Jasmine ● မှန်ဘောင်ထဲမှာ

April 9, 2018

● မှန်ဘောင်ထဲမှာ
(မိုးမခ) ဧပြီ ၉၊ ၂၀၁၈

ရွှေဝါရောင်အလင်းဟာ လက်ခနဲလက်ခနဲ မျက်စိရှေ့မှာ ဖြတ်ပြေးနေတယ်။ တခါ တခါ အထက်မှအောက်၊ တခါတရံ ဘယ် မှညာ၊ တဖန် ညာမှဘယ်သို့ အပြန်ပြန် အလှန်လှန်ရွေ့လျားဖြတ်သန်းနေတာ။ ပျော့ပျောင်းညင်သာစွာစီးမျောနေရာမှ အရှိန်ပြင်းပြင်းတုန်ခါမှုနှင့် ရေပွက်တခု။ ရေမှုန်ရေမွှားလေးတွေ နဖူးအထက်နားကို လာစင်တယ်။ မျက်တောင်ခတ်ဖို့ မေ့ လျော့နေခဲ့ရာမှ သိစိတ်ကို ပြန်လည်ရရှိလိုက်တယ်။ ရွှေဝါရောင်လေးက အောက်ခြေမှန်ကြမ်းခင်းနားထိ နိမ့်ဆင်းလာရင်း ကျောက်ဆွယ်ပန်းခက်တွေကြား တိုးဝင်သွားနေတယ်။ အမြီးဖျားလေးတချက်အခတ်မှာ မှန်ဘောင်စွန်းကအလင်းယိုင်ရဲ့ထိတွေ့ဖြာထွက်ခြင်းတွေဟာ ဂန္တဝင်မြောက်ပန်းချီကားတချပ်လို။

“ဦးအဖူး ဒီကောင်ကြီး ဘယ်လောက်လဲဗျာ။  ကျနော်ခေါ်သွားချင်တယ်။  အိမ်မှာသေသေချာချာထားပြီး ဂရုစိုက်ချစ်ပေးရမယ်” ပြောနေရင်း အားရပါးရ ပြုံးမိလိုက်တယ်ထင်တယ်။

“ဦးအဖူး – အလှမွေးငါးရောင်းဝယ်ရေး”  ဆိုတဲ့ ထည်ထည်ဝါဝါဆိုင်းဘုတ်ကြီးဟာ ကျနော်ကျောပြင်ကိုစိုက်ကြည့်နေမှာလား၊ ကျနော့်လက်ထဲက ရွှေဝါရောင်လေးကို နှမြောတသစွာ လှမ်းငေးရင်း ကျန်နေခဲ့သလား မသေချာ။ ကျောခိုင်းထွက်ခွာ လာတဲ့ကျနော်ကတော့ ပျော်ရွှင်တက်ကြွသောခြေလှမ်းတွေနဲ့။ အိမ်အပြန်လမ်းမှာ အတွေးစိတ်ကူးတွေနဲ့ပီတိဖုံးပြီး ကျနော့် မျက်နှာကြီးက စပ်ဖြီးဖြီးဖြစ်နေမှာ အတိအကျပဲ။ သူ့ကို ဘယ်လိုနာမည်ပေးရင်ကောင်းမလဲ။  ဘယ်နေရာမှာ ထားရကောင်း မလဲ။ ဘယ်လိုအစာတွေကို သူကြိုက်မလဲ။  ဘာတွေဝယ်ပေးရင် သူပျော်မလဲ။  ဘာတွေဖြည့်ဆည်းပေးဖို့ လိုမှာလဲ။ သူ့အ တွက် တန်ဖိုးကြီးကြီးတွေ အကောင်းဆုံးပစ္စည်းတွေကိုပဲ ဝယ်ယူဖြည့်ဆည်းပေးဖို့ ဆုံးဖြတ်ထားတယ်။ ကျနော် သူ့အပေါ် ဘယ်လောက်တန်ဖိုးထားချစ်မြတ်နိုးကြောင်း သိသိသာသာ ပေါ်လွင်ထင်ရှားစေချင်တာက အဓိကပါလေ။
****

