လင်းသက်ငြိမ် ● သိုက်တူးခြင်း

January 7, 2019

● သိုက်တူးခြင်း
(မိုးမခ) ဇန်နဝါရီ ၇၊ ၂၀၁၈

တကယ်တော့ ရေးပစ်လိုက်ရမှာ ဒါပေမဲ့ ကျွန်တော်မရေးဖြစ်ခဲ့ဘူး။ ဆောင်းတွင်းထဲကို သိသိသာသာ တွားသွားဝင်ရောက် လာတဲ့ ရာသီဥတုပါပဲ။ သစ်ပင်ပေါ်က သစ်ရွက်တွေကို ဖုန်မှုန့်တွေ တွယ်ကပ်လို့။ အရာရာထိုင်းမှိုင်းသော နေ့ရက်တွေဟာ ကမ္ဘာပေါ် လေးလေးတွဲ့တွဲ့ ရွေ့လျားနေကြတယ်။

စာမရေးဖြစ်ခဲ့တဲ့ရက်တွေကို ရေတွက်ကြည့်နေရင်းတန်းပေါ်မှာ တွဲလောင်းကျနေတဲ့ စွပ်ကျယ်အဖြူကလေးကို တွေ့ရတယ်။ ပါရီရဲ့ဆောင်းတွေကိုလည်း ဖတ်ဖူးတာပဲ၊ ရှမ်းပြည်ရဲ့ဆောင်းတွင်းကိုလည်း အချိန်အတော်ကြာ ဖြတ်သန်းခဲ့ဖူးတာပါပဲ။

ထည့်ရေးပစ်လိုက်ရမှာပေါ့၊  ပူနွေးလတ်ဆတ်တဲ့ ရာသီပေါ် ခံစားချက်တွေကို ခပ်သွက်သွက် ရေးပစ်လိုက်ရမှာ။ ဆောင်းဦး ပေါက် လူတယောက်ရဲ့ အေးစက် မှုန်မှိုင်းနေတဲ့စိတ်ကူးတွေကို ဆေးရောင်ထည့်၊ စာသားဖွဲ့ပြီး တယောက်ယောက်ရဲ့ရင်ထဲရောက်သွားအောင် (တကယ်တော့ လူတသိန်းထက်မနည်း ဖတ်စေချင်တာပေါ့)။ သီတင်းကျွတ်ပိတ်ရက်တုန်းက မန္တလေးကို သွားခဲ့တယ်။ မန္တလေးမှာ မအေးသေးဘူး။ မနက်အစောပိုင်း ကျုံးရေပြင်ပေါ်မှာ ဝဲပျံနေတဲ့ ရေငွေ့လိုလို၊ နှင်းငွေ့ လိုလိုတွေက လွဲလို့ပေါ့။ ဆောင်းဦးထဲကို ခြေလှမ်းရမလိုလို၊ မလှမ်းရမလိုလို ဖြစ်နေတဲ့ မန္တလေးပေါ့။

မန္တလေးကို လာရတဲ့အကြောင်းရင်းကလည်း တခြားမဟုတ်ပါဘူး။ ကဗျာမရ၊ စကားပြေမရတဲ့ နေ့ရက်တွေထဲကနေ ခဏ တဖြုတ်ထွက်ပြေးပြီး ကဗျာရနံ့၊ စာရနံ့ကို သွားရောက်ရှူရှိုက်ခြင်းပါပဲ။ မန္တလေးဆိုတာ အနုပညာကို ရင်ဘတ်ထဲ ထည့် မြှုပ်ထားတဲ့ မြို့ပဲလေ။

