မောင်သာရ ● မေမေကြီးကြီး

January 9, 2018

● မေမေကြီးကြီး
(မိုးမခ) ဇန်နဝါရီ ၉၊ ၂၀၁၈

ကျုပ်မှာ ကျုပ်တို့တူတူမတွေအားလုံးက မေမေကြီးကြီးလို့ခေါ်ရတဲ့ ကြီးဒေါ်ကြီး တယောက်ရှိတယ်။

ကျုပ်ရဲ့အမေ့မှာ မွေးချင်းညီအမငါးယောက်ကြီးများတောင် ရှိခဲ့ပေမယ့် ကျုပ်အမေအ ပါအဝင်အိမ်ထောင်ရှိတဲ့ ညီအမသုံး ယောက်လုံးကကျတော့ ရှားရှားပါးပါး သားသမီးတယောက်စီပဲ မွေးခဲ့တယ်။ အမေ့အောက်က ကျန်နှစ်ယောက်ဆိုရင် တယောက်ကအိမ် ထောင်ရှိရက်နဲ့ သားသမီးလုံးဝမထွန်းကားဘူး။ မေ့ညီမအငယ်ဆုံးကျတော့ သက်ဆုံးတိုင် ပျိုကြီးဘဝနဲ့ အရိုးထုတ်တယ်။ မျိုးဆက်ကိုပြတ်ကရော။

ဆိုတော့ကာ ကျုပ်မှာတဝမ်းကွဲဆိုပါတော့။ ညီမနှစ်ယောက်ရှိတယ်။ ကြုံရပုံကကျုပ်တို့ မောင်နှမသုံးယောက်ကိုလဲ အမေတွေက ချိန်းဆိုတိုင်ပင်ပြီး မွေးကြလေရော့သလား အောက်မေ့ရတယ်၊ တယောက်နဲ့တယောက်က မီးဝင်မီးထွက်တွေ ချည်းပဲ။ ပြီးတော့အဲဒီ ခေတ်က အခုခေတ်လိုမဟုတ်ဘူး။ ဆွေသံယောဇဉ် မျိုးသံယောဇဉ် အင်မတန်ကြီးကြတော့၊ ကျုပ်တို့ အဖိုးအဖွား မိဘအရိပ်အောက်မှာ သည်တပြုံတမကြီးက ဥမကွဲ သိုက်မပျက် နေကြတယ်။ အတောင်အလက်တွေစုံ၊ ပညာ တွေတတ်၊ အလုပ်အကိုင်တွေရ၊ အိမ်ထောင်တွေကျကြလဲ ရေကြည်ရာ မြက်နုရာခွဲခွါမသွားကြဘူး။ ဘိုးဘွားပိုင် အုတ် တံတိုင်းကာ ဧရာမခြံဝန်းကျယ်ကြီး တကွက်ထဲမှာပဲ ကိုယ့်သီးသန့်အိမ်ကလေးတွေနဲ့ ကိုယ်နေကြတယ်။ ကျုပ်အဒေါ်တွေနဲ့ အိမ်ထောင်ကျကြတဲ့ ကျုပ်ဦးဦးတွေကလဲ ကျုပ်အထင်ပြောရရင်တော့ နဖါးကြိုးအထိုးခံ ထမ်းပိုးအကျင့်သူတော်ကောင်းတွေချည့်ပါပဲ။ အဲ…ကုသိုလ်ကံညံတဲ့ ကျုပ် တယောက်ပဲ…ကျုပ်မမွေးခင် ကျုပ်အမေနဲ့ ကျုပ်အဖေ ကတောက်ကဆဖြစ်ကြပြီး၊ ကျုပ်အဖေဖျာလိပ်ထွက်သွားရတယ်။ ကျန်တဆွေတမျိုးလုံးကတော့ တစည်းတလုံးတည်းပဲ။

အဲ…ခြံရဲ့ရာဟုထောင့်မှာ ကလဲလျှာထိုးပျဉ်ချပ် ဆယ့်ငါးချပ်ဆင့်အမြင့်တံခါးနဲ့ လှောင်ထားတဲ့စပါး ကျီရှိတယ်။ အဖွားပိုင် အရှေ့တော (ပုသိမ်ကြီး၊ ဇီးချိုကုန်း၊ ချောင်းပန်း၊ နှမ်းကြဲတဝိုက်) ကလယ်တွေကို သီးစားချထားလို့ရသမျှ စပါးတွေ အကုန် သည်ကျီထဲထည့်ထားတာပါ။ ဒါအများပိုင်ပဲ။ တဆွေလုံး တမျိုးလုံး တခြံလုံး အချိန်မ ရွေးထုတ်ယူကြိတ်ခွဲ စားသုံးပိုင်ခွင့်ရှိ တယ်။ ရှေးစကား ‘လက်ရေတပြင်စီး’ ဆိုပါတော့။

ဆိုတော့ကာ ကျုပ်တို့ မောင်နှမသုံး ယောက်ကြီးပြင်းလာခဲ့ရပုံကို ခန့်မှန်းကြည့်လို့ ရနိုင်ပါလိမ့်မယ်။ ကျုပ်တို့ကိုကြုံရာအိမ်မှာ ကြုံရာအမေက နို့လှန်တိုက်တာပဲ။ ဘယ်အဒေါ် ဘယ်အမေကမှလဲ သူ့ကလေးကိုယ့်ကလေး ခွဲခြားမနေဘူး။ ကျုပ်တို့ကလဲ အတော် သိတတ်တဲ့ အရွယ်အထိကြုံရာအမေ့ နို့ကိုစို့တာပဲ။ ကျုပ်က မောင်နှမတွေထဲမှာ အကြီးဆုံး ဆိုတော့ ပိုဆိုးတာပေါ့။ ကျုပ်အမေကစနစ်ကြီးတော့ ကျုပ်အခါလည်တာနဲ့ နို့ဖြတ်ပြီ။ ပရုပ်ဆီတွေလူးထားပြီး လုံးဝမတိုက်တော့ဘူး။ ဒါပေမယ့်… သူများနို့စို့ တာကိုငေးကြည့်ပြီး ကျုပ်နှုတ်ခမ်းလိုက်လှုပ်တာမြင်ကြတော့ ကျန်တဲ့အဒေါ်တွေက အမေ့ကွယ်ရာမှာ ခိုးတိုက် ကြတယ်။ ပြီးခြံထဲမှာပဲ၊ ရိုက်ဖြတ်စင်အောက်မှာ နွားစားကျင်းနဲ့ နိုးစားနွားမ နှစ်ကောင်ကလဲမွေးထားလိုက်သေးတယ်။ လူကြီးတွေအတွက်ရော ကျုပ်တို့အတွက်ရော နို့ကတော့ အလျှံပယ်ပဲ။ ဆိုတော့ကာ ကျုပ်တို့က အမေတွေအဒေါ်တွေ အား လုံးကို မေမေတပ်ခေါ်ကြရတယ်၊ “ကြီးကြီး” “ဒေါ်ဒေါ်” မခေါ်ရဘူး။ မကြိုက် ကြဘူး၊ ကွပ်ညတ်တယ်။ အမေမခွဲခြားရဘူးတဲ့။ သည်တော့… ဗဟိုအုဋ္ဌ်ခံအိမ်မကြီးရဲ့ ဘယ်ဘက် မျက်စောင်းထိုး ခြံရဲ့တနင်္ဂနွေထောင့်က အိမ်မှာနေတဲ့ ကျုပ်ညီမဝမ်းကွဲ အကြီးမရဲ့ အမေကို… အမေတို့ညီအမငါး ယောက်ထဲမှာလဲ အကြီးဆုံးဖြစ်တဲ့အတွက် ‘မေမေကြီးကြီး’ လို့ ကျုပ်တို့က ခေါ်ကြရတယ်။ နောက်ညာဘက်မျက်စောင်းထိုးခြံရဲ့ အင်္ဂါထောင့်က အိမ်မှာနေတဲ့ ညီမအငယ် မရဲ့ အမေကိုကျတော့ ‘အိမ်ရှေ့မေမေ’ ခေါ်ရတယ်။ အိမ်ရဲ့ညာတောင်ပံ တောင်ဘက်က အိမ်မှာနေတဲ့ သားသမီးမထွန်းကားတဲ့ အဒေါ်ငယ်ကို ကျတော့ ရွှေဘိုသားနဲ့ညားတဲ့အတွက် ‘ဘိုမေမေ’ ခေါ်ကြရတယ်။ အိမ်မကြီးရဲ့ မြောက်ဖက် ဘယ်တောင်ပံအိမ်မှာနေတဲ့ ကျုပ်အမေ ကိုတော့ ကျုပ်ကကျုပ်ညီမတွေခေါ်သလို “လေးမေမေ” လို့ မခေါ်ရပဲ ‘အမ’ လို့ပဲခေါ်ရတယ်၊ ကျုပ်တို့အညာမှာ၊ တောဘက်မှာပေါ့နော်… များသောအားဖြင့် အမေကို ‘အမ’ လို့ခေါ်တတ်ကြ တာပါပဲ။ ကျုပ်ကမြေးထဲမှာလဲ အကြီးဆုံး၊ အမေက လဲအပျိုတပိုင်းပြန်ဖြစ်နေပြီဆိုတော့ ‘အမေ’အခေါ်မခံချင်လို့မဟုတ်ပါဘူး။ကျုပ်အဖွားကိုယ်တိုင်က သူ့ကိုလဲမြေး အားလုံးက ‘အမေ’ ခေါ်မှကြိုက်တာကိုး။ ကျန်တဲ့မြေးမနှစ်ယောက်က တခါတရံယောင်ယောင်ပြီး ‘အဖွါး’ ခေါ်မိရင် နည်နည်း လောက် မျက်နှာထားတင်းပြပြီး ‘ဟင်း’ ရုံပ ‘ဟင်း’ တယ်။ ကျုပ်ကိုကျတော့ တအိမ်ထဲအတူနေမို့ လုံးဝယောင်ခွင့်မပြုဘူး၊ ချက်ချင်းပြင်ခေါ်ခိုင်းတယ်၊ နော့…ကျုပ်ကိုလဲ အချစ်ဆုံးကို။ သူ့မှာက မွေးခဲ့တာ သမီးချည့်ငါးယောက်။ မြေးကျတော့ လဲယောက်ျား ကလေးက ကျုပ်တယောက်တည်း။ ပြောလို့သာ မြေးလို့ပြောရတာကို။ လက် တွေ့ကကျုပ်က အဖွါးလက်ပေါ်မှာပဲ ကြီးရတာရယ်။ အားလုံးကလဲ ‘မနာလိုစွာ’ အသိအမှတ်ပြုကြပါတယ်။ ကျုပ်က အဖွါးရဲ့ ‘အသည်း’တဲ့။

