မောင်ရင်ငတေ ● ပင်လယ်မရှိတဲ့ မြေကမ္ဘာသို့ စာစု (ပိုလန်နယ်စပ်သို့ တညအိပ် – အပိုင်း ၂)

January 9, 2018

မောင်ရင်ငတေ ● ပင်လယ်မရှိတဲ့ မြေကမ္ဘာသို့ စာစု (ပိုလန်နယ်စပ်သို့ တညအိပ် – အပိုင်း ၂)
(မိုးမခ) ဇန်နဝါရီ ၉၊ ၂၀၁၈

ပိုလန်နယ်သို့ အဝင်ဝ (ဓါတ်ပုံ မရငတ)

Polska
(Rzeczpospolita Polska) (Pologne) (Poland)
ပိုစကာ (သို့မဟုတ်) ပိုလန်
သူတို့ ဒေသခံတွေက Polska
အိမ်နီးချင်း ချက်တွေက Polsko
အိမ်နီးချင်း ဂျာမန်တွေက Polen
ပြင်သစ်စာ အသိုင်းအဝိုင်းက Pologne
အင်္ဂလိပ်စာ အသိုင်းအဝိုင်းကတော့ Poland

ပိုလန်နယ်စပ်သို့ တညအိပ် ပထမပိုင်းရေးခဲ့ရာမှာ ပရာဟာမြို့တော်ကနေ နယ်စပ်စည်းရောက်တဲ့အထိ စာမျက်နှာ ၂၉ မျက်နှာရှိသွားခဲ့လို့ ဒုတိယပိုင်းအဖြစ် ပိုလန်နယ်အကြောင်းစစ်စစ်ကို ဆက်ပြီးရေးပါမယ်၊ Salut Polska Witamy Polska ကြိုဆိုလှည့် ကြိုဆိုလှည့်ပါ “Polska”  “ပိုစကာ” ရေပေါ့…။

 

Road to Polska, Droga Wojewódzka  (DW368) ပိုလန်မြေသို့ အဝင်ဝ (ဓါတ်ပုံ မရငတ)

ပိုလန်မြေတော့ ရောက်လာခဲ့ပါပြီ၊ လမ်းအမှတ်ကလည်း DW368 ဖြစ်သွားပါပြီ၊ လမ်းကတော့ သိပ် အကောင်းကြီး မဟုတ်ပါဘူး၊ နှစ်လမ်းမောင်း ခပ်ကြမ်းကြမ်းသာပါ၊ လမ်းခလယ်က စည်းတောင်မရှိ ပါဘူး၊ DW368 နယ်စပ်အဝင်လမ်းကတော့ ဆယ်ကီလိုမီတာကျော်ကျော်ထိ မြို့မရှိ ရွာမရှိ အိမ်မရှိ လမ်းပါ၊ ထင်းရူးပင်တွေနဲ့သာ အုပ်မိုးထားတဲ့ တကယ့်နယ်စပ်လမ်းပါ၊ DW368 ဆိုတာက ပိုလန်လို Droga Wojewódzka ပါ၊ ဂူဂဲလ်မှာ ဘိုလို ဘာသာပြန်တာ ကြည့်တော့ Provincial Road No.368 ပြည်နယ်လမ်း အမှတ် (၃၆၈) လို့ ပြန်ပါတယ်၊ ပိုလန်လို Droga ဆိုတာက ကားလမ်းပါတဲ့။

လမ်းအမှတ် (၃၆၈) အဆုံးနားရောက်ခါနီး တောင်ဆင်းကွေ့တွေ လွန်လာခဲ့တော့ ထင်းရူပင်ပျိုတွေ အများအပြား စိုက်ပျိုးထားတာကို တွေ့ရှိရပါတယ်၊ တခြား ဘာ စိုက်ခင်းပျိုးခင်းကိုမှ မတွေ့ရှိရပါဘူး၊ လမ်းကတော့ နေရာတော်တော်များများမှာ ကားနှစ်စီး လွတ်သာရုံ ကျဉ်းကျဉ်းမြောင်းမြောင်းသာပါ၊ တချို့နေရာတွေမှာတော့ လမ်းဘေး သစ်ကိုင်းကြီးတွေနဲ့ ထိလုမတတ်ပါ၊ လမ်းအနေအထား ကြည့် ရုံနဲ့တင် ဒီလို နယ်စပ် ဝေးလံခေါင်ဖျား လမ်းကြမ်းတွေပေါ်ကို သူတို့ မြို့ကြီးသား ပိုလန်တွေတောင် ရောက်ဖူးကြမယ်လို့ မထင်မိသလို ရွှေပြည်တော်သားတွေထဲမှာလည်း ပိုလန်ရဲ့မြို့တော်ဝါဆောကို ရောက်ဖူးကြချင် ရောက်ဖူးကြမယ်၊ ဒီခရီး ဒီလမ်း ဒီဒေသ ကိုတော့ မောင်ရင်ငတေတို့ တသိုက်သာ ပထမဦးဆုံး ရောက်ဖူးကြသူများဖြစ်ဖို့ များလှပါတယ်လို့ ပြောဖြစ်ရင်း ရီမိကြပါသေးတယ်။

သို့သော်လည်း နယ်စပ်မျဉ်းဖြတ်သန်းလာတုန်းကလည်း ဘာအစစ်အဆေးမှမရှိသလို နယ်စပ်လမ်းတလျှောက်မှာလည်း လုံခြုံရေးနဲ့တူတာဆိုလို့ ရဲကားတစီးကို လမ်းဆုံတခုနားမှာရပ်ထားတာကိုသာ ဖျတ်ခနဲ မြင်တွေ့ရတာမို့ နယ်စွန်နယ်ဖျားဆိုပေမယ့် ဒီနယ်မြေက အတော်လေးအေးချမ်းမှု ရှိပါလိမ့် မယ်လို့ မောင်ရင်ငတေ ထင်မိကြောင်းပါ၊ ဒါတောင်မှ ရဲကားတွေ့ခဲ့ရတာ နယ်စပ်စည်းနားမှာမဟုတ် ပါဘူး၊ ပိုစကာမြေထဲသို့ ဆယ့်ငါး ကီလိုမီတာကျော်ခန့် ရောက်ပြီးမှ တွေ့ခဲ့ရတာပါ။

 

Road to Polska (DW369) (ဓါတ်ပုံ မရငတ)

လမ်းအမှတ် (၃၆၈) နဲ့ (၃၆၉) ဆုံတွေ့ပြီး တခဏမျှမောင်းရပါတယ်၊ (၃၆၉) လမ်းကလည်း ထိုနည်း တူပါ၊ လမ်းက ခပ်ကျဉ်းကျဉ်းသာပါ၊ ထင်းရူးပင်တွေချည်းသာပါ၊ လမ်းနဘေး ထင်းရူးပင်တွေ ကာရံ အုပ်မိုးထားတော့ ဘာရှုခင်းရူကွက်မှ ကောင်းကောင်းမမြင်ရပါဘူး၊ နေကလည်းမထွက်တထွက်သာ ဆိုတော့လည်း ပိုဆိုးတာပေါ့လေ၊ ကားထဲမှာ ဟီတာ ဖွင့်ထားတာတောင် အပြင်ဘက်ရဲ့ အေးစိမ့်မှု က သိသာလှပါတယ်၊ ဒါတောင် ဆောင်းအကုန်နွေအကူး ဧပရယ်လမို့သာပေ့ါ၊ ဆောင်းတွင်းစစ်စစ် သာဆိုရင်တော့ ပြောဖွယ်ရာ မရှိတော့ပါဘူး၊ ဒါကြောင့်လည်း ဒီလို အေးစက်စက် ခြောက်ကပ်ကပ် ကုန်းခေါင်ခေါင် တောတွေတောင်တွေကြားမှာ သူတို့ဒေသခံပိုစကီးတွေတောင်မှ မြို့ရွာလာမတည် ကြတာနေပါလိမ့်မယ်၊ နောက်မကြာခင် လမ်းအမှတ် (၃၆၇) ဆုံတွေ့ရပြန်ပါတယ်၊ လမ်းဆုံ ဆိုရပေ မယ့်လည်း ကွမ်းယာဆိုင်မရှိ အကြော်ဆိုင်မရှိ ကားစောင့်သူမရှိ ဆိုင်းဘုတ် သုံးလေးခုနဲ့ ကားတစီး ရပ်နားနေတာသာ တွေ့မြင်မိပါတယ်၊ လမ်းဆုံမှာ ခဏနားအမောဖြေ ချက်နယ်စပ်ဘက် ကုန်းတက် ကြီးကို အားစိုက်နင်းလို့တက်သွားတဲ့ စက်ဘီးသမားလေးငါးခြောက်ဦးကို တွေ့ရပါတယ်၊ စက်ဘီးစီး ဝတ်စုံပြည့်နဲ့မို့ ဒီဒေသသားတွေတော့ မဖြစ်လောက်ပါဘူး။

 

Road to Polska (DW367) (ဓါတ်ပုံ မရငတ)

လမ်းဆုံကျော်တော့ လမ်းအမှတ် (၃၆၇) အတိုင်း ဆက်လက်မောင်းလာကြပါတယ်၊ လူသူအရိပ်အ ရောင်တော့ တွေ့စပြုလာပါပြီ၊ နောက်ထပ် စက်ဘီးသမားလေးငါးဦး ချက်နယ်စပ်ဆီသို့ နင်းသွားကြ တာ တွေ့ရပြန်ပြီး ကားသုံးလေးစီးရပ်ထားတဲ့ ကွက်လပ်ကို ကျော်လွန်လာတော့ လမ်းကလည်း ပိုမို ကျယ်လာသလိုပါ၊ တောင်ခါးပန်း တခုကို ကွေ့ပတ်ဖောက်ထားတဲ့ လမ်းပြေပြေ နေရာရောက်တော့ ကားလမ်းမရဲ့ ဘယ်ဘက်အခြမ်းမှာ သာယာလှပတဲ့ ပိုစကာမြေရဲ့ သဘာဝအလှကို ဘွားကနဲလှမ်း မြင်တွေ့လိုက်ရပါတယ်၊ အလွန်တရာ လှပတဲ့ သဘာဝ ပန်းချီကား တချပ်ပါ။

တခြားတော့ မဟုတ်ပါဘူး၊ မနက်က တောင်ခြေသို့ ရောက်ခဲ့ပြီးမှ တောင်ထိပ်ပေါ် မတက်ဖြစ်ခဲ့ရတဲ့ Sněžka တောင်ထွဋ်ကို အတော်ကြီး ရှင်းရှင်းလင်းလင်း မြင်တွေ့လိုက်ရခြင်းပါ၊ ပထမတော့ သိပ်ပြီး ရှင်းရှင်းလင်းလင်း မြင်တွေ့ရခြင်း မဟုတ်သေးပါဘူး၊ လမ်းကွေ့တွေကများတာရယ် အပင်ကြီးတွေနဲ့ ကွယ်နေတာရယ် Sněžka ထက်နည်းနည်းနိမ့်တဲ့ SkalnyStół တောင်ကြီးက သူ့အရှေ့ကကွယ်နေ တာကြောင့်ရယ်ပါ၊ ဒီ Krkonoše တောင်တန်းတလျှောက် တောင်ထွဋ်ပေါင်း ဆယ်ခြောက်ခုရှိတယ် ဆိုပါတယ်၊ ချက်မြေမှာတော့ Sněžka တောင်က အမြင့်ဆုံးဖြစ်ပေမယ့် ပိုစကာမြေအရှေ့ဘက်ခြမ်း မှာတော့ ဒီထက် မြင့်တာတွေ အများကြီး ရှိပါတယ်တဲ့။

 

Road to Polska (Śnieżkę) (ဓါတ်ပုံ မရငတ)

Kowary ကိုဗာရရ် မြို့လမ်းခွဲ ရောက်ခါနီးလာတော့ မြေပြန့်နီးပါး ဖြစ်သွားခဲ့ပါပြီ၊ ရေခဲတောင်ကြီးကို အထင်းသား မြင်တွေ့ လာရပါပြီ၊ မောင်ရင်ငတေလည်း ဒီလမ်း ဒီခရီး လာရကျိုးတော့ နပ်ပါပြီဆိုပြီး အပင်ပန်းခံ ကားမောင်းပို့သူ ပရာဟာသား ချက်ကရီကြီးကို ကျေးဇူးအခါခါ တင်ရပါတော့တယ်။

