“စာကြည့်တိုက်က ပရဟိတသဘောနဲ့လုပ်လို့မရဘူး။  နားလည်မှ လုပ်လို့ရတာမျိုး” 

April 17, 2018

 

“စာကြည့်တိုက်က ပရဟိတသဘောနဲ့လုပ်လို့မရဘူး။  နားလည်မှ လုပ်လို့ရတာမျိုး” 

Save The Library မှ ကိုမောင်မောင်စိုးနှင့် တွေ့ဆုံခြင်း
၊ Academic Weekly Educational Journal
(မိုးမခ) ဧပြီ ၁၇၊ ၂၀၁၈
“အလိမ္မာ စာမှာရှိ”” ဆိုသည့်အတိုင်း စာဖတ်ခြင်းအလေ့အထကို ငယ်စဉ်ကပင် ပြုစုပျိုးထောင်ပေးမှသာ နောင်အနာဂတ်မျိုးဆက်သစ်များ အသိပညာအလိမ္မာ တိုးပွားပေလိမ့်မည်။ ယနေ့ မြန်မာနိုင်ငံတွင်လည်း စာဖတ်ရှိန်မြှင့်တင်ရေးလုပ်ငန်းများနှင့် စာကြည့်တိုက်လုပ်ငန်းများကို အရှိန်အဟုန်ဖြင့် တိုးတက်အောင် ဆောင်ရွက်လျက်ရှိရာ တစ်ဖက် တစ်လမ်းမှ ကူညီပံ့ပိုးနေသည့် အဖွဲ့အစည်းတစ်ခုမှာလည်း အထင် အရှားပင်။Save The Library““စာကြည့်တိုက်များကွန်ရက်””ဟု အမည်ပေးထားပြီး လူတစ်ယောက် တစ်လတစ်ထောင်စုကာ ရရှိသည့် ငွေအားလုံးကို တစ်လတစ်ကြိမ်အကုန်ဝယ်ယူပြီး 4 in 1 စနစ်ဖြင့် စာကြည့်တိုက်လေးတိုက်အား စာအုပ်များ အညီအမျှ မျှဝေခြင်း၊ စာကြည့်တိုက်လေးတိုက်မှ အချင်းချင်းလှည့်လည်ငှားရမ်းသော စနစ် ကိုသုံးကာ လစဉ်စာအုပ်အသစ်ဖတ်နိုင်ရန် ဆောင်ရွက်ပေးနေသည့် အဖွဲ့ဖြစ်သည်။ အွန်လိုင်းစာမျက်နှာ များတွင်လည်း ယင်းအဖွဲ့၏လုပ် ဆောင်ချက်များအားတွေ့ရှိရပြီး အားရကျေနပ်ဖွယ်ရလဒ်များကိုလည်း ရရှိလျက်ရှိပေသည်။ Academic Weekly စာဖတ်ပရိသတ်များကို အဆိုပါအဖွဲ့နှင့် မိတ်ဆက်ပေးလိုသောကြောင့် အဖွဲ့တည်ထောင်သူ ကိုမောင်မောင်စိုး အား ဆက်သွယ်မေးမြန်းဖြစ်ခဲ့သည်။မင်္ဂလာပါ။
ကျွန်တော်ကတော့ မောင်မောင်စိုးပါ။Save The Library လည်း လုပ်နေတယ်။ နောက်ပြီး မြန်မာနိုင်ငံစာကြည့်တိုက်များ ဖောင်ဒေးရှင်း ရန်ကုန်မှာလည်း ဥက္ကဋ္ဌအနေနဲ့ ဆောင်ရွက်နေပါတယ်။ ကျွန်တော့် အဖေကတော့ ဗဂျီအောင်စိုးပါ။ အဖေကပန်းချီရေးတယ်။ ရုပ်ရှင်လည်း ရိုက်ပါတယ်။