ဆိုတော့ကာ ကျုပ်မှာအမေတွေက ဖေါခြင်းသောခြင်း။ အဖွါးနဲ့အတူနေ… လိုတာမရရတာမလိုလို့ အပျိုကြီးဖြစ်နေရတဲ့ ‘မေမေထွေး’ ကလဲ ကျုပ်စာမကျက်ချင်ရင် လူမ မြင်အောင်ပေါင်တွင်းကြောလိမ်ဆွဲတတ်တဲ့အတွက် ကျုပ်ကကျိတ်Nပီး မုန်းနေပေမယ့်… အမေတယောက်ပါပဲ။ လက်ချိုးရေကြည့်ရင် ကျုပ်မှာအမေခြောက်ယောက်ရှိတယ်။ အဲသည်အထဲမှာ အမေသုံးယောက်၊ ကျုပ်အမေရင်းအပါအဝင်က ကျောင်းဆရာမတွေချည့်ပဲ။ မေမေကြီးကြီးနဲ့ရတာ၊ ဘိုမေမေနဲ့ရတာတွေကလဲ ကျောင်းဆရာတွေပဲ။ အိမ်ရှေ့ မေမေကသာ ကုန်သည်ပွဲစားနဲ့ရပြီး၊ ကျုပ်အဖေကလဲကျောင်းဆရာမဟုတ်၊ သာမန် အောက်တန်း စာရေးကလေးသာဖြစ်တယ်လို့ ဆိုပါတယ်။

ဆိုတော့ကာ… အစကိုပြန်ကောက်ရရင် မေမေကြီးကြီးအကြောင်းကို ပြောမလို့…။ မေမေကြီးကြီးနဲ့ရတဲ့ ယောက်ျားကကျောင်း ဆရာဆိုပေမယ့် မန္တလေးဇာတိမဟုတ်ဘူး။ မြေလတ်ပိုင်း မြို့ငယ်လေးတမြို့က အလယ်တန်းကျောင်းရဲ့ကျောင်းအုပ်။ ရာထူးတက်ပြီး မန္တလေးပြောင်းလာတာတဲ့။ ရပုံရနည်းကတော့ ကျုပ်တို့လဲ ဘယ်သိပါ့မလဲ။ ဒါပေမယ့် မေမေကြီးကြီးက ကိုယ့်ယောက်ျားကိုယ် ဆရာကြင် ဆရာကြင်နဲ့ ဆရာတပ်ခေါ် တတ်တာကို ထောက်လို့ရယ်၊ အသက်ချင်း ကလဲတပြန်လောက်ကွာပုံရတာကို ထောက်လို့ရယ်… ကျုပ်တို့မေမေကြီးကြီး ခဏခဏ စိတ်ကောက်ပြီး ထမင်းဟင်းမချက်ပဲ မစားပဲနေရင် လိုက်လိုက်လာပြီး ချော့မော့နှစ်သိမ့်နေရတတ်တာရယ်ကို ထောက်ချင့် ကြည့်ရင်တော့ ကျောင်းမှာဆရာတပည့်များ ဖြစ်ခဲ့ဖူးမလားမပြောတတ်ဘူး၊ ထားပါလေ…။ ဒါကအရေး မကြီးပါဘူး။ သေချာတာကတော့မိန်းမငယ်ငယ်ကလေး ယူထားတာရယ်၊ မန္တလေးဇာတိ မဟုတ်တာရယ်ကြောင့် ဘယ်မှာအိုးခွဲအိမ်ခွဲနေလို့ရမလဲ။ ကျုပ်တို့ ‘ချမ်းဧသာစံ’ ခြံထဲမှာပဲ ပေါင်းနေရမှာပေါ့။ နောက်ကျုပ်နည်းနည်းကြီးလာတော့မှ အကြောင်းသိရတယ်။ မေမေ ကြီးကြီး မကြာခဏစိတ်ကောက်တတ်တာ၊ အမေ့အိမ်ဆင်းလာပြီး ငိုတာအိပ်တာတွေက နောက်ကြောင်းမရှင်းမရှင်း ဇာတ်ထုပ်အရှုပ်ရှိလို့ ကိုး…။ ဆရာကြင်က သူတို့မြို့ကလေးမှာ သားကြီးမယားကြီးရှိသတဲ့။ သားကြီးနှစ်ယောက်ကဆိုရင် အလုပ်အကိုင်တွေနဲ့ဆိုပဲ။ ဒါပေမယ့်ပေါင်းလဲ မပေါင်းတော့ပါဘူး၊ အဆက်အသွယ်လဲမရှိတော့ပါဘူးပြောတာပဲ။ ကျုပ်အမြင်မှာတော့ဟုတ်သားပဲ။ ဆရာကြင် မန္တလေးကတဖဝါးမှခွါတာမတွေ့ပါဘူး။ တနင်္ဂနွေ နဲ့ ဥပုသ်နေ့ ကျောင်းပိတ်တဲ့ရက်တွေမှာရော၊ နွေရာသီကျောင်းရက်ရှည် ပိတ်ရက်တွေမှာရော နှစ်အိမ်ကြားက မန်ကျည်းအချိုပင်ရိပ် ကွပ်ပျစ်ပေါ်မှာစာအုပ်တပုံ ကျောက်သင်ပုန်းတချပ်နဲ့ ထိုင်ဗေဒင် တွက်နေတော့ မြင်တာပဲ၊ အဲ..တခုတော့ရှိတယ်။ ဘိုမေမေ့ ယောက်ျားကျောင်းဆရာ လို၊ အိမ်ရှေ့နေ မေမေရဲ့ယောက်ျားကျောက်ပွဲစားလိုတော့ ကျုပ်တို့ကလေးတွေနဲ့ လက်ပွန်းတတီး ရင်းရင်းနှီးနှီး နေလေ့မရှိဘူး။ ကျုပ်တို့တတွေကလဲ သူ့သမီးအရင်းကိုယ်တိုင်ရဲ့ ဖေါက်သယ်ချထားချက်အရ ဟို့မွေးကင်းစလွန်လာခဲ့ကတည်းက သည်ဘကြီးကြင်ကောက်တည့်ပြီး ပွေ့ချီလိုက်မှာ ဖက်ရမ်းနမ်းရှုံ့လိုက်မှာကို.. သူ့ဗန္ဓုလ နှုတ်ခမ်းမွေးကြီးကြောင့် တအားကြောက်ပြီး ပြေးတတ်ကြတာ။ ဆိုတော့ကာ… ဇာတ်လမ်းကို မြေကြော လေကြောရှုံ့လိုက်ကြစို့ရဲ့…။ ဒုတိယကမ္ဘာ စစ်ဖြစ်ကရောဆိုပါတော့။ ကျုပ်တို့ကို ကျွန်ပြုထားတဲ့ အင်္ဂလိပ်ဘုရင်ခံ အစိုးရက အနောက်ဖက်အိန္ဒိယဆုတ်ပြေးပြီလေ။ “အာရှ သာတူညီမျှရေး” နိပွန်-ဘိရုမာဘန်ဇိုင်း’ ဆိုတဲ့ကြွေးကြော်သံလှလှလေးတွေနဲ့ ဂျပန် တွေတက်လာပြီလေ၊ ဘာပဲပြောပြော၊ ‘မင်းပြောင်းမင်းလွဲ’ ကာလ ‘စစ်ဦးဘီလူး’ နဲ့လဲ ရင်မဆိုင်ရဲတော့ ကျုပ်တို့လဲမြို့လယ်ကောင်မှာ ဘယ်အတင့်ရဲနေလို့ ရတော့မလဲ။ ပြီး ‘မဟာမိတ်’ ဆိုတဲ့လေယာဉ်ပျံကြီးတွေကလဲ ကျုပ်တို့ခေါင်းပေါ်မှာ နေ့စဉ်ရက်ခြားဆိုသလို ငရဲမီးဗုန်းတွေလာကြဲချ စက်သေနတ်တွေနဲ့ပစ် လူတွေကိုသတ်ဖြတ်နှိပ် စက်နေတာကို..။ အရှေ့တောပြောင်းပြေးကြရတာပေါ့။ သိတယ်နော်…။ စစ်ကာလကစစ်အုပ်ချုပ်ရေးလေ၊ အစိုးရအုပ်ချုပ်ရေးယန္တရားတွေအကုန်ရပ်။ ရုံးတွေကျောင်းတွေ စက်ရုံအလုပ်ရုံတွေ ငွေတိုက်ဘဏ်တွေ စီးပွါးရေးလုပ်ငန်းကြီးတွေနဲ့ သယ်ယူပို့ဆောင်ရေးတွေလဲ အကုန်ပိတ်၊ သည်တော့ အစိုးရဝန်ထမ်းတွေ ကျောင်းဆရာဆရာမတွေလဲ အလုပ်လက်မဲ့ဖြစ်ပေါ့၊ လစာဝင်ငွေလဲခြူးတပြားမှ မရကြတော့ဘူးပေါ့။ ဩ… ပြောဖို့တခုကျန်သွားတယ်။ ခုန ကဇာတ်လမ်း အကျဉ်းရုံးလိုက်တဲ့အထဲမှာ ပါသွားလို့၊ ဒုတိယကမ္ဘာစစ်မဖြစ်ခင်တနှစ်မှာ ကျုပ်တို့အဖိုးဆုံးသွားတယ်။ ကုသိုလ် ကံကောင်းတယ်လို့ပဲ အောက်မေ့ရတော့မှာပေါ့။ စစ်ရဲ့အနိဌာရုံတွေနဲ့ မကြုံရမတွေ့ရတော့ဘူးပေါ့။ နော့မို့ဆိုဒုက္ခ။ အဖိုးကအဖွါး ထက်အသက်အများကြီးကြီးတာ။ ကောင်းကောင်းလဲ ကျန်းမာလှတာမဟုတ်ဘူး။ ပြီးတော့ အဖိုးကတောသားလဲမဟုတ်ဘူး၊ ဘိုးစဉ်ဘောင်ဆက် အရှင်သခင်ဘုရင့်အမှု တော်ထမ်းလာတဲ့မျိုးရိုး။