မနက်က ချက်မြေဘက်ခြမ်းမှာ ဒီလောက်နီးနီးကပ်ကပ် ရှင်းရှင်းလင်းလင်း မမြင်တွေခဲ့ရပါဘူး၊ချက်ဘက်အခြမ်းက တောင်ကုန်းတောင်တန်း ပိုမိုပြီး ထူထပ်နေတာလည်း ပါတယ် ထင်မိပါရဲ့။ဒီရေခဲတောင်ကို ချက်လို Sněžka  ပိုလန်လို Śnieżkę  ရေးပါတယ်။ ဒါပေမယ့်လည်း နားမကောင်းတဲ့ မောင်ရင်ငတေကြားရတဲ့အသံအတိုင်း အနီးစပ်ဆုံး ရွှေစကားနဲ့ရေးရမယ်ဆိုရင်တော့ “စညေ့ရ်ှကာ” သာပါ။ ရွှေအဓိပ္ပါယ်ကတော့ ဆီးနှင်း ဖြူဖြူ ဆီးနှင်းဖြူ၊ နှင်းဖြူတောင် အမည်ရပါတယ်။

အဲဒီ Sněžka နှင်းဖြူတောင်က ချက်-ပိုလန် နှစ်နိုင်ငံ သဘာဝ နယ်စပ်စည်းအဖြစ် တည်ရှိနေတာပါ၊ အမြင့်ပေ ငါးထောင့်သုံးရာ (၁၆၀၀ မီတာ) နီးပါး မြင့်ပါတယ်၊ အဲဒီ အနီးနား တဝိုက်မှာတော့ အမြင့် ဆုံးသော တောင်ထွဋ်ပါ၊ တောင်တည်ရှိရာက ချက်မြေဘက်မှာ များပါတယ်၊ တောင်ထိပ်ပေါ်တက် ဖို့ လွယ်တာကတော့ ချက်ပြည်ထောင်စု ဘက်ကပါ၊ ပိုလန်ဘက်အခြမ်းကတော့ မတ်စောက်လှတဲ့ ချောက်ကမ်းပါးကြီးတွေကြောင့် အပေါ်ထိပ်ထိ ရောက်ဖို့က မလွယ်ကူလှပါဘူး၊ အဲဒါကြောင့်မို့ ရေခဲတောင်တက် စီးပွားရေးလုပ်ငန်းတွေက ချက်မြေဘက်မှာ ပိုမိုလွယ်ကူစွာ ဖြစ်ထွန်းလာခဲ့ကြဟန် တူ ပါတယ်၊ စစ်ရေးစစ်ရာမှာလည်း ဟိုးအတိတ်တချိန်က ချက်ကရီတွေအတွက် အရေးပါ အရာရောက် ခဲ့ပါတဲ့ ခံကတုတ် တခုလို့ ပြောစမှတ် ရှိခဲ့တဲ့ နယ်မြေပါ။


 

Road to Polska (Śnieżkę ,  Kowary) (ဓါတ်ပုံ မရငတ)

အမြင့်ပေ ၅၂၅၉ သာရှိတာမို့ သိပ်မြင့်လှပါတယ် မပြောနိုင်ပါဘူး၊ ပုပ္ပားတောင်ထက် ၂၇၉ ပေသာပိုမြင့်ပါတယ်၊ ဒါပေမယ့် မောင်ရင်ငတေတို့ ရောက်ခဲ့တဲ့ ဒီလိုဧပရယ်ကာလမှာ တောင်ထိပ်ပိုင်းနေရာ တော်တော်များများမှာ ဆီးနှင်းဖြူတွေ လှပစွာ ရှိနေဆဲပါ၊ ဆောင်းတွင်းကာလ ဂျန်နဝါရီ ဖေဖော်ဝါရီ ဆိုရင်တော့ တတောလုံး တတောင်းလုံး ဆီးနှင်းဖြူဖြူတွေနဲ့ ဖြူဖြူဖွေး နေမှာဖြစ်ပြီး အနှုတ် ၂၀-၂၅ ဒီဂရီကတော့ အသာလေးပါ၊ တောတောင်တွေ ဖွေးဖွေးဖြူနေပေမယ့် အလင်းရောင်ကို မြင်တွေ့ခွင့် ရနိုင်တာက မနက် ဆယ်နာရီ မွန်းလွဲ သုံးနာရီ အတွင်းလောက်မှာ သာပါ၊ လေတိုက်လွန်းလို့လည်း အအေးဓာတ် နှစ်ဆမက ပိုတတ်ပါတယ်၊ တခါတရံမှာ Jet Stream အနောက် လေအေးစီးကြောင်း ခပ်ကြမ်းကြမ်းလေး တိုက်ခိုက်လာပြီ ဆိုရင်တော့ အိမ်တွင်းပုန်းသာ နေကြရတော့ပါတယ်တဲ့။

သို့သော်လည်း ရာသီဥတု ဘယ်လောက်ဆိုးဆိုး ရေခဲတောင်တက် ပရိသတ်က တနှစ်ထက်တနှစ် ပိုပိုသာ များလာနေလို့ ပိုလန်သားတွေလည်း ပြောင်းလဲလာတဲ့ ခေတ်ကြီးနဲ့အမီလိုက် ရေခဲတောင် အမှီပြု စီးပွားရေးကို ချက်တွေထက် မသာသေး တောင် နောက်မကျန်ရစ်အောင် လိုက်လာနေပါပြီ။

ဆွစ်ဇာလန်နဲ့ ပြင်သစ်ကြီးတို့ရဲ့ မူလပထမ အဲလ်တောင်တန်းပေါ်က ရေခဲတောင်များကို တက်ဖို့က စရိတ်စကတွေ မြင့်မြင့်တက်လာတာကြောင့် ရေခဲတောင်တက်သမားတို့လည်း ဈေးသက်သာရာကို ရှာဖွေလာကြတာရယ် မရောက်ဖူးသေး တဲ့ဒေသများကို ရောက်ဖူးချင်ကြတာရယ်ကြောင့် ရင်းနှီးမြှုပ် နှံသူတွေအတွက် ဒီဒေသရဲ့ ရေခဲတောင် တဆယ့်ခြောက်လုံးကို မျက်စေ့ကျလာကြခြင်းပါ။ အဓိက အချက်ကတော့ ဒီဒေသရဲ့ အထွေထွေ ကုန်ဈေးနှုန်း သက်သာမှုကြောင့် ဖြစ်နိုင်ပါတယ်။


Road to Polska (Śnieżkę , DW367) (ဓါတ်ပုံ မရငတ)

(၃၆၆) လမ်းဆုံမှာကွေ့  ညာဘက် တောင်ဘက်ကိုချိုး Kowary မြို့စွန်ထွက်လာတော့ လမ်းက ပြန် ကျဉ်းသွားပါပြီ၊ မောင်ရင်ငတေတို့ကားက အရှေ့ကနေ အနောက်သို့ သွားနေတာဖြစ်ပြီး ကားလမ်း အရှေ့ ခပ်လှမ်းလှမ်းမှာတော့ တောင်တန်းတွေက ပေါ်လာလိုက် ပျောက်သွားလိုက်နဲ့ပါ။

မောင်ရင်ငတေတို့ ဦးတည်သွားမှာက ဒီဒေသရဲ့ အကြီးဆုံးမြို့ ခရိုင်မြို့ဖြစ်တဲ့ Jelenia Góra မြို့ကို ပါ၊ Kowary မြို့လေးကနေ (၃၆၇) လမ်းမက တိုက်ရိုက်ရောက်ပါတယ်၊ ဒါပေမယ့် ဘာကြောင့်ရယ် မသိပါဘူး၊ Jelenia Góra ကို သွားတဲ့ (၃၆၇) လမ်းကို ပိတ်ထားတာကြောင့် လမ်းအမှတ် (၃၆၆) မှ ပတ်သွားရပါတယ်၊ (၃၆၆) လမ်းဘက်ကနေ ပတ်သွားရတော့ မောင်ရင်ငတေ စိတ်ကြိုက်ဖြစ်ရတာ ပေ့ါလေ၊ ဒီနေရာက မြေပြန့်လွင်ပြင်ကျယ်ကြီး အလယ်မှာ တည်ရှိနေတာပါ၊ တောကျေးလက်လမ်း လေးတွေက တောကျေးရွာလေးတွေကြားက ကွေ့ကွေ့ကောက်ကောက်နဲ့ ပတ်ဝိုက် သွားရတာမို့လို့
လမ်းဖြောင့်ဖြောင့်တန်းနေတာ မရှိသလောက်ပါ။

မြေပြန့် လွင်ပြင်ကျယ်ဖြစ်လို့ စိုက်ခင်းပျိုးခင်းတချို့ကို တွေ့မြင်လာရပါတယ်၊ ခပ်သေးသေး ရွာလေး တွေ သုံလေးကီလိုမီတာ အကွာမှာ တရွာ တည်ထားသလိုမို့ စက်ဘီးစီးသူ လမ်းလျှောက်သူများကို တွေ့ရပါတယ်၊ ဘတ်စ်ကား ဂိတ်လေးတွေကို တွေ့ရပေမယ့် အများဆုံးမှ တနာရီ တစီးလောက်သာ လာတာ ဖြစ်မှာမို့ ကားဂိတ်မှာ ကားမျှော်နေသူ များများစားစား မတွေ့ရပါဘူး။

 

Road to Polska (DW366) (ဓါတ်ပုံ မရငတ)

 

Road to Polska (Jeleniogórska) (ဓါတ်ပုံ မရငတ)

Zbiornik Sosnówka (Sosnówka Reservoir) ရေကန်ကြီးနားကို ရောက်လာတော့ (၃၆၆) လမ်း ကနေ ညာဘက် တောလမ်းကျဉ်းကျဉ်းလေးသို့ ကွေ့ချိုးမောင်းဖို့ ဂျီပီအက်စ်ထဲက အသံချိုချိုလေးနဲ့ လမ်းညွှန်လာပါတယ်၊ ဒီတညအိပ်ခရီး သွားခဲ့ရတဲ့ တောလမ်းကျဉ်းတွေထဲမှာ အကျဉ်းဆုံးလမ်းပိုင်းဖြစ်ပါတယ်၊ အိပ်ခြေ နည်းနည်း နည်းနည်းစီသာ လမ်းတလျှောက် အဆက်မပြတ် တွေ့ခဲ့ရပါတယ်။

ရွာရယ်လို့ ဟုတ်တိပတ်တိ မရှိပါဘဲ ခပ်ကြီးကြီး ရွာဆိုလို့  Staniszów ဆိုတဲ့ ရွာဝင်ဆိုင်းဘုတ်တခုကိုသာ တွေ့မြင်ခဲ့ပါတယ်၊ ဘတ်စ်ကားတောင်ပြေးတဲ့လမ်း ဟုတ်ဟန်မတူပါဘူး၊ လမ်းအမှတ်လည်းမရှိပါဘူး၊ လမ်းအမည်ကိုတော့ ဂူဂဲလ်မြေပုံမှာ Jeleniogórska လို့သာ ရေးထားတာ တွေ့ရပါတယ်။

ထင်းရူးပင်တန်းတွေကြား သီးပင်စားပင် စိုက်ပျိုးခင်းလေးတွေကြား ကွက်ကြားကွက်ကြား နေရာတ ချို့မှာတော့ တောတွင်းကြိုက် ခရီးသည်များအတွက် ဟော်တယ်လေးတွေ ရီဆော့တ်ခပ်သေးသေး လေးတွေရဲ့ လမ်းညွှန်ဆိုင်းဘုတ်လေးတွေကိုတော့ တွေ့ရှိရပါတယ်၊ အများအားဖြင့်ကတော့ ဒေသ ခံတွေရဲ့ ခြံဝန်းကျယ်ကျယ် (တကယ်တော့ ခြံဝန်းလို့တောင် ပြောလို့ မရနိုင်ပါဘူး၊ ဟုတ်တိပတ်တိ ကာရံထားတာမျိုးမှ မဟုတ်တာလေ) တွေထဲက တိုက်ပုပုလေးတွေသာ အရှိများပါတယ်၊ ဒါပေမယ့် တောခေါင်ခေါင် လမ်းကျဉ်းကျဉ်းပေမယ့် အိမ်ကလေးတွေက နေချင်စရာ လှတပတ သန့်ရှင်းနေသ လို အမှိုက်ကားသန့်ရှင်းရေးသမားတွေကလည်း တာဝန်ကျေကြဟန် တူပါတယ်၊ ဒီလို နေချင်စဖွယ်
အိမ်လေးတွေ တွေ့ရသလို ပိုင်ရှင်မနေ စွန့်ပစ်ထားဟန်ရှိတဲ့ ပျက်စီးယိုယွင်းနေပြီဖြစ်တဲ့ အိမ်အိုအိမ် ဟောင်းတွေလည်း အများအပြားပါ၊ အခုတော့ တန်ဖိုးနည်း အိမ်အိုများ ဖြစ်နေပေမယ့် မကြာခင်မှာ ဈေးကွက်ဝင်လာပြီး တန်ဖိုးကြီး အိမ်ယာများ ဖြစ်မလာဘူးလို့ ဘယ်သူ ပြောနိုင်ပါမည်နည်း။