စာကြည့်တိုက်တွေကို ဘယ်ကနေစပြီး စိတ်ဝင်စားခဲ့လဲဆိုရင်တော့ ကျွန်တော့်အဖေကနေ အစပျိုးပေးခဲ့တယ်လို့ပဲပြောရပါမယ်။ အဖေက ကဗျာသရုပ်ဖော်ပုံတွေ ဆွဲတယ်။ အဖေပန်းချီဆွဲသမျှ၊ သရုပ်ဖော်ပုံ ဆွဲသမျှစာအုပ်တွေက အိမ်မှာအမြဲရနေတယ်။ ရတော့ ကျွန်တော်ယူ ဖတ်တယ်။ ပထမတော့ ကာတွန်းလေးတွေဖတ်တယ်။ နောက်ကျ တော့ ဆောင်းပါးတွေ၊ ၀တ္ထုတွေ၊ အခန်းဆက်ဝတ္ထုတွေကို ဖတ်ခဲ့ တယ်။ တဖြည်းဖြည်းနဲ့ စာပေကိုစိတ်ဝင်စားလာတယ်။ အဲဒီလိုနဲ့ ၁၉၉၃ ခုနှစ်မှာ ဗဂျီအိမ် ဆိုတဲ့ နာမည်နဲ့ စာအုပ်အငှားဆိုင်လေး စဖွင့် ဖြစ်တယ်။ စာအုပ်အငှားဆိုင်ဆိုပေမဲ့လည်း စာကြည့်တိုက်ပုံစံမျိုး လေးပါ။ စာအုပ်အကောင်းတွေ တကယ့်ကို ဖတ်သင့်ဖတ် ထိုက်တဲ့ စာအုပ်တွေကို ငှားပေးခဲ့တာ။ ၁၉၉၃ ခုနှစ်ကနေ ၂၀၀၀ ပြည့်နှစ် လောက်အထိကို အဲဒီစာအုပ်အငှားဆိုင်လေး လုပ်ခဲ့တယ်။၂၀၀၀ ပြည့်နှစ်နောက်ပိုင်းကျတော့ စာအုပ်အငှားဆိုင်တွေရဲ့ ကဏ္ဍက လျော့ကျလာတယ်ဗျ။ ဒါကြောင့် စာကြည့်တိုက် ပုံစံကို ပြောင်းမယ်ဆိုပြီးတော့ ဆက်လေ့လာတယ်။

၂၀၁၂ မှာတော့ သူငယ်ချင်းတစ်စုနဲ့အတူ ကိုသက်ဝင်းအောင် စာကြည့်တိုက်ကို စတင်တည်ထောင်နိုင်ခဲ့တယ်။ အဲဒီကနေစပြီး နောက်ပိုင်းတောက်လျှောက် ဒါကိုပဲ တစိုက်မတ်မတ်ဆက်လုပ်ဖြစ် ခဲ့တယ်။ ကလေးတွေစာဖတ်ချင်လာအောင် စည်းရုံးလှုံ့ဆော်မှုတွေ၊ နောက်ပြီး သင်တန်းတွေလည်း စီစဉ်ပေးခဲ့တယ်။ သတင်းထောက်သင် တန်း၊ အင်္ဂလိပ်စာသင်တန်း၊ ပန်းချီသင်တန်းတွေပါ ဖွင့်လှစ်သင်ကြား ပေးခဲ့တယ်။ အဲဒီလိုလုပ်နေရင်းနဲ့ တခြားစာကြည့်တိုက်တွေနဲ့ပါ ချိတ် ဆက်မိလာတဲ့အခါ ၂၀၁၅ မှာ စာကြည့်တိုက်များကွန်ရက်ကို စတင် ဖွဲ့စည်းခဲ့တယ်။၂၀၁၆ သြဂုတ်မှာတော့Save The Library စာကြည့်တိုက်များ ကွန်ရက်ကနေ လူတစ်ယောက် တစ်လတစ်ထောင်စုပြီး ရတဲ့ငွေ အားလုံးကို တစ်လတစ်ကြိမ်အကုန်ဝယ်ပြီး 4 in 1 စနစ်နဲ့ စာကြည့် တိုက် လေးတိုက်ကို စာအုပ်တွေ အညီအမျှ မျှဝေတယ်။ နောက်ပြီး စာကြည့်တိုက်လေးတိုက်က အချင်းချင်းလှည့်လည်ငှားရမ်းတဲ့ စနစ်ကို သုံးပြီး လစဉ်စာအုပ်အသစ်ဖတ်နိုင်ဖို့လည်း ဆောင်ရွက်ပေးခဲ့ပါတယ်။ နောက်ပြီး တစ်ပြိုင်တည်းမှာ မိုဘိုင်းဖုန်းမှာ သုံးလို့ရတဲ့ Application လေးတစ်ခုကိုလည်း တီထွင်ရေးသားခဲ့ပါတယ်။ နာမည်ကတော့ Save The Library Application ပါပဲ။ Android ရော၊ ios အတွက်ပါ အသုံးပြုလို့ရပါတယ်။