တောင်သမန်၊ဦးပိန်တံတား၊ရောင်စုံလူများ၊ စန္ဒာမုနိဘုရား၊ ကင်မရာမန်းများ၊ ရုပ်သေးရုပ်များ၊ ယာဉ်တန်းများ၊ အိပ်ဇော ငွေ့များ၊ မီးပွိုင့်များ၊ ကြော်ငြာပိုစတာများ၊ သီချင်းသံများ၊ ရယ်သံများ၊ ဘီယာဆိုင်များ၊ ငွေစက္ကူများ၊ ကတ္တရာလမ်းမများ…များတွေကိုသာဖြတ်ကျော်လာခဲ့ရတယ် ဘာကိုမှ အာသာမပြေခဲ့ဘူး။ ကိုနေမျိုးနဲ့ ဦးကျော်နဲ့ ကိုနေညိုအောင်နဲ့ ကိုမင်းနဒီခနဲ့ ကြည်လင်းဝတီနဲ့ စောမင်းနှစ်နဲ့ ဦးကြည်သာနဲ့ လင်းသစ်ဝေနဲ့ကိုငြိမ်းထက်နဲ့ ကိုမိုသျှန်းနဲ့ နောဧကနဲ့ အက်ဆေးစာမူတွေနဲ့ ဓာတ်ပုံတွေနဲ့ ရှုခင်းတွေနဲ့ မန္တလေးကို အရှိန်နဲ့ပြေးလွှားဖြတ်ကျော်နေခဲ့ရသလို ခံစားနေမိတယ်။ အလောတကြီး ကမ္ဘာကြီး လား။ အရှိန်နဲ့ အချိန်နဲ့ ကမ္ဘာကြီးလား။ ကျွန်တော့်ခေါင်းထဲ ရှုပ်ထွေးလို့။ ဘူတာကြီး၊မြောက်ပြင်၊ နန်းရှေ့၊ ကုန်းတန်း၊ နာမည်မမှတ်မိတဲ့တည်းခိုခန်း မန္တလေးနေ့ရက်တွေထဲ ကျွန်တော်ကျင်လည်သွားလာနေခဲ့တဲ့နေရာတွေ။ ဖျတ်ခနဲပါပဲ။

ငွေရေစက်ထဲက ပိုက်ဆံတွေလို မြန်ဆန်စွာ ကုန်ဆုံးသွားခဲ့တဲ့ရက်သတ္တပတ်ပါပဲ။ လမ်းတွေကိုကြည့်လိုက်တော့ အကုန်လုံး အရေးတကြီး ပြေးလွှားနေကြတယ်။ မီးသတ်ကားတွေ၊ ဆိုင်ကယ်တွေ၊ ကားတွေ၊ လူတွေ အရေးတကြီးပါပဲ။

နေပြည်တော်ကလာတဲ့ ညီမကလည်း သူ့အိတ်တွေကိုဆွဲပြီး ပြန်ထွက်သွားတယ်။ ကဗျာဆရာတယောက်ကလည်း ဘီယာ ခွက်တွေကို မော့ချပြီး အပြေးအလွှားပြန်ထွက်သွားတယ်။

တမနက်တော့ ကုန်းတန်းကနေ လမ်းလျှောက်လာရင်း နန်းရှေ့ဈေးကို ဖြတ်လာပြီးတော့မှ စိတ်ကဖျတ်ခနဲသတိရ လိုက် မိတယ်။ ဆရာပိုင်စိုးဝေကို ဝင်ကန်တော့ရမယ်၊ လက်ထဲမှာ ပိုက်ဆံက များများစားစား သိပ်မကျန်တော့ဘူး။ မုန့်လေးနဲ့ပဲသွား ကန်တော့လိုက်ရတယ်။ ညနေပိုင်းကျ ကိုခင်ဇော်မြင့်ဆီဝင်တယ်။ ရထားချိန်ကပ်နေမှ ဘူတာကိုအပြေးအလွှား သွားရတယ်။ ဘူတာရုံကိုရောက် ရထားက ထွက်ဖို့ပြင်နေပြီ။ တွဲစောင့်ကပြေးလာနေတဲ့ ကျွန်တော့်ကို မြန်မြန်လာလို့ လှမ်းအော်ခေါ် နေတယ်။ ဟုတ်ကဲ့ ကျွန်တော် မြန်မြန်လာမှာပါ မြန်မြန်ပြန်ထွက်သွားရမှာပါ။ နှစ်သုံးဆယ်ကျော်ကျော်ကို သုံးစွဲပြီးသား လူတယောက်အတွက် အရာရာ အလျင် လိုနေသလိုပါပဲလား။