 

Road to Polska (Jeleniogórska) (ဓါတ်ပုံ မရငတ)

အိမ်လေးတွေ ခြံလေးတွေကတော့ နေချင်စဖွယ်ပါ၊ နှင်းများရာ ဒေသဆိုတော့ မတ်စောက်စောက် ခပ်ချွန်ချွန် ခေါင်မိုးလေးတွေနဲ့ မှတ်တမ်းတင်ဖို့ ကောင်းလှတာမို့ မဖြစ်မနေ မှတ်တမ်းတင်ရတာပေ့ါ၊ ဒီလို သာသာယာယာနဲ့ နေချင်ဖွယ်ရာ ဘယ်လောက်တောင် ကောင်းနေပေမယ့် မြို့ပြလူသားတွေ မောင်ရင်ငတေတို့လို ကောင်တွေကတော့ တကယ်တမ်း လာနေမလား ဆိုရင် လာမနေနိုင်ပါဘူး။

တောတွေတောင်တွေ ရေကန်တွေ စိမ်းလန်းတာတွေ ငြိမ်းချမ်းတာတွေ အေးမြတာတွေ ဘာတွေရှိ ရှိပါ၊ လူတွေကြား ကားတွေကြား ဆိုင်တွေကြား အပူအရှုပ် ဆူညံမှုတွေကြား နေသားကျနေလေခဲ့ တာက ကြာပြီဖြစ်လို့ ဒီလို နေရာမျိုးကို အားလပ်ရက် အလည်လေး ခဏလာပြီး တောင်ရေးမြောက် ရေး ရေးနေတာနဲ့ ကျေနပ်နေတတ်တဲ့ မောင်ရင်ငတေလို လူစားမျိုးတွေသာ များလှတာပါ။

ဒီပိုလန်တောလမ်းကို ရောက်လာတော့ မောင်ရင်ငတေ ပြီးခဲ့တဲ့နှစ်ကုန်ကသွားခဲ့တဲ့ ထိုင်းအနောက် မြောက်ပိုင်းဒေသက မယ့်ဟောင်ဆောင်တို့ မယ့်ဆရီယန်တို့ ပိုင်တို့ ဖန်းတို့ကိုတောင်မှ သတိယမိပါ သေးတယ်၊ ဖွင့်ဖြိုးမှု တိုးတက်မှု လမ်းပန်းဆက်သွယ်ရေး ခရီးသွားလုပ်ငန်း အစရှိသဖြင့် ထပ်တူညီ မဟုတ်ပေမယ့် အတော်ဆင်တူတဲ့ သဘောရှိပါတယ်၊ သို့ပေမယ့်လည်း ထိုင်းအနောက်မြောက်ပိုင်း ကမှ ဒီမှာထက် ပိုမိုပြီး လူသွားလူလာ များပြားပါသေးတယ်။

လမ်းအမည် Mickiewicza ဆိုင်းဘုတ်ကိုတွေ့လိုက်ရပြီးနောက် ခဏအကြာမှာတော့ လူနေအိမ်ခြေ ခပ်စိတ်စိတ် တွေ့လာရပြီး လမ်းဘေးပလက်ဖောင်းတွေ စရှိလာပြီး Jelenia Góra မြို့စွန်သို့ဝင်လာ ခဲ့ပါပြီ၊ ဘတ်စ်ကားဂိတ်ဝါဝါလေးတွေလည်း တွေ့မြင်လာရပါပြီ၊ မြို့အဝင်လမ်းလည်း ကျယ်လာပါပြီ၊ မြို့အဝင် ဘီးခွန်တွေ ဘာခွန် ညာခွန်တွေတော့ ကောက်တဲ့ ဂိတ်တော့ မတွေ့မြင်ရပါဘူး။

 

Road to Polska (Jelenia Góra) (ဓါတ်ပုံ မရငတ)

Jelenia Góra မြို့လယ်သို့ ရောက်လာပါပြီ၊ မောင်ရင်ငတေတို့ ပိုလန်တညအိပ် ခရီးရဲ့ အကြီးဆုံး မြို့ပါ၊ Jelenia Góra မြို့က Dolny Śląsk (Lower Silesia) ပြည်နယ်ထဲက ခရိုင်မြို့ကြီး တမြို့ပါ၊ ဒီ Silesia ဆိုတာကလည်း သူ့သမိုင်းကြောင်းနဲ့သူ ရှည်လျားစွာ တည်ရှိခဲ့တဲ့ နယ်မြေဒေသ တခုပါ၊

ဒီဒေသကို သွားသွားနေတော့ ဒီဒေသအကြောင်းကို အကျဉ်းချုပ်အဖြစ် မောင်ရင်ငတေ ဖတ်ထားမိ မှတ်သားထားမိသမျှကို ရေးချဖြစ်ခဲ့ပါတယ်၊ (မောင်ရင်ငတေရဲ့ အလွယ်သမိုင်းပေ့ါ)။ Silesia တို့ Bohemia တို့ Moravia တို့ အဲဒီ ဒေသကြီးတွေက ရှေးသမိုင်းတလျှောက် တသီးတခြား  တနိုင်ငံစီ သီးသန့်သမိုင်းကိုယ်စီနဲ့ပါ၊ Kingdom of Prussia (1701-1918) ခေတ်ရောက်လာတော့ လက်အောက်ခံ ပြည်နယ်များအဖြစ် အနှစ်နှစ်ရာကျော်မျှ နေခဲ့ရပါတယ်၊ ပရပ်ရှားတွေရဲ့ခေတ်ကုန် ဆုံးသွားပြီးနောက် Deutsches Reich ခေတ်ကိုရောက်လာတော့ ဂျာမန်အင်ပါယာ (၁၈၇၁-၁၉၁၈) Weimar Republic (၁၉၁၈-၁၉၃၃) နာဇီဂျာမဏီ (၁၉၃၃-၁၉၄၅) တိုရဲ့ အုပ်ချုပ်ခံဒေသများ ဖြစ်ခဲ့ ရပြန်ပါတယ်၊ စစ်ကြီးတွေ အပြီးမှာတော့ Bohemia တို့ Moravia တို့က Slovakia နဲ့ ပေါင်းစည်းပြီး  Czecho-Slovakia ဖြစ်သွားပါတယ်၊ Silesia ဒေသ အများစုကတော့ Polska နိုင်ငံထဲ ပါဝင်သွားပြီး Prussia ခေတ်တုန်းက Austria ကိုပေးအပ်ခဲ့တဲ့ အနောက်မြောက်ပိုင်း Silesia ဒေသနယ်မြေလေး ကတော့ ဒီကနေ့ Czech Silesia ဒေသ ဖြစ်လာခဲ့ပါတယ်၊ မောင်ရင်ငတေရဲ့ အလွယ်သမိုင်းပါ။

 

Road to Polska (Polacy) (ဓါတ်ပုံ မရငတ)

ချက်လူမျိုးတွေက Stožáry စတိုဂျာရရ် လို့ ခေါ်ကြတဲ့ Polacy ပိုလာဆယ်ဇ် ခေါ်  Poles ပိုးလ် ခေါ် Polish ပိုလန်လူမျိုးတွေရဲ့ ပုံပန်းသဏ္ဍာန်တွေ စရိုက်တွေက မြောက်ပိုင်း ဂျာမန်တွေနဲ့ ခပ်ဆင်ဆင် ပါ၊ နှစ်ပေါင်းများစွာ ဂျာမန်တွေရဲ့ လွှမ်းမိုးမှု ခံခဲ့ရတာကြောင့်လည်း ပါနိုင်ပါတယ်၊ ဒီကနေ့ ဂျာမဏီ ရောက်ရှိ အခြေချ နေထိုင်နေတဲ့ ပိုလန်လူမျိူးကတင် သုံးသန်းလောက်ရှိပြီး ခဏတဖြုတ် ရောက်ရှိ အလုပ်လုပ်ကိုင်နေသူတွေကလည်း မြောက်များစွာပါ၊ ပိုလန်တွေရဲ့ ပုံစံကတော့ နီစပ်စပ်အသားဖြူ ဖြူနဲ့ ထောင်ထောင်မောင်းမောင်း ခပ်ကြမ်းကြမ်း ရိုးသားအေးဆေးတဲ့ပုံတွေ များပါတယ်။
ပြင်သစ်ပြည်မှာလည်း ဟိုးအရင့်ရင်ခေတ်အဆက်ဆက်တည်းက ပိုလန်နွယ်ဖွားတွေ ပိုလန်ဂျူးတွေ မြောက်များစွာ လာရောက် အခြေချ နေထိုင်ခဲ့ကြတာပါ၊ ပိုလန်နွယ်ဖွား တသန်းခန့် ပြင်သစ်ပြည်မှာ ရှိတယ် ဆိုပါတယ်၊ မောင်ရင်ငတေ ပြင်သစ်ရောက်ခါစ ပြင်သစ်စကားပြောသင်ရင်းနဲ့ တွေ့ခဲ့ဖူးပါတဲ့ ပိုလန်မလေးကတော့ ယဉ်ယဉ်ကျေးကျေး အေးအေးဆေးဆေးပါ၊ ဒါပေမယ့် သူတို့ ရိုးရာ စားကြတဲ့Bigos Hunter’s Stew အသားပေါင်းစုံ ရောသမမွှေထားတာနဲ့ ပေါင်မုန့် ခပ်ကြမ်းကြမ်းကြီးကတော့ မောင်ရင်ငတေ့ ငပိ ငံပြာရည်စားတဲ့ အာနဲ့လျှာနဲ့ ဘယ်လိုမှ ပေါင်းစပ်လို့ မရနိုင်ခဲ့ပါဘူး၊ သြော် ဗမာ အစာသည် ဒို့အစာ၊ ဗမာ အစားသည် ဒို့အစား မဟုတ်ပါလား။

 

Road to Polska (Jelenia Góra) (ဓါတ်ပုံ မရငတ)

Jelenia Góra မြို့က ဒီဒေသ ဒီခရိုင်မှာတော့ မြို့ကြီးတမြို့ပါ၊ စည်ကားမှု အတော်အတန်ရှိပါတယ်၊ ပိုလန် အနောက်တောင်စွန်းဒေသမှာ ဖွင့်ဖြိုးတိုးတက်လာနေတဲ့မြို့ပါ၊ ပရပ်ရှား-ဂျာမန်တို့ရဲ့ လွှမ်းမိုး ခံခဲ့ရတာများပြားခဲ့တဲ့ ဒေသမို့ ထင်ပါလေရဲ့၊ မြို့တပတ် ကားမောင်းပြီး ကြည့်ခဲ့ရမြင်တွေ့ခဲ့ရတာက အဝါရောင် အနီရောင် ရဲရဲထိန်ထိန်တွေပါ၊ တိုက်တွေလည်း ဝါဝါနီနီ ဘတ်စ်ကားတွေလည်း ဝါဝါနီနီ မြင်တွေ့သမျှ ဝါဝါနီနီတွေပါ၊ အထပ်မြင့် တိုက်ကြီးတွေတော့ သိပ်မတွေ့ရပါဘူး၊ မြို့လယ်တဝိုက်မှာ ကတော့ ကမ္ဘာစစ်ကာလခန့်က ရှေးဟောင်းတိုက်တွေသာ များပါတယ်၊ သိပ်ခမ်းနား ကြီးကျယ်လှမှု မရှိပါဘူး၊ လူဦးရေက တသိန်းခန့် ရှိပါတယ်၊ ဂျာမန်စတိုင်လ် မြို့လယ်မှာတော့ ဈေးဆိုင်လေးတွေနဲ့ စည်စည်ကားကားပါ၊ ဂျလေနီယာဂိုယာ မြို့တွင်းသယ်ယူပို့ဆောင်ရေးက ဘတ်စ်ကားလိုင်းများသာ အဓိကဖြစ်မယ် ထင်ပါတယ်၊ တခြား ဥရောပမြို့ငယ်လေးတွေလို ထရော်လီဘတ်စ်တွေ ထရန်းဝေး ဓါတ်ရထားတွေကိုတော့ မတွေ့မမြင်ခဲ့ရပါဘူး၊ ဒီမြို့ကို မောင်ရင်ငတေ ရောက်ရှိခဲ့ချိန်က ခရီးသွားမ များလှတဲ့ အချိန် ဖြစ်တာကြောင့် သူစိမ်းတွေထက် မြို့ခံသမားများကိုသာ တွေ့ရှိခဲ့ရပါတယ်။

