မောင်အောင်မွန် ● ကျွန်တော်တွေးမိသလိုရေးပါမည် (၃၂၈)

April 2, 2018

မောင်အောင်မွန် ● ကျွန်တော်တွေးမိသလိုရေးပါမည် (၃၂၈)
(မိုးမခ) ဧပြီ ၂၊ ၂ဝ၁၈
သမတအရသာနှင့် မန်းဝင်းမောင်

(၁)
၁၉၅၇ ခု၊ မတ်လ။
ကျွန်တော့်တစ်သက်တွင် ပထမဆုံးအကြိမ် စာမေးပွဲကျဖူးသော Ist Year B.Sc (Engg) စာမေးပွဲ စတင်ဖြေဆိုနေရချိန်ဖြစ်သည်။ ကျောင်းမှန်မှန်မတက် စာမကျက်၊ တကသ သို့မူနေ့စဉ်ရောက် သတင်းစာတွေ မပျက်မကွက်ဖတ် နိုင်ငံရေးအကြောင်း ပြောဆိုဆွေးနွေးကြသည့်ထဲ နားထောင်တန်နားထောင် အခွင့်သာလျှင် ဝင်ပါနှင့်မို့ စာမေးပွဲခန်းသို့ပင် မန်းဝင်းမောင်က ကျွန်တော့်ခေါင်းထဲ လိုက်ပါလာ၏။

ဒေါက်တာဘဦး သမတသက်တန်း ကုန်ဆုံးပြီမို့ နောက်တစ်ယောက် ပါလီမန်ပြည်သူ့လွှတ်တော်က ရွေးကောက်တင် မြှောက်ကြရမည်။

(၂)
ကရင်တိုင်းရင်းသား အလှည့်ကျ၍ သမတလုပ်ရန် ဝန်ကြီးမန်းဝင်းမောင် အားဝိုင်းဝန်းနားချ၊ သူကလည်းကြောက်အကန် ငြင်းနေပုံသတင်းစာများက ဝေဝေဆာဆာဖော်ပြသည်။ ကျွန်တော်တို့ဖတ်ကြရ၏။ သဘောအကျဆုံးက ဘောလုံးပွဲကြိုက် သူမို့ ဘောလုံးပွဲမကြည့်ရလျှင် သမတ မလုပ်နိုင်ဟု ဇွတ်အတင်းငြင်း၏။

ထိုစဉ်က မန်းဝင်းမောင်သည် အာဏာရ ဖဆပလ အစိုးရအဖွဲ့တွင် သယ်ယူပို့ဆောင်ရေး ဝန်ကြီးပါ။

ရန်ကုန်မြို့ အောင်ဆန်းကွင်း ပထမတန်း ဘောလုံးပြိင်ပွဲ၌ သူ့ဝန်ကြီးဋ္ဌာနက မီးရထားအသင်းနှင့် ဧရာဝတီ(ရေကြောင်း)အသင်း တို့ပါဝင်ယှဉ်ပြိုင်ခွင့် ရနေကြချိန်ပါ။ အဲဒီဘောလုံအသင်း နှစ်သင်းကန်တိုင်း မရရအောင်အချိန်ယူ မှန်မှန်လာကြည့်ပြီး နိုင်တဲ့အသင်းကို ဆုငွေ ၁ဝဝိ ( အဲဒီအချိန်က ရွှေတကျပ်သား ၂၄ဝိ) အမြဲမပြတ်ပေး၏။

မန်းဝင်းမောင် ဘောလုံးပွဲ ဘယ်လောက်ကြိုက်သလဲဆိုတာ သိလောက်ပါပြီ။

သမတဖြစ်လည်း ဘောလုံးပွဲကြည့်ခွင့်ပြုပါမည်ဟု ဖဆပလ တစ်ဖွဲ့လုံးကအာမခံ၊ ပါလီမန်ကသဘောတူနှင့် အသက် (၄၁) နှစ် မပြည့်တပြည့်အရွယ် ဝါရင့်ဝန်ကြီး မန်းဝင်းမောင်အား ပြည်ထောင်စု သမတမြန်မာနိုင်ငံတော်၏ တတိယသမတအဖြစ်ဖြစ် ၁၉၅၇ ခု၊ မတ်လ (၁၃) ရက်နေ့တွင် ပါလီမန်လွှတ်တော်က ဖဆပလ၊ ပမညတ စသဖြင့် တညီတညွတ်တည်း တင်မြှောက်လိုက်ကြသည်။