အင်္ဂလိပ်လက်အောက်မှာ မလုပ်မနေရအလုပ်ဝင်လုပ်ရတော့လဲ ‘၈’ မှတ်ဂတ်တဲမှာ ပထမ ‘ဆပ်’ ကလေး။ နောင်အင်စပက်တော် ခုခေတ်အ ခေါ်တော့ရဲမှူးနေမှာပေါ့။ ဘုရားစင်ဘက် ခေါင်းရင်းနံရံမှာချိတ်ထားတဲ့ အဖိုးရဲ့ဓာတ်ပုံကရယ်ရတယ်။ ကာကီရောင်ရှပ်လက်တို ကာကီရောင်ဘောင်းဘီတိုသားရေခါးပတ်နဲ့။ ခြေထောက်မှာကလဲ အညိုရောင်သက္ကလပ်ပတ်ကြီးနဲ့ အကျအနပါ။ ဖိနပ်ကလဲ အခု ခေတ်စစ်သားတွေ စီးရတာမျိုးလို အစိုးရခြေနင်းပါပဲ။ ဒါပေမယ့် ဘောင်းဘီတိုက ထိုးကွင်းတွေကို လုံအောင်မဖုံးနိုင်ထားနိုင်တဲ့အပြင် ခေါင်းပေါ်မှာကလဲ ဦးထုပ်မဆောင်းထားဘူး။ ‘ရောင်’ နဲ့ဆိုတော့ ကိုယ်တိုင်ပေါင်းရတဲ့ ပန်းရောင်ပိုးပုဝါခေါင်းပေါင်းနဲ့။ ဒါပေမယ့် ကျုပ်တို့အဖိုးကို ပေါ့သေးသေးမထင်နဲ့။ အစိုးရကချီးမြှင့်ထားတဲ့ နာမည်ကောင်းလက်မှတ်နဲ့ လက်ကိုင်ဒင်မှာ နာမည်ရေးထိုးထားတဲ့ ၄၅ ဗို့ ခြောက်လုံးပြူး တလက်လဲရှိတယ်။ နောက်တော့ ဘယ်အ လိုတော်ရိက လက်ထောက်ချလိုက်လို့လဲမသိဘူး။ ဂျပန်ခေတ်ရောက်လာလို့မကြာ ခင်မှာပဲ ဗမာလူမျိုးစကားပြန်နဲ့ပါလာတဲ့ ဂျပန်စစ်ဗိုလ်တကောင်က လက်နက်အပ်ပါဆိုလို့… မြေကြီးထဲ မြုပ်ဝှက်ထားတာကိုဖေါ်အပ်လိုက်ရတာပဲ။ အဖွါးကတော့ ယောက်ျားနာမည်ပါတဲ့ တခုတည်းသောအမွေပစ္စည်းအနေနဲ့ တတ်နိုင်ရင် သေတပန် သက်တဆုံးသိမ်းထားချင်မှာပေါ့၊ မျက်ရည်ကျသေးတယ်။ အဲသည်တုန်းကအဖိုးလည်းမရှိတော့ပါဘူး။ အခုလည်းအဖိုးမရှိတော့၊ သေနတ်လည်း မရှိတော့ပေမယ့် အဖွါးနဲ့ကျုပ်တို့မိသားစုအားလုံး မျက်နှာမငယ်ရပါဘူး။ အရှေ့တောဆိုတာက အဖွါးရဲ့ဇာတိ ချက်မြှုပ်လေ…။ ဆွေတွေမျိုးတွေဆိုတာက လက်ညိုးထိုးမလွဲပဲဥစ္စာ။ အခုလိုစစ် ဘေးဒုက္ခရောက်ရလို့ မင်းပြောင်းမင်းလွဲ ဖြစ်လို့သာမြို့ပေါ်က အထည်ကြီးကိုဖျက်ပြီး ခေတ္တယာယီဇာတိရပ်ရွာမှာ ပြန်လာခိုလှုံ တာကို… ဘယ်အဆွေအမျိုးကမသိုင်းဝိုင်း မပံ့ပိုး မကူညီ မဖြည့်စွမ်းပဲနေပါ့မလဲ။ ပြီးတော့လဲ ပြန်ပြောင်းအောက်မေ့ဘွယ်… အဲသည်ခေတ်တုန်းက လယ်ပိုင်ရှင်ဆိုတာ သူရင်းငှား သားချင်းလယ်သမားတွေရဲ့ အမြင်မှာက ကျေးဇူးရှင်ရယ်လို့ သတ်မှတ်ယူဆ ထားတတ်ကြတာမဟုတ်လား။ ဆိုတော့ကာ အဖွားဇာတိပုသိမ်ကြီးအပါ အဝင်ဇီးချိုကုန်း၊ သစ်ချိုကုန်း၊ ညောင်ပင်သာ၊ ချောင်းပန်း၊ နှမ်းကြဲ အစရှိတဲ့ရွာအားလုံးက သူတို့ရွာမှာလာနေကြဖို့ အလုအ ယက်နေရာတွေပေး ဖိတ်ခေါ်ကြိုဆိုကြတာပေါ့၊ ရွာစုံကလှည်း ၁၆ စီးနဲ့ ညမှောင်ခိုက်မှာ မြို့ကအိမ်ရှိပစ္စည်းတွေ တိုက်လာကြတော့ တချို့က သူတို့ရွာမှာလာနေစေချင်တဲ့ဆန္ဒနဲ့ မပြောမဆို ကိုယ့်ရွာကိုယ်မောင်းသွား လိုက်ကြတာ လူတွေလဲကွဲ၊ ပစ္စည်းတွေလဲပြန့်ကုန်။ နောက်တနေ့ မိုးလင်းမှမနည်း လိုက်ပြန်စုယူရတယ်။ အဖွားကတော့သူ့ဇာတိရွာ ပုသိမ်ကြီးက အိမ်ခြေလဲများ စစ်ပြေး သူစိမ်းတွေကလဲများလို့ ကြပ်နေပြီး၊ မြို့နဲ့လဲမော်တော်ကားလမ်း ပေါက်နေတဲ့အတွက် ကြောက်သတဲ့။ ဒါပေမယ့်ပုသိမ် ကြီးနဲ့ လဲတတိုင်လောက်ပဲဝေး၊ နည်းနည်းအတွင်းဘက်ကျပြီး၊ ရွာနံဘေးမှာလဲဆယ့် နှစ်ရာသီရေမပြတ်တဲ့ ဆည်မြောင်းချောင်းကလေးရှိတဲ့ ဇီးချိုကုန်းရွာကို ရွေးလိုက်တယ်။ ဘာမှမဟုတ်ဘူး။ မသိရင်ခက်မယ်။ ဇီးချိုကုန်းရွာသူကြီး ဦးမောင်ချိုဆိုတာကသူ့နိုင်ဖက်။ သူ့ကိုသာဆိုရင်ပြားပြားမှောက်ကြောက်ရတဲ့ ငယ်ကြောက်။ ပြီးဇီးချိုကုန်းမှာ အချမ်းသာဆုံးလယ်ပိုင်ရှင် ကြီးတွေဖြစ်နေကြတဲ့ အဖွါးဒေါ်မမတို့ ဘ ကြီးဦးစံပင်တို့ ဆိုတာကလဲ အဖွါးရဲ့ ငယ် ပေါင်း၊ ကြာနီကန်ဆရာတော့်ကျောင်းမှာ စာအံဖက်တွေလို့ပြောတယ်။ ပြီးရေကန်အသင့် ကြာအသင့်ဖြစ်ချင်တော့၊ အဲသည်နှစ် ယောက်နေကြတာကလဲ ရွာ့တောင်ဖျားမှာ ခြံစည်းရိုးချင်းကပ်ရက် ဘာခဲယဉ်းတော့သလဲ။ နှစ်ခြံခွပြီး မြေလွတ်နှစ်ဧကလောက် ရအောင် စည်းရိုးဖျက် ခုတ်ထွင်ရှင်းလင်းလိုက်ကြတယ်။ ပြီး လောင်းရိပ်လွတ်တဲ့ ကွက်လပ်အလယ်မှာ ခြောက်ပင်သုံးခန်း သက်ငယ်မိုးဝါးထရံကာ ဝါးပိုးကြမ်းခင်းတဲ့ တန်းလျားရှည်ကြီးထိုးတာပဲ။ ဗမာ့တောရွာဓလေ့ သတင်းမေးလာသမျှ လက်ပေါင်းစုံအင်အားနဲ့ ဝိုင်းဝန်းဆောက်လုပ်လိုက်ကြတာနေ့ချင်းပြီး အိမ်ယာပေါ့။ ခိုင်မှခိုင်ခန့် မှခန့်။ အဲ… စစ်အတွင်းမှာ အလိုအပ်ဆုံးဖြစ်တဲ့ ဗုံးခိုကျင်းကိုတော့ မြို့နဲ့လဲဝေးပြီး လေ ယာဉ်ပျံမဲမဲကြီးတွေလဲ ခေါင်းပေါ်အဝဲကျဲ လာပြီဆိုပြီး၊ နေ့ရွှေ့ညရွှေ့နဲ့ တော်တော်နဲ့ မတူးခိုင်းဘူး။ တူးပြန်တော့လဲ တဲကြီးရဲ့မျက်နှာစာ ခပ်လှမ်းလှမ်းက နေ့ခင်းဘက်ချက် ပြုတ်စားသောက်ကြရာ ခန်းမဆောင်လို့ဆိုရမယ့် မန်ကျည်းပင်အုပ်အရိပ်အောက်မှာ တထောင်သာသာလောက်ပဲ နက်တဲ့ကျင်းတိမ် ကလေးပဲကရော်ကမယ်တူးတယ်။ ကျင်းကလူ ဆင်းထိုင်ရင်ခေါင်းမြေပြင်ပေါ်မှာလေ။ ခက်တာက သည့်ထက်နက်အောင် တထွာတမိုက်ထပ်တူးလိုက်မယ်ဆိုရင်ကိုပဲ ရေထွက်လာတော့တယ်တဲ့။ သည်တော့ အောက်မနှိုက်နဲ့။ ကျင်းပတ်ပတ်လည်မှာ တောင်ဆုပ်လောက် တိုင်တွေအပြည့်စိုက်။ ပြီး အပြင်ဘက်ကနေ ထန်းလုံးတွေဆင့်ကာ။ အမိုးလဲထန်းလုံးထက်ခြမ်းခွဲတွေနဲ့အခြင်ပစ်။ ပြီးအပေါ်ကမှ လှည်းကြမ်းခင်းတွေနဲ့တထပ်၊ ဝါးကြောဖျာကြမ်းတွေနဲ့တထပ်၊ နှစ်ထပ်ထပ်ခင်းသည့် အပေါ်ကမှ မြေတွေဖို့။ ကျင်းပတ်ပတ်လည် လဲမြေဆိုင်ခဲတွေနဲ့ရံ၊ တနေ့တခါ မြေသိပ်အောင်ရေ ဖျန်းပေး။ အဲဒါပဲ။ ခုနေကျင်းထဲဝင်ထိုင်ရင် ခေါင်းတော့ကောင်းကောင်း လွတ်ပါတယ်။ သာမန်ကြည့်လိုက်လို့ကတော့ ထန်းပင်မြစ်စိုက်ရောင်းဖို့ မြေဖို့ထားတာအောက်မေ့ရမယ်။သိတယ်နော်…။ ထန်းပင်မြစ်ဆိုတာ ကြွေကျတဲ့ ထန်းသီးမှည့်တွေထဲက ထန်းသီးစေ့တွေကို ဖို့မြေပွပေါ်မှာမှောက်စိုက်တာပေါ့။ မြေထပ်ဖုံးစရာမလိုဘူး။ ဒါပေမယ့်စိုက်ခါစမှာတော့ မိုးတပြိုက်နှစ်ပြိုက် ကြိုက်တတ်တယ်။ ပြီးတမိုးတွင်းလုံး ပစ်ထားလိုက်ရုံပဲ။ အဲ… ဆောင်းတွင်းရောက် ပြီဆိုတော့မှ ဖို့မြေတောင်ပို့ကို ဘေးကနေတဖြေးဖြေးချင်းဖဲ့ပြီး လိုသလောက်ဖြိုယူရုံပဲ။ မှတ်မိကြပါတယ်နော်။ ဆောင်းချမ်းခိုက်မှာ မီးဖိုဘေးက မီးလှုံကြရင်း ဖုတ်စားကြတာလေ။ ဆီကလေးဆားကလေးနဲ့ တို့စားရင် အရသာရှိမှရှိ။ အဲ… ကြုံကြိုက်ချင်တော့ ကျုပ်တို့ဖို့မြေတောင်ပို့ ဗုံးခိုကျင်းလဲတူး ပြီးပါလေရော။ မိုးကလဲအုံ့မှိုင်းထစ်ချုန်း ရွာချပါလေရော။ ရယ်ရတယ်။ ကျုပ်တို့ ဗုံးခိုကျင်းလဲ အသူရာသကြားမင်းရဲ့ စစ်တလင်းမှာ ချက်ချင်းလက်ငင်း ငါးမွေးကန်ဖြစ် သွားပါလေရော။ ကျင်းရဲ့အောက်ခြေမြေက သဲကျောက်စရစ်ဆိုတော့ အပေါ်ကဖုံးထားတဲ့ ထန်းလုံးတွေရဲ့ဖိအားကြောင့် ကျင်းနံရံတွေပါအိကျပြီးပြိုတော့တာပေါ့။ လုံးဝသုံးမရတော့ဘူး။ ဒါပေမယ့်တော်သေးရဲ့။ သိတယ်နော်…။