မောင်ရင်ငတေတို့တသိုက် ခဏတာမျှ မြို့လယ်ကို တပတ်ပတ်ကြည့် ညအိပ် ရပ်နားမယ့် နေရာသို့ ဆက်လက်ချီတက် ထွက်ခွာလာကြပါတယ်၊ အချိန်ကလည်း ညနေစောင်း ငါးနာရီခန့် ရှိပါပြီ၊ ပိုလန် ဧပရယ်နွေဦးက ဆောင်းရိပ်ဆောင်းငွေ့တွေများစွာ ကျန်ရှိနေသေးတာမို့ နေ့တာက တိုနေဆဲပါ။

အအေးဓာတ်ကလည်းများစွာကျန်နေဆဲမို့ မမှောင်ခင်တော့ တည်းခိုရာသို့ရောက်အောင် သွားကြရ အောင်ဆိုပြီး ဂျလေနီယာဂိုယာ မြို့ကနေ အမှတ်(သုံး) အမြန်လမ်းမကြီးရှိရာသို့ မောင်းထွက်လာခဲ့ ကြပါတယ်၊ တကယ်တမ်း မြို့တမြို့မှာ လည်စရာရှိတာလည်မယ်ဆိုရင် အနည်းဆုံး တညလောက် အိပ်မှသာ ဖြစ်မှာပါ၊ မောင်ရင်ငတေတို့က စဦးစီစဉ်ကတည်းက ပိုလန်မြေမှာ အိပ်ဖူးတယ်ဆိုရုံလေး တညအိပ် ကားတပတ် ပတ်မောင်းဖို့သာ အချိန်ယူခဲ့တာမို့ အိပ်စက် အနားယူမယ့် တည်းခိုရာဆီသို့ Szklarska Poręba စက္ကလာဆကာ ပိုရင်ဘာ မြို့လေးဆီသို့ ခရီးဆက်ကြရခြင်းပါ။

 

Road to Polska (Droga Krajowa DK3) (ဓါတ်ပုံ မရငတ)

Jelenia Góra မြို့ပြင် အမှတ် (၃) လမ်းသို့ တခဏနဲ့ ရောက်ရှိလာပြီး ကားရှေ့မြင်ကွင်းမှာ လှပစွာ ပေါ်လာတာက ဆီးနှင်းဖြူဖြူနဲ့ တောင်တန်းတွေပါ၊ မောင်ရင်ငတေတို့ မနက်ပိုင်းက ရောက်ရှိ ဖြတ် သန်းခဲ့တဲ့ Śnieżkę ဆီးနှင်းဖြူတောင်ရဲ့ ညီအမတောင်တွေပါ၊  အနောက်ဘက်ခြမ်းက တောင်ထွဋ် များပါ၊ မောင်ရင်ငတေတို့ ညအိပ်ရပ်နားမယ့် စက္ကလာဆကာ ပိုရင်ဘာ မြို့လေးနဲ့ အနီးဆုံးကတော့ Szrenica နဲ့ Łabski Szczyt တောင်ထွဋ်တွေပါ၊ ချက်လူမျိုးတွေက Jínonoš ခေါ်ကြပါတဲ့ Szrenica တောင်ထိပ် အမြင့်ပေ ၄၄၆၉ (၁၃၆၂ မီတာ) ပေါ်အထိရောက်အောင် တက်ချင်တယ်  ဆိုရင်တော့ စက္ကလာဆကာပိုရင်ဘာ မြို့နားမှာ တောင်ပေါ်တက်တဲ့ Chairlift Cable ရှိပါတယ်၊ မောင်ရင်ငတေ တို့က အချိန်မရတာကြောင့်ရော ရာသီဥတုမကောင်းတာကြောင့်ရော မတက်ဖြစ်ခဲ့ပါဘူး၊ တညအိပ် ခရီးသာ ဆိုတော့လည်း ဒီမျှလောက်နဲ့သာ ကျေနပ်ရမှာပါ၊ နောက်တခေါက်တော့ ပွင့်လင်းရာသီမှာ ရောက်အောင်လာပြီး တောင်တက်ခြင်းရသကို ခံစားချင်မိပါသေးတယ်။

Road to Polska (Droga Krajowa DK3) (ဓါတ်ပုံ မရငတ)


Droga Krajowa (DK3) သို့မဟုတ် National Road (3) ခေါ် ပိုစကာ အမှတ် (၃) လမ်းမကတော့ သိပ်ကျယ်ကျယ်ကြီး မဟုတ်ပါဘူး၊ အများအားဖြင့် အသွားလမ်းအပြန်လမ်း တလမ်းစီသာပါ၊ တချို့ လမ်းပိုင်း တော်တော်များများမှာတော့ Droga Ekspresowa (Expressway S3) အဖြစ် အဆင့်မြှင့်နေတာတွေ့ခဲ့ရပါတယ်၊ ပြီးစီးနေပြီဖြစ်တဲ့ လမ်းပိုင်းယာဉ်ကြောတွေက ဘယ်ဘက်ခြမ်းက နှစ်ကြော ဖြစ်လိုက် ညာဘက်ခြမ်းက နှစ်ကြောဖြစ်လိုက်နဲ့ ယာဉ်ကြောသုံးကြောရှိတဲ့ အမြန်လမ်း တခုသာပါ၊ ပိုစကာမြေမှာ Autostrada ဆိုပြီး အဆင့်မြင့်အမြန်လမ်းမကြီးတွေလည်း ရှိနေသေးတော့ ဒီအမှတ် (၃) လမ်းမကြီးက ဒုတိယတန်းစား လမ်းတလမ်းလို့ ပြောရမှာပါ၊ ဒီလမ်းက European Route E65 အမြန်လမ်းကြီးရဲ့ အစိတ်အပိုင်းတခုပါ၊ ဘော်လ်တစ်ပင်လယ်က ပိုလန်ရဲ့ တတိယအကြီးဆုံးသော ပင်လယ်ကူး သင်္ဘောဆိပ်ကမ်းမြို့ Port Morski Szczecin (Świnoujście) စတင်ခဲ့တဲ့ လမ်းဖြစ်ပြီး ကုန်းပိတ်မြို့တော် ပရာဟာ မြို့သို့ ရောက်ရှိနိုင်တဲ့ အနီးဆုံးသော လမ်းတလမ်းမို့လို့ ကုန်းပိတ်နိုင်ငံ ချက်ပြည်ထောင်စုအတွက် အရေးကြီးတဲ့ ပင်လယ်ထွက်ပေါက် အမြန်လမ်းမကြီးဟု ဆိုနိုင်ပါတယ်။

အီး (၆၅) ဥရောပ အမြန်လမ်းမကြီးပေါ်ကို ပြီးခဲ့တဲ့အပတ် ဒီ ပင်လယ်မရှိသောမြေသို့ ခရီးစဉ်တွင်း ဆလိုဗားကီးယားမြို့တော် Bratislava ဘရာတီဆလာဗာသို့ အသွား ဟန်ဂေရီနဲ့ ဆလိုဗားကီးယား နယ်စပ်အကူးမှာ ရောက်ဖူးခဲ့ပါသေးတယ်၊ အရှေ့အနောက် တောင်မြောက် အလယ် ဥရောပ နိုင်ငံ များရဲ့ ဆင်းရဲချမ်းသာ စိမ်းလန်းငြိမ်းချမ်းမှု ကွာဟနေသေးသလို ဥရောပ ရှန်ဂန် လမ်းမကြီး လမ်းမလတ် လမ်းမလေးများရဲ့ အဆင့်အတန်း ကွာလတီတွေ ကွာဟနေသေးတာ မှန်ပါတယ်၊ သို့ပေမယ့် စနစ်ကျတဲ့ စနစ်တွေကို စနစ်တွေ စချစဉ် တည်းက လမ်းအမည် ပေးတာမျိုးကအစ စနစ်တကျပေး စနစ်တကျ လုပ်ခဲ့တာတွေကို ဒီလမ်းမများပေါ် သွားဖြစ်ရင်း တွေးနေမိတတ်တာ အမြဲလိုပါ။

Road to Polska (Szrenica, Szklarska Poręba) (ဓါတ်ပုံ မရငတ)

Szklarska Poręba (Powiat jeleniogórski)
Jelenia Góra County (Polska)


တညတာ နားခိုမယ့် Szklarska Poręba စက္ကလာဆကာ ပိုရင်ဘာ မြို့သို့ ရောက်ခါနီးလာလေလေ တောင်တန်းဖြူတွေနဲ့ နီးလာလေလေပါ၊ Droga Krajowa (DK3) လမ်းမရဲ့ ဦးတည်ရာ ဂိတ်ဆုံးက အဲဒီတောင်ခြေ တနေရာမှာပါ၊ မောင်ရင်ငတေတို့ကတော့ အဲဒီတောင်ခြေမှာ တညတာ နားခိုကြပြီး ဒီကနေ့ တနေ့တာ ခရီးကို အဆုံးသတ်ပါမယ်၊ မနက်ဖန် မနက်မှာ အေးအေးဆေးဆေးထပြီး အပြန် ခရီးအဖြစ် ပရာဟာမြို့တော်ဆီကို ဆက်ကြရပါမယ်၊

တကယ်ဆိုရင် ဒီနေရာမှာ သုံးလေးငါးညအိပ်၊ စမ်းချောင်းလေးတွေရေချောင်းလေးတွေနဲ့ ရေတံခွန် သေးသေးလေးတွေ ရွာသေးသေးလေးတွေကြားမှာ နားနားနေနေ နေဖြစ်မှသာ ဒီခရီးထွက်ခဲ့ရခြင်း ရည်ရွယ်ချက်က ပြည့်စုံမှာပါ၊ မောင်ရင်ငတေတို့ရဲ့ခရီးက ဒီနယ်မြေကို ရောက်ဖူးရုံလေး ရောက်ပြန် အဆင့်မျှသာ ဖြစ်ပါတယ်၊ သူတို့လူဖြူတွေလို တောထဲတောင်ထဲ တယောက်တည်းရောအတွဲနဲ့ရော အဖွဲ့လိုက်ပါ အေးအေးသက်သာသွားလာနေကြတာမျိုးကို မောင်ရင်ငတေ အားကျမိပါတယ်၊ ကိုယ့် ဘဝပေး အခြေအနေက သူတို့နဲ့ ကွာခြားတာကိုး၊ မောင်ရင်ငတေတို့က ရောက်ဖူးချင်စိတ် အားကြီး လွန်းလို့သာ သွားနိုင်သလောက်လေး သွားနေရတယ် သူတို့ သွားပုံမျိုးကို ခြေဖျား ဘယ်မှီနိုင်မလဲ။

သူတို့တတွေက တောင်ပေါ်တက်ရင်လည်း ကျောပိုးအိတ်တလုံးနဲ့ အေးအေးဆေးဆေး ဟိုနား နား ဒီနား နား၊ လျှောက်လိုက် နားလိုက်နဲ့ တောတောင်ရဲ့ အရသာကို အပြည့်အဝ ခံစားကြတာမျိုးလေ၊သူတို့တွေလောက် မဖြစ်နိုင်ပေမယ့် ကိုယ့်အထွာနဲ့ကိုယ် ကျေနပ်နေမိရတာပါ။

