာ။  ဒါပေမယ့် အကောင်အထည်မဖော်ဖြစ်ဘူး။  တကယ့်တကယ် ကျောင်းပိတ်တော့လည်း လူက နားချင်သေးတယ်။  မိသားစု ဆုံတုန်းလေးကို နားနားနေနေနဲ့ နေချင်တာ။

ကျောင်းဖွင့်ရက်တွေဆိုရင် မနက် ၅ နာရီခွဲကတည်းက အိမ်က ထွက်ရတာ။  ကျနော်ထွက်သွားတော့ သားနဲ့မိန်းမက အိပ်ရာ ထဲမှာပဲ ရှိသေးတယ်။  မထကြသေးဘူး။  တခါတလေကျတော့ မိန်းမက နိုးနေပါပြီ။  အိမ်မှုကိစ္စ၊ သူ့ဝေယာဝစ္စတွေကို လုပ်နေ ပါပြီ။  ကျနော်ကတော့ မနက် ၆ နာရီထဲကနေ နားချိန် မရှိ စာတွေသင်တာ၊ နေ့ လယ် ၁၂ နာရီထိပဲ။  နေ့လယ်စာထမင်းစားဖို့ ပြန်လာတာက မွန်းတည့်ချိန်။  ထမင်းစားပြန်ချိန်မှာ အိမ်မှာ အမေကလွဲရင် ဘယ်သူမှမရှိတော့ဘူး။  သားက ကျောင်းတက်။  မိန်းမက ကျောင်းတက်တဲ့သားကို ထမင်းသွားကျွေး။  အမေကလည်း အပေါ်ထပ်မှာ သူ့တရားနဲ့သူ။  ဒီတော့လည်း ကျနော် တယောက်တည်းပဲ အိမ်မှာရှိတယ်လို့ဆိုရမယ်။  ကိုယ့်ဘာသာပဲ ထမင်းခူးတယ်။  စားတယ်။  ပြီးတော့ မိနစ်နှစ်ဆယ်လောက် ခဏမှိန်းတယ်။

မမှိန်းလို့လည်း မရဘူးလေ။  မှိန်းမသွားရင် စာသင်ရတာ စိတ်မပါဘူး။  ကျောင်းသားတွေ အိပ်ငိုက်တာကို မပြောနဲ့၊ ကိုယ် တိုင်ကိုယ်က အိပ်ချင်နေတာ။  ဒီတော့လည်း မဖြစ်ဖြစ်တဲ့နည်းနဲ့ ခဏမှိန်းရတော့တာပဲ။  ၁ နာရီထိုးခါနီးတော့ ထ။  ရေချိုး။  ကျောင်းပြန်သွားရတယ်။  အဲ့ဒီလို ကျနော်ပြန်ထွက်တော့  မိန်းမက ထမင်းကျွေးပြီးလို့ ပြန်လာပြီ။  အဝင်အထွက်ပဲ။

ည ၇ နာရီ အတန်းချိန်ပြီးရင် ညစာပြန်စားရတယ်။  စားတော့လည်း မြန်မြန်စား၊မြန်မြန် ပြန်ထွက်ပါပဲ။  ည ၁၁ နာရီထိ ကျောင်းတကျောင်းမှာ စာကျက်တာကို ကြီးကြပ်ပေးရတယ်။  ကိုယ့်လောဘနဲ့ကိုယ်လို့ပဲ အပြစ်တင်ရမှာပါပဲ။  အိမ်ရောက် တော့ ၁၁ နာရီခွဲနေပြီ။  သားနဲ့မိန်းမက အိပ်နေပြီ။  တခါတလေကျမှသာ သူတို့နှစ်ယောက်ကို မအိပ်သေးဘဲ တွေ့ ရတာ။

အဲ့ဒီလိုတွေ ဖြတ်သန်းရတာဆိုတော့ ကျောင်းပိတ်ရက်ဆို အိမ်မှာပဲ စာလေးဖတ်၊ စာလေးရေးပြီး သား၊ မယားနဲ့အတူ တမိုး ထဲအောက်မှာ တသားတည်းနေချင်တာ။  အေးအေးလူလူပေါ့။  အလုပ်တွေ မရှုပ်ချင်ဘူး။  စိတ်တွေ မရှုပ်ချင်ဘူး။  ဒါပေမယ့် ဒီနှစ်တော့ မလုပ်လို့၊ မရှုပ်လို့ မရတော့ဘူး။  စာအုပ်တွေက များလာပြီ။  ဒီတော့ တခါတခါ ကိုးကားချင်လို့ရှာရင်ပဲဖြစ်ဖြစ်၊ ဒီအတိုင်း ပြန်ဖတ်ချင်လို့ရှာရင်ပဲဖြစ်ဖြစ် လွယ်လွယ်နဲ့ရှာမတွေ့ဘူး။  စာအုပ်ရှာနေတာနဲ့ပဲ အချိန်တွေက ကုန်သွားတယ်။