မန္တလေးဆိုတာ မိုးခေါင်ရေရှားရပ်ကိုး။ ပူတယ်လေ၊ ဆယ်နေကဲကျဲကျဲတောက်ပူတော့တာပေါ့။ တပတ်ဆယ်ရက်နဲ့ခြောက်သွားတော့ ပြန်ပြင်တူးပြီး ပိုခိုင်ခိုင်တောင့်တောင့်ဆောက်ကြတာပေါ့။ မြတ်စွာဘုရား တန်ခိုးတော်နဲ့ သမ္မာဒေဝနတ်ကောင်းနတ်မြတ်တွေက သတိပေးတာလို့ပဲ အောက်မေ့ကြပါတယ်။ အဲသည်လို ပိုအခိုင်အခန့်လုပ်လိုက်လို့သာပေါ့။ မဟုတ်ရင်သေကုန်ပြီ။ ဘယ့်နှယ် မန္တလေးကို ပြန်သိမ်းတော့မြို့ကို မြောက်ဘက်ကနေ ဂဏန်းလက်မပုံစံနဲ့ ပတ်ညှပ်ပြီးဝင်တာထင်ပါရဲ့။ အင်္ဂလိပ်တွေလား အမေရိကန်တွေလားမသိ။

ကျုပ်တို့ အရှေ့တောတလျှောက်လုံးကိုလဲ အ မြောက်ကြီးတွေနဲ့ သခင်မတောင်ဘက်က လေးငါးနာရီလောက် လှမ်းထုလိုက်တာရ စရာကိုမရှိဘူး။ ကျုပ်တို့ရွာတွေဝန်းကျင်မှာ ဂျပန်ဖြင့်တကောင်မှမရှိပဲနဲ့၊ လက်နက်ကြီး အင်အားမတန်တဆသုံးပြီးဖြို့ခွင်း မောင်းထုတ်လိုက်တာ ပြောပါတယ်။ ရွာစဉ် တလျှောက်မှာ မြောက်ပိုင်းကျတဲ့ဆင်ရွာကြီးတို့ ညောင်ပင်သာတို့ ကျုပ်တို့ဇီးချိုကုန်းတို့ဆိုတာ ဆိဆိညက်ညက်ကျေပေါ့။ ကျုပ်တို့တဲအိမ်ကြီးလဲ အမြှောက်ကျည်ဆံဗုံးတွေ မှန်ထားလိုက်တာပွစိတက်။ အိမ်တိုင်တတိုင်မှာလဲ ထင်းခွဲဓါးမလောက်ရှိတဲ့ ဗုံးဆံ ကြီးတဆံက စိုက်ရက်။ ဗုံးခိုကျင်းပေါ်မှာကလဲ ပြတ်သတ်ကျလာတဲ့ သစ်ကိုင်းတွေသစ်ခက်တွေဆိုတာ ထင်းလှည်းတိုက်လာရပ်ထားသလိုပဲ။ အဲ… ကျုပ်တို့လူတွေအားလုံးလဲ တညနေ နဲ့တညဦးလုံး ဘယ်ခေါင်းဖေါ်ရဲကြပါ့မလဲ။ သမ္ဗုဒ္ဓေတွေ အမြီးအမောက်မတည့် တ ယောက်တပေါက်ရွတ်ကြပြီး တုတ်တုတ်မှ မလှုပ်ရဲကြဘူးပေါ့။ နားတွေလဲအူ၊ ဇောချွေး တွေလဲပြန်၊ လက်ဖျားခြေဖျားအေးကြလို့ပေါ့။ ခေါင်းထဲကိုယ်ထဲမလဲ ဖုတ်သဲတွေအလိမ်းလိမ်းနဲ့ပေါ့။ ရေငတ်ပေမယ့် ရေကိုဘယ်သူကထွက်ယူရဲပါ့မလဲ။ အဲညမိုးချုပ်တော့မှ အမြောက်သံတွေစဲသွားပြီး စက်သေနတ်သံတွေ သေနတ်သံတွေ ကြားရတယ်။ ဘယ်သူတွေက ဘယ်သူတွေကိုပစ်နေမှန်းလဲမသိ။ ဘယ်လှုပ်ရဲပါ့မလဲ။ ဒါပေမယ့် ကျင်းဝမှာ လူမဲမဲကြီးနှစ်ကောင်လာရပ်ပြီး သေနတ်နဲ့ချိန် အကုန်အပြင်ထွက်ခိုင်း တယ်။ ကျုပ်တို့တတွေဆိုတာမေးခိုက်ခိုက်ရိုက်ရက်၊ လက်အုပ်ကလေးတွေချီ မျောက်တွေလို ထွက်ကြရတာပေါ့။ ကျုပ်တို့မိသားစုက အင်္ဂလိပ်လိုပြောနိုင်တော့ သူတို့အတော် သဘောကျသွားတယ်။ ဘာမှမဟုတ်ဘူး။ ဂျပန်သတင်းမေးတာပေါ့။ သည်ရွာတဝိုက်မှာ ဂျပန်တယောက်မှမရှိပါဘူးပြောတော့မှ ပြန်ထွက်သွားကြတယ်။ အဲသည်တော့မှပဲ ကျုပ်တို့အားလုံးလဲ သက်ပြင်းချ နိုင်ကြတော့တယ်။ အဲသည်တော့မှ ရေငတ်မှန်း ဆာမှန်းသိကြတော့တယ်။ ဒါပေမယ့် ထမင်းမရှိ၊ ဟင်းလဲမရှိတော့ဘူး။ ထမင်း အိုးကြီးကလည်း စလောင်းဖုံးလွင့်သွားပြီး ဖုံတွေ အမှိုက်တွေ နန်းချင်းဖုံးလို့။ မန်ကျည်းပင်မှာ ကပ်စင်ရိုက်ပြီး တင်ထားတဲ့ သောက်ရေအိုးနှစ်လုံးကလဲ ကျကွဲလို့။ သံပန်းကန်ပြားအဖုံးနဲ့ အုန်းသီးဆံရေမှုတ် တွေကိုတော့လိုက်ရှာကောက်ယူရတယ်။ တော်သေးရဲ့။ သောက်ရေထည့်လှောင်ထားတဲ့ စဥ့်အိုးကမြေကြီးထဲ အထိုင်မြုပ်ထား တဲ့အတွက်မကွဲလို့။ အင်ဒုံအဖုံးကိုလှပ်ပြီး၊ ရေမှုတ်နဲ့ခပ်သောက်လို့ ရကြတယ်၊ ထမင်းကတော့ မစားကြရပါဘူး။ ထပ်ချက်ရအောင် ညကြီးမင်းကြီး မီးလဲမမွှေးရဲပါဘူး။ အမယ်… ကြက်တွေကတော့ မသေဘူးဟဲ့။ ဘယ်သွားပုန်းနေခဲ့ကြတယ်မသိဘူး။ လူသံ တွေကြားတော့ သူတို့အသံတွေလဲပြန်ကြားလာရတယ်။ လူတွေလဲခုမှဖုံတွေသဲတွေချွေး စေးတွေနဲ့ညစ်ပတ်ပေရေနေမှန်းသိပြီး၊ ရေချိုးချင်စိတ်တွေပေါ်လာကြတယ်။ ဒါပေမယ့် ချိုးစရာရေ ဘယ်မှာရှိမှာလဲ။ ထုံးစံအတိုင်းခါတိုင်းလို ရွာ့ပြင်ထွက်ပြီးချောင်းထဲ ခုန်ချ ရေချိုးရအောင်က ဘယ်ထွက်ရဲပါ့မလဲ၊ ကျုပ်တို့ကလေးတွေဆိုတာ နားအူလဲမပျောက်၊ အကြောက်လဲ တော်တော်နဲ့မပြေတော့၊ အမေတွေအနားကပ်လို့။ အေး လေ…ဘာပဲပြောပြော စစ်ကြောင်းကျလို့ရွာတွေအိမ်တွေ သာညက်ညက်ကြေပေမယ့် မီးလဲမလောင်၊ လူလဲအထိအခိုက်အသေအပျောက်လုံးဝမရှိပါဘူး။ တခုတော့ရှိတယ်။ နွားတော့လေးကောင်တောင် အမြောက်ဆံ မှန်ပြီးသေတယ်။ နောက်တနေ့ တရွာလုံးအမဲသားပေါ်တော့တာပေါ့။ ဆိုတော့ကာ… အခုမှဆရာကြင့်တန်ဖိုး ကိုသိကြရတော့တယ်။ ဆရာကြင်ကတော့ မရှိတော့ပါဘူး။ သွားပြီပဲ။ ဒါပေမယ့် သည်အရှေ့တောဘက်ပြောင်း ပြေးခိုလှုံကြမယ် ဆိုတုန်းက၊ မေမေကြီးကြီးကတဆင့် ဆရာကြင်ကတွက်ချက်ပြီးသတိပေးတယ်။ မြို့ရဲ့ အရှေ့မြောက်အရပ် တနင်္ဂနွေတောင့်က နဂါးလှည့် မသင့်ဘူးတဲ့။ မပြောင်းကောင်းဘူးတဲ့။ ဒုက္ခတွေ့နိုင်တယ် ပြောသားပဲ။ ဒါပေမယ့် ဆရာကြင့်စကားကို ဘယ်သူကမှအယုံအကြည်မရှိကြဘူး။ တောကို သူမလိုက်လာချင်လို့၊ မေမေကြီးကြီးတို့ သားအမိကိုပစ်သွားချင်လို့၊ သူ့ဇာတိ မြေလတ်မြို့ကလေးကိုသူပြန်ပြေး ချင်လို့ သက်သက်မဲ့ ရမယ်ရှာကပျက်ယပျက်လုပ်တာလို့ပဲ ထင်ခဲ့ကြတယ်၊ အဖွါးကတော့လူ ကြီးမိဘတယောက်နေနဲ့ နားလည်ခွင့်လွှတ်လိုက်တယ်။ စစ်အတွင်း ဘယ်သူမှအလုပ် မရှိကြ၊ ဝင်ငွေမရှိကြဘူးမဟုတ်လား။ အဲတော့ အားနာတာလဲပါ၊ ရှက်တာလဲပါ ကောင်းပါမယ်ပေါ့။ ပြီးကြီးကောင့်ကြီးမားနဲ့ ယောက္ခမထမီနားလဲ ခိုမစားချင်ဘူးထင် ပါရဲ့ပေါ့။ ဝင်မပါဘူး၊ လက်ပိုက်ကြည့်နေလိုက်တယ်။ နော့… သားမက်နဲ့ယောက္ခမရဲ့ အသက်ချင်းကလဲ ဆယ်နှစ်သာသာလောက်ပဲကွာတာကို။ ကျုပ်တို့မေမေကြီးကြီးကလဲ တသက်လုံးမခွဲဖူးတဲ့ အမေကိုပစ်ပြီး၊ လင့်မယားကြီးရှိရာအရပ်ကို ဘယ်လိုက်ပါ့မလဲ။ ဆိုတော့ကာ… ကွဲကြလေသတည်းပေါ့။ အိမ်မကြီးရဲ့ဘယ်တောင်ပံက အိမ်ထောင် ရေးကံဇာတာညံ့တယ်လို့ပဲ ပြောရတော့မှာပေါ့။ ညာတောင်ပံတောင်ညာစံဒေဝီတွေရဲ့ သားမက်တွေကတော့ မဆိုးပါဘူး။ အနည်းဆုံး ထင်းခွဲရေခတ် ဟင်းရှာသီးနှံစိုက်ပေါ့။ ရွာဦးကျောင်း အဝီစိတွင်းကသောက်ရေ သုံးရေကိုနေ့စဉ် ဆယ်ထမ်းဆယ်ခေါက်လောက် ခပ်ရတယ်ဆိုတကလဲ လွယ်တာမှတ်လို့။