ရထားပေါ် ခုန်တက်ပြီး ကိုယ့်နေရာကိုယ် ရှာနေတုန်းမှာပဲ ရထားကဥသြသံရှည်ဆွဲပြီး စတင်ခုတ်မောင်းထွက်ခွာတယ်။

တဖြည်းဖြည်းမြန်လာ။ ပို၍ ပို၍ မြန်လာ။ မြို့ကြီးဟာ လက်မပြ ဘာမပြ ကျန်နေရစ်ခဲ့ပေါ့။ ဘာပါလာခဲ့သလဲ ဆိုတော့ ဘာမှမပါလာဘူးပေါ့။ ဘာရလာသလဲ ဆိုရင်တော့ အကုန်လုံး ရလာခဲ့တယ်ပေါ့။ ပြတင်းပေါက်ကနေ လေတွေ ပြေးဝင် လာနေကြတယ်။ ရထားတွဲထဲမှာ လူသံတွေဆူညံနေတယ်။ ဟုတ်တယ်အရာရာ ဆူညံ မြန်ဆန်နေကြတယ်။

ကျွန်တော်တယောက်ပဲ ကျောက်တုံးတတုံးလို၊ သစ်သားရုပ်တစ်ခုလို ငြိမ်သက်လို့၊ တိတ်ဆိတ်လို့။ အိတ်ထဲက ဘောလ်ဇက် ရဲ့တိုးတိုးပုံပြင်ကိုထုတ်လိုက်တော့ ကျွန်တော်ရထားတွဲပေါ်မှာ မရှိတော့ဘူး။ ဘော်ဒိုးမြို့ကိုရောက်သွားတယ်။ ရဟန်းပျို လေးနဲ့ ပြည့်တန်ဆာမတို့ တယောက်ကိုတယောက် ရွှန်းလဲ့စွာငေး စိုက်ကြည့်နေကြတယ်။

ညဆယ်နာရီဆိုတဲ့အချိန်မှာ မြို့ကလေးဟာ တိတ်ဆိတ်အေးစက်နေပြီ။ ကိုယ့်အိပ်ရာလေးကိုယ် လှည်းကျင်းရှင်းလင်းပြီး လှဲချလိုက်တယ်။ အိပ်စက်လိုက်ဖို့ တွေးမိပေမယ့်အိပ်မရဘူး။ ဘယ်ကိုပဲထွက်ပြေး ထွက်ပြေး ကိုယ့် နေရာလေးထဲ ကိုယ်ပြန်ရောက်ရတာပဲ။ အကျဉ်းသားတယောက်လို။ ချည်တိုင်က နွားလို။ သံသရာဟာ ဒီအဓိပ္ပာယ်ပဲလား။ ကျွန်တော်မသိ တဲ့နေရာတခုကနေ ကျွန်တော်ရောက်ရှိလာခဲ့ပြီး။ ကျွန်တော်မသိတဲ့နေရာတခုဆီ ကျွန်တော် ထွက်ခွာသွားရပေလိမ့်ဦးမယ်။ ရေးလက်စအတိုအထွာတွေပြန်ကြည့်ပြီး ဆက်ရေးလို့ရမလား တွေးကြည့်တော့ ခေါင်းထဲမှာဗလာ။