ကျနော့်စာအုပ်တွေကလည်း ဘာသာရေးကော၊ နိုင်ငံရေးကော၊ လူမှုရေးကော၊ စီးပွားရေးကော၊ ပညာရေးကော ဟာ အကုန် ရောထွေးစုပြုံနေတာပဲ။ ဂိုထောင်လို ဖြစ်နေတာ။ ခြောက်ထောင်ကျော်လောက်ရှိတဲ့ စာအုပ်တွေဟာလည်း ဘီဒို မလုံလောက်လို့ စာအုပ်အနောင့်လေးတွေကိုတောင် ထောင်ပြီး မစီထားနိုင်ဘူး။ ရောထွေးပြီး ထပ်ထားရတာ။ ထပ်တာ တောင် နောက်အပုံကို ရှေ့အထပ်က ကွယ်ပြီး ထပ်တင်ထားရတာဆိုတော့ စာအုပ်တအုပ် ရှာဖို့ဆိုတာ ခေါင်းခြောက်စရာပါပဲ။ နောက်အပုံထဲက စာအုပ်ကိုရှာမယ်ဆိုရင် ရှေ့အပုံကြီးကို ဖယ်ရတာက တလုပ်။ နောက်အထပ်မှာ ရှာတဲ့စာအုပ်ကလည်း ရှိ၊ မရှိဆိုတာ မသေချာဘူး။ ဒီတော့ ကျားမြီးဆွဲမှာလား၊ စာအုပ်ရှာမှာလားဆိုရင် ကျားမြီးကိုပဲ ရွေးရမလို ဖြစ်နေတယ်။

ဟိုတလောက ပညာရေးနဲ့ပတ်သက်ပြီး ဆောင်းပါးတပုဒ်ရေးတာ လွတ်လပ်ပြီးစ ပြည်သူ့နီတိမှာ ပေါင်းသင်းဆက်ဆံရေး ကအစ၊ လွှတ်တော်အကြောင်း၊ အမတ်အကြောင်း၊ မဲပေးပုံ အကြောင်းတွေအထိပါ ပါတယ်ဆိုတာ ရေးပြီးမှ စာအုပ်ပြုစုတဲ့ ဆရာကြီးနာမည်ကို မေ့နေ၊ ရောနေလို့ စာအုပ်လိုက်ရှာတာ မတွေ့ဘူး။ စာအုပ် မတွေ့တာနဲ့ပဲ အဲ့ဒီ့ဆောင်းပါး ဆက်မရေးဖြစ် တော့ဘူး။ အခု မရေးတော့မှ တွေ့တယ်။

ဒီလိုဒုက္ခမျိုးတွေကင်းဖို့ ကက်တလောက်လုပ်မှ ဖြစ်တော့မယ်။ စာအုပ်ရှာရင် လွယ်လွယ်နဲ့ရှာလို့ရအောင် ဦးစားပေးပြီး လုပ်ရမယ်။ စာအုပ်တွေကို နိုင်ငံရေးသီးသန့်၊ ဘာသာရေးသီးသန့်၊ ပညာရေးသီးသန့်ထားရမယ်။  ရသစာပေတွေကို သီး သန့်၊ ရသစာအုပ်တွေကတော့ နည်းပါလိမ့်မယ်။ ဘာလို့လဲဆိုတော့ စာဖတ်မှုအလှည့်အပြောင်းမှာ ရသစာပေကို ကျနော်ပစ် ထားခဲ့လို့ပါပဲ။ ရက်စက်စွာပေါ့။ ဘယ်အချိန်တွေလောက်ကလည်းဆိုရင် ၁၉၉ဝ လွန် ကာလတွေ အရောက်မှာပါ။

(၂)
အဲ့ဒီ့ကာလတွေကစပြီး ကျနော် ရသစာပေတွေ အဖတ်ကျဲသွားတယ်။ အဖတ်နည်းသွားတယ်။ ဒီ့မတိုင်ခင်တွေမှာတော့ ရသစာပေမှ ရသစာပေပါ။ ဒါပေမယ့် ရသစာပေတွေကို ဒီလိုသုတပညာစာအုပ်တွေ ဝယ်ဖတ်သလို ဝယ်ဖတ်တာ မဟုတ် ပါဘူး။ ဖတ်ခဲ့သမျှ မဂ္ဂဇင်းတွေ၊ ဝတ္ထုတွေဟာ ငှားဖတ်တာတွေချည်းပါပဲ။ ငှားဖတ်စရာဆိုင်တွေကလည်း အသင့်ရှိနေတယ်။