အိမ်နဲ့ကျောင်းနဲ့က တပြခွဲလောက်ဝေးတာ တယောက်တခေါက်အလှည့်နဲ့ထမ်းကြရတာ။ တွင်းကလဲ ဘယ်လောက်နက်သလဲဆိုရင် ရေကိုငုံ့ကြည့်လို့မမြင်ရဘူး။ ပြီးတော့ အမျိုးသမီးတွေလဲခပ် ခွင့်ငင်ခွင့်တွင်း ဘောင်ရပ်ခွင့်မရှိဘူး။ ကျုပ်တို့ အမေတွေအုပ်စုကတော့၊ ချက်ပြုတ် လျှော်ဖွပ်တာဝန်တွေအပြင် တတ်တဲ့ပညာမနေသာဆိုသလို ပါလာသမျှ သိုးမွှေးထည်တွေကို ပြန်ဖြေပြန်လုံးပြီး ဝါးသီတံဇာထိုးအပ်တွေနဲ့ အင်္ကျီတွေ ခြုံစောင်တွေ ဦးထုပ်တွေပြန်ထိုးရောင်းကြပေါ့။ ဒါပေမယ့်စစ်အတွင်းမှာ ဘယ်ကသိုးမွှေးချည်ခင်အသစ် ဝယ်လို့ရမှာလဲ။ ကုန်တော့အလုပ်ပြုတ်ပေါ့။ ပြဿနာကဆန်ဆီဆာစသည့်အခြေ ခံစားကုန်ကမပူရပါဘူး၊ ဦးလေးကျောက် (ပွဲစား) ကကြက်တွေမွေးထားလို့ ကြက်ဥ လဲအလျှံပယ်စားရပါတယ်။ ဒါပေမယ့်စစ်ဒဏ်အမြောက်ကျည်ဒဏ်က တချီတည်းနဲ့ သေလုမျောပါးခံလိုက်ကြရတော့၊ နောက်တကြိမ်ကြော့လာရင် ဘယ်နှယ်လုပ်ကြပါ့မလဲပေါ့။ လူကြီးတွေ ခေါင်းချင်းဆိုင်တိုင် ပင်ကြတယ်။ ခုနေရတာက မနက်မိုးလင်းလို့ အိပ်ရာကနိုးတာနဲ့ တပြိုင်နက်ကိုယ့် ခေါင်းကိုယ်ဘီးစမ်းသလို ပြန်စမ်းကြည့်နေရတဲ့ဘဝတဲ့။

ခေါင်းနဲ့ကိုယ်တဆက်တည်း အိုးစား မကွဲသေးပါလား ဆိုတာသေချာမှ အသက်တရက်တော့ရှည်ပြန်ပဟဆိုပြီး သက်ပြင်းချလို့ ရသတဲ့။ ပြီးတော့လဲဦးလေးကျောက်ကအကြံပြု တယ်။ မန္တလေးတမြို့လုံးကလူတွေ အ နောက်ဖက်ကမ်းစစ်ကိုင်းတောင်ရိုးပြေး၊ ဘုရားရိပ် ကျောင်းရိပ် ခိုလှုံကြတာများတယ်၊ ခုဆိုရင်စစ်ကိုင်းတောင်ရိုးကချောင်တွေမှာ မြို့လိုစည်ကားနေပြီဆိုပဲ။ ဘုန်းကြီးတပါးဆီက သူသတင်းကြားလာသတဲ့။ စစ်ကိုင်းတောင်ရိုး အောက်ဖက်က ‘သရက်ပင်ဆိပ်’ တို့ အထက်ဖက်က ‘ဝါးချက်’ တို့ဆိုရင် ဈေးဆိုင်တန်းတွေနဲ့ဖြစ်နေပြီတဲ့။ ပြီး အောက်ပြေ အောက်ရွာက ရွက်လွှင့်ဆန်တက်လာကြတဲ့ ပိန်းကောမကြီးတွေနဲ့ အောက်ကုန်ငခြောက် ငခြမ်းတွေလဲ ရောက်လာ၊ အကြီးအကျယ်ဈေးကွက်ကြီး ဖြစ်နေတယ်ဆိုပဲ။ သူ့အနေနဲ့ အများကြီး အလုပ်လုပ်လို့ ရနိုင်တယ်ပြောတယ်။ ဆိုတော့ကာ…သူကစစ်ကိုင်းတောင်ရိုး ပြောင်းကြဖို့စည်းရုံးမဲဆွယ်တယ်။ ရာနဲ့ချီရှိတဲ့ချောင်တွေမှာ ထောင်နဲ့ချီရှိတဲ့ကျောင်း ကန်ဇရပ်တွေဓမ္မာရုံတွေလည်း ပေါပါတယ်ပေါ့။ ပထမဆုံးသူကိုယ်တိုင်ကူး စုံစမ်း လေ့လာစုံစမ်းလိုက်မယ်ပေါ့။