ကျနော့်အိမ်။ မကျဉ်းမကျယ်ခြံငယ်လေးတခုအလယ်က တထပ်တိုက်ပုလေးတလုံး။  ဒါပါပဲ၊ ရိုးရှင်းပါတယ်။ ခြံအဝင်ဝကနေတိုက်ရှေ့ပေါ်တီကိုဆီအသွား လမ်းငယ်လေးဘေးတဘက်ဆီမှာ ပုဏ္ဏရိပ်ပန်းပင်ပုပုလေးများ ညီညီညာညာရှိတယ်။  တိုက် ရှေ့ပေါ်တီကိုဘေးတဖက်စီမှာ အညိုရောင် စဥ့်ပန်းအိုးကြီးတလုံးစီရှိနေတယ်။ ပိန်းပန်းနီနီရဲရဲကြီးတွေ တနေ့ကပဲပွင့်ထား တာ။  အဲဒီပန်းအိုးကြီးဘေးမှာ သူ့အတွက်နေရာလုပ်ပေးရမလား။ ရေပိုက်ကြိုးက ပြဿနာသိပ်မရှိနိုင်ဘူးပေါ့။  အပင်ရေ လောင်းတဲ့ရေပိုက် အခွေလိုက်ရှိတာပဲ။  မဖြစ်သေးပါဘူး။  ကားအဝင်အထွက် မတော်တဆထိခိုက်မိဦးမယ်။  ခြံပြင်က လျှပ်တပြတ်ဝင်လာနိုင်တဲ့ ဘောလုံးပျံတို့၊ လောက်စာလုံးပျံတို့ အန္တရာယ်ကလည်း ရှိနိုင်သေးတယ်။  ဒါဆို သံဇကာအိမ်သေး သေးလေးလုပ်ပြီး ထားရမလား။ မဟုတ်သေးဘူး။  မီးသွယ်ရတာခက်ဦးမယ်။ ဒီပေါ်တီကိုအောက်မှာ ဘယ်လိုမှ အဆင်မပြေ နိုင်ဘူးလို့တွေးမိရင်း ခြံထဲမျက်လုံးတချက်ဝေ့ကြည့်လိုက်မိတယ်။ မမြင်မိဘူး။  သင့်တော်မယ့်နေရာ ခပ်မှိန်မှိန်တောင်မရှိ။  ခြံဘေးဘက်မှာထားပြန်ရင်လဲ အမြဲမြင်တွေ့နေဖို့ခက်ခဲလိမ့်မယ်။  အိမ်ထဲမှာ နေရာတခုရှာပြီးထားဖို့ ဆုံးဖြတ်လိုက်တယ်။