သမတ မန်းဝင်းမောင်ဖြစ်လာပါပြီ။

(၃)
မန်းဝင်းမောင်အား ဟင်္သာတခရိုင်၊ ကျုံပျော်မြို့တွင် ၁၉၁၆ ခု၊ နှစ်ဧပြီလ (၁၇)ရက်နေ့၌မွေး၏။

ဒုတိယကောလိပ် သပိတ်ကာလတွင် ရန်ကုန်တက္ကသိုလ် Judson College ကျောင်းသားအဖြစ် ပါဝင်ဆင်နွှဲခဲ့ပြီး ၁၉၃၇ ခု၊ တွင် B.A အောင်သည်။ မြန်မာပြည်ကို သိမ်းပိုက်အုပ်စိုးနေသော ဖက်ဆစ်ဂျပန်တို့ ညှဉ်းပန်းနှိပ်စက်နေသည့် ဒဏ်က လွတ်မြောက်ရေး ဝိုင်းဝန်းကြိုးပမ်းကြရာ မန်းဝင်းမောင်လည်းပါ၏။

အိန္ဒိယနိုင်ငံသို့ ရောက်နေကြသော သခင်သိန်းဖေ(မြင့်)၊ သခင်တင်ရွှေတို့သည် အင်္ဂလိပ်၊ အမေရိကန် တို့ပါဝင်သော မဟာ မိတ်တပ်ဖွဲ့များနှင့် ဆက်သွယ်စီစဉ်ကာ မြန်မာလူငယ်များအား လေထီးသင်တန်းပေးသည်။ ဗြိတိသျှတို့၏ သင်တန်းတွင် ကိုအုန်းမောင်၊ ကိုစိုးမောင်၊ ကိုကျော်ရင်၊ ကိုညွန့်ဝေ၊ မန်းဝင်းမောင် စသူတို့ပါဝင်ကြပြီး မြန်မာပြည်မြောက်ပိုင်း စစ်မျက်နှာ၌ တိုက်နေသော အမေရိကန်တို့ကလည်း ဝမ်းအိုဝမ်း (101) ကျော်ဝင်းမောင် စသူတို့အား အလားတူသင်တန်းပေးသည်။

ဂျပန်သိမ်းပိုက်နယ်မြေသို့ လေယာဉ်ပျံပေါ်က လေထီးများနှင့်ဆင်းကာ ဖက်ဆစ်တို့အား ပြောက်ကျား စစ်ဆင်တိုက်ရသည်မို့ အင်မတန်အန္တရာယ်ကြီးပါ၏။ ဖက်စစ်တော်လှန်းရေး ဆင်နွှဲနေသော တပ်ဖွဲ့များနှင့် နိုင်ငံရေးအဆက်အသွယ် ရယူရန်လည်းကြိုးပမ်းကြရ၏။ မန်းဝင်းမောင်တို့ လေထီးဆင်းလူငယ်များသည် ချင်းတွင်းမြစ်ကနေ ဖောင်များဖွဲ့ကာ စွန့်စားဆင်းကြရသည်။

မိတ္ထီလာကိုသိမ်းပိုက်ထားသော ဗြိတိသျှတပ်မှ ဗိုလ်ချုပ်စလင်းနှင့် ဗိုလ်ချုပ်အောင်ဆန်း တွေ့ဆုံကြပြီ။