အတွေးသစ်၊ အရေးသစ်ပါမှ ကဗျာဆိုတော့လည်း ကျွန်တော့်မှာ ကဗျာမရှိဘူး။ ဖြစ်ပျက်နေတဲ့ နိုင်ငံရေးအခင်းအကျင်းအပေါ်ရှုမြင်သုံးသပ်ထားတဲ့ အရေးအသားမျိုးကိုလည်း မတွေးခေါ်တတ်ဘူး။ အဲ့ဒီလိုအတွေးအခေါ်တွေ ခြောက်ခမ်းနေလို့ပဲကောင်းမြင့်မြတ်တဲ့ စကားပြေတပုဒ်မှ ကျွန်တော့်မှာမရှိတာလား။ ပါရမီနည်းပါးခြင်းရဲ့ အသီးအပွင့်တွေ ဝေဆာလာတဲ့ သဘောလား။ ကြိုးစားမှု၊ ဝီရိယပျက်ပြားနေတဲ့ အိမ်အမိုးအောက်မှာ အလိုမကျ ခြင်းတွေနဲ့စိုရွှဲနေတာလား။ ဒါပေမဲ့ စိတ်ကူးနဲ့ပါရီရောက်နေတာကိုက ပါရီနဲ့မလွဲခဲ့ဘူးမဟုတ်လား။ ကျွန်တော်ဟာ မတူးဖော်ရသေးတဲ့ ရတနာသိုက်ကြီးလည်း ဖြစ်နိုင်တာပဲ။

ကျွန်တော် တစ်ကြောင်းမှ မရေးဖြစ်သေးတဲ့စာသားတွေက  ဂါဆီယာမားကွတ်ရဲ့အထီးကျန်နှစ်တစ်ရာလိုဖြစ်မလာနိုင်ဘူးလို့ ဘယ်သူအာမခံနိုင်သလဲ။ ဂျက်လန်ဒန်ရဲ့ပင်လယ်ဝံပုလွေလို၊ ဟဲမင်းဝေးရဲ့ပင်လယ်ပြာနဲ့ တံငါအိုလို၊ အလန်ဂင်း စဘာ့သ်ရဲ့ အူသံလို၊ အာရင်ဘတ်ရဲ့လူများ၊ သက္ကရာဇ်များလို။ သိမ်းစွန်ငှက်ရဲ့ အပြန်လမ်းလို ၊ဗုဒ္ဓဟူးနေ့မှ မိုင်ငါးရာလို၊ လူဖြစ်ရတာကောင်းတယ်လို  အဲဒီလိုမျိုးတွေပေါ့။

ကိုယ်ရှေ့ကဖြစ်ပြီးသား အရာတွေက ကိုယ့်ကိုတဖန်ပြန်လည်ဖြစ်စေမယ့် တန်ခိုးသတ္တိရှိသလား။ ဒီရက်ပိုင်းတွေထဲ စာတစ် ပုဒ်မပြောနဲ့ စာတစ်ကြောင်းကလေးတောင် ချရေးမရတာကတော့ အမှန်ပါပဲ။ ကျွန်တော် ရေး ချင်နေမိတာပေါ့။

ကောင်းချင်ကောင်း မကောင်းချင်နေ တခုခုကို ကျွန်တော်ရေးချပစ်လိုက်ရမှာ။ ဒါပေမဲ့ ကျွန်တော်မရေးဖြစ်ခဲ့ဘူး။

မင်းကဗျာ ကောင်းလိုက်တာဆိုတာမျိုး၊ မင့်အက်ဆေးလေးတွေကို ခိုက်တယ်ကွာ ဆိုတာမျိုးတွေ အဲ့ဒီအသံတွေကို ငံ့လင့်ပြီး ရေးသားဖို့တွေးနေမိလို့လား၊ ဒါမှမဟုတ် အရေးအသားသစ်တခုခုကို ကြံဆနေလို့လား အဲ့ဒီလိုမျိုး အတွေးလည်း ကျွန်တော့် မှာမရှိတာ သေချာတယ်။