Road to Polska (Hotel Wiktoria) (ဓါတ်ပုံ မရငတ)


တည်းခိုရာဟော်တယ်ရောက်တော့ မောင်ရင်ငတေတို့ ကားတစီးကလွဲလို့ ဘယ်သူမှ မတွေ့ရပါဘူး၊ ဟော်တယ်တခုလုံးလည်း တိတ်ဆိတ်ခြောက်ကပ် နေပါတယ်၊ ကြိုတင်ဘွတ်ကင် လုပ်ထားပြီးသား ဆိုတော့ အခန်းခပေး သော့ယူပါတယ်၊ ဟော်တယ်ဝန်ထမ်းဆိုလို့ ဧည့်ကြိုသူ တယောက်တည်းရှိ တယ် ထင်ပါတယ်၊ အဲဒီ ဝန်ထမ်းက မောင်ရင်ငတေတို့ကို သူစောင့်နေတာ ဖြစ်ကြောင်း ဘယ်သူမှ မရှိကြောင်း ရာသီချိန်မဟုတ်လို့ လူလာကျဲပါးချိန်မို့ မီးဖိုချောင်လည်းပိတ်ထားပါကြောင်း ဒီအနီးနား မှာတော့ စားပွဲရုံလေးတွေဖွင့်ပါကြောင်း သွားစားနိုင်ပါကြောင်း ပြောရှာပါတယ်၊ ရိက္ခာအပြည့်အစုံနဲ့ လာခဲ့တဲ့ မောင်ရင်ငတေတို့က အိုကေပါ ဒီအတွက်တော့ စိတ်မပူပါနဲ့ ကိစ္စမရှိပါဘူးပြောပြီး အခန်းရှိ ရာသို့ တက်လာခဲ့ကြပါတယ်။

တကယ်တော့ Hotel Wiktoria ဝိတိုရိယဟော်တယ်က ဟော်တယ်ကြီးပါ၊ အခန်းပေါင်းတရာကျော် ရှိပါတယ်၊ ရာသီချိန် မဟုတ်တော့ ခြောက်ကပ်နေတာပါ၊ ရေခဲတောင် စီးပွားရေးကိုသာ အခြေပြုပြီး လုပ်နေရတဲ့ လုပ်ငန်းသာဖြစ်နေသေးလို့ တနှစ်မှာ သုံးလေးငါးလက အခုလိုတည်းခိုသူမရှိ ဟောင်း လောင်းသာ ရှိနေဟန် တူပါတယ်၊ ဟော်တယ် ဧည့်ကြိုဝန်ထမ်းကတော့ ဒီကနေ့ ရောက်လာကြတဲ့ ဧည့်သည်တော် မောင်ရင်ငတေတို့ကို နေရာချထားပြီးတာနဲ့ သူလည်းကားမောင်း လစ်တော့တာပါ။

မောင်ရင်ငတေတို့လည်း အခန်းကျယ်ကြီးတွေမှာ နေရာယူပစ္စည်းတွေချပါတယ်၊ ဗိုက်တွေကလည်း အတော်လေး ဆာလောင်နေကြပြီမို့ သယ်ဆောင်လာတဲ့ ဟင်းတွေ ထမင်းတွေ ပုလင်းတွေ ဗူးတွေ ထုတ် ဝိုင်းဖွဲ့စားသောက်ကြပါတယ်၊ ဟော်တယ်မှာစားတဲ့ ငပိကြော်ငပိချက် အိမ်ဟင်းအိမ်ထမင်းပါ။

ဗိုက်ဖြည့်ပြီးတော့ လိုအပ်တာလေးတွေ ဝယ်ရင်း တည်းခိုရာနားက ကားဂိတ်လမ်းဆုံကို လမ်းဆင်း လျှောက်ပါတယ်၊ ညကလည်း မှောင်စပြုနေလို့ ထင်ပါရဲ့၊ လမ်းပေါ်မှာတော့ လူ သိပ် မတွေ့ရပါဘူး၊ဘားဆိုင်လေးတွေထဲမှာတော့ ပိုလန်အအေးဒဏ်ကို ကာကွယ်နေကြတဲ့ လူတချို့ကိုတွေ့ရပါတယ်၊မောင်ရင်ငတေတို့တော့ ဟိုနားဒီနား တပတ်လျှောက်ကြည့်ပြီး စမ်းချောင်းလေးအတိုင်း စမ်းရေစီး သံကိုခံစား နေချင်သေးပေမယ့် အခန်းပြန် နားနားနေနေ စကားပြော ကြရအောင်ဆိုပြီး တည်းခိုရာ ဆီသို့ ခပ်ဖြေးဖြေးလျှောက် ပြန်လာခဲ့ကြပါတယ်။

ဒီပိုလန်နယ်စပ် တညအိပ်ခရီးက မောင်ရင်ငတေရဲ့ “ပင်လယ်မရှိသောမြေ” ခရီးစဉ်မှာ ဧကဒဿမ မြောက်နေ့ ဖြစ်နေပြီ ဆိုတော့လည်း ခရီးကလည်းပမ်း လူလည်း နည်းနည်းတော့ နွမ်းနေကြပြီလေ၊ ဒါကြောင့် ကြီးစိုးလာတဲ့ အမှောင်ထုအောက်မှာ တသွင်သွင် စီးနေတဲ့ ရေချောင်းလေးကို နှုတ်ဆက်စမ်းရေစီးသံကို တည်းခိုရာ ဝရံတာကနေ နားထောင်မယ်ဆိုပြီး ပြန်လာခဲ့ရတာပါ။

ဟော်တယ်က ကြယ်နှစ်လုံးအဆင့်သာဆိုပေမယ့် ပါရီလိုမြို့ကြီးများရဲ့ မြို့အလယ်က ကြယ်နှစ်လုံး များထက် အများကြီးသာပါတယ်၊ အခန်းတွေလည်း အကျယ်ကြီးပါ၊ ဝရံတာတွေကလည်း အကျယ် ကြီးပါ၊ တခုသာပြောစရာ ဖြစ်ခဲ့ပါတယ်၊ တိုးရ်းရာသီချိန် မဟုတ်ပေတော့ ခရီးသည်များ မလာသလိုဟော်တယ်ပိုင်ရှင်ရဲ့ ချွေတာရေးမူဝါဒကြောင့် ထင်ပါရဲ့၊ လူသူမရှိ အခန်းလွတ်ကြီးတွေကို အပူပေးစနစ် ဖြတ်တောက်ထားလေတော့ တညလုံး ပိုလန် ဧပရယ်ဆောင်းရဲ့ အအေးဒဏ်ကို ခံကြရတော့ တာပေ့ါ၊ ကြိုတင်ဝယ်ယူခဲ့တဲ့ ပိုလန်ဗော်ဒဂါရဲ့အစွမ်းနဲ့ မောင်ရင်ငတေ့အတွက်ကတော့ သိပ်မှုစရာ မလိုခဲ့ပါဘူး၊ ဘာပြောပြော အေးအေးချမ်းချမ်းနဲ့ စိတ်ချမ်းမြေ့ဖွယ် ဖြတ်သန်းခဲ့ရတဲ့ စက္ကလာဆကာ ပိုရင်ဘာရဲ့ ည ပိုစကာမြေရဲ့ ညတည ဖြစ်ခဲ့တယ် ဆိုရပါမယ်၊ တညလုံးမှာတော့ မိုးသံတွေကြားမှာစမ်းရေစီးသံတွေကို တိုးတိုးတလှည့် ကျယ်ကျယ်တလှည့် တချက်တချက် ကြားခဲ့ရပါတယ်။

Road to Polska (Hotel Wiktoria) (ဓါတ်ပုံ မရငတ)


နောက်တနေ့မှာလည်း စက္ကလာဆကာ ပိုရင်ဘာ နံနက်ခင်း ဆောင်းနှင်းမိုးက မောင်ရင်ငတေတို့ကိုကြိုဆိုနှုတ်ဆက် နေပါတော့တယ်၊ သည်းမည်းစွာ မဟုတ်ပေမယ့် တစိမ့်စိမ့် စွေနေတာကြောင့် စမ်း ရေချောင်းလေးအတိုင်း ဒီအနီးအနားတဝိုက် လမ်းထွက်လျှောက်မယ်လို့ စိတ်ကူးထားချက်ကို စိတ် မကောင်းစွာနဲ့ ရုတ်သိမ်းလိုက်ရပါတယ်၊ ရာသီဥတုကောင်း နေပူနေတဲ့ ချက်မြေကိုသာသွားကြဖို့ကို ဆုံးဖြတ်ပြီး အပြန်ခရီးနှင်ရန် ပြင်ဆင်ကြပါတယ်၊ စမ်းချောင်းလေးနဘေး မောနင်းကဖေးလေး ထိုင် သောက်မယ်မှန်းထားတာလည်း မသောက်ဖြစ်ခဲ့တော့ပါ၊ ပိုရင်ဘာနံနက်ခင်းရေ နှုတ်ဆက်ပါတယ်။

ပိုရင်ဘာနံနက်ခင်းကိုနှုတ်ဆက် ကားပေါ်ပစ္စည်းတွေတင် ထွက်ခွာလာတော့ မနက် ၁၁ နာရီရှိပါပြီ၊ မိုးကနည်းနည်းစဲသွားပြီဆိုပေမယ့် နေမင်းကြီးကတော့ ဘယ်ဆီမှာသာနေသလဲ မသိနိုင်ပါ၊ ပိုစကာ မြေကတော့ အုံ့ဆိုင်းမှိုင်းမှုန်လို့သာနေပါတယ်၊ ချက်မြေမှာတော့ နေသာနေပါစေ မျှော်လင့်ပါတယ်။ မနေ့က လာခဲ့တဲ့ ပိုစကာ အမှတ် (၃) လမ်း သို့မဟုတ် အီး (၆၅) ဥရောပ အမြန်လမ်းမကြီးအတိုင်း ပိုစကာ နယ်စပ်စခန်း Jakuszyce ဆီသို့ မောင်းလာခဲ့ကြပါတယ်၊ မနေ့ညက ကျခဲ့တဲ့ နှင်းမိုးတွေက ကားလမ်းမပေါ်မှာသာ မိုးရေဖြစ်သွားပေမယ့် ဆယ်ကီလိုမီတာ ဝေးတဲ့ နယ်စပ်လမ်းတလျှောက်မှာ ဖြူဖြူဖွေးနေတာပါ၊ ဆောင်းတွင်းစစ်စစ် ဆိုရင်တော့ အတော်အေးမယ်ဆိုတာ သေချာပါတယ်။


နယ်စပ်မျဉ်း မရောက်ခင်လေးမှာတော့ စားသောက်ဆိုင် ဓါတ်ဆီဆိုင် ငွေလဲကောင်တာလေး တခုနဲ့ နှင်းလျှောစီးစခန်းခွဲ ခပ်သေးသေးလေးတခုမှာ ခေတ္တဝင်နား ဆီဖြည့် ကော်ဖီ ဝယ်သောက်ဖို့ ရပ်ကြ ပါတယ်၊ ဒါပေမယ့် လူသူလေးပါး မရှိသလို ဆိုင်ကလည်း မဖွင့်ပါဘူး၊ မောင်ရင်ငတေအတွက်တော့ မှတ်တမ်းပုံ ဆင်းရိုက်ဖြစ်ခဲ့တာ အဖတ်တင်တာပေ့ါလေ။