အဆင်ပြေရင်ပြောင်းနေကြဖို့ တခါတည်းစီစဉ်ဆောင်ရွက်ခဲ့မယ်ပေါ့။ သည်အချိန်မှာ ဘိုမေမေ့ယောက်ျား လေးလေးဘိုကလဲ အညံ့မခံပဲအကြံတခုထပ်တင်တယ်။ အခုအင်္ဂလိပ်လဲ ပြန်ဝင်လာပြီ၊ မကြာခင် တပြည်လုံးပြန်သိမ်းပြီး အုပ်ချုပ်ရေးယန္တရားက ပြန်စရင် ကျောင်းတွေလဲ မလွဲမသွေပြန်ဖွင့်မှာပဲပေါ့။ သည်တော့ချောင်တချောင်ကဓမ္မာ ရုံကြီးတခုခုမှာ ဆရာတော်တွေရဲ့ အကူအညီနဲ့ ကျုပ်တို့မိသားစုအပါအဝင် ကျောင်းတကျောင်း ကြိုတင်ဖွင့်နှင့် သင်ပြနေရင်မကောင်းဘူးလားပေါ့။ တောင်ရိုးကဘုန်းတော်ကြီးတွေ သီလရှင်ဆရာလေးတွေ ကို ကျောင်းသုံးပရိဘောဂတွေ အလှူခံမယ်ပေါ့။ နောင်အခါ အစိုးရ အသိအမှတ် ပြုကျောင်းလဲ ဖြစ်သွားနိုင်တယ်ပေါ့။ လေးလေးဘိုပြောသလို ကျုပ်တို့ကလေးတွေ စာနဲ့ဝေး ပညာရေး နောက်ကျခဲ့ရတာ လေးနှစ်ရှိပြီလေ။ လူကောင်တွေသာ ကြီးလာ၊ အတန်းတွေကငယ်၊ အတတ်တွေက နောက်ကျနဲ့ အတော်ကြိုးစားလုပ်ယူ ကြရမှာဆိုတာ မှန်တယ်။ တယောက်က လက်ငင်းစားဝတ်နေရေးပြေလည်ဖို့ရည်ရွယ်တယ်။ တယောက်က အနာဂတ်အတွက်ပါ ရည်ရွယ်တယ်။ အမှန်ကတော့ အဖွါးရဲ့ဆုံးဖြတ်ချက်တခုပါပဲ။ အဖွါးကအား လုံးရဲ့အမေ၊ အိမ်ထောင်ဦးစီးခေါင်းဆောင်ပဲ။ ပြဿနာကသည်အရှေ့တောမှာ ဆက်ပုန်းရှောင်နေလို့က ဘာအာမခံချက်မှမရှိဘူး။ ဆိုတော့ကာ… သားမက်နှစ်ယောက်ရဲ့ အဆိုကို အဖွါးက ခေါင်းညိတ်လိုက်ပါတယ်။ သွားကြ… မြန်မြန်လဲပြန်လာကြ… မှာပြီး လမ်းစရိတ်တွေပါ ထုတ်ပေးလိုက်တယ်။ ဂျပန်ငွေစက္ကူ အစိမ်းရောင်တရောင်တည်း ‘ထောင်မလဲသဲကော်ရ’ တွေ ပေါ့။ ပြီး သူပဉ္ဇင်းခံပေးခဲ့တဲ့ ဘုန်းကြီးဦးကောသလ္လရဲ့ ဗေါဓိချောင်မှာ အကျိုးအကြောင်း ပြောပြလျှောက်ထားပြီး တည်းခိုအကူအညီတောင်းဖို့ပါ စာရေးပေးလိုက်တယ်။ ဘာအခက် အခဲတွေစရာရှိသလဲ။ တပတ်မကြာခင်ချောချောမောမော ပြန်ရောက်လာကြတယ်။ မမြင်ရတာ ကြာလို့ မမှတ်မိချင်ချင်ဖြစ်နေတဲ့ အဖွါးရဲ့ အနှစ်သက်ဆုံး ငသိုင်းခြမ်းခြောက်ကြီးတွေလဲ ဂျုံထည့်တဲ့ပိတ်ဖြူ အိတ်နဲ့တအိတ်ပါလာတယ်။ ပြီးသ ရက်ပင်ဆိပ်နဲ့ သိပ်မဝေးတဲ့ ချောင်အတွင်းလမ်း မြင်းလှည်းဂိတ်အထက်နားက မောက္ခသီဝံချောင်ရွာနေမယ်ဆိုရင် နေဖို့ သီလရှင်ဇရပ်အောက်ထပ်ကြီး တထပ်လုံးလဲ ပါးစပ်စရံသပ်ခဲ့တယ်လို့ဆိုတယ်။ ဆိုတော့ ကာ… ဇာတ်လမ်းကိုတကြိမ် မြေကြောရှုံ့လိုက်ကြအုံးစို့ရဲ့။

ဆိုင်းမဆင့် ဗုံမဆင့်ဆိုသလို ဆွေကုန်မျိုးကုန်နှုတ်ဆက် မနေကြတော့ပဲ အစုတ်ပလုပ် စုပေါင်းထုတ် ခပ်ကုပ်ကုပ် ပြောင်းလာခဲ့ကြတယ်။ သိ တယ်နော်။ လှည်း ၁၆စီး တိုက်ပစ္စည်းနဲ့ လူတကျိပ်တယောက်ဆိုတဲ့ ဝန်နည်းနည်းမှမ ဟုတ်ပဲ။ ပြီးတော့ဧရာဝတီမြစ်ကို ဖြတ်ကူး ရတာက ‘ငှက်’ ကလေးတွေနဲ့ပဲကူးရတာလေ။ သည်အထဲ သံယောဇဉ်ကမဖြတ် နိုင်တော့၊ လူတွေနဲ့ယဉ်ပါးနေတဲ့လူတွေရဲ့ ထမင်းဝိုင်းမှာ အတင်းဝင်နှိုက်စားတတ်တဲ့ ဦးလေးကျောက်ရဲ့ ရွှေဒင်္ဂါးဘိလပ်ကြက်ကြီးဆယ်ကောင်ကလဲ ပါသေးတယ်။ ငှားလို့ရသမျှ ငှက်တွေနဲ့ ပိုက်ကျုံး ဆိပ်မြစ်ညာကကူးတာ တနေကုန်နဲ့မပြီးဘူး။ တော်သလင်း ဧရာဝတီကလဲ ကျယ်မှကျယ်ကို။ ဦး ပဉ္ဇင်းတွေလဲမနေရ၊ ဆရာလေးတွေလဲ တယောက်တလက်ပေါ့။ အေး…နောက်ဆုံးတော့ မေက္ခသီဝံမှာဆရာလေးဒေါ်ဓမ္မေသီရဲ့ ကျေးဇူးနဲ့အခြေကျကြရောဆိုပါတော့။ အဲ အဆင်ပြေ ချင်တော့ သရက်ပင်ဆိပ်က အတက်မှာပါပဲ။ ကျုပ်တို့မောက္ခသီဝံချောင်ရဲ့ တောင်ဘက်မှာ သံဃာတော်တွေသာ သီတင်းသုံးတဲ့ ခေမာသကချောင်ဆိုတဲ့ ဧရာမ နှစ်ထပ်ချောင်ကြီး တချောင်ရှိတယ်။ တောင်ကမ်းပါးယံစောင်းမှာဆောက်ထား တာဆိုတော့ မြေပြင်နဲ့ အညီထပ်မှာ သံဃာဆောင်တွေနဲ့ ဆွမ်းစားဆောင်စသည်ပေါ့။ တောင်ပေါ်ထပ်မှာကတော့ သိမ်တို့ ပိဋကတ်တိုက်တို့ ကမ္မဌာန်းဆောင်တို့ပေါ့။ အဲတရားနာပရိသတ်နှစ်ထောင်ကျော်ဆံ့ တဲ့၊ သို့မဟုတ်သံဃာအပါးငါးရာလောက် စာဖြေနိုင်တဲ့ မှန်စီရွှေချဓမ္မာရုံကြီးလဲရှိတယ်။

မလျှောက်ရပါဘူး။ ကလေးသူငယ်တွေရဲ့ ပညာသင်ကြားရေးအတွက် နေရာအခက် အခဲတွေ့နေကြတယ် သတင်းကြားတော့ ဆရာတော်ဘုရားကြီးဦးဉာဏောဘာ သာဘိဝံသက ကျုပ်တို့ လေးလေးဘိုနဲ့ ကျောင်းအုပ်ဆရာကြီးဟောင်း ဦးမင်းဟန်ကိုတနေ့ခေါ်တွေ့ပြီး ဓမ္မာရုံကြီးမှာ ယာယီကျောင်းဖွင့်ခွင့်ပြုလိုက်ပါတယ်။ ဆိုတော့ကာ… သီတင်းကျွတ်လထုံးစံ ကျောင်းပိတ်ရက်တွေလွန်တော့ ကျုပ်တို့တတွေကျောင်းသားဖြစ်ကြပေါ့။ ကျောင်းကြီးက ခန့်မှန်းပြောရရင် ကြက်တောင်ရိုက်ကွင်း ခြောက်ကွင်းသာလောက်ကို ကျယ်ပါတယ်။