အဲဒီApplication ထဲမှာ ဘာတွေပါသလဲဆိုရင် မြန်မာနိုင်ငံမှာ ရှိတဲ့ စာကြည့်တိုက်တွေကို ဒေသမရွေးရှာလို့ရမယ်။ သဘောကတော့ ကိုယ်က မန္တလေးရောက်သွားတယ်။ စာဖတ်ချင်တယ်။ ကိုယ်ရောက်နေ တဲ့ နေရာနဲ့ အနီးဆုံးနေရာမှာ ဘယ်စာကြည့်တိုက်ရှိသလဲဆိုတာကို ကြည့်လို့ရမယ်။ ပြီးရင်သွားငှားလို့ရမယ်။ နောက်တစ်ခုက စာပေ လောကသတင်းတွေ ကြည့်လို့ရမယ်။ ဘယ်မှာဘယ်ပွဲတွေရှိတယ်ဆိုတာ သိရ မယ်။ ဘယ်နေ့မှာတော့ စာအုပ်မိတ်ဆက်ပွဲ ရှိတယ်ဆိုတာမျိုး ပေါ့။ စာပေဟောပြောပွဲ ဘယ်မှာရှိတယ်ပေါ့။ နောက်ထပ်အရေးကြီး ဆုံးတစ်ခုကတော့ နေ့စဉ်စာအုပ်အသစ် တွေက ထွက်နေတယ်။ ဘယ် ဟာကို ရွေးဝယ်ရမယ်မှန်းမသိဘူးဖြစ်နေတဲ့သူတွေအတွက် စာအုပ် အညွှန်း ထည့်ပေးထားတယ်။ ဘာအကြောင်းအရာရေးထားတယ်၊ ဘာတွေပါတယ်ဆိုတာကို စာအုပ်ကို အစ-အဆုံး ဖတ်စရာမလိုဘဲ အညွှန်းဖတ်ရုံနဲ့ ကိုယ်ဖတ်ချင်တဲ့စာအုပ်လား၊ ဖတ်သင့်တဲ့ စာအုပ်လား ဆိုတာကို ရွေးချယ်လို့ရသွားမယ်။ နောက်တစ်ခုကကျတော့ Resource Center ဆိုတာပါတယ်။ သူကကျတော့ သီးခြားစာအုပ်အဖြစ် ထွက် မလာတဲ့ ရှားပါးစာတွေလိုမျိုး ဥပမာ- မြန်မာထိုးကွင်းမင်ကြောင် အကြောင်းလိုမျိုးပေါ့။ နောက်ပြီး မျက်စိမကောင်းတဲ့သူတွေတို့၊ စာဖတ် ဖို့အဆင် မပြေတဲ့သူတွေအတွက်ကျတော့ အသံဖိုင်လေးတွေ ထည့်ပေး ထားတယ်။ ၀တ်္ထုဖတ်ပြတာကို နားထောင်လို့ရတယ်။ Audio Book ပုံစံပေါ့။ နိုင်ငံတကာမှာတော့ ခေတ်စားနေပြီဆိုပေမဲ့ ဒီမှာတော့ မရှိ သေးဘူးလေ။ ဒီApplication ထဲမှာ ထည့်ထားတဲ့စာအုပ်တွေကတော့ နိုင်ငံကျော်စာအုပ်တွေနဲ့ ရှားပါးစာအုပ်တွေပိုများပါတယ်။ လက်ရှိထွက် နေတဲ့စာအုပ်တွေကိုတော့ မထည့်ပေးထားပါဘူး။ နောက်တစ်ခုက ဗီဒီယိုဖိုင်လေးတွေပါတယ်။You Tube ကနေ လင့်ခ်ထည့်ပေးထား တယ်။ ပညာရပ်တွေကို အလွယ်တကူလေ့လာနိုင်ပါတယ်။ဟုတ်ကဲ့။ ဒီ Application ကို စတင်ရေးသားပေးတဲ့သူကတော့ ဆရာ ကိုစိုးသီဟနောင် Soe ThihaNaung ပါ။ ဆရာက သင်တန်းကျောင်းလည်းဖွင့်ထား ပါတယ်။ အစ်ကိုနဲ့ချိတ်ဆက်မိတဲ့အခါ ကျွန်တော်က ကျွန်တော်လုပ်ချင် တဲ့ပုံစံလေးကိုပြောပြတော့ အစ်ကိုက အခမဲ့ကူညီပြီး ရေးပေးတာပါ။ ဒါပေမဲ့ တစ်ခုရှိတာက နည်းပညာသမားနဲ့Knowledge သမား၊Resource သမားပေါ့။ မတူတာက နည်းပညာသမားက နည်းပညာအရ သူ လုပ်ပေးနိုင်ပေမဲ့ Resource ကိုကျ သူလုပ်မပေးနိုင်ဘူး။ ဒီတော့ ကျွန်တော်တို့လို စာကြည့်တိုက်ကိုနားလည်သူတွေကနေပြီးတော့ ဘယ် လိုအချက်လေးတွေ ပါချင်ပါတယ်ဆိုတာကို အစ်ကို့ကိုပြောပြရတယ်။ ကျွန်တော်တို့ဘက်ကကျတော့ စာအုပ်တိုက်တွေနဲ့ချိတ်ထားပြီး သူတို့ ဘက်က စာအုပ်အသစ်ထွက်တာပဲဖြစ်ဖြစ်၊ စာအုပ်မိတ်ဆက်ပွဲလုပ် တာပဲဖြစ်ဖြစ် ကျွန်တော်တို့က တင်ပေးတယ်။ နောက်ပြီး စာကြည့် တိုက်တွေနဲ့လည်း အဲဒီလိုပဲ ချိတ်ဆက်ပြီး သူတို့ဆီကရတဲ့ သတင်း အချက်အလက်တွေကို ကျွန်တော်တို့ကတင်ပေးတယ်။ အခုအချိန် အထိ ဒီ Application ကိုအသုံးပြုသူက နှစ်သောင်းကျော်ရှိနေပြီလို့ ကျွန်တော်သိရပါတယ်။ အသေးစိတ်ကတော့ အစ်ကိုတို့က ပိုသိပါ လိမ့်မယ်။ ဒီလိုနည်းလမ်းတွေနဲ့ ကျွန်တော်တို့Application ကို အသုံး ပြုပြီး လေ့လာသင်ယူနိုင်တယ်ဆိုတာကိုလည်း ကျွန်တော်က သတင်း ပေးချင်ပါတယ်။