ပထမဆုံးသူ့ကို မှန်ဘောင်အသစ်ထဲထည့်ပေးရမယ်။  လုပ်စရာရှိတာတွေက အများကြီးကျန်သေးတယ်။ အိမ်အဝမှာ ဖိနပ် ကို စုံကန်ချွတ်လိုက်ရင်း ရေချိုးခန်းရှေ့ထိ တန်းဝင်လာခဲ့လိုက်တယ်။ လက်တဘက်ထဲကိုင်ထားတဲ့အိပ်ကို  အဝတ်ဇလုံထဲ အသာအယာချလိုက်တယ်။ နာကျင်သွားမလားစိုးစိတ်နဲ့ ကြည့်မိတော့ သူကတည်တည်ငြိမ်ငြိမ်။   အစာဘူးတွေ၊ ရေစစ်တွေ ၊ ရေမှော်ပင်တွေ စသဖြင့် သူ့အတွက် လိုအပ်မယ်ထင်သမျှ ဝယ်လာတဲ့အိပ်ကြီးကို ထမင်းစားခန်းအလယ်က စားပွဲခုံပေါ် သွားတင်ထားလိုက်တယ်။ ရေချိုးခန်းအဝမှာတွေ့တဲ့ အပြာရောင်ပုံးကိုဆွဲယူပြီး ရေဆေးသန့်စင်တယ်။  နောက် ဂျိုးဖြူရေ ပိုက်ကိုဖွင့်ချပြီး ပုံးတဝက်ခန့်ရေထည့်လိုက်တယ်။  သူ့ကို အပြာရောင်ပုံးထဲ ဖွင့်ထည့်ပေးလိုက်ချိန်မှာ သူဟာ ငြိမ်ငြိမ်လေးရွေ့ နေပြီး ဟိုဒီ ကူးခေတ်တယ်။  ဗိုက်စာနေလို့များလား။  အစာဘူးသွားယူပြီး လိမ္မော်ရောင်အလုံးလေးတွေ ချကျွေးလိုက်တယ်။
မှန်ပုံးသွားသယ်ဖို့ပြန်ထွက်လာခဲ့ရင်း စိတ်မချဖြစ်ရခြင်းတွေ အတွေးထဲဝင်လာသေးတယ်။ အသစ်ဝယ်လာတဲ့မှန်ပုံးကို သေချာတိုက်ချွတ်ဆေးကြော၊ ရေလုံမလုံစစ်ကြည့်ပြီးမှ မှန်ပုံးထားဖို့နေရာကို မရှာရသေးတာ သတိရမိတယ်။

ဒါက ပထမဦးဆုံးအတွေ့အကြုံဖြစ်နေတော့ စိတ်ထဲရှိရာတွေပဲ အကောင်းဆုံးလုပ်ပေးနေမိတာ။  ကိုယ့်လုပ်ရပ်အပေါ် မကျေနပ်တဲ့ ကိုယ့်ဦးနှောက်ရဲ့ဝေဖန်မှုက အစီအစဉ်သိပ်မကျသလိုပဲလို့ အဖြေရတယ်။ ခုလောလောဆယ် မှန်ပုံးထားဖို့ နေရာက အရေးကြီးတယ်။  ရေအမြဲလဲပေးရမှာဆိုတော့ ရေချိုးခန်းရှေ့နားပဲခုံရှည်တလုံးရိုက်ပြီး တင်ထားလိုက်ရကောင်း မလား။  မကောင်းဘူးလို့ ကိုယ့်အသိစိတ်က ချက်ခြင်းပြန်ပြောတယ်။ မှန်ပုံးထဲကသူ့ကို အိမ်မှာနေတဲ့သူတိုင်း အမြဲမြင်နေရတဲ့ နေရာ။  အိမ်လာလည်တဲ့သူတိုင်းလဲ အလွယ်တကူမြင်ရမယ့်နေရာ။  အဲလိုနေရာမှာထားချင်တာ။  ကျနော်က သူ့ကိုပိုင်ဆိုင် ကြောင်း၊ သူ့ကို ဘယ်လိုဂရုစိုက်ရကြောင်း၊ သူဘယ်လောက်လှကြောင်းတွေ  ကြွားဝါချင်သေးတာလေ။  ကိုယ်ချစ်မြတ်နိုးတဲ့ အရတွေ၊ကိုယ်ပိုင်ဆိုင်ထားတဲ့အရာတွေကို ကြွားဝါချင်တာက လူ့သဘာဝမဟုတ်လား။ ဒီလိုတွေးကြည့်လိုက်တော့ ဒီမှန်ပုံး ကို ရေချိုးခန်းရှေ့ထားတာလဲ မသင့်တော်ဘူး။ ထမင်းစားခန်းထောင့်ထားတာလဲ မသင့်တော်ဘူး။  ကျနော့်အိပ်ခန်းထဲထား တာလဲ မသင့်တော်ပြန်ဘူး။ ဒါဆို အသင့်တော်ဆုံးနေရာက ဧည့်ခန်းပဲရှိတော့တာပေါ့။
****