မြို့ရယ်၊ လူဦးရေရယ်နဲ့ယှဉ်ကြည့်၊ တွက်ကြည့်ရင် စာအုပ်အငှားဆိုင် အရေအတွက်က အကိုက်ပါပဲလို့ပြောနိုင်တယ်။ ပျဉ်း မနားမှာ ရပ်ကွက်အလိုက် စာအုပ်အငှားဆိုင်လေးတွေရှိခဲ့တယ်။ ဒါပေမယ့် မင်းမင်းစာပေ၊ စိန်မြင့် စာပေ၊ သီဟစာပေ၊ အေး ချမ်းစည်စာပေ၊ သုဝဏ္ဏသျှံစာပေဆိုတာတွေကတော့ မြို့ရဲ့အထင်ကရ စာအုပ်အငှားဆိုင်တွေလို့ပြောရမယ်။ ပျဉ်းမနား သားမှန်ရင် သိကြတဲ့စာအုပ်ဆိုင်တွေပါ။ နောက်ထပ် မြတ်ရိပ်မွန်စာပေ၊ စောစံစာပေစတဲ့ ရပ်ကွက်အလိုက် ကျော်တဲ့ အငှား ဆိုင် လေးတွေလည်း ရှိပါသေးတယ်။

ရေဆင်းဘက်မှာလည်း ချိန်တန်ပြီစာပေဆိုတဲ့ အငှားဆိုင်လေးဟာ ရေဆင်းစိုက်တက္ကသိုလ်နဲ့ တိမွေးကုတက္ကသိုလ်တွေကို ပရိသတ်ယူပြီး ဖွင့်ထားတယ်။ ပြောရရင် ကျနော့်အမဆိုင်။ ကျနော်တောင် အဲ့ဒီ့ဆိုင်ဝင်ငွေလေးနဲ့ ဘွဲ့ရခဲ့တာ။ အဲ့ဒီ့ အငှား ဆိုင်တွေကိုတော့  ရွာလွန်ရွက်တိုက် မငှားကြပါဘူး။ နီးစပ်ရာ ရပ်ကွက်ကလူပဲ ငှားကြတယ်။

စာအုပ်ငှားရင် တရက်ဖတ်ခ ၁ ကျပ်၊ ၂ ကျပ် စသဖြင့်ပေးရတယ်။ ရက်လွန်သွားရင် ရက်လွန်ကြေးပေးရတယ်။ တချို့ဆိုင် တွေက ရက်လွန်ကြေးကို လျှော့ယူတာရှိသလို အပြည့်ယူတာလည်းရှိတယ်။ ကျနော်ကတော့ ရက်လွန်မရှိ။ တရက်ပဲငှား တယ်။ ငှားမယ်ဆိုရင်လည်း စာအုပ်ငှားခကို အရင်ရှာတယ်။ ရရင် ပိုက်ဆံကို အံဆွဲထဲမှာ အရင်သိမ်းထားပြီးမှ ငှားဖတ်တယ်။

စာအုပ်ငှားရင် စာအုပ်ဆိုင်က ဘယ်သူငှားတယ်၊ ဘယ်နေ့ငှားတယ်ဆိုတာကို ရေးမှတ်ထားတယ်။ ပြန်အပ်တဲ့အခါကျရင် အဲ့ဒီ့မှတ်တမ်းနဲ့တိုက်စစ်ပြီးမှ လက်ခံတယ်။ စာအုပ်မှာ အပြဲ၊ အစုတ် ရှိ၊ မရှိကိုလည်း တခါတလေမှာ လူကြည့်ပြီး စစ်တတ် တယ်။ ဒါဟာလည်း ကျနော်တို့အတွက်တော့ စာရိတ္တတခုကို ပြုစုပျိုးထောင်တာပဲလို့ မြင်နေတယ်။ သူများပစ္စည်းကို ငှားပြီး ရင် ပြန်ပေးရတယ်၊ မစုတ်မပြဲအောင် ထိန်းသိမ်းစောင့်ရှောက်ရတယ်ဆိုတဲ့ လူ့ကျင့်ဝတ်ငယ်လေးတခုကို စာအုပ်တွေ ငှားဖတ်ရင်း လေ့ကျင့်ကြတာလို့ နားလည်မိတယ်။ စာအုပ်ငှားပြီး ပြန်အပ်တိုင်း ကိုယ့်ကိုယ်ကျင့်တရားပေါ်မှာ ပိုပိုပြီးယုံကြည် မှုရှိလာတယ်လို့ ခံစားမိတယ်။