ဒီဘက်ခေတ်မှာ စာကြည့်တိုက်ကို အသုံးပြုမှုနည်းလာတာနဲ့ ပတ်သက်ပြီး ပြောရမယ်ဆိုရင်တော့ ကျွန်တော်တို့အမြဲသုံးသပ်တာက တော့ ပညာရေးစနစ်ပါ။ ဘာလို့ဒီလိုပြောရတာလဲဆိုရင် နိုင်ငံတကာ က ကျောင်းတွေကိုလေ့လာကြည့်မယ်ဆိုရင် စာကြည့်တိုက် မသုံးမနေရ စနစ်မျိုးဖြစ်အောင် လုပ်ပေးထားကြတယ်။ ကျွန်တော်တို့ဆီမှာကျ စာကြည့်တိုက်က မရှိသလောက်ကိုရှားနေတယ်။ ရှိတဲ့စာကြည့်တိုက် ကိုလည်း အသုံးပြုတာနည်းတယ်။ ဒီဟာကိုသင်တယ်၊ ဒီဟာကိုကျက်၊ ဒီဟာကိုဖြေဆိုတဲ့ စနစ်တစ်ခုမှာ စာကြည့်တိုက်ဆိုတာ သုံးစရာမှမလို တာ။ ဒါကတော့ စာကြည့်တိုက်ထဲမှာရှိတယ်၊ သွားရှာ။ ဒီဟာကို ကိုယ်ပိုင်အတွေးနဲ့ပြန်ရေးဆိုရင်တော့ ကလေးတွေက စာကြည့်တိုက်ကို သွားမှာပေါ့။ အသုံးပြုမှာပေါ့။ အဲဒီအတွက် ကျွန်တော်တို့ ကလေးတွေဟာ ကျောင်းသားဘ၀ကို ဖြတ်သန်းနေချိန်မှာလည်း စာကြည့်တိုက်ကို သွား စရာမလိုဘူး။ လေ့လာစရာမလိုဘူး။ အသုံးပြုစရာလည်းမလိုဘူး။ ဒီလိုနဲ့ တက္ကသိုလ်ရောက်တယ်၊ အလုပ်ခွင်ရောက်တယ်။ သူတို့ရဲ့နေ့စဉ် ဘ၀မှာ စာကြည့်တိုက်ကို သွားပြီး စာဖတ်ခြင်းအားဖြင့် အလုပ်အကိုင် မှာပဲ ဖြစ်ဖြစ်ပေါ့ တိုးတက်ဖို့အတွက်က ဆက်စပ်မှုမရှိဘူးဖြစ်နေတယ်။ အဲဒီတော့ စာကြည့်တိုက်ကိုသွားပြီး စာဖတ်နေစရာမလိုဘူး။