ဧည့်ခန်းရဲ့အနေအထားကို ခုမှပဲ သေသေချာချာ သတိထားကြည့်ဖြစ်တယ်။ နေအလင်းရောင်ဝင်နေတဲ့နေရာ သုံးခုရှိတယ်။  အဝင်ဝတံခါးမကြီးရယ်၊ အိမ်ခေါင်းရင်း ဘုရားစင်ဘေးဘက်ကပြတင်းပေါက်ငယ်တခု ၊အိမ်ခြေရင်းဘက်မှာ တံခါးလေးချပ်ပါ ပြတင်းပေါက်ခပ်ရှည်ရှည်တခု။ ဘုရားစင်အောက်မှာထားမယ်ဆို မှန်ပုံးအရွယ်အစားနဲ့ နေရာအကျယ်အဝန်းက ကွက်တိပဲ။  ဒါပေမယ့်မဖြစ်သေးဘူး။ မေမေဘုရားရှိခိုးချိန်တိုင်း သူကအလိုလိုကန်တော့ခံပုဂ္ဂိုလ် ဖြစ်နေရမှာ။ ခြေရင်းဘက်ပြတင်းပေါက်ဘေးမှာထားဖို့စဉ်းစားလိုက်တယ်။  မီးပလတ်ပေါက်ကလဲ ပြတင်းဘောင်ဘေးမှာရှိတော့ သင့်တော်တဲ့နေရာပါ။  မှန်ပုံး တင်ဖို့ ကျွန်းစားပွဲရှည်လှလှလေးကို အိပ်ခန်းထဲကထုတ်ယူလာခဲ့ပြီး အဆင်ပြေအောင်နေရာချထားလိုက်တယ်။

မှန်ပုံးနေရာချပြီးတော့ ရေချိုးခန်းက ဂျိုးဖြူပိုက်ခေါင်းနဲ့သွယ်ထားတဲ့ ရေပိုက်ကို မှန်ပုံးထဲထည့်၊ ရေဖြည့်ထားလိုက်တယ်။  ခဏအမောဖြေဦးမှလို့စဉ်းစားမိတော့မှ ကိုယ်ထမင်းမစားရသေးတာသတိရပြီး သူလဲဗိုက်စာနေမလား  တွေးမိတယ်။  ပုံး အပြာကျဉ်းကျဉ်းလေးထဲ သူအဆင်ပြေရဲ့လား ပြေးကြည့်ရင်း အစာလုံးလေးတွေ မှန်ဘောင်ထဲထပ်ချပေးလိုက်တယ်။  ခုမှ မြင်တယ်၊ ပထမထည့်ပေးထားတဲ့ အစာလုံးလေးတွေလဲ ဒီအတိုင်းရှိနေသေးတာ။ သူကတော့ ခပ်အေးအေးပါပဲ။  အမြီးကွက် လေးနဲ့ ပါးဟပ်လေးတွေ သာလှုပ်ခတ်ပြီး တည်တည်ငြိမ်ငြိမ်။ ရေပုံးအပြာက သူ့အတွက်ကျဉ်းကျပ်လို့ ထင်ပါတယ်။