(၃)
ကျနော် စငှားဖူးတဲ့ဆိုင်ကတော့ သီဟစာပေပါပဲ။ ထရံကာထားတဲ့ အခန်းလေး။ သီဟစာပေမှာတုန်းကတော့ ကာတွန်းတွေ ဖတ်တဲ့အရွယ်ပါ။ ကာတွန်းတွေထဲမှာ တင်အောင်နီကို အကြိုက်ဆုံးပဲ။ ရွှေခေါင်းပြောင်လည်း ကြိုက်တယ်။ ရွှေခေါင်းပြောင် ဖတ်တုန်းက ပိုငယ်မယ်ထင်တယ်။ တင်အောင်နီကာတွန်းတွေဖတ်တော့ ၇ တန်း ၈ တန်း ရောက်နေပြီ။ လေးတန်းလောက် တုန်းက သမိန်ပေါသွပ်တွေလည်း ငှားဖတ်ဖြစ်သေးတယ်။ စာအုပ်ဆိုင်လေးက ကျနော်တို့အလယ်တန်းကျောင်းရဲ့ အရှေ့ ဘက် ဝင်ပေါက် ညာဘက်ခြမ်းမှာ ရှိတယ်။ အဖိုးကြီး၊ အဖွားကြီးတွေ ဖွင့်ထားတာ။

ကျနော်တို့အလယ်တန်းကျောင်းလေးက ဘုန်းတော်ကြီးကျောင်းက စခဲ့တာဖြစ်လို့ ဘုန်းတော်ကြီးကျောင်း အမည်နဲ့ကန်နား ကျောင်းလို့ပဲ ကျော်တယ်။ ကန်နားကျောင်း အရှေ့ဘက်ထိပ် သီဟစာပေဆိုတာ ကျနော့်ရဲ့ စာဖတ်မှုသန္ဓေစတည်ရာလို့ တောင် ပြောနိုင်တာပေါ့။

မင်းမင်းစာပေဆီဝင်တော့ နန်းဦးတို့လို စာများများပါတဲ့ ကာတွန်းရုပ်ပြတွေကို ဖတ်တတ်နေပါပြီ။ စံရွှေမြင့်လည်း ငှားတယ်။ ကျော်အောင်မော်နဲ့စိုင်းလားရှိုး ရုပ်ပြတွေကြေင့် ပန်းချီကျောင်းတောင် တက်ဖြစ်လိုက်သေးတယ်။ ရုပ်ပြပန်းချီဆရာ ဖြစ်ရမယ်ပေါ့လေ။ စိန်မြင့်စာပေနဲ့ အေးချမ်းစည်စာပေဆီကိုတော့ တပြိုင်တည်းလိုလို ရောက်ခဲ့ဟန်တူပါတယ်။ သိပ်စဉ်းစား မရဘူးဖြစ်နေတယ်။

အေးချမ်းစည်က ဈေးမှာဖွင့်ထားတာ။ ခုဈေးကြီးတော့ မဟုတ်ပါဘူး။ ဈေးဟောင်းမှာ။ အနောက်ဘက်၊ဈေးအိမ် သာဘက် ခြမ်း၊ အပြင်တန်းမှာ။ အေးချမ်းစည်က ကက်စက်ခွေနဲ့အတူ စာအုပ်အငှားဆိုင်ကို တွဲဖွင့်ထားတာ အဲ့ဒီ့ဆိုင်ကနေ ခင်မောင် တိုး၊ ဗိုလ်ထီး၊ လွှမ်းမိုး၊ ခိုင်ထူး၊ စိုးလွင်လွင်၊ ထူးအိမ်သင် အခွေတွေပါ စာအုပ်နဲ့အတူငှားပြီး သူငယ်ချင်းအိမ်မှာ နားထောင်ဖူး တယ်။ ဒီဘက် ဗဒင်တို့၊ဆောင်းဦးလှိုင်တို့ကျတော့ ကျနော်ဆီမှာ နားကြပ် ကက်စက်လေးတလုံး ရှိလာလို့ ကိုယ့်အိမ်မှာကိုယ် နားအရသာ ခံစားလာနိုင်တယ်။ ဒါပေမယ့် စာဖတ်တော့ မပျက်ခဲ့ပါဘူး။