စာဖတ်တယ်ဆိုတဲ့နေရာမှာလည်း စာဖတ်သူအတွက်က အဓိက အချက်နှစ်ချက်ရဖို့လိုတယ်။ အသိပညာနဲ့ အတတ်ပညာပါ။ အသိ ပညာဆိုတာကတော့ ကိုယ်ချင်းစာတရား၊ ဆင်ခြင်တုံတရားတွေ အားကောင်းလာဖို့အတွက် ရသစာပေတွေကို ဖတ်ရှုရတာမျိုးပါ။ အတတ်ပညာဆိုတာကတော့ ပညာရပ်တစ်ခုကို လေ့လာတဲ့အခါ ဆရာသင်ပေးမှမဟုတ်ဘဲ ကိုယ်တိုင်သင်ယူလေ့လာတာ မျိုးတွေပေါ့။ ဒီလိုတွေရဖို့အတွက် စာဖတ်ကြရတယ်။ စာကြည့်တိုက်ကို အသုံးပြုကြ ရတယ်။

အခုဆိုရင် စာကြည့်တိုက်ကို အဓိပ္ပာယ်ဖွင့်ဆိုတာ ပုံစံပြောင်းသွားပြီ။Community Center ဖြစ်သွားပြီ။ ဒါကြောင့် ရပ်ရွာကနေ လိုချင်တဲ့ အချက်အလက်တွေ ရယူနိုင်တဲ့ နေရာတစ်ခု အဖြစ် သတ်မှတ်ထားကြ တယ်။ နောက်ပြီး ရပ်ရွာကလည်း စာကြည့်တိုက်ကိုလာပြီး ကိုယ့်ဒေသ ရဲ့ ဖွံ့ဖြိုးတိုးတက်မှုတွေကို ဆွေးနွေးမယ့်နေရာမျိုးဖြစ်အောင်ကို သုတေသနပြုပြီး ဆောင်ရွက်နေကြပြီ။ အဲဒီလိုနေရာမျိုး မဖြစ်လာသရွေ့ ကတော့ စာကြည့်တိုက်ကို ဘယ်သူမှ အသုံးပြုမှာမဟုတ်ပါဘူး။ စာ ကြည့်တိုက်ကို အသုံးပြုလာအောင် ဒီလိုအခြေအနေတွေကို ဖန်တီးရ မယ်။ နောက်တစ်ခုက အဲဒီဒေသမှာ အမှန်ကတယ်လိုအပ်နေတဲ့ အချက်အလက်တွေကို စာကြည့်တိုက်ကနေပြီးတော့မှ ဖြည့်ဆည်းပေး နိုင်ရမယ်။ဥပမာ – လူတစ်ယောက်က စာကြည့်တိုက်ကိုလာပြီး ဒီ စာအုပ်ဖတ်ချင်တယ်ပြောမယ်။ စာကြည့်တိုက်က မရှိဘူးငြင်းမယ်။ တစ်ခါ ငြင်းမယ်၊ နှစ်ခါငြင်းမယ်၊ သုံးခါငြင်းမယ်။ နောက် အဲဒီလူက စာကြည့်တိုက်ကို ဘယ်တော့မှ လာမှာမဟုတ်တော့ဘူး။ ဒါတွေကို ဖြည့်ဆည်းပေးဖို့အတွက်ကတော့ စာကြည့်တိုက်မှူးတွေရဲ့ အားနည်း ချက်တွေကို ပြုပြင်ဖို့လိုမယ်။