မှန်ပုံးထဲကို အလှဆင်ဖို့ ကျောက်ခတ်တွေ၊ ရေမှော်တွေ၊ ကျောက်တန်းပုံသဏ္ဍာန်လှလှလေး၊ ကျောက်ဂူငယ်ပုံစံသူ့အတွက်အိမ်လေးတလုံး။  ဒါတွေအကုန်မှန်ဘောင်ဘေးကိုသယ်ယူသွားပြီး မှန်ပုံးလေးကို စနစ်တကျ လှပအောင်ပြင်ဆင်ပေးနေ မိတယ်။  သူ့အတွက် နေရာသစ်လေးကိုပြီးပြည့်စုံစေချင်တဲ့ စေတနာဆန္ဒနဲ့ပါ။  အားလုံးပြင်ဆင်ပြီးပြီ။ ရေလဲမှန်ဘောင်ရဲ့သုံးပုံတပုံခန့်ထိပြည့်လာပြီ။  သူ့ကို မနာကျင်ရအောင်သတိထားပြီး ရေစစ်နဲ့အသာအယာမတင်လို့ ရေထဲကိုသေချာထည့်ပေး လိုက်တယ်။  သူက နေရာသစ်ကို စူးစမ်းပြီး မှန်ပုံးကိုတပတ်ပတ်တယ်။  သူ့ရဲ့ လှပတဲ့အမြီးနဲ့ ရွှေရောင်တလက်လက်ထနေတဲ့ သူ့ခန္ဓာကို လှလှပပ သယ်ဆောင်ရင်း ကျောက်ပန်း ကျောက်ခတ်တွေကြား ဟိုဟို ဒီဒီကူးတယ်။  ကျောက်တန်းလေးကြားက ရေမှော်တွေနားအရောက်မှာ ငြိမ်နေတယ်။  တစိမ့်စိမ့်ကြည့်ရင်း ကြည်နူးနေမိရာက မှန်ဘောင်ရဲ့ ဒီဘက်ခြမ်းမှာ ရေသန့် စက်လေးတပ်ပေးဖို့သတိရတာနဲ့ လုပ်လက်စတွေ အကုန်လက်စသတ်ရှင်းလင်းပြီး ဆိုင်သွားဖို့ ခပ်သုတ်သုတ် ထွက်လာခဲ့ တယ်။
*****

နွေနေဟာ ပူလောင်လွန်းနေတယ်။  ဦးခေါင်းခွံတခုလုံးလောင်ကျွမ်းခံထားရသလို ရှိန်ရှိန်ထနေတယ်။  အရေပြားတွေအစိမ်းသပ်သပ်မဟုတ်တော့ဘူးလို့တောင် တွေးမိတယ်။  ဖဲ့ယူစားဖို့အသင့်ဖြစ်နေတဲ့အခြေအနေထိ ပူကျတ်နေပြီလား ထင်ရ လောက်အောင် ခရမ်းလွန်ရောင်ခြည်လွန်ကဲမှုကို ထိတွေ့ခံစားနေရတယ်။  ရေသန့်စက်ဝယ်ဖို့သာစိတ်လောနေမိ တာ မို့ ထီးယူခဲ့ဖို့၊ ဦးထုတ်စောင်းခဲ့ဖို့ မေ့လျော့ကာ ထွက်လာခြင်းအတွက် နောင်တရမိတယ်။ အိမ်အပြန်လမ်းမှာ ခြေထောက်တွေက မတက်ကြွနိုင်တော့ဘူး။  နားထဲမှာလဲ အသံဗလံတွေ ကြားနေရသလိုလို။ နားစည်အတွင်းမှာ တဝူးဝူးးနဲ့ဖြစ်နေတယ်။  ဒီလိုနဲ့ ရန်ကုန်နွေရဲ့အပူဒဏ်ကို အံကြိတ်အာခံရင်းပဲ အိမ်ရဲ့ပေါ်တီကိုအောက် ပြန်ရောက်လာခဲ့တယ်။  ရောက်ရောက် အဝင် ဝကနေ မှန်ဘောင်ဆီကြည့်မိချိန်မှာတော့ ရင်ဝကို ပိဿလုံးငါးလုံးလောက် ဆင့်ကဲထိမှန် သလို ခံစားလိုက်ရတယ်။

ပြတင်းဝက နေရောင်ခြည်ဟာ မှန်ဘောင်တည့်တည့်ထိုးစိုက်ကျနေလိုက်တာ စူးစူးရဲရဲ။  စိတ်ကမသိလိုက်ခင်မှာပဲ မှန် ဘောင်နား အပြေးအလွှားရောက်သွားမိတယ်။  စိုးရိမ်မိတဲ့အတိုင်း မှန်ဘောင်ထဲကရေတွေပူနွေးနေပါပြီ။  ကိုယ့်အသုံးမကျမ တွေကို အပြစ်တင်လိုက်မိတယ်။  ဒီအချက်ကို ထည့်မတွေးမိခဲ့တာ။  သူ့ခမျာကိုယ်ထားတဲ့နေရာမှာ နေရရှာတာ။  ဘယ် လောက်များ ပူလောင်နေရှာမလဲ။  ကျောက်ခတ်တွေအောက်မှာ ငြိမ်နေတဲ့သူ့ကို စိတ်ထဲကတောင်းပန်နေမိတယ်။