တကယ့်တကယ်ကတော့ ဒီဒေသဟာ ကမ္ဘာ့ရေခဲတောင် အပန်းဖြေရေး အားကစားရေးနဲ့စီးပွားရေး လောကမှာ အဖူးအငုံအဆင့်မျှသာ ရှိနေပါသေးတယ်၊ ဧည့်ခံကြိုဆိုရေး ဖျော်ဖြေရေး အပိုင်းတွေမှာ အများကြီး လိုနေမှာကတော့ သေချာလှပါတယ်၊ သို့သော် သည် သို့သော်က အရေးကြီးပါတယ်၊ လိုအပ်ချက်တွေ အများအပြားရှိနေပေမယ့် ဈေးနှုန်းအပိုင်းမှာက ချိုသာမှုများစွာ ရှိနေပါသေးတယ်၊ ဒါကို သိကြပါတဲ့ ဥရောပက လူလည်ကြီးများကတော့ ဈေးကြီးလှပါတဲ့ ဆွစ် ပြင်သစ် နှင်းတောင်ဖြူ များဘက်ဆီသို့ သွားနေကျအတိုင်း ခြေဦးမလှည့်ကြတော့ပါဘဲ ဈေးချိုသာရာ နေရာသစ်တွေဆီသို့ ရှာဖွေလေ တွေ့ရှိလေ သွားဖို့ကြိုးစား သွားဖို့ရည်ရွယ်ခဲ့ကြတာ ဆယ်စုနှစ်တခုမက ရှိလာခဲ့ရာကနေ ဒီကနေ့မှာ ပိုလန်ရေခဲတောင် စခန်းများအဖြစ် တစတစ လူသိများထင်ရှားလာတာကတော့ သေချာ လှပါတယ်၊ အဲဒါကိုသိတဲ့ ဒေသခံတွေ သက်ဆိုင်ရာ တာဝန်ရှိသူတွေက နည်းအမျိုးမျိုးနဲ့ စွဲဆောင် ရမှန်း သိလာကြသလို မသိသောသူများကလည်း နေရာအနှံ့မှာ ရှိနေဆဲပါ၊ ဒါပေမယ့် ဒီအလုပ်မျိုးမှ မဟုတ် ဘယ်အလုပ်မဆို ဘေးထွက် ဆိုးကျိုးတွေကတော့ အနည်းနဲ့အများရှိမှာ ကျိန်းသေပါတယ်၊ ဆောင်ရန် ရှောင်ရန် သိဖို့လိုပြီး လူလည်ကျတတ်ဖို့လည်း လိုအပ်တယ် မဟုတ်လား၊ ဘာပြောပြောတိုးတက်လာတဲ့ လူမှုစီးပွားတွေနဲ့အတူ ပိုလန် သို့မဟုတ် ပိုစကာမြေက ဥရောပမှာ လည်ဖို့ကောင်း ပါတဲ့ လည်ပျော်တဲ့ နေရာတနေရာ ဖြစ်လာနေပြီ ဆိုနိုင်ပါတယ်။ 

Road to Polska (Jakuszyce) (ဓါတ်ပုံ မရငတ)


အဲဒီလိုနဲ့ နှင်းမိုးဖွဲဖွဲ မှိုင်းမှုန်မှုန် ကောင်းကင်အောက်မှာ နယ်စည်းခြားရာနေရာသို့ ရောက်ရှိလာပါပြီ၊ ဒီနယ်စပ်ဖြတ်ကျော်ဂိတ်ကလည်း ဘာမှမရှိသလောက်ပါ၊ အဆောက်အဦးလေး နှစ်လုံးသုံးလုံးရယ် ပိုလန်အထွက်ချက်အဝင် ယိုင်တိုင်တိုင်ဆိုင်းဘုတ်လေးတွေက နှင်းမှုန်တွေအောက်မှာ ခပ်ကုပ်ကုပ် လေးနဲ့သာ လက်ပြနှုတ်ဆက်၍ ကျန်ခဲ့ပါပြီ၊ ချက်ပြည်ထောင်စုမြေကြီးကို ပြန်လည်ဝင်ရောက်လာခဲ့ ပါပြီ၊ နေရစ်တော့ ပိုစကာမြေရေ၊ နောက်တခေါက်တော့ ဒီထက်များများ အချိန်ပေး လာခဲ့ပါဦးမယ်၊ ဒီတခေါက် ဤ၍ ဤမျှသာပေ့ါ၊ ပိုစကာမြေရေ။

Do widzenia Polska Au Revoir Pologne ဘိုင့် ဘိုင် ပါ  ပိုစကာ ရေ ….


ပိုစကာမြေကနေ ချက်မြေ ရောက်လာတော့ လမ်းဘေးမှာ လူနေအိမ်တန်းတွေ ရွာလေးတွေ ခပ်စိပ် စိပ်လေး တွေ့လာရတာတော့အမှန်ပါ၊ ပိုစကာမြေက ချက်မြေထက် လေးဆပိုကျယ်ဝန်းပြီး လူဦးရေ ကလည်း လေးဆ ပိုများပါတယ်၊ ဂျာမန်မြေနဲ့ ထိစပ်နေတဲ့ ချက်အနောက်မြောက်ပိုင်း ဒေသက ပိုမို လျှင်မြန်စွာ တိုးတက်မှုတွေ ရှိနေပြီး ဒီပိုလန် အနောက်စွန်းဒေသကတော့ ဘာလို့များ ခေတ်နောက် ကျပြီး ကျန်ရစ်ခဲ့ရပါသလဲ ဆိုတာကို သူတို့ဒေသခံတတွေသာ အသိနိုင်ဆုံး ဖြစ်မှာပါ၊ ကွာတာတော့ ကွာပါတယ်၊ ဘာကွာပါသလဲ ဆိုတာကိုတော့ မောင်ရင်ငတေရဲ့ဉာဏ် ခပ်တိမ်တိမ်သာမို့လို့ မပြော ပါရစေတော့ပါနဲ့ ခင်ဗျာ။

တောင်တန်းတွေကို ကွေ့ဝိုက်ကျော်ဖြတ်ခဲ့ပြီးနောက် Czechs သို့မဟုတ် Češi ချေရှီတို့ရဲ့ မြေဆီသို့ (မောင်ရင်ငတေ့ အခေါ်ကတော့ ချက်ကရီ တို့ရဲ့ မြေပေါ့လေ) ရောက်လာပါသော်လည်း ပိုစကာတို့ ရဲ့ နှင်းတဝက် မိုးတဝက်နဲ့ ဆောင်းဟာ ချက်မြေအထိ စွတ်စိုထိုင်းမှိုင်း လိုက်ပါလာပါတယ်။

ပိုစကာ အမှတ် (၃) လမ်းမက ချက်မြေသို့ရောက်ရှိလာတော့ ချက်အခေါ် Silnice I/10 (S10) ဖြစ် သွားပါပြီ၊ ဥရောပ အမြန်လမ်း သတ်မှတ်ထားချက် အရကတော့ E65 လမ်းမလို့သာ ခေါ်ပါတယ်၊ Silnice I/10 ဆိုတာကတော့ Czech 1st Class Road အမှတ် (၁၀) ပါ၊ ရိုးရိုးလမ်း တွေထဲမှာတော့ အဆင့်မြင့်လမ်းလို့ဆိုရပါမယ်၊ လမ်းကတော့ နေရာတော်တော်များများမှာ နှစ်လမ်းသွား အဆင့်မြှင့် တင်ထားပြီး ဖြစ်နေပေမယ့် တချို့နေရာတွေမှာ မျက်နှာချင်းဆိုင် နှစ်စီးလွတ် မောင်းသာရုံပါ။

Road to Polska (Kořenov) (ဓါတ်ပုံ မရငတ)


ချက်ရဲ့နယ်စပ်မြို့လေးတွေ ဖြစ်ကြတဲ့ Harrachov, Kořenov, Tesařov, Desná, Tanvald တို့က မြို့သူမြို့သား တွေကတော့ နှင်းမိုးအေးအေးမှာ အခန်းအောင်း ကွေးနေကြတယ် ထင်ပါရဲ့၊ လမ်းန ဘေးမှာ လူသူကင်းမဲ့လို့ပေ့ါ၊ လမ်းဘေး စိုက်ခင်းပျိုးခင်းတွေလည်း သိပ်မတွေ့ရပါဘဲ တောသဘာဝ တောရိပ် တောင်ရိပ်မှာ အေးအေးချမ်းချမ်း နေထိုင် လုပ်ကိုင်စားသောက်ကြတဲ့ သဘောသာ ရှိဟန် တူပါတယ်၊ နိုင်ငံတော်တော်များများရဲ့ ကျေးလက်အရပ်တွေကတော့ သိပ်တော့ကွာဟမယ် မထင် ပါဘူး၊ လမ်းပမ်း ဆက်သွယ်ရေးနဲ့ မီးအလင်းအမှောင်သာ ကွာချင်ကွာနိုင်ပါတယ်၊ ဒီကနေ့ အင်တာ နက် အိုင်တီခေတ်မှာတော့ ကိုယ်ပိုင် သတင်းတွေနဲ့ ကမ္ဘာကြီးအကြောင်း သိလွယ်တာတော့ တူတူလောက်သာ ဖြစ်မှာပါ၊ လမ်းတလျှောက်မှာတော့ မိုးမင်းက နည်းနည်းစဲသွားလိုက် နည်းနည်းသည်း လာလိုက်နဲ့ စွေမြဲစွေနေဆဲပါ။

Road to Polska (Božkov Original) (ဓါတ်ပုံ မရငတ)


လမ်းကျဉ်းကျဉ်းမှာ နှင်းတလှည့် မိုးတလှည့် ခပ်ဖွဲဖွဲ ကျနေတာကြောင့် ခပ်ဖြေးဖြေးသာ မောင်းလာ ခဲ့ကြပါတယ်၊ တနေရာမှာတော့ ကော်ဖီပူပူလေးသောက်ချင်လာတာကြောင့် လမ်းဘေးဓါတ်ဆီဆိုင် တွဲလျှက် ဆိုင်ကလေး တဆိုင်မှာ ကားခဏရပ် ဝင်နားကြပါတယ်၊ ဆိုင်ကလေးကတော့ ကုန်စုံဆိုင် သာမန်သာပါ၊ မောင်ရင်ငတေကတော့ ကော်ဖီမှာရင်း ဘာများ ထူးထူးခြားခြား ရှိမလဲဆိုပြီး စပ်စုတဲ့ မျက်လုံးများက ဆိုင်ပတ်ပတ်လည်ကို စူးစမ်းကြည့်မိရတော့ ဆိုင်ကောင်တာပေါ်က ပလပ်စတစ်ဗူး ခပ်သေးသေးလေးတွေကို တွေ့မိလိုက်ပါတယ်၊ လူကြီးများအကြိုက် အားကစားသမားများအကြိုက် ၃၇ ဒဿမ ၅ ရာခိုင်နှုန်း အချိုရည်ဗူးလေးတွေပါ၊ ပိုလန်နယ်စပ်မှာ ရောင်းတဲ့ ချက်အရက် Božkov Original ဗော်ဒဂါပါ၊ သွားရင်းလာရင်း အားကစားသမားများ လွယ်ကူမြန်ဆန်စွာသောက်သုံးနိုင်ရန် စီစဉ်ပေးထားဟန်တူပါတယ်၊  အဲဒါမျိုးက ပြင်သစ်တို့ ဂျာမဏီတို့ အီတလီစပိန်တို့မှာ တွေ့မြင်ရလေ့ မရှိပါဘူး၊ မောင်ရင်ငတေလည်း သူတို့ရဲ့စိတ်ကူးကို သဘောကျမိရတာကြောင့် မှတ်တမ်းပြုမိလိုက် ရင်း တခွက်တဖလား အားပေးခဲ့ရပါတယ်၊ အဲ ဒါပေမယ့် ဒေသထွက် ချက်အရက်ဆိုတော့ကြည့်ကျက်တော့ သောက်ကြပေ့ါနော်၊ ချက်အရက် လောကမှာတော့ ဒီတံဆိပ်က နာမည်ကျော်တဲ့ တံဆိပ်လို့ ဆိုကြပါတယ်၊ ချက်ကရီကြီးရေ ဟုတ်မဟုတ် မောင်ရင် ရှင်းပြလိုက်ပါတော့။

တကယ်ကတော့ အကောင်းဆုံးသော ဗော်ဒဂါများက ရုရှားနဲ့ ပိုလန်မြေက ထွက်ရှိတာပါ၊ ချက်မိတ် ဗော်ဒဂါ အရက်များကတော့ လူကြိုက်သိပ်မများပါဘူး၊ ချက်ရဲ့ အကောင်းဆုံးသော ယစ်ရွှေရည်က ဘီယာပါ၊ ချက်ပြည်သူပြည်သားတွေဟာ ကမ္ဘာ့ ဘီယာအသောက်ဆုံး စံချိန်တင်ထားကြသူတွေပါ။