စာကြည့်တိုက်မှူးတွေဟာ စာကြည့်တိုက်မှူးလုပ်ပြီး စာပေနဲ့ မနီး စပ်ဘူး။ သူတို့ကိုယ်တိုင် စာမဖတ်ဘူး။ ဒါတွေဟာ စာကြည့်တိုက်တွေ ရှေ့ဆက်လို့မရတဲ့ အဟန့်အတားတစ်ခုလို့ ကျွန်တော်မြင်တယ်လေ။ ကျွန်တော်တို့ စလုပ်ကတည်းက အမြဲ ကြုံတွေ့ခဲ့ရတဲ့အခက်အခဲကံHuman Resource ပါပဲ။ စာကြည့်တိုက်တစ်ခုကို တည်ထောင်ကြတယ်။ အဆောက်အအုံလည်းရှိတယ်၊ စာအုပ်လည်းရှိတယ်။ ခက်နေတာက ဒါကို သတ်သတ်မှတ်မှတ် တာဝန်ယူပြီးလုပ်ဆိုရင် လုပ်မယ့်သူ မရှိ တော့ဘူး။ ပရဟိကသဘောနဲ့ တစ်ယောက်တစ်လှည့်အချိန်ယူပြီး တော့ လုပ်မယ်။ ဒီလိုတွေကြုံရတယ်။ တကယ်တော့ အဲဒီလိုလုပ်လို့ မရဘူး။
စာကြည့်တိုက်က ပရဟိတသဘောနဲ့ လုပ်လို့မရဘူး။ နားလည် မှလုပ်လို့ရတာမျိုး။ ပြောချင်တာက ကိုယ့်စာကြည့်တိုက်မှာရှိတဲ့ စာအုပ် တောင်မှ ကိုယ်မသိဘဲနဲ့ ဖတ်ချင်တာဖတ်၊ ဘယ်ဟာဖတ်ဖတ်၊ စာဖတ်ရင်ပြီးရော လုပ်လို့မရဘူး။ ကိုယ့်ဆီကိုလာတဲ့User တစ်ယောက်ကို ကိုယ်ကGuideline ပေးနိုင်ရမယ်။ အဲဒီ User က ဘာအတွက် လာ တာလဲ။ ဥပမာ-လူငယ်တစ်ယောက်လာတယ်။ သူက ဖုန်းနဲ့ပတ်သက် တာကို စိတ်ဝင်စားတယ်ဆိုရင် ဖြစ်နေတဲ့ အင်တာနက်ဂျာနယ် လိုမျိုးတွေကို ကိုယ်က ညွှန်ပေးနိုင်ရမယ်။ နောက်ပြီး ဖုန်းနဲ့ပတ်သက် ပြီး ထွက်တတ်တဲ့စာအုပ်တွေကို ကိုယ်က ညွှန်ပေးနိုင်ရမယ်။ ဒီတော့ မှ User က သူလေ့လာရတာအဆင်ပြေတယ်၊ လွယ်ကူတယ်၊ မြန်ဆန် တယ်ဆိုပြီး စာကြည့်တိုက်ကိုလာမှာပေါ့။ အဲဒီလိုမဟုတ်ဘဲ လာမေးသမျှ မသိရင်တော့ စာကြည့်တိုက်ကို ဘယ်သူမှလာမှာမဟုတ်ပါဘူး။
ဒါကြောင့် စာကြည့်တိုက်မှူးလုပ်မယ့်သူဟာ အခြေခံစာပေစိတ် တော့ ရှိရပါမယ်။ နောက်ပြီးKnowledge ကို ကိုယ်တိုင် Update လုပ်နေနိုင်ရမယ်။ အမြဲ လေ့လာသင်ယူနေရမယ်။
ဒီနှစ်မှာ ပညာရေးဝန်ကြီးဌာနနဲ့ညှိနှိုင်းပြီး ဆရာသန့်သော်ကောင်း တို့ကနေ ကျောင်းတိုင်းမှာ စာကြည့်တိုက်ရှိဖို့ဆိုတဲ့ အစီအစဉ်တစ်ခု စတင်နေပါပြီ။ ဒီလိုတွေလုပ်ဖို့ဆိုတာက ပထမအချက်က ဗကအ့သမငအပ ဘက်ကနေ ခွင့်ပြုဖို့လိုတယ်။ နောက်တစ်ချက်က စာကြည့်တိုက်ကို ကိုင်တွယ်မယ့် ဆရာ၊ ဆရာမတွေအနေနဲ့ စာသင်ကြားချိန်ထဲကနေ ဖဲ့ပေးရတော့ သူတို့အနေနဲ့ စာကြည့်တိုက်ကို သေသေချာချာမလုပ် နိုင်ကြဘူး။ ကျွန်တော့်အမြင်ကတော့ စာကြည့်တိုက်မှူးကို သီးခြား ခန့်သင့်ပါတယ်။ သီးခြားခန့်တဲ့စာကြည့်တိုက်မှူးတွေကိုလည်း စာကြည့် တိုက်ဆိုင်ရာပညာတွေအပြင်၊ နည်းပညာဆိုင်ရာတွေ လေ့ကျင့်သင်ကြား ပေးသင့်ပါတယ်။ သင်တန်းအပြင် အလုပ်ရုံဆွေးနွေးပွဲတွေလုပ်ပေး တာမျိုးတွေပါ လုပ်ပေးသင့်ပါတယ်။ကျောင်းစာကြည့်တိုက်တစ်ခုလုပ်မယ်ဆိုရင် ကျောင်းစာကြည့် တိုက်မှာထားသင့်တဲ့ စာအုပ်အမျိုးအစားတွေကို စာရင်းပြုစုရမယ်။ မူလတန်း၊ အလယ်တန်း၊ အထက်တန်း အရွယ်အလိုက် လေ့လာသင့်တဲ့ စာအုပ်တွေကို ဆရာမတွေက ညွှန်ကြားရမယ်။ ဆိုလိုတာက သမိုင်း ဆိုရင် သမိုင်းနဲ့ပတ်သက်တာကို ဆရာမက မှတ်စုလေး ပေးလိုက်မယ်။ ခေါင်းစဉ်လေးပေးလိုက်မယ်။ ကျန်တာကို စာကြည့်တိုက်ကနေသွား လေ့လာပြီး ကိုယ့်အမြင်နဲ့ကိုယ်ပြန်ရေးပေးပါဆိုရင် ကလေးက မဖြစ် မနေ စာကြည့်တိုက်ကို အသုံးပြုရတော့မယ်။ ဒီမှာ သမိုင်းသင်တဲ့ပုံစံက တစ်မျိုးဖြစ်နေတယ်။ Resource လည်းမပါဘူး။ သမိုင်းမှာက Primary Resource နဲ့ Secondary Resource ဆိုပြီးရှိတယ်။ အဲဒီနှစ်ခုကို သုံးသပ်ပြီးတော့မှ ဒီသမိုင်းကဘာကြောင့်ဖြစ်တယ်၊ မှန်တယ်၊ မှား တယ်ဆိုတာကို ကလေးကကိုယ်တိုင်ဆုံးဖြတ်ရမယ်။ သမိုင်းဆိုတာ ဒါပဲ။ ဒီအတိုင်းပဲဆိုပြီး အလွတ်ကျက်လို့မရဘူး။ ဒီတော့ ပညာရေးစနစ် မှာသင်ကြားတဲ့ပုံစံက မှားနေတယ်။