(၄)
၁၉၄၅ ခု၊ သြဂုတ်လ (၁၅) ရက်နေ့တွင် ဒုတိယကမ္ဘာစစ်ကြီးပြီးဆုံး၏။

ဖက်စစ်တော်လှန်းရေးအတွက် ဗကပ၊ တပ်မတော်နှင့် ဆိုရှယ်တို့ ဖွဲ့စည်းထားသည့် ဖတပလ (ဖက်ဆစ် တိုက်ဖျက်ရေး ပြည်သူ့လွတ်မြောက်ရေး) အဖွဲ့လည်း ပိုမိုကျယ်ပြန့်လာကာ အခြားသော အဖွဲ့အစည်းများ ပါဝင်သည့် ဖဆပလ အမျိုးသားတပ်ဦးကြီး ဖြစ်လာလေပြီ။ လေထီးဆင်းလူငယ်တို့လည်း ပါဝင်ကာ လွတ်လပ်ရေးတိုက်ပွဲ ဆက်လက်ဆင်နွှဲကြ၏။
အောင်ဆန်း အက်တလီစာချုပ်အရ တိုင်းပြုပြည်ပြု လွှတ်တော် ရွေးကောက်ပွဲလုပ်သောအခါ ဗကပ တို့ကစတိလောက်သာ ဝင်ပြိုင်သည်။ ဖဆပလ အဖွဲ့ဝင် မန်းဝင်းမောင်သည် ဟင်္သာတခရိုင်၊ ကျုံပျော်မြို့ မဲဆန္ဒနယ်မှ အရွေးခံရသည်။ ဗိုလ်ချုပ်အောင်ဆန်း ဒုတိယသဘာပတိလုပ်သော အစိုးရအဖွဲ့တွင် ဝန်ကြီးဖြစ်လာ၏။ ထို့နောက် ၁၉၄၇ ခု၊ ဇွန်လ (၁ဝ) ရက်နေ့ အမတ်များ ဗန္ဓုလပန်းခြံကနေ လွှတ်တော်သို့ ချီတက်ကြရာ၌လည်း ပါဝင်၏။

ဗကပ ကို ဖဆပလ ထဲကထုတ်ပစ်လိုက်တော့ လေထီးဆင်းလူယ် အတော်များများပါသွားပြီး မန်းဝင်းမောင် ကျန်ရစ်ခဲ့သည်။ သွေးသောက် လေထီးဆင်းလူငယ်တို့ ကွဲသွားကြရှာပြီ။ ၁၉၄၇ ခု၊ ဇူလိုင်လ (၁၉)ရက်နေ့ ဗိုလ်ချုပ်အောင်ဆန်းနှင့် ခေါင်းဆောင်ကြီတို့ လုပ်ကြံခံရပြီးနောက်တွင်လည်း သူ ဖဆပလ ဝင်အဖြစ်ဆက်လက် လှုပ်ရှား၏။

၁၉၄၈ ခု၊ ဇန်နဝါရီလ (၄) ရက် လွတ်လပ်ရေးရတော့လည်း သူမပြောင်းလဲပါ။ သည်လိုနှင့်ပင် သမတ မန်းဝင်းမောင်ရယ်လို့ ဖြစ်လာခဲ့ရသည်။

(၅)
သူ့သမတ လက်ထက် ဂယက်အရိုက်ဆုံးကား ကြိုးစင်တက်မည့်သူအား လွှတ်ပေးခြင်းတည်း။

သူတို့လူသိုက်ထဲ တစ်ယောက်က နိုင်ငံရေးသမား လေထီးအုန်းမောင်၊ နောက်တစ်ယောက်က ကထိကဦးကျော်ရင်၊ အခြားတစ်ယောက်က ဗကပ ဦးညွန့်ဝေ၊ ဟောဒီ ကိုစိုးမောင်ကတော့ ဗကပတပ်နီမှ ကာနယ်ချစ်ကောင်း– တိုက်ပွဲတွင် စစ်တပ်ကဖမ်းမိပြီး တရားရုံးအဆင့်ဆင့်က သေဒဏ်စီရင်ထား၍ ကြိုးစင်တက်ရန် စောင့်နေရသူ။

မိမိကတော့ နိုင်ငံတော်သမ မန်းဝင်းမောင်။

အိန္ဒိယ လေထီးသင်တန်းကျောင်း၌ အတူတက်ခဲ့ရသူ၊ လေယာဉ်ပျံပေါ်ကနေ အတူဆင်းကြစဉ် လေထီးမပွင့်၍–သို့မဟုတ် သစ်ပင်နှင့်ငြိ၍– သို့မဟုတ် ဂျပန်တို့မိသွား၍ သို့မဟုတ် ချင်းတွင်းမြစ်ထဲ ဖောင်ပျက်၍ စသဖြင့် သေလမ်းများစွာက လွတ်မြောက်လာပြီး လွတ်လပ်ရေး ရပြီးချိန်အထိ အတူတွဲခဲ့သူ ရဲဘော်နှစ်ယောက် မဟုတ်ပါလား။