နေရာ။ ခုအရေးတကြီးလိုအပ်နေတာက ဒီမှန်ဘောင်ထားဖို့နေရာ။  နံရံထောင့်က တီဗွီစင်၊ အခန်းအလယ်ကဆက်တီခုံနဲ့ စားပွဲရှည်တဝိုင်း၊ တဘက်ခြမ်းမှာ ရှည်မျောမျော ခပ်မြင့်မြင့်ပန်းအိုးတလုံး၊။  ထောင့်တွေမှာထားဖို့အဆင်မပြေနိုင်တော့ဘူး။  ဆက်တီခုံအနောက်ဘက်ခြမ်း အိမ်အဝင်တံခါးမတည့်တည့် အခန်းရဲ့အလယ်ဗဟိုနေရာ။ ဒီနေရာကိုရွေးချယ်လိုက်တယ်။  ချက်ချင်းရွှေ့ဖို့ပြင်ဆင်လိုက်မိတယ်။  ပူနွေးနေတဲ့ မှန်ဘောင်ကိုကိုင်မိတော ရေပြန်လှယ်ပေးဖို့အတွေးလဲ ခေါင်းထဲဆင့်ကဲ ရောက်လာခဲ့တယ်။  ရေသန့်စက်လဲ တပ်ပေးရဦးမယ်။
***

ညနေလဲစောင်းသွားပြီ။ လုပ်ပေးချင်တဲ့ဆန္ဒတွေ၊ ဖြစ်စေချင်တာတွေအားလုံး နေသားတကျဖြစ်သွားချိန်မှာ ကျနော်လဲ တော်တော်မောနေပါပြီ။ ရေသန့်စက်လဲ အဆင်ပြေပြေတပ်ဆင်ပြီးပြီ။ မောမောနဲ့ မှန်ဘောင်ထဲကပူစီပေါင်းလေးတွေကို အဓိပ္ပါယ်မဲ့ငေးနေမိတယ်။  ပူစီပေါင်းလေးတွေက ကြီးလိုက် သေးလိုက်နဲ့။  ရေပြင်ပေါ်အလုအယက် ထိုးတက်နေကြတယ်။ မြင်ကွင်းရှေ့ကိုဖျတ်ခနဲ ပြေးဝင်လာတဲ့ ရွှေဝါရောင်လေး။  ဟုတ်တယ်။  ဒီလိုခံစားမှုလေး။  ကျနော့်မျက်နှာ ပြုံးနေမယ်ထင် တယ်။  သေသေချာချာကြည့်မိတော့ မှန်ထဲမှာမြင်နေရတဲ့ ရွှေဝါရောင်အရိပ်ဟာ ကျနော်။  အထိတ်တလန့် လှည့်ထွက်ပြေး လာမိတယ်။  ကျနော်ပြေးလို့မရဘူး။  ခြေထောက်တွေမရှိဘူးဆိုတဲ့ ခံစားမှု။  ဒါပေမယ့်ကျနော်ရွေ့နေတယ်။  အရှိန်နဲ့ တခုခု ကိုဝင်တိုက်မိတယ်။  ကျနော်ရှေ့ကို ဆက်ပြေးလို့မရတော့ဘူး။  ရှေ့မှာလှုပ်ရှားနေတဲ့ အရိပ်တွေ။  ကျနော့်ကိုယ်ကျနော်  ကျနော်မဟုတ်ပဲ ပြန်မြင်နေရတယ်။