စိန်မြင့်စာပေကတော့ ပျဉ်းမနားရဲ့ အထင်ကရ ဗိုလ်ချုပ်လမ်းမကြီးပေါ်မှာ ဖွင့်ထားတာ။ ဆိုင်ခန်းက ကျဉ်းရှည်ရှည်လေး။ ညဆိုင်သိမ်းရင် ပျဉ်ပြားတံခါးတွေနဲ့စီပြီးပိတ်တာ မှတ်မိသေးတယ်။ စိန်မြင့်မှာ ထူးခြားတာက သိုင်းဝတ္ထုအကုန်ရှိတယ်။ ဘယ်သိုင်းဝတ္ထုက ဖတ်ချင်ဖတ်ချင်၊စိန်မြင့်စာပေဆီသွား။ ရှစ်အုပ်တွဲဆိုရင်လည်း ရှစ်အုပ်စလုံးရှိတယ်။ ဆယ်အုပ်တွဲဆိုရင် လည်း ဆယ်အုပ်စလုံး ရှိတယ်။ တဆက်တည်း၊တခါတည်းတွဲပြီး ချည်ထားတာ။  အဲ့ဒီ့ခေတ်ကြိုးကတော့ ဂုံနီကြိုးပေါ့။

ကျနော်ကတော့ သိုင်းဝတ္ထုတွေ မဖတ်လို့မငှားပါဘူး။ တအုပ်လား ငှားဖတ်ဖူးတာ။ သိုင်းတွေ မဖတ်ဘူးဆို တော့ မုသား ဖြစ်နေမယ်။ အသစ်ထွက်တိုင်း ကျနော်ဖတ်တဲ့ သိုင်းတော့ရှိတယ်။ အဲ့ဒါက နွမ်ဂျာသိုင်း။ သိုင်းတော့ သိုင်းပါပဲ။ မောင်စိန်ဝင်း (ပုတီးကုန်း) ဖတ်တယ်။ နုနုရည်အင်းဝဖတ်တယ်။ မိုးမိုး (အင်းလျား) ဖတ်တယ်။ မောင်သာရဖတ်တယ်။ နောက် ငြိမ်းကျော် ဖတ်တယ်။ မောင်သာပြည့် ဖတ်တယ်။ တက္ကသိုလ်ဘုန်းနိုင်ဝတ္ထုကိုတော့ မောင့်ဘဝ ညအလားကွယ်  တအုပ်တည်းပဲ ဖတ် ဖူးခဲ့တယ်။

ရသခေတ်နှောင်းပိုင်းလောက်မှာ ကောလ်ထန်မောရိယယ်လုံးချင်းတအုပ်ကို ဖတ်ဖြစ်လိုက်တယ်။ ဒါပေမယ့် ကျနော်တို့ရသ မြေပေါ် ကနေ တပ်မဆုတ်ခင်လေးမှာပဲ ကောလ်ထန်မောရိယယ် ပျောက်သွားတယ်။ သူ့ စာအုပ်တွေ မတွေ့ တော့ဘူး။

(၄)
ရှစ်လေးလုံးကြီးအပြီးမှာတော့ ကျနော့်စာဖတ်မှုအလှည့်အပြောင်း စတယ်လို့ပဲပြောရမယ်။ သိန်းဖေမြင့်ရဲ့ သ ပိတ်မှောက် ကျောင်းသား၊ အရှေ့ကနေဝန်းထွက်သည့်ပမာ၊ ဝတ္ထုတိုပေါင်းချုပ်စတာတွေ၊ ရန်ကုန်ဗဆွေ၊ ဦးနုရဲ့ ငါးနှစ်ရာသီ ဗမာပြည်၊ ဆရပါရဂူရဲ့ စာအုပ်တွေကို အဲ့ကျမှဖတ်ဖြစ်တာ။ နိုင်ငံရေးအငွေ့အသက်နဲ့ဘာသာရေးရနံ့ကို အဲ့ကာလကျမှ ရှူရှိုက်ရကောင်း မှန်းသိတာ။ စောစောပိုင်းကာလတွေကတော့ စာဖတ်တယ်ဆိုပေမယ့် အပျော်ဖတ်တွေက များများပါ။ ဂုရုကြီးတွေ သတ် မှတ်တဲ့ လောက်လောက်လားလားရသမျိုးတွေကတော့ နည်းနည်းရယ်။

ဒါပေမယ့် ပြောင်းတယ်ဆိုပေမယ့် ရသဖတ်ရာကနေ ချက်ချင်းပြောင်းသွားတာမျိုးတော့ မဟုတ်ပါဘူး။ ရသတွေ ဖတ်ရင်း၊ အပျော်ဖတ်တွေဖတ်ရင်း သုတတွေဘက်လှည့်တာ။ တစ်အုပ်စ။ နှစ်အုပ်စ ဖတ်ရင်းက တဖြည်းဖြည်းချင်း များလာတာ။  အဲ့ဒီ့အဟုန်ဟာ ၁၉၉ဝ လွန်ကာလတွေမှာတော့ မြင့်လာတယ်လို့ဆိုနိုင်တယ်။ စာအုပ်တွေ ဝယ်စုဖြစ်တယ်။  ဆရာကြီးမြသန်း တင့်ရဲ့ သမိုင်းစကားပန်းစကားလို အက်ဆေးတွေကိုတော့ သဘောကျတယ်။ တောင်သမန်အင်းမှာ လေညှင်းဆော်တော့လို သမိုင်းမျိုးကို ကြက်သီးဖြန်းဖြန်းထအောင် ကြိုက်ခဲ့တယ်။