နိုင်ငံတော်သမတသည် သေဒဏ်ကျခံနေရသူအား လွတ်ငြိမ်းချမ်းသာခွင့် ပေးနိုင်ကြောင်း ဥပဒေက ဆိုထားသည်။ အစဉ်အလာအားဖြင့်မူ ကက်ဘိနက် အစိုးရအဖွဲ့က ဆုံးဖြတ်ပြီးနောက် တင်ပြလာတော့မှ သမတက ပေးလေ့ရှိသည်။ အငြိုးအာဃာတ အလွန်ကြီးမားသော နိုင်ငံရေးသမား တစ်ဦးသြဇာထက်နေသည့် ကက်ဘိနက်က ဗိုလ်မှူးချစ်ကောင်းအား လွတ်ငြိမ်းခွင့်ပေးရန် တင်လာလိမ့်မည်ဟု မန်းဝင်းမောင်က ထင်ပုံမရ။

မိမိဘာသာ သမတ အာဏာသုံးကာ ဗိုလ်မှူးချစ်ကောင်းအား လွတ်ငြိမ်းချမ်းသာခွင့်ပေးလိုက်ပြီ။

ဝန်ကြီးချုပ် ဦးနုက ဒေါပွ ပြစ်တင်စကာားပြောသော်လည်း ပြင်၍မရတော့၊ သတင်းစာများက အမျိုးမျိုး ဝေဖန်ရေးသားကြနှင့် အကြီးအကျယ်ဂယက်ရိုက်ကုန်၏။ မကျေနပ်ကြ၍ သမတအဖြစ်က ဖယ်ရှားပစ်လည်း ရင်ဆိုင်ဖို့အသင့်ဟု မန်းဝင်းမောင်က ပိုင်းဖြတ်ထားပုံ ခန့်မှန်းရသည်။

ဖဆပလ နှစ်ခြမ်းကွဲသောအခါ သမတမန်းဝင်းမောင် ဝင်ပါဖို့ အကြောင်းမရှိ။
၁၉၅၈ ခု၊ ဇွန်လ(၄)ရက်နေ့တွင် တည်မြဲဝန်ကြီးများ နှုတ်ထွက်ကြ၍ ဝန်ကြီးချုပ်ဦးနု၏သန့်ရှင်ဖဆပလ အစိုးရအဖွဲ့ သမတရှေ့မှောက် ကျန်းကျိမ်ကြ၏။ ပမညတ တို့၏ထောက်ခံမှု မရတော့သောအခါ ဦးနုသည် ဘတ်ဂျကို ပါလီမန်မခေါ်ရဲ မတင်ရဲဖြစ်လာပြီ။ စစ်တပ်က အာဏာသိမ်းမည်ဟု သတင်းတွေလည်းထွက်နေ၏။
ဝန်ကြီးချုပ်က မေတ္တာရပ်ခံလာ၍ သမတက ဘတ်ဂျက်ကို အတည်ပြုပေးလိုက်သည်။
ပြစ်တင်ဝေဖန်သံတွေ ညံလာပြီ။

ဖွဲ့စည်းပုံနှင့် အညီသမတက လုပ်ဆောင်ခြင်းဖြစ်၍ ထိုးနှက်များက ဒီမိုကရေစီ ဖခင်ကြီး ဦးနုအပေါ်သာ စုပြုံထိမှန်ပြီးနောက် သက်တန်း(၃)လနှင့်(၁၇)ရက်ကြာ သူ၏ဆွဲစပ်အစိုးနိဂုံးချုပ်သွားလေပြီ။ စစ်အာဏာသိမ်း အစိုးရကို ပါလီမန်တွင် အတည်ပြုပေးကြသည်။