ပညာရေးစနစ်ကိုပြုပြင်ပြောင်းလဲ မယ်ဆိုရင်တော့ ကျောင်းတိုင်းမှာ တင်းပြည့်ကျပ်ပြည့် စာကြည့်တိုက် တစ်ခုက ရှိကိုရှိရမယ်။ အဲဒီစာကြည့်တိုက်မှာလည်း တကယ်နားလည် တတ်ကျွမ်းတဲ့ စာကြည့်တိုက်မှူး ရှိဖို့လိုတယ်။ ဒါမှသာ ကျောင်းသားရယ်၊ ဆရာ-ဆရာမရယ်၊ စာကြည့်တိုက်ရယ် အားလုံး သဟဇာတဖြစ်မယ်။ ကျွန်တော်တို့ကလေးတွေဟာ ပြဋ္ဌာန်းစာအုပ်ကနေ မလွတ်မြောက်နိုင်တဲ့ အတွက် ဒါသင်၊ ဒါမှတ်၊ ဒါကျက်ဖြစ်နေကြတယ်။ ကမ္ဘာမှာဖြစ်နေတဲ့ နောက်ဆုံးပေါ်အခြေအနေတွေကို သူတို့ မသိကြဘူး။ ကျောင်း စာကြည့်တိုက်တွေနဲ့ ပတ်သက်ပြီး အခုလက်ရှိ အနေအထားကိုတော့ အဖြစ်လုပ်ထားတယ်လို့ပဲ မြင်ပါတယ်။
ဟုတ်ပါပြီ။ ဒီနေ့ခေတ်လူငယ်တွေကို စာမဖတ်ဘူးလို့ပြောကြတယ် ဆိုရင် လူငယ်တွေ စာဖတ်ရင်ဘာရမလဲဆိုတာကို ကျွန်တော်ကပြန်မေး ချင်ပါတယ်။ သူတို့အနေနဲ့ စာဖတ်ဖို့ကောလိုသလားပေါ့။ ဥပမာ- အလုပ်ခွင်ဝင်တယ်ဆိုရင် စာကြည့်တိုက်သွားပြီး စာဖတ်ဖို့လိုတယ် ဆိုတဲ့အခြေအနေက နည်းပါးတယ်။ ဆိုလိုတာက သူတို့ဟာ ဆက်ပြီး တော့ လေ့လာသင်ယူနေဖို့ မလိုတဲ့အလုပ်က များနေတယ်။ နေ့စဉ် ဒါပြီး ဒါကိုပဲ လုပ်နေကြတယ်။ ဒီတော့ တီထွင်ဖန်တီးမှုတွေမပါတဲ့ အလုပ်ကိုလုပ်နေကြတော့ စာကြည့်တိုက်သွားပြီး စာဖတ်ဖို့၊ လေ့လာ ဖို့ မလိုတော့ဘူးလေ။ ဒီတော့ တီထွင်ဖန်တီးမှုများတဲ့အလုပ်တွေကို လုပ်ကိုင်ရတာများလာရင်တော့ စာဖတ်ကြမယ်။ အခုဆိုရင် သင်ယူမှု ပုံစံတွေက ပြောင်းလာပြီ။ ဒါကြောင့် စာအုပ်တစ်အုပ်ကိုဖတ်နေမှ မဟုတ်ဘူး။ ဗီဒီယို တစ်မိနစ်စာကနေလည်း သူတို့ သင်ယူချင်ရင် သင်ယူနိုင်မယ်။ ဆိုလိုတာက လူငယ်တွေအနေနဲ့ သူတို့ဘ၀အတွက် စာဖတ်ခြင်းကြောင့် အပြောင်းအလဲဖြစ်နိုင်မယ့်အနေအထားမျိုး ရှိတယ်ဆိုရင်တော့ သူတို့ စာဖတ်ကြပါလိမ့်မယ်။ မဟုတ်ရင်တော့ သူ တုိ့ ဖတ်မှာမဟုတ်ပါဘူး။ကျောင်းသားလက်စွဲဂျာနယ်ကနေတစ်ဆင့် ကျောင်းသား၊ ကျောင်း သူတွေအပြင် ဆရာ၊ ဆရာမတွေအတွက် စကားလက်ဆောင်ပေးချင် ပါတယ်။ ကျောင်းသားတစ်ယောက်အတွက် ပြုစုပျိုးထောင်မှုက အင် မတန်အရေးကြီးပါတယ်။ စာဖတ်တယ်ဆိုတာကလည်း ပြုစုပျိုးထောင် ယူရတဲ့ အလေ့အကျင့်တစ်ခုပါပဲ။ နိုင်ငံတကာမှာဆိုရင်တော့ မူကြို အရွယ်မှာပဲ စာဖတ်ပြတဲ့အချိန်ဆိုတာ သီးသန့်ရှိပါတယ်။ စာဖတ်ပြ တဲ့ နည်းလမ်းတွေလည်းရှိပါတယ်။ ဖတ်ပြပြီးတဲ့စာကို ခံစားရသလို ပြန်ရေးခိုင်းကြတယ်။ လေ့ကျင့်ပေးရတာပါ။ အစိုးရပေါ်လစီအနေနဲ့ မပြောင်းနိုင်သေးရင်တောင်မှ ဆရာ၊ ဆရာမတွေက လေ့ကျင့်ပေးရင် ရနိုင်ပါတယ်။ အဲဒီလိုအနေအထားကိုဖန်တီးကြဖို့လိုပါတယ်။ ဒီလို ဖန်တီးပေးမှသာ နောင်မျိုးဆက်တွေအနေနဲ့ စာကြည့်တိုက်ကို ကောင်းကောင်းအသုံးပြုတတ်လာပြီး ဘ၀အတွက်အကျိုးရှိမယ့် အရာတွေကို ရှာဖွေတွေ့ရှိလာနိုင်မယ်လို့ ကျွန်တော်မြင်ပါတယ်။
ကျေးဇူးတင်ပါတယ်။