ဒါပေမယ့်အခန်းဖွဲ့ကာထားတာမရှိ၊ ခန်းမကျယ်ကြီးပေါ့။ ပရိဘောဂလဲမရှိသေးတော့ မှန်ကြည့် လို့ရနိုင်လောက်အောင် ပြောင်လက်နေတဲ့ ကျွန်းလျှာထိုးကြမ်းပြင်ကြီး ပေါ်မှာပဲထိုင်ကြရ တာပေါ့။ နောက်တဖြေး ဖြေးနဲ့တော့ အတန်းတိုင်းအတွက် သစ်သား ကျောက်သင်ပုန်း ကြီးတွေ ရလာပါတယ်။ စစ်ကြည့်တော့ အရည်အချင်းအလိုက်လဲ အတန်းငါးတန်းခွဲ သင်ပြ ပါတယ်။ လုံးဝ ကျောင်းမနေဖူးသေးတဲ့ကလေးတွေက တတန်းသပ်သပ်ပေါ့။ ကျုပ်မှတ်မိသ လောက်တော့ ၁+၂+၃ က တတန်း၊ ၄+၅+၆ က တတန်း၊ ၇နဲ့ ၈က တတန်းနဲ့ ၉+၁ဝ က တတန်းအောက်မေ့တာပဲ။ အဲ နောက်နှစ်လသုံးလကြာလာတော့ထင်ပါရဲ့။ အစတုန်းကလို ကြမ်းပေါ်မှာစာအုပ်ချပြီး ကုန်းရေးစရာမလိုတော့ပါဘူး၊ တင်ရေးစရာခုံတန်းရှည်ကလေးတွေ လုပ်လှူကြတဲ့ အလှူရှင်တွေပေါ်လာပါတယ်။ ကျုပ်ကတော့စစ်မဖြစ်ခင်ကလည်းငါးတန်း၊ ခုပြန်တတ်တော့လဲငါး တန်းမှာပဲနေရပါတယ်။ ကျုပ်အမေက ‘ကျောင်းဆရာမရဲ့သား စာ မလိုက်နိုင်ရင် သိက္ခာကျမယ်’ ဆိုပြီး အတန်းတက် မထားပါဘူး။ ကျုပ်မှတ်မိသေးတယ်။ ကျုပ်နဲ့အတန်းဖေါ်သိန်းအောင်ဆိုတဲ့ကောင်က တနေ့အင်္ဂလိပ်စာ ဆရာမကို ထမေးတယ်။ာ.သ.အ.့.န.မ မိုးသားဆိုတာ ဘာလဲဆရာမတဲ့။ တတန်းလုံးရော တကျောင်းလုံးရော ပွဲကျသွားပါတယ်။ အဲသည်ကောင်နောင်အခါကြီးလာတော့ ဟံသာဝတီခရိုင် စက်ရှင်တရားသူ ကြီး ဖြစ်သွားတယ်။ အဲသည်တုန်းက အတန်းဖေါ်ပဲ။ ကြည်ညွန့်ဆိုတဲ့ကောင် နောင်အခါ စစ်ဗိုလ်ကြီးဖြစ်ပြီး သာသနာရေးဝန်ကြီးဌာနဝန်ကြီးဖြစ်တယ်။ အဲ သည်တုန်းက အတန်းဖေါ်ပဲအမြဲတန်းပြုံး ချိုနေတတ်တဲ့ မောင်စိုးဆိုတဲ့ကောင် နောင်အခါကွန်မြူနစ်ဖြစ်၊ တောခိုပြီးတောထဲမှာပဲ တိုက်ပွဲကျသလား၊ ငှက်ဖျားမိသေသလား မသိ၊ သတင်းအစအန ပျောက်သွားတယ်။ ကျုပ်မှတ်မိသမျှ ကျောင်းနေဘက်တွေကို ပြောပြတာပါ။ ကျန်တာတွေ တော့ နောင်တနှစ်မှာစစ်ကိုင်းမြို့ထဲကို ကျောင်းပြောင်း၊ ကျုပ်တို့လဲ မန္တလေးပြန်ပြောင်းနဲ့ လူချင်းလဲကွဲကုန်ကြရလို့ မေ့ကုန်ပါပြီ။ ဆိုတော့ကာ ပြောစရာကကျုပ်တို့ မေမေကြီးကြီး အကြောင်းပဲ ကျန်ပါတော့တယ်။ နော့… ကျုပ်တို့မိသားစုကြီးထဲမှာ ထူးခြား ပြောင်းလဲနေ တာက သူတယောက်ပဲရှိတာကို။ စစ်မဖြစ်ခင်တုန်းက လင်နဲ့သားနဲ့ အိမ်ထောင်ပြည့်။ လူလဲအကောင်းပြကတေ့။ ဟောစစ်မီးလဲငြိမ်းရော။ နေရပ်ဟောင်းကို ပြန်ပြောင်းကြမယ် ဆိုတော့ အနားမှာယောက်ျားလဲမရှိတော့ဘူး။ သူ့ဆရာကြင်လဲစူဠလိပ်၊ တခါတည်းပြန်ပေါ် မလာတော့ဘူး။ မေမေကြီးကြီးလဲ မျက်စိလုံးဝမမြင်တော့ဘူး။ ဘယ်လိုဖြစ်သွားရတာလဲ ဆိုတော့စစ် ကိုင်းတောင်ရိုးက ငလျင်ကြောကျောက် တောင်မဟုတ်လား။ အောက်က ပူတာပေါ့။ သည်အထဲများသောအားဖြင့် ဖိနပ်ကလဲမ စီးဖြစ်တော့ ကျောက်ပူမိ ကျောက်ခိုး ရိုက်တာနေမှာပေါ့။ လူတိုင်းလဲသူ့လိုစီးလိုက် ချွတ်လိုက်နေကြရတာပါပဲ။ ဘာကြောင့် သူ့ကျမှရွေးဖြစ်ရသလဲဆိုတော့ ဝဋ်နာကံနာလို့ပဲ လူမတန်ပြောရမလားမသိပါဘူး။ သူ့ကျမှ ခြေဖဝါးတွေခြေဖနောင့်တွေက ပပ်ကြားတွေအက်ပြီး ကွဲကုန်သတဲ့လေ။ အဲဒါကို အရှေ့တောကလယ်သူမ ကောက်စိုက်သမတွေ ခြေထောက်ဝဲစားတော့ ကုလေ့ရှိကြတဲ့ ဇာတ်ကြမ်းတိုက်ဆေးမြီးတိုနဲ့ကုသတဲ့။ ကျောက်ပြင်ဖင်မှာ ရေနံချေးနဲ့ဆားကို ကျိတ်သွေးပြီး ခြေဖဝါးပပ်ကြားအက်တွေ ထဲထည့်သတဲ့။ ထွန့်ထွန့်လူးပေါ့။ ခံရတဲ့ ဝေဒနာက မျက်ရည်ပေါက်ကြီးငယ်တွေကျ၊ မသက်သာလှဘူး။ ဒါပေမယ့်ပျောက်သလားဆိုတော့၊ ဟုတ်နိုးနိုးငုပ်လျှိုးသွားတာနေမှာပေါ့။ လမ်းတော့ပြန်လျှောက်လာနိုင်ပါရဲ့။ ဒါပေမယ့် အထက်တက် မျက်စိလာခိုက်ပြီး၊မှုန်ရာက ဝါး… ဝါးရာကနေတ ဖြေးဖြေးနဲ့ လုံးဝကွယ်သွားရတော့တာပါပဲ။ အင်း… ကံကွက်ကျားပြီး သူ့မှရွေးဖြစ်ရလေတော့၊ ဒွေးရော ဥပါဒ်ရောဆိုသလို ကျုပ်တို့မေမေကြီးကြီးလဲ စိတ်ပါခပ်နောက်နောက် ဖြစ်သွားတော့တာပါပဲ။ အရင်ကဓမ္မစကြာတွေ ပဋ္ဌာန်းတွေသာ အစဉ်ရွတ်ဆို လေ့ရှိတဲ့ကလျာဏယုဝပါးစပ်… ခုတော့ ငယ်တုန်းကကြည့်ဖူးထားတဲ့ ဇာတ်ပွဲတွေထဲကသီချင်းတွေချည့် သံနေသံထားနဲ့ ပြန်ဆိုနေ တော့တာပါပဲ။ ကျုပ်အဖို့ကတော့… ဒုတ်ဆွဲတွဲပို့တွဲခေါ်နဲ့ ဆေးပြင်းလိပ်မီး ခဏခဏညှိပေးရ ကျိုးနပ်ပါတယ်။ ရှေးဇာတ် သီချင်းပေါင်းချုပ်စာအုပ်ကြီးအပိုင်ရထား လိုက်သလိုပါပဲ၊ အရှုံးထဲကအမြတ်ပြောပါတော့။

ဆိုတော့ကာ… ဇာတ်လမ်းကိုချုပ်ရရင် မေမေကြီးကြီးလဲ ခုတော့ဘယ်ရှိပါတော့မလဲ။ မေမေကြီးကြီးမပြောပါနဲ့၊ ကျုပ်အမေ့ မျိုးဆက်လဲတမျိုးဆက်လုံး ဆုံးကုန်ကြပါပြီ။ ကျုပ်တို့နို့စို့ ဖက်မောင်နှမသုံးယောက်ထဲကတောင် စိန်မေတယောက်ပြုတ်နှင့်ပြီ။ ‘စန်းငွေ’ နဲ့ ကျုပ်ပဲကျန် တော့တယ်။ အမယ် ကျုပ်တောင် မြစ်တယောက်ရနေပြီ။ မြစ်မကလေးကို သူ့အဖွါး ကျုပ်သမီး ‘အိမ့်’ က ကျုပ်နာမည်ပေးနည်းအတိုင်းလိုက်ပြီး တလုံးတည်းပေးထားတယ်၊ တနင်္လာသမီး မို့… ‘ခ’တဲ့။ သူမသိဘူးရယ်။ ‘ခ’ဆိုတာ သူမမှီလိုက် မတွေ့ဖူးလိုက်ရတဲ့ ကျုပ်တို့ မေမေကြီးကြီးရဲ့နာမည်။ မေမေကြီးကြီးရဲ့ ငယ်နာမည်က ‘မခ’…။ ကြီးလာတော့ ‘ဒေါ်ခ’…ပေါ့။

မောင်သာရ


မှတ်ချက်။ ။ မန္တလေးဂေဇက်ဒီဇင်ဘာလထုတ် (၂ဝဝ၉) တွင် ပုံနှိပ်ဖေါ်ပြပြီးဖြစ်သည်။
သရုပ်ဖေါ်ပုံကို ပန်းချီသန်းဌေးမောင်မှ ရေးဆွဲပါသည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:၀တ္ထုတို

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

ဒီလို ကြော်ငြာချင်သလား

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ် ထွက်ပြီ

By

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်