၁၉၅၈ ခု၊ စက်တင်ဘာလ (၂၈) ရက်နေ့၌ ဝန်ကြီးချုပ် ဗိုလ်ချုပ်ကြီးနေဝင်းနှင့် အစိုးရအဖွဲ့ဝန်ကြီးများ သမတ မန်းဝင်းမောင်ထံ ကျမ်းသစ္စာကျိန်ဆိုကြ၏။ ၁၉၆ဝ ခု၊ ဖေဖေါ်ဝါရီလ ရွေးကောက်ပွဲတွင် အနိုင်ရသော သန့်ရှင်းဖဆပလ က ပထစ (ပြည်ထောင်စု) ပါတီအဖြစ် နာမည်ပြောင်းပြီး ဝန်ကြီးချုပ် ဦးနုနှင့် ပထစဝန်ကြီးများ သမတ မန်းဝင်းမောင်ထံ ကျမ်းသစ္စာကျိန်ဆိုကြ၏။

(၆)
အိမ်စောင့်အစိုးရလက်ထက် ၁၉၅၉ ခု၊ အောက်တိုဘာလ (၁၇) နေ့တွင် ကျွန်တော် မြန်မာ့အသံ၌ အလုပ်ရသည်။ စက်မှုလက်ထောက်အဖြစ် Outdoor Recordings and Outdoor Broadcasts များ၌ပါရ၏။

၁၉၆၁ ခု၊ ဒီဇင်ဘာလ ရန်ကုန်မြို့ အောင်ဆန်းကွင်းမှ 2nd SEAP Games ကိုဖွင့်ပွဲ ပိတ်ပွဲတို့ကို မြန်မာ့အသံက တိုက်ရိုက်အသံလွှင့်ပေးသည်။

ဖွင့်ပွဲက ဒီလိုပါ။

ပါဝင်ယှဉ်ပြိုင်ကြသည့် နိုင်ငံများက အားကစားသမာများ ကွင်းထဲမှာ နေရာယူထားကြပါပြီ။ နိုင်ငံ့ဂုဏ်ဆောင် ဦးဇော်ဝိတ်လည်း မီးရှူးတိုင်ကိုင်ကွင်းထဲဝင်လာပြီး အရှေ့ဘက်ပွဲကြည့်စင် အထက်သို့ အသင်ရောက်ရှိနေပါပြီ။

ပြိုင်ပွဲကျင်းပရေး ဦးစီးကော်မတီဥက္ကဋ္ဌ ဗိုလ်မှူးချုပ်အောင်ကြီး အလေးပြုအနေအထားနှင့် ပြိုင်ပွဲဖွင့်ပေးရန် ပန်ကြားသောအခါ၊ သမတ မန်းဝင်းမောင်က ခုချိန်ကစပြီး ဒုတိယအကြိမ်မြောက် အရှေ့တောင်အာရှ ကျွန်းဆွယ် အားကစားပြိုင်ပွဲကို ဖွင့်လိုက်ပြီဟု ကြေညာလိုက်ရာ ဦးဇော်ဝိတ်လည်း မီးရှူးတိုင်နှင့် ပြိင်ပွဲပြီးဆုံချိန်ထိ တောက်နေမည့် မီးတောက်ထွန်းညှိလိုက်သည်။

ထို့နောက် ဖွင့်ပွဲအထိန်းအမှတ် သရုပ်ဖော်ကြသည်။ ပြိုင်ပွဲဝင် နိုင်ငံအလိုက် အားကစားသမားများက သမတ မန်းဝင်းမောင်အား ချီတက်အလေးပြုကြသည်။ TV မပေါ်သေး၍ သောတရှင်များ ရေဒီယိုနားထောင် မျက်စိထဲ မြင်လာအောင် အသံလွှင့်ကြရသောကြောင့် ကျွန်တော်လည်း သမတ မန်းဝင်းမောင်အား အနီးကပ် ကြည့်ခွင့်မြင်ခွင့် ရလိုက်လေပြီ။

2nd SEAP Games ပိတ်ပွဲနေ့က သမတ မန်းဝင်းမောင် စောပြီးရောက်နေနှင့်၏။

မြန်မာနှင့်မလေးရှား ဘောလုံး နောက်ဆုံးဗိုလ်လုပွဲ ကြည့်ဖို့ပါ။ ဖွင့်ပွဲကကဲ့သို့ပင် ပြိုင်ပွဲပြီးဆုံးကြောင်း သမတ မန်းဝင်းမောင် ကကြေညာအပြီး အခန်းအနားနှင့် ပိတ်ကြရသည်။