ရိုးပြေပြစ်အောင်


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Tags: ,

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:အင်တာဗျူး

စာဖတ်သူတွေရဲ့ ပြောရေးဆိုခွင့်

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

မိုးမခမှာ ကြော်ငြာပါ

Help MoeMaKa

မိုးမခမာတိကာစဉ်

%d bloggers like this:

ကြော်ငြာရန် …

မိုးမခနဲ့ ပတ်သက်သမျှ

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ

By

ဂျူနီယာဝင်းရဲ့ မြန်မာနေ့ရက်များနှင့် ပန်းများ စာအုပ် ထွက်ပြီ (မိုးမခ) မတ် ၂၄၊ ၂၀၁၈...

Read more »

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ)

By

ဇော်အောင်(မုံရွာ) ၏ ပြည်မြန်မာ မီးထိန်ထိန်သာဖို့အရေး မိုးမခဆောင်းပါးများ (ထွက်ပြီ) မိုးမခစာအုပ်စင်၊ ဖေဖော်ဝါရီ ၂၈၊...

Read more »

 ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ

By

ဦးခင်မောင်လတ်(MA) နဲ့ ဒေါ်ခင်မျိူးချစ် – အင်္ဂလိပ်စာတတ်လိုသော် စာအုပ် ထွက်ပြီ (မိုးမခ) ဖေဖော်ဝါရီ ၅၊...

Read more »

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ 

By

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ  မိုးမခစာပေက ထွက်ပါပြီ။...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Recent Comments

ကဏ္ဍများအလိုက်

ကဏ္ဍများအလိုက် မာတိကာစဉ်