ကြောက်လန့်တကြား အော်ဟစ်လိုက်မိတယ်။  ကျနော့်အသံဟာ အပြင်လောကကို ထွက်မလာဘူး။  ရေတွေကျနော်ပါးစပ်ထဲကိုဝင်လာတယ်။  အလျင်အမြန် ထွေးထုတ်လိုက်မိတယ်။  ဒါပေမယ့် ကောင်းကောင်းအသက်ရှူလို့ရနေသေးတယ်။  အပင်စိမ်းစိမ်းတွေက လှမ်းခေါ်နေတယ်။  ကျနော် ရှေ့မှာမြင်နေရတဲ့ နေရာတွေဆီကို ပြေးတယ်။ ဘောင်တခုနဲ့ အရှိန်ပြင်း ပြင်း ရိုက်မိလိုက်သလိုခံစားရပြီး ကျနော် အနောက်ကိုလွင့်ထွက်သွားတယ်။ ကျနော်မောပန်းနွမ်းနယ်စွာ အတန်ကြာငြိမ် သက်တွေဝေနေမိတယ်။  ဆာလောင်မှုတွေ၊ တကိုယ်လုံးကိုက်ခဲနာကျင်မှုတွေ၊ ထိတ်လန့် အားငယ်မှုတွေ၊ ကျနော့်ရင်ထဲက ခံစားချက်တွေကို တစုံတယောက်ကြားအောင်ေ အ်ာဟစ်ပြောပြချင်ပေမယ့် အသံကထွက်မလာဘူး။  ရုတ်တရက် အပေါ် ကနေ လိမ္မော်ရောင်အလုံးတွေကျလာတယ်။ အမှတ်တမဲ့မို့ ဆတ်ခနဲတုန်သွားမိတယ်။ ဒီကနေလွတ်အောင်ပြေးထွက်ရမယ်။

ကျနော်ပြေးနေတယ်။ ခြေထောက်တွေမပါပဲ ပြေးနေတယ်။  တလောကလုံး အမှောင်ကမ္ဘာကြီးဖြစ်သွားတယ်။  တီဗွီက ကျနော့်ရှေ့မှာ။ တီဗွီမျက်နှာပြင်ကလင်းနေတယ်။  သေချာအားစိုက်ကြည့်မိတော့ တီဗွီထဲမှာ ကျနော်နဲ့တူတဲ့ ‘သူ’။ အပေါ်က ကျနော့်မျက်နှာနဲ့ အောက်ပိုင်းက ရွှေဝါရောင်။   အဲဒီရွှေဝါရောင်တွေကို ကျနော် ကြောက်လာပြီ။  သူကပင်လယ်ကြီးဆီ လက်ညှိုးထိုးပြနေတယ်။  သူ့ကို တခုခုပြောဖို့ ကျနော်ကြိုးစားကြည့်တယ်။  အသံမထွက်လာပါဘူး။ သူက  ကျနော့်ကိုပြုံးပြပြီး ပင်လယ်ပြင်ဘက်ကို လှည့်ထွက်သွားတယ်။ သောင်ပြင်အစပ်ကနေ မိုးတိမ်ဖျားအထိ ကျယ်ပြန့် လှပနေတဲ့ပင်လယ်ပြင် ကြီးထဲ သူငုတ်ဝင်ပျောက်ကွယ်သွားတယ်။ ကျနော်ပြေးလိုက်နေပေမယ့် အရှေ့ကိုမရောက်ခဲ့ဘူး။  မမြင်ရတဲ့ ဘောင်တခု ထဲမှာ ကျနော်။  ထွက်ပေါက်တွေ့ဖို့ ကျနော်အားကုန်ရုန်းကန်နေမိတယ်။  ဘေးပတ်ပတ်လည်လှည့်ပတ်ရှာဖွေပေမယ့် မမြင်ရတဲ့ ဘောင်တွေအလယ်ကထွက်ပေါက်ကင်းမဲ့ဇုန်။  မျက်နှာမူရာအရပ်တိုင်းမှာ ရွှေဝါရောင်အရိပ်တွေက ခြောက်လှန့် နေတယ်။  ဒီနေရာကိုမုန်းတယ်။ ဒီနေရာကိုကြောက်တယ်။  ဒီနေရာက ကျနော့်ရဲ့ငရဲခန်း။  ဒီနေရာက လွတ်မြောက်ခွင့်ရဖို့ အားကုန်သုံးပြီး လူးလွန့် ရုန်းထွက်လိုက်မိတယ်။
*****