ကျွန်တော်ချစ်သော သမတမန်းဝင်းမောင်နှင့် ပိုနီးကပ်စွာမြင်ခွင့်ရပြန်ပြီ။

သမတအိမ်တော်မှာ ဘွဲ့၊ဆု၊တံဆိပ်များပေးသည့် အခန်းအနား မြန်မာ့အသံက တိုက်ရိုက်အသံလွှင့်ရာ ဦးတင်ဦးခေါင်းဆောင်သော အဖွဲ့၌စက်မှုလက်ထောက်အဖြစ် လိုက်ပါခွင့်ရ၏။ လက်ခံရယူသူ မျိုးစုံကိူကြည့်ပြီး တော်လှန်ရေးဟူသည် အလွှာပေါင်းစုံပါဝင်၊ စကားမပြောတတ်သူ အ အလေးပင်လျှင်မကျန်ဟူ၍ မော်ကွန်းမဝင်သော တော်လှန်ရေးသမား ဝတ္ထုတိုတပုဒ် အတွေးပါလာ ရေးဖြစ်လိုက်သည်။

စာရေးဆရာကြီး တက္ကသိုလ်နန္ဒမိတ် အယ်ဒီတာချုပ်လုပ်သော ၁၉၆၂ ခု၊ မတ်လထုတ် နဝဒေးမဂ္ဂဇင်းတွင်ပါလာ၏။ ရှုမဝတိုက်ထုတ် မောင်အောင်မွန်၏ ရူးတုန်းမိုက်တုန်းသည်အရွယ် ဝတ္ထုတိုစု စာအုပ်တွင်လည်း ဦးကျော်က သဘောကျ၍ ထည့်သွင်းခဲ့သည်။

(၇)
မြန်မာပြည်တွင် နိုင်ငံရေးသမားတွေက အကွဲကွဲအပြဲပြဲ စစ်တပ်ကလည်း ဝင်ရင်းဝင်ရင်း ပြန်လှည့်တော့ ပါမည်လော။ စိတ်ပျက်လာ၍ ကျုံပျော်ပြန်ကာ ငှက်ပျောပင်တွေကြား ငယ်သူငယ်ချင်းများနှင့် ကစားချင်ပုံရ၏။ ရိုးသားပွင့်လင်းသော သမတ မန်းဝင်းမောင်အား သတင်းစာဆရာတို့က ချစ်ကြ၍ မကြာခဏတွေ့ဆုံကြ၏။

သမတသက်တန်း ဘယ်သင်းကို အကျေနပ်ဆုံးလဲဟု မေးကြရာ ၅ မိနစ်အတွင်း တောင်ရှည်ပုဆိုး ကျကျနနဝတ်တတ်ခြင်းပါ ဟူ၍ဖြေသည်။ ရယ်မောနေကြရင်း တစ်ကြိမ်မတော့ အိမ်တော်ကနေ သူ့ဒရိုင်လာနှင့် ထွက်လာ၏။ ရန်ကုန်မှာ လာရောင်းသော ငှက်ပျောသီးတင် သမ္ဗာန်တွင် ညဥ့်လုံးပေါက် ကက် ကစားနေ၍ သမတ ပျောက်သည့်သတင်း အကြောင်းပြန်ပြောကြ ရယ်မောကြသည်။

သမတသက်တန်း ကုန်ဆုံးတော့မည်မို့ မန်းဝင်းမောင် ပျော်နေဟန်တူ၏။

ကချင်တိုင်းရင်းသား သမတလုပ်ရမည့် အလှည့်ဖြစ်၍ ဆမားဒူးဝါး ဆင်ဝါးနောင်အား ရာထားသည်မှာ သေချာသလောက်ဖြစ်နေပြီ။ သည်လိုနှင့်ပင် ၁၉၆၂ ခု၊ မတ်လ(၁) ရက်နေ့ည အိပ်နေစဉ် အိမ်တော်တွင်းသို့ စစ်သားများဝင်လာပြီး ဖမ်းဆီး၍ သမတဘဝကနေ ညတွင်းချင်း ရေကြည်အိုင်၌ အကျဉ်းသားဖြစ်သွားပြီ။