တစ်ကြိမ်ထက်မက ချော်လွဲမှုများနဲ့ အသက်ရှင်ခြင်း နေ့တာများစွာကို ကျွန်တော်ဖြတ်သန်းခဲ့ဖူးတယ်။ ရယ်မောဖူး၊ တယ်၊ နာကျင်ဖူးတယ်၊ ငိုကြွေးဖူးတယ်။ ဒါတွေကိုရေးပစ်လိုက်ရမှာပေါ့။ မျက်စိရှေ့မှာတင်ဖြစ်ပျက်သွားတဲ့ ရုပ်ရှင်တွေ။

ရုပ်ရှင်ထဲက သရုပ်ဆောင်တွေထက် ပိုမိုသရုပ်ဆောင်ကောင်းလွန်းကြတဲ့ အပြင်လောကက လူတွေ။ မျက်လှည့်ပြပွဲတွေ။ စီးချင်းထိုးပွဲတွေ။ ဂျစ်ပစီများညများ၊ ကောင်းဘွိုင်နေ့ရက်များ။ ကျွန်ကုန်သယ်များ။ ရက်အင်ဒီးယန်းများ။ ခြောက်သွေ့လွင်ပြင် ကျယ်များ။ သောင်ထွန်းနေတဲ့မြစ်များ။ ရင်ဘတ်ဟောင်းလောင်းပေါက်ကြီးတွေနဲ့ တောင်များ။ မြင်ကွင်းတွေ မြင်ကွင်းတွေ နိစ္စဓူဝ မြင်ကွင်းတွေ။ ဒါတွေကိုလည်း ရေးရမှာပေါ့။ ပါးစပ်ပေါက်တွေထဲ ရွှေပြည်ကြီးအကြောင်းတွေထားပါ။ နံစော်နေတဲ့နေရာထိုင်ခင်းတွေအကြောင်း ထားပါ။ တူဖြစ်တုန်းထုလိုက်မယ်ဆိုတဲ့ စကားပုံကိုလည်း ထားလိုက်ပါတော့။ အမှန်တရားကို မပြောရဲတဲ့ ခေတ်ကနေ အမှားအယွင်းကို ထောက် မပြရဲတဲ့ခေတ်ကိုလည်း ပစ်ထားလိုက်ပါတော့။ သမိုင်းဝင်တွေ့ဆုံပွဲတွေရာဇဝင်တွင်မယ့် စားပွဲသောက်ပွဲတွေ ထားစမ်းပါကွာ။

ဘယ်လိုစာအုပ်တွေ ဘယ်လိုပေါက်နေတယ်ဆိုတာထက် ဘယ်လိုလူတွေဖတ်တဲ့ ဘာစာအုပ်လည်းဆိုတာကိုပဲပြောရတော့မယ်။ တကယ်က အစ်ဇင်ပေါင်းစုံရောမွှေထားတဲ့အကောင်းစား ခေတ်ရှေ့ပြေး စာအုပ်တအုပ် ဒါမှမဟုတ် စာတစ်ပုဒ် ရေးချင်ခဲ့တာပဲ။ ပိုးတုံးလုံးကောင်ကြီးဟာ ကာ့ဖ်ကာရဲ့အတွေးထဲ ဘယ်လိုဝင်သွားခဲ့သလဲ။ ဆရာနေမျိုးဟာ ကားဂိုထောင်ကြီး ထဲ နှင်းတွေကျလာအောင် ဘယ်လိုရေးခဲ့တာလဲ။ ပြေးတဲ့အကြောင်းကို မူရာကာမိက တစ်အုပ်ရအောင်ရေးနိုင်ခဲ့တယ်။ ဟိုတလောကဖတ်ရတဲ့ ကိုသားဦးရဲ့ “တောင်းသူရယ်” ကဗျာကို ကြိုက်မိတယ်။ တကယ်တော့ သူတို့လို ရေးချင်နေမိတာ ကနေ ဘာမှမရေးဖြစ်တော့တဲ့ဆီကို ဆိုက်ရောက် သွားခဲ့ရတာလား။ ပေါင်မုန့်ထုတ်သလို ထုတ်လုပ်ဖို့ အထိလျှောကျပျက်စီး သွားရတဲ့ ကျွန်တော့်အနုပညာဗီဇ နုံနဲ့မှုလား။ အကောင်းစားစိတ်ကူးတွေဟာ အပြင်ကိုခေါ်ဖို့မလွယ်ကူဘူး။ အတွေးတိမ် တိုက်တွေက မရွာဘူး။ ရွေ့နေတယ် တရက်ပြီး တရက်။ စိတ်ကူးထဲမှာတော့ အကောင်းစားတခုခုကိုရေးဖို့တွေးခေါ်နေမိတာပဲ။ သစ်ရွက်တွေကြွေသလို နေ့ရက်တွေတဖြုတ်ဖြုတ်ကြွေသွားတယ် ကျွန်တော် ဘာမှမရေးဖြစ်ဘူး။