ဇောချွေးတွေရွှဲနစ်နေတဲ့ ဦးခေါင်းကဆံပင်တွေကို လက်ချောင်းတွေနဲ့ ပထမဆုံးထိတွေ့မိတာသိလိုက်တယ်။ ဒုတိယ အသိ က ခန္ဓာတခုလုံးကိုက်ခဲနာကျင်နေမှု။  နေရာကအားယူပြီးထနိုင်ဖို့ကြိုးစားကြည့်ပေမယ့်မရဘူး။ တတိယမြောက် သတိရမိ တာက ခြေထောက်တွေ။  လက်နဲ့ခန္ဓာအောက်ပိုင်းကို မှီသလောက် လှမ်းကိုင်တွယ်ကြည့်မိတယ်။ ပူလောင်တဲ့အထိ အ တွေ့ တွေ။ ဝမ်းသာစရာပါ။ ခြေထောက်တွေရှိနေတယ်။  ဒါပေမယ့် ကျနော့်ပါးစပ်ထဲခါးနေတာ သေသေချာချာ ထပ်သိ လိုက်တယ်။  ကိုယ်တွေပူပြီး ဖျားနေပါပြီ။ ခဏငြိမ်နေလိုက်ပြီးမှ အားယူထပြီး ပတ်ဝန်းကျင်ကို အကဲခတ်ကြည့်မိတယ်။  လက်ရှိ ပကတိအခြေအနေကိုပြန်မှတ်မိလာတယ်။ ဧည့်ခန်းထဲကဆက်တီပေါ်မှာ အိပ်ပျော်နေခဲ့တာ။ မှောင်နေတဲ့အခန်းထဲ တရွေ့ရွေ့ စမ်းတဝါးဝါးသွားရင်း မီးခလုတ်ကို ဖွင့်လိုက်တယ်။  တိုင်ကပ်နာရီမှာ နာရီလက်တံအတိုလေးက တမှာရှိပြီး လက်တံအရှည်က တဆယ်မှာ။  ညသန်းခေါင်တောင်ကျော်ခဲ့ပြီပဲ။ မှန်ဘောင်ထဲက သူ။  ခြောက်ချားမှုတွေနဲ့ အားယူလှမ်း ကြည့်မိတယ်။  ရွှေဝါရောင်လေးက မှန်ဘောင်ထဲမှာ။

မျက်စိရှေ့မှာ ရွှေဝါရောင်အမြီးဟာ လှလှပပ ကူးခတ်နေတယ်။ မှန်ဘောင်ဘေးတလျောက် တဖြည်းဖြည်းရွေ့လျားရင်း တ ပတ်ပြီးတပတ်။ အတွေးတခုကို ရုတ်တရက်တွေးမိလိုက်တယ်။ သူရော မှန်ဘောင်ထဲကထွက်ပေါက်ကို ရှာနေတာများလား။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags: ,

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:စာစုတို

Comments are closed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

Twitter: moemaka


%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ

By

မိုးမခ သြဂုတ်လ ၂၀၁၈၊ တွဲ ၅ မှတ် ၄ ထွက်ပြီ (မိုးမခ)...

Read more »

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ

By

မိုးမခ ဇူလိုင် ၂၀၁၈ – အတွဲ ၅၊ အမှတ် ၃ တကယ်ထွက်ပြီ...

Read more »

Junior Win ၏ My Life will go on (အင်္ဂလိပ်ဘာသာ၊ ရုပ်စုံ) စာအုပ် ထွက်ပါပြီ

By

  Junior Win ၏ My Life will go on...

Read more »

ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ

By

  ဒေါက်တာခင်မောင်ဝင်း(သချာင်္) ၏ ဂိမ်းသီအိုရီ – ၂ ထွက်ပြီ (မိုးမခ) ဇူလိုင်...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်