အပြောင်းအလဲဟာ ကျနော့်ဟဒယမှာ အပင်ရင့်စပြုလာတဲ့အချိန်မှာတော့ နိုင်ငံရေးစာပေဘက်ကို ပိုပြီးခုံမင်တတ်လာတယ်။ သုတပညာတွေကို ပိုပြီး ခံတွင်းလိုက်လာတယ်။ တော်လှန်တဲ့အတွေးအခေါ်ရှိတဲ့ဘက်ကို တိမ်းညွတ်လာတယ်။ ဘာသာရေး မှာလည်း အဲ့လိုပဲ။ ဆန်းသစ်တဲ့၊ ထွန်းတောက်တဲ့ အတွေးအခေါ်တွေကို ပိုလက်ခံလာတယ်။  ဒါပေမယ့် ကျနော်တို့ခေတ်မှာ အဲ့လိုစာအုပ်တွေက ခပ်ရှားရှာရယ်။ အကြောင်းအရာနည်းနည်းလောက်ကိုပဲ ရိုးတိုးရိပ်တိတ် ကြားဖူး၊ ဖတ်ဖူးထားတာ။ အဲ့ဒီ လို ခပ်ရှားရှားစာအုပ်တွေကိုရှာဖွေဖို့ ကျနော်တို့ ကြိုးစားခဲ့တယ်။ ခြေဆန့်ခဲ့တယ်။

အဲ့ဒီ့အချိန်ကျမှ သုဝဏ္ဏသျှံစာပေဆီ ရောက်သွားတယ်။ ငှားကြတယ်။ ဖတ်ကြတယ်။ သုဝဏ္ဏသျှံစာပေဟာ ကျနော့် အတွက် တော့ စာအုပ်အငှားဆိုင်သွားတဲ့ခေတ်ရဲ့ အနှောင်းပိုင်းလို့ ပြောရမယ်ထင်ပါတယ်။ အဲ့ဒီ့နောက်ပိုင်းမှာ စာအုပ်အငှားဆိုင်တွေဆီ မသွားဖြစ်တော့ဘူး။ ရသတွေ၊ ဝတ္ထုတွေ၊ အပျော်ဖတ်တွေကို မဖတ်ဖြစ်တော့ဘူး။  မဂ္ဂဇင်းတွေတောင်မှ သုတကဲတဲ့ မဂ္ဂဇင်း တွေကိုပဲ ရွေးဖတ်ဖြစ်တော့တယ်။ သင့်ဘဝ၊ အတွေးအမြင်တွေ။

၁၉၉၉ /၂ဝဝဝ ကာလတွေဟာ ရသစာပေတွေနဲ့အသိသာ၊ အပြတ်သားဆုံး လမ်းခွဲချိန်တွေပေါ့။ ကိုတာရဲ့ လှည်းဘီးတပတ်၊ ကျနော်သည် မျောက်ကဆင်းသက်သည်တို့ကို အရမ်းကြွေခဲ့တယ်။ ဆရာကြီးဦးအေးမောင်ရဲ့ ဗုဒ္ဓနဲ့ဗုဒ္ဓဝါဒတို့၊ ဦးရွှေအောင်ရဲ့ ဘဝအကျဉ်းသားတို့၊အတ္တဝါဒမှ အနတ္တဝါဒဆီသို့တို့၊ ဓမ္မပဒတို့ဟာ ကျနော့်ရဲ့ စာဖတ်မှုအပြေင်းအလဲကာလမှာ သိပ်ကို စွဲ မက်ခဲ့ရတဲ့စာအုပ်တွေပါ။ အဲ့ဒီ့စာအုပ်တွေ အကုန်လုံး အိမ်မှာဝယ်ထားတယ်။

အဲ့ဒီလို သုတပညာစာအုပ်တွေ ဝယ်ပါပြီဆိုကတည်းက စာအုပ်အငှားဆိုင်လေးတွေဆီ မရောက်ဖြစ်တော့ဘူး။ စာအုပ်ဆိုင် လေးတွေ ဘယ်အချိန်မှာ ပိတ်သိမ်းကုန်ကြသလဲတောင် အမှတ်မထားမိတော့ဘူး။ အခုလို စာအုပ်အငှားဆိုင်လေးတွေ သိသိသာသာကွယ်ပျောက်ကုန်တယ်ဆိုမှ ဟင်- မရှိတော့ဘူးဖြစ်ရတာ။ တသက်လုံးပစ်ထားလာခဲ့ပြီးမှ သေမှ ငိုနေကြတဲ့ အဖြစ်မျိုး ကျနော်ဖြစ်နေတာပါ။