ဗော်ဒဂါလို့ဆိုလိုက်တာနဲ့ အများက ရုရှားဆိုတာကြီးနဲ့ တွဲမြင်လိုက်ကြတာပါ၊ သို့သော်လည်း ပိုလန်မြေကလည်း ဗော်ဒဂါရဲ့ ပင်ရင်းမြေသာပါ၊ လူသိ နည်းပေမယ့် သောက်တတ်သောသူ များကတော့ ဈေးနှုန်းလည်း ချိုသာတဲ့ ပိုစကာ ဗော်ဒဂါကိုသာ လမ်းညွှန်ကြပါတယ်၊ ဗော်ဒဂါရဲ့ မူရင်းက အာလူး ဆိုပေမယ့် တခြားသီးနှံများ ပန်းသီး သစ်တော်သီး ဇီးသီးလို အသီးများကလည်း ချက်လို့ ရပါတယ်။

အဲဒီ Vodka, Wódka, водка, Voda, Woda, вода, ဆိုတဲ့ စကားလုံး  မူရင်းအဓိပ္ပါယ်ကို သိချင်မိ ရတာကြောင့် ရှာဖွေကြည့်လိုက်တဲ့ခါမှာ အရှေ့ဥရောပသားတွေရဲ့ Slavic Languages စကားအရ ဤ “ဗော်ဒဂါ” ဆိုတာ တခြားမဟုတ်ပါ၊ “ရေ” ပါတဲ့၊ ဤသို့ ဖွင့်ဆိုပါကြောင်း မှတ်သားမိရပါတယ်၊ မောင်ရင်ငတေ မှတ်သားမိထားတာကိုသာ ပြောတာပါ၊ ရေလို့ယုံပြီး တချက်တည်းနဲ့မော့မသောက် လိုက်ကြပါနဲ့၊ ဇရက်မင်း စည်းစိမ်မရပါဘဲ နတ်ပြည်ခြောက်ထပ် တန်းရောက်သွားမှာ စိုးလို့ပါ။

ဗော်ဒဂါရဲ့ မူလဇစ်မြစ်က ပိုလန်လား ရုရှားလား တခြားအရှေ့ဖျားဥရောပကလားဆိုတာ ဘယ်သူမှသေချာ မပြောနိုင်သလို ဗော်ဒဂါစံနှုန်း သတ်မှတ်ချက်များကလည်း ဝေဝေဝါးဝါး ရှိလှတာမို့ ဒီကနေ့ တွဲဘက်သိနေကြတဲ့ ပြင်သစ်ရဲ့ဝိုင် စကော်တလန်ရဲ့ ဝီစကီတို့ကို မယှဉ်ပြိုင်နိုင်တာပါတဲ့ ခင်ဗျာ။

ဟုတ်လည်းဟုတ်နိုင်ပါတယ်၊ အရှေ့ဖျားဥရောပရဲ့ ဗော်ဒဂါတို့ ကာရေဘီယံဒေသက ရမ်တို့ဆိုတာ ဈေးကွက်မှာ နာမည် အမျိုးမျိုးနဲ့ ရှိနေပေမယ့် သောက်သုံးသူတွေအတွက် ဒုတိယတန်းစား အဆင့် မှာသာ ရှိနေဆဲပါ၊ ဘယ်လိုပြောပြော ချက်ပိုလန်နယ်စပ်မှာတွေ့ခဲ့ရတဲ့ ဂျယ်လီဗူးလိုလို အချိုရည်ဗူး လိုလို Božkov ဗော်ဒဂါ ပလတ်စတစ်ဗူးလေးတွေကတော့ သူ့မိတ်သူ့ပရိသတ်နဲ့ သူ့ဈေးကွက် ရှိနေ တာကတော့ မောင်ရင်ငတေ အသေအချာ ပြောနိုင်ကြောင်းပါ။

ရုရှားတော့ မရောက်ဖူးလို့ သေချာမသိပါဘူး၊ သူတို့တတွေ ချက်တို့ ပိုလန်တို့က မူလထဲက ဗော်ဒဂါ လိုမျိုး ရိုးရာ ချက်အရက် အဖြူတွေနဲ့ ကြီးပြင်းလာကြဟန် တူပါတယ်၊ မောင်ရင်ငတေ တွေ့ဆုံဖူးတဲ့ ပြင်သစ်ရောက် ပိုလန်သားကြီးတွေလည်း ဗော်ဒဂါကို နှစ်နှစ်ချိုက်ချိုက် မော့တတ်ကြပါတယ်၊ တခါ မော့စာ ဗူးလေးတွေ တခါသောက်စာ ပုလင်းသေးသေးလေးတွေနဲ့ ရေသောက်သလို မော့တတ်ကြ သူတွေပါ၊ မောင်ရင်ငတေ လား၊ မော့ကြည့်တာပေ့ါ၊ ဒါပေမယ့် သူတို့ မော့သလို ဘယ်လိုက်မော့နိုင် ပါမလဲ၊ သူတို့လို့ သောက်သုံးသူမှ မဟုတ်တာ၊ မောင်ရင်ငတေက အပျော်တမ်းသမားလေးပါ။

Road to Polska (2878 Dobrá voda) (ဓါတ်ပုံ မရငတ)


Tanvald အကျော် ဗော်ဒဂါဆိုင်လေးက ထွက်လာတော့ လမ်းအမှတ် (၁၄) နောက် ဘယ်ဘက်ကို ကွေ့၊ နောက်တခါ အမှတ် (၂၈၇၃၃) Nová Ves nad Nisou ဆိုင်းဘုတ်လေး တွေ့ပြီးတော့ ညာကို ထပ်ကွေ့၊ နောက်လမ်းအမှတ် (၂၈၇၄၁) ရောက်ထပ်ကွေ့၊ နောက်တခါ Kokonín (၂၈၇၉)၊ နောက် တခါ Vrkoslavice (၂၈၇)၊ Dobrá Voda (၂၈၇၈)၊ အဲဒီ Dobrá Voda လမ်းလေးကတော့ သစ်ပင် မြင့်မြင့်တွေနဲ့ လှပတဲ့ ခပ်ကျဉ်းကျဉ်းမှ တကယ့်ကို ခပ်ကျဉ်းကျဉ်း လမ်းလေးပါ၊ ရာသီဥတုသာ သာ သာယာယာဆိုရင်တော့ အင်မတန်လှပမယ့် နေရာလေးပါ၊ ရွာကလေးတွေကို ပတ်ဝိုက်ကွေ့၊ ခပ်တို တိုနဲ့ တောတောင်ဖြတ်လမ်းလေးတွေသာပါ၊ Rádlo လမ်းအမှတ် (၆၅) လမ်းခွဲသို့ ရောက်လာတော့ လမ်းမကျယ် ပြန်ဖြစ်သွားပါပြီ၊ ပရာဟာ ရောက်ဖို့တော့ ကီလိုမီတာ တရာကျော်မျှ လိုပါသေးတယ်။

လမ်းမကျယ်ရောက်သွားပြီဆိုတော့ တောလမ်းလေးတွေမှာ ဘယ်ညာယိမ်းထိုးပြီး မူးလာကြသူများလည်း အမူးပြေ သွားကြပါပြီ၊ အလာတုန်းက ဖွင့် နားထောင်လာတဲ့ ကိုဝေလလည်း သီချင်း ပြန်ဆို လာနိုင်ပါပြီ၊ အပြည်ပြည်ဆိုင်ရာ အသည်းကွဲသမားလေးတွေလည်း ၁၅ မိနစ်မျှကြာအောင် မစောင့် နိုင်တော့ပါဘဲ အလိုလို လွမ်းချင် အသည်းကွဲချင် လာပါပြီ၊ မိုးကလည်း ပိုသည်းလာလို့ ထင်ပါရဲ့။

လမ်းအမှတ် (အက်စ် ၃၅ သို့မဟုတ် အီး ၄၄၂) နဲ့  (ဒီ ၁၀ သို့မဟုတ် အီး ၆၅) လမ်းဆုံမြို့ Turnov မြို့လေးကို ရောက်လာတော့လည်း ပိုစကာမြေက လိုက်ပါလာတဲ့ နှင်းမိုးကမစဲတဲ့အပြင် ပို၍တောင် သည်းလာပါသေးတယ်၊ နေသာမယ် ပြောထားတဲ့ ချက်မြေကြီးလည်း မိုးမင်းလွန်ကဲလို့ တတောလုံး တတောင်လုံး နှင်းမှုန်မြူမှုန် မိုးမှုန်တွေနဲ့သာ မှိုင်းမှိုင်းဝေ နေပါတော့တယ်၊ မောင်ရင်ငတေတို့လည်း ပရာဟာကို အရောက်ပြန် ကုန်တိုက်တခုဝင် ဝင်းဒိုးရှောပင်လေးဘာလေးလုပ် ဝယ်စရာရှိတာ ဝယ် ကြမယ်ပေ့ါ၊ ပြီးရင် အလယ်ဥရောပရဲ့အကြီးဆုံးသော ဗီယက်နမ်ဈေးသွားပြီး နာမည်ကြီး အမဲသား Phở သွားစားကြမယ်ပေ့ါ၊ ပရာဟာမြို့တော် ဧရိယာထဲ ဝင်လာတော့ လမ်းပေါ်မှာ ကားတွေနဲ့ ပြည့် နေပါပြီ၊ အားလုံးလည်း ဝမ်းဟာ နေကြပြီမို့ ဗီယက်နမ်းဈေး အရင်သွား ဗိုက်ဖြည့်ကြမယ်ဆိုပြီး ဈေး ဆီသို့ဦးတည်ပါတယ်၊ တကယ်က အဲဒီဈေးရုံကြီးကို အရင်တခါ ရောက်ပြီးကထဲက မောင်ရင်ငတေ မသွားချင်တော့ပါဘူး၊ ဘာလို့ဆိုတော့ ဈေးအတွင်း ဓါတ်ပုံရိုက်ခွင့် ပိတ်ပင်ထားလို့ပါ။

Road to Polska (“Little Hanoi”  TTTM Sapa Market in Prague) (ဓါတ်ပုံ မရငတ)


အဲဒီ “Little Hanoi”  TTTM Sapa Market ခေါ် ပရာဟာရဲ့ ဗီယက်နမ် ဈေးကြီးက သာမန် ဈေးတဈေးအဆင့်မျှ မကပါဘူး၊ လူပေါင်းရှစ်ထောင်ခန့် နေထိုင်ကြပြီး ကျောင်းတွေ ရုံးတွေ စာတိုက်တွေ ဟော်တယ်တွေ ဂိုဏ်းစတားစ်တွေနဲ့ သီးခြား မြို့လေးတမြို့ အလားပါ၊ သီးခြားဥပဒေ တောင်မှ မရှိဘူး မပြောနိုင်ပါဘူး၊ ဒါမှဒို့အာဆီယံလို့ ဆိုရလေမလား မသိတော့ပါဘူး၊ သူတို့က ဒီလိုဥရောပနိုင်ငံထိတောင် လူပေါ်လူဇော် လုပ်နိုင်နေတယ် မဟုတ်ပါလားနော်။

ဈေးအတွင်း ဈေးအဝင်ဝ ဓါတ်ပုံမရိုက်ရပါဘူး၊ ဘာကြောင့် ဘယ်သူ့အမိန့်အရ ပိတ်ပင်ထားပါသလဲ ရှင်းရှင်းလင်းလင်း မရှိလှပါဘူး၊ သူ့ထက်တန်ဖိုးကြီးတဲ့ ဈေးကြီးတွေ ချက်နိုင်ငံမှာရှိပါတယ်၊ ဓါတ်ပုံမ ရိုက်ရ တားမြစ်ချက်မရှိပါဘူး၊ ဒီဈေးက အစုတ်အပြတ်အသတ် အင်ဂုလိတွေသာ ရောင်းချတဲ့ဈေးမို့ ပိတ်ပင်ထားတာ ဆိုရင်တော့ မောင်ရင်ငတေ ဘာမှမပြောချင်တော့ပါဘူး၊ ပထမတခေါက်က ဈေးဝအဝင်ဂိတ်ကို မှတ်တမ်းတင်မိတာ အတားမြစ် ခံထားရတဲ့ မောင်ရင်ငတေ့ အတွေ့အကြုံအရ အဝေး ကနေ ဈေးဝကိုတော့ အရင်ဦးအောင် မှတ်တမ်းတင်၍ ကျေနပ်လိုက်ပါတယ်။