ဗိုလ်ချုပ်ကြီးနေဝင်း ဦးဆောင်ကာ စစ်တပ်က အာဏာသိမ်းကြောင်း ရေဒီယိုကကြေညာ၏။

ကြားကြားချင်း အပေါ်ထပ်ရှိ ဦနု အိပ်မောကျနေ၍ ဝန်ကြီးချုပ် ဝန်ကြီးချုပ်ဟု မနည်းနှိုးပြီး ပြောပြရာ ဟာ မဟုတ်တာ၊ ဗိုလ်ချုပ်ကြီးနေဝင်းက ကျုပ်တို့ကိုလာကယ်မှာဆိုကာ ပြစ်တင်ခံရပြန်၏။ မန်းဝင်းမောင်သည် (၂၄) နာရီအတွင်း သမတအိမ်တော်နှင့် များစွာကွာခြားသော ရေကြည်အိုင် အကျဉ်းစခန်း၌သာ ဆက်နေရ၏။

(၅)နှစ်ကြာ၍ သမတသက်တန်း ထက်ပင်ပိုရှည်သေးသည်။ သမတ စပ်ရွှေသိုက်လို ထောင်ထဲတွင် မသေပဲ ၁၉၆၇ ခု၊ တွင်ပြန်လွတ်လာသည်။

(၈)
သပိတ်မှောက်ကျောင်းသား၊ လေထီးဆင်း ပြောက်ကြားစစ်သား၊ တိုင်းပြုပြည်ပြု လွှတ်တော်အမတ်၊ ဝန်ကြီး၊ သမတ တစ်ပိုင်းနိုင်ငံရေး အကျဉ်းသားတစ်ပိုင်း လူရိုးလူဖြောင့် ကရင်ကြီးမန်းဝင်းမောင် သည် ၈-၈-၈၈ အရေးအခင်းကိုပင် ကြုံလိုက်ရပြီးနောက် ၁၉၈၉ ခု၊ ဇူလိုင်လ (၄) ရက်နေ့တွင် ကွယ်လွန်၏။

သာမန်အသုဘပါ။

မိုးမရွာ နေမပူနှင့် လိုက်ပို့ကြသူတွေ များလွန်း၍ စည်ကားလှပါဘိ။ ကြံတောသင်္ချိုင်းအဝင်၌ လူအုပ်ကြီးက တိုးမပေါက်။ ကျွန်တော့်အား ပခုံးပုတ်လာ၍ ကြည့်လိုက်တော့ လုပ်ဖော်ကိုင်ဖက်ဟောင်း နိုင်ငံခြားသတင်းထောက် BBC ကိုမောင်မောင်၊ ဦးနုလိုက်ပို့လား သေချာအောင် ဝိုင်းကြည့်ပေးပါတဲ့။

မြင်လိုက်ရပါပြီ ဦးနု ခေါင်းပေါင်းစ တထောင်ထောင်နှင့်။

ကိုမောင်မောင်လည်း BBC ကိုသတင်းပို့ဖို့ ထွက်သွားပြီ။ မန်းဝင်းမောင်၏ ယုဂ်ကလပ်ကမူ ဘာမှမသိ၊ ဦးနုကတော့ ကယ်တင်ရှင် ဗိုလ်နေဝင်းကို စဉ်းစားနေမည်လောဟု– မဆီမဆိုင်တွေးတောရင်း ကျွန်တော်သည် အသုဘလူရှင်းသည်ထိ ရပ်ကြည့်ခဲ့ကြောင်းပါ။

(ပုံနှိပ်နေပြီး မကြာမီထွက်လာတော့မည့် ကြုံဖူးဆုံဖူးကြိုက်ဖူးသူများ စာအုပ်တွင် ဓာတ်ပုံများစွာနှင့် ဝေဝေဆာဆာပါရှိပါမည်)

၂ဝ၁၈ ခု၊ မတ်လ (၂၃) ရက်နေ့


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Tags:

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ခေတ်ပြိုင်အတွေ့အကြုံ, မောင်အောင်မွန်

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ

By

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ (မိုးမခ) မတ် ၂၄၊ ၂၀၁၈...

Read more »

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ)

By

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ) မိုးမခစာအုပ်စင်၊ ဖေဖော်ဝါရီ ၂၈၊...

Read more »

 ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ

By

ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ (မိုးမခ) ဖေဖော်ဝါရီ ၅၊...

Read more »

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ 

By

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ  မိုးမခစာပေက ထွက်ပါပြီ။...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်