ဗိုလ်ချုပ်လမ်းပေါ်က စိန်မြင့်စာပေကို မမြင်ရတော့ဘူး။ ကြာပြီ။ အေးချမ်းစည်စာပေကတော့ ဈေးဟောင်းဖျက်ပြီး သူ့ အိမ်မှာ ပြောင်းဖွင့်ကတည်းက ကျနော် မရောက်ဖြစ်တော့တာ။ အခု ရှိသေးလားတောင် မသိတော့လို့ မေးကြည့်ယူရတယ်။ သူ လည်း မရှိတော့ဘူးတဲ့။ မင်းမင်းစာပေဆိုတာကလည်း အတူတူပဲ။ ကျနော်တို့ရပ်ကွက် ကုန်းဆင်းလေးမှာ ရှိမနေတော့ဘူး။

တကယ်တော့ ဒါဟာ ဘယ်ကိုမှရွှေ့ပြောင်းသွားကြလို့ ကွယ်ပျောက်ကုန်ကြတာ မဟုတ်ပါဘူး။ အတိတ်မှာ ကျန်နေ ရစ်ခဲ့ တာပါ။ ဒါမှမဟုတ် ချန်ထားတာကို ခံလိုက်ရတာပါ။ စွန့်ခွာမှုကို လက်သင့်ခံလိုက်ရတာပါ။ ဒီအဖြစ်ကို ပြန်တွေးကြည့် တော့ ကျနော့်ကိုယ် ကျနော်လည်း တရားခံတယောက်လို ခံစားမိတယ်။ ရသစာပေ ကျဆုံးရတာ၊ စာအုပ်ဆိုင်လေးတွေ ကွယ် ပျောက်သွားရတာ ဒါတွေမှာ ကျနော်တို့စာဖတ်ပရိသတ်ရဲ့ ပယောဂလည်း မကင်းဘူးလို့မြင်မိတယ်။

ဘာလို့လဲဆိုတော့ ရသစာပေတွေကို ကျနော်တို့ပစ်ပယ်တယ်။ စာအုပ်အငှားဆိုင်လေးတွေကို ကျနော်တို့ ရှောင်ဖယ်ကြ တယ်လေ။ အကြောင်းအမျိုးမျိုးနဲ့ ကျနော်တို့ သစ်စိမ်းချိုး ချိုးပစ်ခဲ့ကြတယ်။ အဓိကကတော့ ရသစာပေမှာ ဘာအပြစ်မှ မရှိပါဘဲနဲ့ ကျနော်တို့ရဲ့ အတောမသတ်နိုင်တဲ့ လိုဘတွေရဲ့အောက်မှာ ရသစာပေကို ဒူးထောက်စေခဲ့ကြတာပဲ။

ရသစာပေအစားလက်တွေက ဖုန်းအမျိုးမျိုးတွေကို ကိုင်ဆောင်နေကြတယ်။ အင်တာနက် စနစ်မျိုးစုံနဲ့သုတနယ်ကို ချဲ့  နေကြတယ်။ သတင်းတွေကို နားစွင့်နေကြတယ်။ မျက်လုံးတွေက အမျိုးစုံတဲ့ ရုပ်သံလိုင်းတွေကိုပဲ ကြည့်ရှုဖို့ တောင်း ဆိုနေကြတယ်။ စား၊ ဝတ်နေရေးဆိုတဲ့ အကြောင်းအမျိုးကိုပဲ အလေးထားစရာအဖြစ် ထင်ထာကြတယ်။ ကျနော်လည်း ဘာထူးသေးလဲ။  အကြောင်းတရားသာလွဲတယ်၊ ရသစာပေနဲ့ စာအုပ်အငှားဆိုင်လေးတွေကို စွန့်ခွာတာကတော့ စွန့်ခွာတာ ပဲလေ။

ကျနော် ရသစာပေတွေကို စွန့်ခွာရတဲ့ အကြောင်းထုပ္ပတ်မှာတော့ သုတပညာရှာဖွေလိုမှုရယ်၊ ငါ့အသက်အရွယ်မှာ ဒါတွေ တော်လောက်ပါပြီဆိုတဲ့ တကြောင်းဆွဲအမြင်တွေရယ်က အခရာပါပဲ။ ဒါပေမယ့် ကျနော်ရှောင်ခွာတော့ စာအုပ်အငှား ဆိုင် လေးတွေ လုံးလုံးလျားလျား ကွယ်ပျောက်သေးတာ မဟုတ်ပါဘူး။  ရှိနေသေးတယ်။  ရသစာပေတွေ မဖတ်တော့ဘူး၊ တော်ပြီဆိုပြီး ငှား မဖတ်တော့လို့သာ မသွားတာပဲရှိတာ။ စာအုပ်အငှားဆိုင်တွေကတော့ ရပ်တည်နေ ကြပါသေးတယ်။

