မန္တလေးမှ လူသတ်မှု သတင်းဖြင့် သံဃာထု သိက္ခာကို ချဖို့ကြံစည်

မိုးမခ အထောက်တော်၊ ရန်ကုန်

ဇူလိုင် ၁၅၊ ၂၀၀၉

          ဇူလိုင်လ ၁၃ရက်နေ့စွဲ ဖြင့်ထုတ်ဝေသည့် ၀ိကလီး အလဲဗင်းဂျာနယ်တွင် မန္တလေး ဒေးဝန်း အနောက်ရက်ကွက် ၊ အကောက်ဝန်မင်းကြီး ကျောင်းတိုက် အရှေ့ဆောင်တွင် သီတင်းသုံးနေသည့် သံဃာနှစ်ပါးကို မာတုဂါမကိစ္စဖြင့် အငြိုးထားပြီး အရပ်သား တဦးက ညအချိန်တွင် လာရောက် သေကြောင်းကြံရာမှ အရပ်သားနှစ်ဦးနှင့် သံဃာတပါး အသက်ဆုံးရှုံးခဲ့ရသည်ဟု ဖေါ်ပြထားခဲ့သည်။

သာမန်အားဖြင့် ထိုသို့သော သတင်းမျိုးကို ဖေါ်ပြခွင့် ပိတ်ပင်ထားလေ့ ရှိသော်လည်း ယခုအဖြစ်အပျက်ကို စာပေစိစစ်ရေး နှင့်နီးစပ်သည်ဟု သတင်းကြီးသော ၀ိကလီး အလဲဗင်း ဂျာနယ်တွင် ဖေါ်ပြစေခြင်း သည် သဘောရိုးမဟုတ်နိုင်ဟု မီဒီယာ အသိုင်းအ၀ိုင်းမှ ပြောဆိုလျက်ရှိသည်။ ၂၀၀၇ စက်တင်ဘာ သံဃာ့အရေးအခင်းနောက်ပိုင်း သံဃာထုကို ပစ်မှတ်ထားလာသည့် နအဖ အစိုးရ၏ ၀ါဒဖြန့်ချိမှု တခု အနေဖြင့် ယခု သတင်းဖေါ်ပြခြင်းဖြစ်သည် ဟုလည်း ရန်ကုန်မီဒီယာ အသိုင်းအ၀ိုင်းမှ နားလည် သဘောပေါက်လျက်ရှိသည်။

          နအဖ အစိုးရသည် ၂၀၀၇ ခုနှစ် သံဃာ့အရေး အခင်းတွင်ပါဝင်သော ရဟန်းသံဃာများကို အသရေ ပျက်စေရန်ရည်ရွယ်ပြီး ငွေကြာယံကျောင်းတိုက် တွင် ဝေယျာဝစ္စလုပ်ကိုင်ပေးသည့် ဒကာမ၊ နယ်မှ ဆေးကုရန် လာရောက်တည်းခိုနေသည့် ဒကာမ အမျိုးသမီးများ၏ အ၀တ်အစားများကို ရှာဖွေသိမ်းဆည်းပြီး မရိုးသားသည့် သဘောဖြင့် သက်သေခံ တင်ပြခြင်း၊ အတင်းအဓမ္မ ခြိမ်းခြောက်ထွက်ဆို စေခြင်းများ ပြုလုပ်ခဲ့သည်။ ငွေကြာယံကျောင်းတိုက်ကို စက်တင်ဘာ ၂၇ရက်နေ့ အာရုံတက်ချိန်တွင် စစ်တပ်ဖြင့် အကြမ်းဘက် ၀င်စီးခဲ့ပြီးနောက် သေဆုံး၊ ဒဏ်ရာရခဲ့သည့် သံဃာအများ အပြားရှိခဲ့ပြီး ငွေကြာယံ ကျောင်း ၀င်စီးပြီးနောက် မြင်ကွင်း ဓါတ်ပုံဗီဒီယိုများမှာ နိုင်ငံတကာ မီဒီယာများအထိ ပြန့်နှံ့ခဲ့သည်။