အကြီးကြီးတွေးရင် အကြီးကြီးလုပ်ဖို့လိုတယ်။ အကြီးကြီးဆီကိုသေးသေးလေးကနေစသွားရတယ်။ စစ်ရှုံးသူကို ပင့်ကူက ဆုံးမတယ်။ ဘယ်မှမသွားရင် ဘယ်မှမရောက်ဘူး။ တနေရာရာကိုသွားရင် တနေရာရာ ရောက်မလား။ ကျွန်တော် ရေးချပစ်လိုက် တယ်။ သေးသေးလေးလား အကြီးကြီးလား။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Related posts

Tags: , ,

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:စာစုတို

စာဖတ်သူတွေရဲ့ ပြောရေးဆိုခွင့်

This site uses Akismet to reduce spam. Learn how your comment data is processed.

ကြော်ငြာ … ကြော်ငြာ …

စာအုပ်မြင် ချစ်ခင်ပါစေ

ဒေါက်တာခင်မောင်ဝင်း (သင်္ချာ) – သင်္ချာအတွေးအခေါ်သမိုင်း ၊ ဂိမ်းသီအိုရီနှင့် အတွေးအမြင်ဆောင်းပါးများ

မိုးမခမှာ ကြော်ငြာပါ

Help MoeMaKa

မိုးမခ Kindel Store

မိုးမခ Kindel Store

MoeMaKa Online Store

MoeMaKa Online Store

Colorful People Memorial Place

%d bloggers like this:

မိုးမခနဲ့ ပတ်သက်သမျှ

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ်

By

အေးဝင်း(လမင်းတရာ) ၆၆ မွေးနေ့ အတွက် ကလောင်စုံရေးတဲ့ စာအုပ် (မိုးမခစာအုပ်စင်) ဒီဇင်ဘာ ၂၆၊ ၂၀၁၈...

Read more »

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ

By

ဇင်လင်း၏ စိန်ခေါ်မှုများနှင့် စစ်ခင်းသူ နဲ့ အခြားဆောင်းပါးများ ထွက်ပါပြီ မိုးမခစာအုပ်စင်၊ ဒီဇင်ဘာ ၈၊...

Read more »

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ

By

မောင်မောင်စိုး၏ နှင်းဆီနီနီအိပ်မက်များ(၁၉၇၅-၈၀) ထွက်ပါပြီ (မိုးမခ) နိုဝင်ဘာ ၁၄၊ ၂၀၁၈ မိုးမခစာပေက ထုတ်ဝေပြီး...

Read more »

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ

By

ဂျူနီယာဝင်းရဲ့ မိုနာလီဇာနဲ့ နိုင်ငံတကာပန်းချီများ ခံစားမှုဆောင်းပါး ထွက်ပြီ (မိုးမခစာအုပ်စင်) အောက်တိုဘာ ၁၈၊ ၂၀၁၈...

Read more »

သင်ကြိုက်နှစ်သက်ရာ စာကို အနည်းဆုံး ၁ ဒေါ်လာ လှူပြီး မိုးမခကို ကူညီပါ

Donate while shopping on amazon

Recent Comments

Tags

(all tags)