(၅)
ခုတော့ စာအုပ်အငှားဆိုင်လေးတွေ လုံးလုံးလျားလျား ပျောက်ကွယ်ကုန်ပြီ။  သုဝဏ္ဏသျှံစာအုပ်ဆိုင်လေးနေရာမှာ အိမ် ဆောက် ပစ္စည်းတွေ ရောင်းတဲ့ဆိုင်ကြီးက ဟီးထနေအောင် နေရာယူထားတာ တွေ့ မိတယ်။ နွေတုန်းက ရေဆင်းမှာရှိတဲ့ ချိန်တန်ပြီ စာပေလေးဆီရောက်တော့ အငှားစာအုပ်တွေတောင် တအုပ်တလေ မတွေ့ ရတော့ဘူး။ စာအုပ်အငှားဆိုင် ဖြုတ် ပစ်ပြီတဲ့။ ကြာပြီတဲ့။ ကျောင်းသုံးစာအုပ်နဲ့ကာရာအိုကေဆိုင်လေး တွဲဖွင့်ထားတယ်။ ဖုန်းငွေဖြည့်ကဒ်ရောင်းတာလည်းတွေ့ ရတယ်။

ကျနော် မှတ်မိသေးတယ်။ ဒီစာအုပ်ဆိုင်လေးစဖွင့်တော့ ကျနော်က ရသစာပေတွေကို စွန့်ခွာနေတဲ့အချိန်။ ဒါကြောင့် ကျနော့် ဆီမှာရှိတဲ့ တာရာမင်းဝေရဲ့ဝတ္ထုတွေနဲ့တခြားဝတ္ထုစာအုပ်တွေကို ငှားစားဖို့ ပေးပစ်လိုက်တယ်။ ဒီလိုပေးလိုက်ပေမယ့် အဲ့ဒီ့စာအုပ်တွေအစား ကျနော့်ဆီမှာက ခုထိအောင် သုတပညာစာအုပ်တွေ ကျန်နေပါသေးတယ်။ ချိန်တန်ပြီစာပေက အ ငှားစာအုပ်တွေကို စွန့်ပစ်လိုက်ချိန်ကျတော့ စာအုပ်ဆိုင်လေးမှာ ဘာတွေကျန်ရစ်ခဲ့သလဲ။ ကျနော် ထပ်မတွေးချင်တော့ဘူး။ တခုပဲရှိတော့တယ်။

ကျနော့်မှာရှိတဲ့ စာအုပ်တွေမပျောက်ကွယ်ခင် ကက်တလောက်လုပ်တော့မယ်။ ဟုတ်တယ်။ သီတင်းကျွတ်ပိတ်ရင် ကတ် တလောက်လုပ်တော့မယ်။

ကျော်ထင်


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:၀တ္ထုတို

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ကြပါစေ …

မိုးမခ လစဉ်ထုတ်မဂ္ဂဇင်း စက်တင်ဘာ ၂၀၁၇ ထွက်ပြီ

မိုးမခမှာ ကြော်ငြာပါ

မိုးမခကို အိမ်အရောက် ပို့ပေးမည်

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခမဂ္ဂဇင်း နောက်ဆုံးထုတ်ကို WE မှာ ဝယ်ပါ

By

မိုးမခမဂ္ဂဇင်း နောက်ဆုံးထုတ်ကို WE မှာ ဝယ်ပါ (မိုးမခ) စက်တင်ဘာ ၂၀၊ ၂၀၁၇...

Read more »

မိုးမခထုတ် မောင်စွမ်းရည်စာအုပ် WE မှာ ဝယ်ပါ

By

မိုးမခထုတ် မောင်စွမ်းရည်စာအုပ် WE မှာ ဝယ်ပါ (မိုးမခ) စက်တင်ဘာ ၂၀၊ ၂၀၁၇...

Read more »

မိုးမခ သြဂတ်စ် ထွက်ပြီ

By

မိုးမခ သြဂတ်စ် ထွက်ပြီ သြဂတ်စ် ၁၅၊ ၂၀၁၇ ပြည်တွင်း ပြည်ပ ကလောင်ရှင်တွေရဲ့...

Read more »

မိုးမခ ဇူလိုင် ထွက်ပါပြီ …

By

မိုးမခ ဇူလိုင် ထွက်ပါပြီ … (မိုးမခ) ဇူလိုင် ၁၈၊ ၂၀၁၇ မိုးမခ...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်