ဒီဈေးက ဗီယက်နမ် လှေစီးသမားတွေ ဦးစီး ဦးဆောင်ခဲ့လို့ ဗီယက်နမ်ဈေးလို့ အမည်တွင်ခဲ့ဟန် တူ ပါတယ်၊ ဒါပေမယ့် အာရှတခွင်က စားစရာတွေနဲ့ ပစ္စည်းပစ္စယတွေ အမျိုးစုံလင် ရှိပါတယ်၊ စားစရာ တွေကတော့ အမှန်အကန်ပေမယ့် တခြား လူသုံးကုန်ပစ္စည်းတွေကတော့ သိပ် အလုပ်မဖြစ်ပါဘူး။

အလယ်ဥရောပ အရှေ့ဥရောပ တောင်ဥရောပနိုင်ငံတွေက အနောက်ဥရောပ မြောက်ဥရောပဆီက နိုင်ငံတွေထက် ဈေးသက်သာတာကတော့ အမှန်ပါ၊ ကွာလတီကတော့ ကြည့်သာဝယ်ကြပေ့ါ၊ အားလုံးလိုလိုက တရုတ်ပြည်မှာ ထုတ်လုပ်ပါသည်၊ သို့တည်းမဟုတ် အိန်ဒရိယ ပါကစ္စတန် ဗီယက်နမ် ထိုင်း တူရကီ မော်ရိုကို တွေသာပါ၊ အခုတလောတော့ မိတ် အင် ဘားမားတွေတောင် အတော်တွေ့ လာရတယ် ဆိုကြပါတယ်၊ ယူရိုပီယမ်ဆိုတော့ ကွာလတီ ကွန်ထရိုးလ်လေးတော့ ရှိတာပေ့ါလေ။

ဟိုအရင်တခါက အဲဒီ ဗီယက်နမ်ဈေးက ပေါချောင်ကောင်း ဟန်းဘက် အိတ်လေးတလုံး လိုအပ်လို့ တခါသုံးဆိုပြီး ဝယ်လာမိပါတယ်၊ မိတ်အင်ချီးနားလား ဘာလားတော့ မကြည့်မိရပါဘူး၊ အပြန် ခရီးဘူတာအတက်မှာတင် ဇစ်ကဆွဲစိမရတော့ပါဘူး၊ ကွာလတီက အဲလိုပါ၊ ဒီတခါတော့ မှတ်သွားပါပြီ။

စားရုံစားပြီး ဘာမှ မဝယ်တော့ပါဘူး၊ ဒါပေမယ့် အဲဒီ ‘Little Hanoi’ အမည်ရ ဗီယက်နမ်ဈေးကြီးက သူ့နည်းသူ့ဟန်နဲ့ စည်ကားမြဲစည်ကားနေတာကတော့ သေချာပါတယ်၊ အာရှအစားအသောက်တွေ စားသောက်ရမှသာ ခွန်အားပြည့်ဖြိုးတယ် ထင်ကြတဲ့ မောင်ရင်ငတေတို့ အတွက်ကတော့ ဒီဈေးကို အားမကိုးရင် ရွှေပြည်တော်က ကီလီဈေးတို့ သီရိမင်္ဂလာဈေးတို့ကို အွန်လိုင်းက လှမ်းမှာရုံသာ ရှိပါ တော့တယ်၊ နေပြည်တော်က ကိုရွှေခရိုဏီများ ဒီ ပရာဟာ ‘Little Hanoi’ ကိုလာရောက် လေ့လာဖို့ သူတို့ကိုယ်စား မောင်ရင်ငတေ ဖိတ်ခေါ်အပ်ကြောင်းပါ ခင်ဗျား။

ဘာပြောပြော ဗိုက်ဆာနေပြီကြပြီဖြစ်တဲ့ မောင်ရင်ငတေတို့ကတော့ ဗီယက်နမ် အစာသည် ဒို့အစာဗီယက်နမ် Phở သည် ဒို့ဖို ဆိုပြီး ခေါင်းမဖော်စတမ်း တွယ်နေမိပါတော့တယ်၊ မုန့်တီတို့ မုန့်ဟင်းခါးတို့မှ မရောင်းတာကိုး၊ အဲတော့ ဒီ Phở အဟုတ်လုပ် စားကြရတော့တာ ပေ့ါလေ၊ ပါရီမြို့က ဆိုင်မှာ ရှစ်ယူရိုလောက် ပေးမှ စားရတဲ့ Phở ကို ပရာဟာမှာ သုံးယူရိုလောက်သာ ပေးရတော့ တန်ပါတယ် ပေ့ါလေ၊ နှစ်ပွဲလောက်ကြိတ်လိုက်ချင်ပေမယ့် တဖြေးဖြေးကျဉ်းလာတဲ့ အစာအိမ်က လက်ခံနိုင်စွမ်း မရှိတော့လို့ တပွဲနဲ့သာ ရပ်နားလိုက်ရပါတယ်။

Road to Polska (Phở, Soupe Tonkinoise, Pot-au-Feu) (ဓါတ်ပုံ မရငတ)


စားဖူးတဲ့ Phở ထဲမှာတော့ တကယ်စား ကောင်းပါတယ်၊ Soupe Tonkinoise သို့မဟုတ် Phở ခေါ် ပြင်သစ်လို Pot-au-Feu ဆိုတာက ဆန်ခေါက်ဆွဲနဲ့ အမဲသား အရွတ်တွေ ရောလို့ ပြုတ်ထားတာပါ၊ ရွှေပြည်ကြီးက ကြေးအိုးဆိုတာနဲ့ ဝက်နဲ့အမဲကွာတာကလွဲလို့ အတော်လေးတူပါတယ်၊ ဘယ်ခေတ်ဘယ်အခါ ဘယ်အရပ်ဒေသကနေ စတင်ပေါ်လာသလဲ မသေချာပေမယ့် ဒီကနေ့တော့ ဗီယက်နမ် တွေရဲ့ရိုးရာ နေ့စဉ်စာတမျိုး ဖြစ်နေပါပြီ၊ စားလို့မဆိုးလှပါဘူး၊ မောင်ရင်ငတေလည်း ကြိုက်ပါတယ်၊ပါရီမြို့ ၁၃ ရပ်ကွက် တရုတ်တန်းရှိ Resto de “Phở Banh Cuon 14”   ဆိုင်ကတော့ ညနေညနေ တန်းစီသူ အပြည့်ပေ့ါလေ၊ မောင်ရင်ငတေကတော့ ရွှေပြည်ကြီးက ကြေးအိုးဘုရင် မောင်မောင်ခင်  တို့ကို ခေါ်ပြလိုက်ချင်မိပါရဲ့၊ အဲဒီ Phở ဆိုတာကြီးက တကယ်စားကြည့် ကြေးအိုးခြေဖျား မမှီပါဘူး၊သို့ပေမယ့် ၁၉၇၀ နှောင်းပိုင်းမှာတော့ ဗီယက်နမ် စစ်ပွဲအပြီး ထွက်ပြေးရောက်ရှိလာကြတဲ့ စစ်ပြေး ပြည်ပြေး ဒုက္ခသည်များနဲ့အတူ Phở ဆိုတာကြီးလည်း ပြင်သစ်မြေမှာ တွင်ကျယ်လာခဲ့တာ ဒီကနေ့ မှာတော့ အဲဒီ Phở ပိုင်ရှင်များရဲ့ သားသမီးမြေးမြစ်များလည်း နေးတစ်စပီကာ ပြင်သစ်ကြီးများ ဖြစ် လို့ လာနေပါပြီ၊ မောင်ရင်ငတေတို့ကတော့ စားသုံးသူအဆင့်က မတက်လာသေးပါဘူး။

ကုန်တိုက်ရောက်တော့ အမဲသား ဆွပ်ပြုတ်သောက် ဗိုက်တင်းလာတဲ့ မောင်ရင်ငတေကတော့ အိပ် ငိုက်နေပါပြီ၊ သူတို့တွေ ဈေးဝယ်နေတုန်း မောင်ရင်ငတေကတော့ တခဏ အနားယူရင်း ပိုစကာရဲ့ တညအိပ် ဒီ ခရီးကို စမြုံပြန် စဉ်းစားခန်း ဝင်နေမိတာပေ့ါ၊ ခရီးစဉ်တခု အောင်မြင်စွာ ပြီးဆုံးတိုင်းမှာ မောင်ရင်ငတေအတွက် ဘာအမြတ်ကျန်ပါသလဲ စဉ်းစားပါတယ်၊ ဘာလို့ ဒီခရီးတွေ သွားနေသလဲ စဉ်းစားပါတယ်၊ တကယ်တော့ စိတ်နဲ့ စိတ်အဆာကို ဒီနည်းတွေနဲ့ လျှော့နေခြင်းလား စဉ်းစားရင်းနဲ့ အဖြေက ခေါင်းခြောက်လာခြင်းပါ၊ ကဲကဲ စဉ်းစားမနေနဲ့၊ သွားစရာရှိသာသွား၊ ရှေ့ဆက်၍သာသွား၊ သံသရာမပြီးမချင်း သွားသာသွားပါ မောင်ရင်ငတေရာ၊ သိပ်စဉ်းစားမနေပါနဲ့၊ အဲလို သိပ်မစဉ်းစားဖို့စဉ်းစားနေမိတဲ့ မောင်ရင်ငတေနားထဲ သွားမယ်ပြန်မယ် အိမ်ရောက်ရင် နားမယ်သောက်မယ်ဆိုတဲ့ ကျေးဇူးရှင် ကားဆရာ ချက်ကရီကြီးရဲ့ အသံကြောင့် စဉ်းစားခန်းဖြတ် ကုန်တိုက်ကထွက် ကားပေါ် ပြန်တက် အိမ်ရောက် တညတာနားကြပြီး ပိုလန်နယ်စပ်သို့ တညအိပ် ဇာတ်လမ်းကို အဆုံးသတ်ပါ တော့မယ်၊ ကျေးဇူးတင်ပါတယ် အားလုံးကို။

Road to Polska (2878 Dobrá voda) (ဓါတ်ပုံ မရငတ)


ကုန်းခေါင်ခေါင် ဒီခရီးမှာ အဆိုတော်ဝေလ သီချင်းများနဲ့ သေချာရွေးဧည့်ခံခဲ့ပြီး စိတ်ရှည်လက်ရှည် လူကလည်း အရပ်ရှည်ရှည် ဆံပင်ရှည်ရှည်နဲ့ ကားမောင်း လိုက်ပို့ပေးခဲ့သူ ပရာဟာရောက် မိုးကုတ် သားကြီးနဲ့ ကွန်ထရိုလ်လာ မမကို ဒီနေရာကနေ ကျေးဇူးတင်ကြောင်း ထပ်မံ မှတ်တမ်းတင်လိုက်ပါ တယ် ခင်ဗျာ၊ ကျေးဇူး အထူးပါ ခင်ဗျာ။

Road to Polska (Rzeczpospolita Polska) (Photo Google)


ဒီခရီးရည်ရွယ်ချက်က ဘယ်လိုဖြစ်ဖြစ်ပါ၊ ပိုလန်မြေကို နင်းဖူးတယ်ဆို မောင်ရင်ငတေ ကျေနပ်ပါပြီ၊ ပထမအဆင့်ပေ့ါ၊ နောက်များတော့ ပိုစကာမြေ အရှေ့ခြမ်း မြို့တော်ဝါးဆောနဲ့ သိပ်မဝေးကွာလှတဲ့ ဆိုဗီယက်ယူအက်စ်အက်စ်အာရ် နယ်ဟောင်းများ ဖြစ်ကြတဲ့ လစ်သူရေးနီးယား အက်စ်စတိုနီးယား လာ့ဗီးယားတို့ ဘယ်ရ်လာရုစ်တို့ ယူကရိန်းတို့ကို သွားနိုင်ဖို့ ကြိုးစားရပါဦးမည် ခင်ဗျား။

Polska ပိုစကာမြေ ဇာတ်လမ်း တခန်းရပ်ပါပြီ။

မောင်ရင်ငတေ
၀၆၀၄၂၀၁၇-၂၅၁၂၂၀၁၇


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ခရီးသွား ဆောင်းပါး, မောင်ရင်ငတေ

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ် ထွက်ပြီ

By

မိုးမခရဲ့ လောကဓာတ်ခန်း – Gmail နဲ့ Google Application အသုံးချ လမ်းညွှန်စာအုပ်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်